San Marcos 7:19 - Alacatlatzala Mixtec New Testament

¹⁹ Ña xíxi ni̱vi o̱n vása xáa̱ ña níma̱ na, kuiti xáa̱ ña ti̱xin na, ta saá yáꞌa ña xíta̱ ña ―káchí ra. Xíꞌin to̱ꞌon yóꞌo ta̱Jesús káchí ra ndiꞌi ña xíxi ni̱vi ñandii kúu ña.

San Marcos 7:19 ပူးပေါင်းရင်းမြစ်များ

San Mateo 15:17

Ndiꞌi ña xíxi ni̱vi kíꞌvi ña yuꞌu̱ na ta xáa̱ ña ti̱xin na, ta saá yáꞌa ña xíta̱ ña.

San Marcos 7:18

Ta ni̱ka̱ꞌa̱n ra xíꞌin na: ―¿Án ñii ki̱ꞌva nda̱tán yóo inka̱ ni̱vi, saá yóo ndóꞌó? ¿Án ta̱ꞌán kunda̱a̱ ini ndó? Ndiꞌi ña xíxi ni̱vi ta kíꞌvi ña yuꞌu̱ na, ta o̱n vása ndása ña ña nduu na ni̱vi ya̱kua̱ no̱o̱ Ndios.

San Lucas 11:41

Tá ndinoꞌo ini ndó taxi ndó ñava̱ꞌa ndó ña chindeé ndó nandáꞌví, ta saá ndundii ini ndó.

Hechos 10:15

Ta nda̱kuii̱n to̱ꞌon, ni̱ka̱ꞌa̱n tuku ña xíꞌin ra saá: ―Ta vitin Ndios xa nda̱sa ndii ra ndiꞌi kiti̱. Ta saá, o̱n váꞌa ka̱ ka̱ꞌa̱n ún ndí yóo kiti̱ kini no̱o̱ Ndios ―káchí to̱ꞌon xíꞌin ta̱Pedro.

Hechos 11:9

Ta ni̱ka̱ꞌa̱n tuku to̱ꞌon ña ki̱xi ñoyívi ni̱no xíꞌin i̱, ka̱chí ña saá: “O̱n váꞌa ka̱ ka̱ꞌa̱n ún ndí kiti̱ kini kúu rí, chi Ndios xa nda̱sa ndii ra ndiꞌi kiti̱”, ka̱chí to̱ꞌon xíꞌin i̱.

1 Corintios 6:13

Ta saá ni, sava ndóꞌó ndakuii̱n ndó, kachí ndó saá: “Ndios ki̱sa va̱ꞌa ra ñaxíxi xa̱ꞌa̱ ña kuxu yó ña nda̱ xáa ini yó, ta ti̱xin yó ku̱va̱ꞌa ña xa̱ꞌa̱ ña koꞌon ña xíxi yó”, saá ndakuii̱n ndó. Vará ñandixa ndáto̱ꞌon to̱ꞌon yóꞌo, ta ndóꞌó xíni̱ ñóꞌó kunda̱a̱ ini ndó ndí o̱n kundeé ña xíxi yó ni o̱n kundeé ti̱xin yó koo ña ndiꞌi saá ki̱vi̱, chi yóo ki̱vi̱ ña chi̱tóni̱ Ndios sandiꞌi ra xa̱ꞌa̱ ndio̱vi̱ ñayóꞌo. Ta vitin xíni̱ ñóꞌó kunda̱a̱ ini ndó ndí o̱n si̱ví xa̱ꞌa̱ ña ki̱ꞌvi yó kua̱chi xíꞌin inka̱ náñaꞌa̱ án xíꞌin inka̱ nata̱a kúu ña ki̱sa va̱ꞌa Ndios yi̱kí ko̱ñu yó. Nda̱ víka̱, Ndios ki̱sa va̱ꞌa ra yi̱kí ko̱ñu yó xa̱ꞌa̱ ña kasa chiño yó no̱o̱ Jesucristo. Ta Jesucristo kúu ta̱a ta̱káꞌno no̱o̱ yi̱kí ko̱ñu yó ta ndíni ra xíni ra ña.

Colosenses 2:16

Ta xa̱ꞌa̱ ñayóꞌo, o̱n váꞌa chikaa̱ so̱ꞌo ndó nda̱ ñii ni̱vi na káꞌa̱n kuáchí xíꞌin ndó xa̱ꞌa̱ ña o̱n vása kísa ndivi ndó nda̱yí mi̱i na. Chi xáꞌnda chiño na ndí o̱n váꞌa kuxu ndó sava kiti̱, ta o̱n váꞌa koꞌo ndó sava nduta̱. Ta xáꞌnda chiño na ndí xíni̱ ñóꞌó sakana ndó viko̱ ñii ñii ki̱vi̱ káꞌno ñayi̱i̱, ta xíni̱ ñóꞌó sakana ndó viko̱ ñii ñii yo̱o̱ xa̱á, ta xíni̱ ñóꞌó kasa ndivi ndó ndiꞌi nda̱yí ña káꞌa̱n xa̱ꞌa̱ ki̱vi̱ yi̱i̱ ña nákindée najudío.