Hechos 2:27 - Alacatlatzala Mixtec New Testament

²⁷ Ña o̱n vása taxi ún koo níma̱ i̱ ndiꞌi saá ki̱vi̱ no̱o̱ ndóo ni̱vi na ni̱xiꞌi̱, ni o̱n taxi ún ña ta̱ꞌyi̱ yi̱kí ko̱ñu i̱ ti̱xin ñáñá. Chi ta̱a ta̱ na̱ka̱xin ún kasa chiño no̱o̱ ún kúu i̱, ta ta̱a ta̱yi̱i̱ kúu i̱.

Hechos 2:27 ပူးပေါင်းရင်းမြစ်များ

San Mateo 11:23

Ta ndóꞌó, nañoo Capernaum, ¿án xáni si̱ni̱ ndó kanóo va̱ꞌa ní to̱ꞌon ndó nda̱ ñoyívi ni̱no? ¡O̱n vása! Ta ndáꞌví ní ndó, chi Ndios tiꞌví ra ndóꞌó ko̱ꞌo̱n ndó ni̱no̱, nda̱ nda̱ya. Saá chi kui̱ya̱ xi̱na̱ꞌá tá ní xini ví nañoo Sodoma milagro ña kéꞌé i̱ xíꞌin ndó vitin, ta nañoo Sodoma o̱n ndiꞌi xa̱ꞌa̱ na, níkúu.

San Marcos 1:24

―Yóꞌó kúu Jesús ta̱ñoo Nazaret, ta, ¿nda̱chun sándiꞌi ún ndi̱ꞌi̱? ¿Án xa ki̱xaa̱ ún sandiꞌi ún xa̱ꞌa̱ ndi̱? Xíni̱ va̱ꞌa i̱ yu kúu ún, yóꞌó kúu Ta̱a ta̱Yi̱i̱ ta̱ ki̱xi no̱o̱ Ndios ―káchí ña xíꞌin ra.

San Lucas 1:35

Ta nda̱kuii̱n ñaángel: ―Ta Níma̱ Ndios kixaa̱ ña xíꞌin ún, ta ndee̱ Ndios ta̱Káꞌno kixaa̱ ña nda̱tán ñii ku̱nda̱ti̱ koo ña, ta nakundixin níí ndiꞌi ún ña. Ña̱kán sa̱ꞌya ún kuu ra ñii ta̱a yi̱i̱, ta kunaní ra Sa̱ꞌya Ndios.

San Lucas 16:23

Ta ta̱kuíká yóꞌo xóꞌvi̱ ní ra no̱o̱ yóo ra xíꞌin inka̱ na ni̱xiꞌi̱, ta na̱koto ndaa ra, ta xi̱ni ra nda̱ xíká yóo ta̱Abraham, ta sii̱n ra yóo ta̱Lázaro.

San Lucas 24:44

Ta ni̱ka̱ꞌa̱n ta̱Jesús xíꞌin na: ―Ta ki̱vi̱ ni̱xika i̱ xíꞌin ndó, ta nda̱to̱ꞌon i̱ xíꞌin ndó ndí xíni̱ ñóꞌó xo̱ꞌvi̱ ní i̱, chi saá kasa ndivi i̱ ndiꞌi to̱ꞌon Ndios ña káꞌa̱n xa̱ꞌa̱ i̱, ña kúu nda̱yí ña ni̱taa ta̱Moisés xíꞌin tutu ña ni̱taa inka̱ naprofeta, xíꞌin tutu na̱ní ña Salmos. Ta ñii ki̱ꞌva nda̱tán káchí to̱ꞌon Ndios yóꞌo xa̱ꞌa̱ i̱, saá ki̱sa ndivi i̱ ―káchí ta̱Jesús xíꞌin na.

San Lucas 4:34

―Yóꞌó kúu ta̱Jesús ta̱ñoo Nazaret, ta, ¿nda̱chun sándiꞌi ún ndi̱ꞌi̱? ¿Án xa ki̱xaa̱ ún sandiꞌi ún xa̱ꞌa̱ ndi̱ vitin? Xíni̱ va̱ꞌa i̱ yu kúu ún, yóꞌó kúu Ta̱a ta̱Yi̱i̱ ta̱ ki̱xi no̱o̱ Ndios ―káchí ña xíꞌin ta̱Jesús.

San Juan 11:39

Ta ni̱ka̱ꞌa̱n ta̱Jesús xíꞌin ni̱vi na yíta yóꞌo, káchí ra saá: ―Tiin ndó yu̱u̱ ña ndási̱ yuꞌu̱ kavua̱ yóꞌo, ta sakutaꞌa ndó ña ―káchí ra xíꞌin na. Ta ni̱ka̱ꞌa̱n ñáMarta xíꞌin ra, káchí ñá saá: ―O̱n váꞌa vitin, Tata, chi xa ni̱xi̱no̱ ko̱mi̱ ki̱vi̱ ni̱xiꞌi̱ ra, ta saá xa xáꞌan táꞌyí ní ra vitin ―káchí ñá.

Hechos 2:26

Ta saá kúsii̱ ní ini i̱ ta káꞌa̱n i̱ to̱ꞌon si̱i̱ ní. Vará ñii ki̱vi̱ kivi̱ i̱ nda̱tán ndiꞌi ni̱vi kivi̱ na, yóo va̱ꞌa ini i̱, ta o̱n vása kúchuchú ini i̱. Saá chi ndáa ini i̱ yóꞌó, Tata Ndios.

Hechos 2:28

Yóꞌó Tata Ndios, xa sa̱náꞌa ún yi̱ꞌi̱ yichi̱ va̱ꞌa no̱o̱ kúsii̱ ini ún kutaku̱ i̱. Ta sakutú ún ini i̱ xíꞌin ñasi̱i̱ mi̱i ún, chi ndiꞌi saá ki̱vi̱ yóo ún xíꞌin i̱, saá káchí to̱ꞌon ña ni̱taa ta̱David kui̱ya̱ xi̱na̱ꞌá ―káchí ta̱Pedro xíꞌin ni̱vi na na̱kutáꞌan yóꞌo.

Hechos 2:31

Ta Ndios sa̱náꞌa ra saá no̱o̱ ta̱David ña ku̱nda̱a̱ ini ra ndasaá kundoꞌo Cristo, ta̱a ta̱ tiꞌví Ndios saka̱ku ra ni̱vi ñii ki̱vi̱ va̱xi. Saá ni̱taa ta̱David to̱ꞌon ña káchí saá: Ndios o̱n vása taxi ra ña ndiꞌi saá ki̱vi̱ koo níma̱ ra no̱o̱ ndóo ni̱vi na ni̱xiꞌi̱, ni o̱n taxi ra ña ta̱ꞌyi̱ yi̱kí ko̱ñu ra ti̱xin ñáñá yóꞌo, ka̱chí ta̱rey David.

Hechos 3:14

O̱n vása ní‑xiin ndó nakiꞌin va̱ꞌa ndó ta̱Jesús, ta̱a ta̱ kúu ta̱Nda̱a̱, ta̱ kúu ta̱Yi̱i̱, ta nda̱ víka̱ ndu̱kú ndó no̱o̱ ta̱Pilato ña saña ra inka̱ ta̱a, ta̱ kúu ta̱ xáꞌni ni̱vi.

Hechos 4:27

’Ta xa ku̱ndivi ña ni̱ka̱ꞌa̱n ta̱David, chi ñoo Jerusalén yóꞌo na̱kutáꞌan ta̱rey Herodes xíꞌin ta̱gobernador Pilato xíꞌin inka̱ ni̱vi na ñoo xíyo, ta xíꞌin sava nañoo yó naIsrael, ta ndiꞌi nayóꞌo na̱koo yuꞌú na ña kaꞌni na Sa̱ꞌya ún ta̱yi̱i̱ ta̱Jesús, ta̱a ta̱ na̱ka̱xin ún ta sa̱kuiso chiño ún ra ña saka̱ku ra ni̱vi.

1 Corintios 15:52

Ta ñii kama xa̱ndi̱ko̱n nasama ña saá. Saá chi ki̱vi̱ sondíꞌí ñoyívi yóꞌo tá mi̱i koni̱ so̱ꞌo ni̱vi ña ndáꞌyi tón trompeta, ta ñii kama kuiti, nda̱tán yóo ña ñii nákuáni yó ta nákoto yó, saá kama nataku̱ ni̱vi na ka̱ndixa Jesucristo na ni̱xiꞌi̱, ta nakiꞌin na yi̱kí ko̱ñu xa̱á, ña nda̱ ñii ki̱vi̱ o̱n ndiꞌi xa̱ꞌa̱. Ta saá ni̱vi na kándixa Jesucristo na táku̱ ka̱ ñoyívi yóꞌo ki̱vi̱ saá, ñii kama nasama na, chi nduu na ni̱vi na nakiꞌin yi̱kí ko̱ñu xa̱á ña nda̱ ñii ki̱vi̱ o̱n ndiꞌi xa̱ꞌa̱.

1 Corintios 15:55

Ta saá, ¿mí kúchiño ka̱ ndee̱ ña xáꞌni ni̱vi satakuéꞌe̱ ña na? Ta, ¿mí kúchiño ka̱ ndee̱ ña xáꞌni?, chi o̱n ko̱ó ka̱ ndee̱ kukomí ña no̱o̱ ni̱vi”, saá káchí to̱ꞌon Ndios.

1 Juan 2:20

Ta ndóꞌó, o̱n si̱ví nda̱tán yóo ni̱vi yóꞌo yóo ndó. Saá chi Jesucristo, Ta̱a ta̱Yi̱i̱, ti̱ꞌví ra Níma̱ Ndios ña kutaku̱ ña ini ndó. Ta xa̱ꞌa̱ ña táku̱ Níma̱ Ndios ini ndó, xa xíni̱ ndó ndiꞌi ñanda̱a̱.

Apocalipsis 1:18

Yi̱ꞌi̱ kúu ta̱a ta̱ ndixa táku̱. Ni̱xiꞌi̱ i̱, ta na̱taku̱ i̱, ta vitin táku̱ i̱, ta ndiꞌi saá ki̱vi̱ ña va̱xi táku̱ ka̱ i̱. Kómí i̱ nda̱yí no̱o̱ ndee̱ ña xáꞌni ni̱vi, ta kómí i̱ nda̱yí no̱o̱ ña na̱ní Hades no̱o̱ xáꞌnda chiño ndee̱ yóꞌo ―káchí ra xíꞌin i̱.

Apocalipsis 20:13

Ta saá xi̱ni i̱ takuií mi̱ni na̱taxi rá ndiꞌi ni̱vi na ni̱xiꞌi̱ ini takuií yóꞌo, ta ke̱e nayóꞌo kua̱ꞌa̱n na no̱o̱ yóo Ndios. Saá tuku xi̱ni i̱ ndiꞌi ni̱vi na ni̱xiꞌi̱, na kúu na ndóo ñii xiiña no̱o̱ na̱ní Hades, ta ke̱e ndiꞌi nayóꞌo, ta kua̱ꞌa̱n na no̱o̱ yóo Ndios ña kasa nani ra xa̱ꞌa̱ kua̱chi na. Ta Ndios ki̱sa nani ra xa̱ꞌa̱ kua̱chi ñii ñii nayóꞌo, nda̱tán yóo ña ke̱ꞌé na.

Apocalipsis 3:7

Tuku ni̱ka̱ꞌa̱n ra xíꞌin i̱, káchí ra saá: ―Taa ún no̱o̱ tutu to̱ꞌon yóꞌo ko̱ꞌo̱n ña ndaꞌa̱ ñaángel ña ndáa ni̱vi na kándixa yi̱ꞌi̱ ta nákutáꞌan na ñoo Filadelfia ña kísa káꞌno na Ndios: “Yi̱ꞌi̱, ta̱a ta̱ káꞌa̱n xíꞌin ndó, kúu Ta̱a ta̱Yi̱i̱ ta̱Nda̱a̱ ndixa. Yi̱ꞌi̱ kómí i̱ llave ña xi̱komí ta̱rey David ña nakoná yéꞌé ña ki̱ꞌvi ni̱vi ñoo Jerusalén. Ta yéꞌé ña nakoná i̱, nda̱ ñii ni̱vi o̱n kuchiño na nakasi na yéꞌé yóꞌo. Ta yéꞌé ña nakasi i̱, nda̱ ñii ni̱vi o̱n kuchiño na nakoná na yéꞌé yóꞌo.