Colosenses 3:2 - Alacatlatzala Mixtec New Testament

² Ta va̱ꞌa kani si̱ni̱ ndó xa̱ꞌa̱ ña ndáya̱ꞌví ní ñoyívi ni̱no no̱o̱ yóo Ndios, ta o̱n váꞌa kani si̱ni̱ ndó xa̱ꞌa̱ ña ndáya̱ꞌví ní no̱o̱ ni̱vi na ndíko̱n yichi̱ ñoyívi yóꞌo.

Colosenses 3:2 ပူးပေါင်းရင်းမြစ်များ

San Mateo 16:23

Ta ndi̱kó koo ta̱Jesús ta ni̱ka̱ꞌa̱n ra xíꞌin ta̱Pedro, káchí ra saá: ―¡Kutaꞌa ún no̱o̱ i̱, ñandiva̱ꞌa káꞌno! Ta yóꞌó ta̱Pedro sási ún no̱o̱ i̱ ña o̱n kasa ndivi i̱ ña kóni Yivá i̱ Ndios. O̱n vása xáni ini ún nda̱tán xáni ini Ndios. Ta kuiti xáni ini ún nda̱tán xáni ini ni̱vi ―káchí ta̱Jesús xíꞌin ta̱Pedro.

San Mateo 6:19

Ta tuku káchí ta̱Jesús saá xíꞌin na: ―O̱n ndukú ndó taan va̱ꞌa ndó ñakuíká ñoyívi yóꞌo, chi ñoyívi yóꞌo yóo tikisin xáxi ndiꞌi rí ña, ta inka̱ ñakuíká kivi kuxéꞌé ña ta ndiꞌi xa̱ꞌa̱ ña, án nakuíꞌná kivi ki̱ꞌvi na veꞌe ndó ta kasa kuíꞌná na ñakuíká ndó.

San Lucas 12:15

Ta ni̱ka̱ꞌa̱n ta̱Jesús xíꞌin ndiꞌi ni̱vi na ndóo yóꞌo: ―Kasa kuenda xíꞌin mi̱i ndó ña o̱n vása kútoo ndó koo kua̱ꞌa̱ ní ñakuíká ndaꞌa̱ ndó. Saá chi tá kómí ndó víꞌí ní ñakuíká, ta o̱n vása chíndeé ñakuíká ndóꞌó ña kutaku̱ va̱ꞌa ndó no̱o̱ Ndios ―káchí ta̱Jesús xíꞌin na.

San Lucas 16:11

Ta ndóꞌó, tá o̱n váꞌa kísa ndivi ndó xíꞌin ñakuíká ñoyívi o̱n váꞌa yóꞌo, ta saá, ¿án xáni si̱ni̱ ndó taxi Ndios ñakuíká ndinoꞌo ndaꞌa̱ ndó ñoyívi ni̱no?

Filipenses 1:23

¿Án kusii̱ ka̱ ini i̱ kivi̱ i̱? ¿Án kusii̱ ka̱ ini i̱ kutaku̱ ka̱ i̱ ñoyívi yóꞌo? Yo̱ꞌvi̱ ní naka̱xin i̱ yukú ñava̱ꞌa kóni i̱. Saá chi kúsii̱ ní ini i̱ sandakoo i̱ ñoyívi yóꞌo, ta ko̱ꞌo̱n i̱ kutaku̱ i̱ xíꞌin Jesucristo, chi ña va̱ꞌa ka̱ no̱o̱ i̱ kúu ña kutaku̱ i̱ xíꞌin ra ñoyívi ni̱no.

Colosenses 3:1

Ta ndóꞌó, ni̱vi na kándixa Jesucristo, táku̱ xa̱á ndó vitin, chi nda̱tán ñii káchí na̱taku̱ ndó xíꞌin ra, saá yóo ña. Ta xa̱ꞌa̱ ñayóꞌo xíni̱ ñóꞌó chikaa̱ ndó ndee̱ ndukú ndó ñava̱ꞌa ña kúu ña ndáya̱ꞌví ní ñoyívi ni̱no no̱o̱ yóo Jesucristo no̱o̱ táyi̱ tón to̱ꞌó káꞌno tón ñíndichi ndaꞌa̱ kuaꞌá Ndios.

Colosenses 3:5

Xa̱ꞌa̱ ña ñii yóo ndó táku̱ ndó xíꞌin Jesucristo vitin, xíni̱ ñóꞌó chikaa̱ ndó ndee̱ ña sandiꞌi ndó xa̱ꞌa̱ ña o̱n váꞌa ña kísa chiño ini ndó ña kúu ña chíndaꞌá ndóꞌó keꞌé ndó ña o̱n váꞌa. Ndóꞌó nañani yó, nda̱ loꞌo o̱n ki̱ꞌvi ndó kua̱chi xíꞌin náñaꞌa̱ ná o̱n si̱ví násíꞌí ndó kúu, ta ndóꞌó náki̱ꞌva̱ yó, nda̱ loꞌo o̱n ki̱ꞌvi ndó kua̱chi xíꞌin nata̱a, na o̱n si̱ví yii̱ ndó kúu. Ta ndiꞌi ndóꞌó, ni̱vi na kándixa Jesucristo, nda̱ loꞌo o̱n ki̱ꞌvi ndó inka̱ kua̱chi kini xíꞌin nata̱a án xíꞌin náñaꞌa̱, ta ni o̱n kutoo ndó ki̱ꞌvi ndó kua̱chi yóꞌo. Ta ni o̱n kutoo ndó keꞌé ndó nda̱ ñii no̱o̱ ña o̱n váꞌa. Ta o̱n váꞌa chikaa̱ ndó ndiꞌi ndee̱ ndó ña kukomí ndó kua̱ꞌa̱ ní ñakuíká. Saá chi tá táku̱ ndó saá, sánáꞌa ndó ndí kíꞌvi ní ka̱ ini ndó xíni ndó ñakuíká no̱o̱ ña kíꞌvi ini ndó xíni ndó Ndios, ta ñii kúu ña xíꞌin ña kasa káꞌno ndó ñaídolo án inka̱ ndios vatá.