SAN JUAN 7:39 - New Testament in Mixtec Atatláhuca

³⁹ Te súcuan ni cahān yā jeē ñáyuu candíje jeē jnáma ya i, nihīn i Espíritu Santo. Chi ná tu quee Espíritu ún, chi ná tu ndaa Jesús quinuhun yā nuū ndujéhnu ya.

SAN JUAN 7:39 ပူးပေါင်းရင်းမြစ်များ

SAN MATEO 16:14

Te ni cacahān de: Sava i cácahān jeē cúu ní Juan tēe ni scuándute. Te sava ga i cácahān jeē cúu ní Elías, tēe ni nacani jnūhun Yaā Dios nde jenahán. Te sava ga i cácahān jeē Jeremías chí ɨnga tēe ni nacani jnūhun Yaā Dios cúu ní. Achí de.

SAN MATEO 21:11

Te ni cacahān ñayuu vējicoo jíín yá: Yāha cúu Jesús jeē nácani jnūhun Yaā Dios, jeē véji nde ñuu Nazaret ndañúū Galilea. Achí i.

SAN LUCAS 24:49

Te tají rí Espíritu Santo quiji ya nuū rō jijnáhan ró, nájnūhun ni jejnūhun Tátá rī. Te na quéndōo ró ñuu Jerusalén condetu ró ndé nihīn rō poder Espíritu Santo jeē quíji nde andɨvɨ́. Achí yá.

SAN LUCAS 3:16

Te ni cahān Juan jiín i jíjnáhan i: Ruhū chi jíín ndute scuándute ri rohó. Te vēji ɨɨn Yaā jeē nájnūhun scuándute ya rohó cúu jeē cuáha ya Espíritu Santo condee ini anuá rō, te poder yā cúu nájnūhun ñuhūn. Te cújéhnu ndasɨ́ yá, chi tú na vé jéhnu cuɨtɨ cúu ri nuū yā, ni jeē cuajníñu ri nuū yā vēsú ɨɨn jniñu lúlí gá nájnūhun jeē ndají rí vēsú correa ndijēn yā.

SAN LUCAS 7:16

Te ndɨvii ñayuu ni cayūhú i jeē ní cajito i, te ni cacahān i jeē yóhyo vāha Yaā cúu Yaā Dios. Te cácahān i: Mēhñu yó ni quee ɨɨn tēe cújéhnu nácani jnūhun Yaā Dios. Te suni cácahān i: Máá Yaā Dios ni quejéé yá chindéé ñáhán yá ñayuu yā. Achí i.

SAN JUAN 1:21

Te ni cacajnūhún tucu de: Núu súcuan ¿te ndé ɨɨn cúu ró? ¿A cúu ró Elías, tēe ni nacani jnūhun Yaā Dios nde jenahán, chí naún? Te ni cahān Juan: Nasūú de cúu ri. Te ni cacajnūhún tucu de: Núu súcuan ¿te á cúu ró tée nacani jnūhun Yaā Dios jeē achí tutu iī jeē quíji? Tuú, áchí tucu Juan.

SAN JUAN 1:25

Te ni cacajnūhún de Juan: Núu súcuan ¿te naun scuándute ró te núu nasūu Cristo ni Elías ni máá tée quiji nacani jnūhun Yaā Dios cúu ró?

SAN JUAN 1:33

Te nde saá te ná tu cuni rī jeē Jesús cúu. Te máá Yaā Dios jeē ní tají yá ruhū jeē scuándute ri jiín ndute, ni cahān yā jiín rí: Núu ni jito ró jéē cúun Espíritu Santo te quendōo xinī ɨɨn tēe, yūcuan cúu Yaā jeē cuáha Espíritu Santo condee ini anuá ñayuu, achí Yaā Dios.

SAN JUAN 12:16

Te quɨvɨ̄ ún te tēe cáscuáha jíín yá, tu ní cájecūhun ni de jeē súcuan squícu tāca jéē yosó núū tútu iī. Te nde ná ni ndujéhnu Jesús jeē cuánuhun yā andɨvɨ́, te sáá te ni canucūhun ni de tāca jnúhun yósó sɨ́quɨ̄ yā, jiín jéē ní casáha de súcuan jíín yá.

SAN JUAN 12:23

Te ni cahān Jesús jiín de: Je ni quee quɨvɨ̄ jeē ndujéhnu Yaā ní nduu tēe.

SAN JUAN 14:13

Te tācá na‑ni vé cacán rō nuū Tatá rī sɨquɨ̄ jeē cácandíje ró jéē cúu ri Sēhe ya, te sáha ri jeē cacán rō, te súcuan stéén rī jeē yóhyo cújéhnu Tátá rī.

SAN JUAN 14:26

Te Tátá rī chi tají yá Espíritu Santo, quiji nucuɨñɨ̄ nuū rī. Te máá yá chindéé ñáhán yá rohó, te sáha ya jeē cóo sɨɨ̄ ni rō. Te stéén yā tāca jnúhun nuū rō, te nacachi tucu ya tāca jéē ni cáhān rī jiín ró.

SAN JUAN 16:14

Te stéén yā jeē cujéhnu ri, chi nacastūhun yá nuū rō tāca jnúhun jeē jé ni cahān rī, te sáha ya jeē jécūhun ni rō.

SAN JUAN 16:7

Jendaá cahán rī jiín ró: Jeē váha máá ró jijnáhan ró cúu jeē quihín rī. Chi núu tú quihīn rī, te ma quíji Yaā chindéé ñáhán róhó te sáha ya jeē cóo sɨɨ̄ ni rō. Te núu cuahān rī, te tají rí yā quiji ya nuū rō.

SAN JUAN 17:1

Te ná ni cahān Jesús tāca jnúhun yáha, te ni ndacoto ya ichi ándɨvɨ́, te ni cahān yā: Tátā, je ni quee quɨvɨ̄ jeē ndóho ná. Vijna te stéén ni jéē cujéhnu máá ná jeē cúu ná Séhe ní, návāha suni máá ná steén na jéē cujéhnu máá ní.

SAN JUAN 17:5

Te vijna, Tátā, sáha ní jéē ndujéhnu tucu ná ndé nuū néne ní, nájnūhun cújéhnu ná jíín ní nde ná tu jecōo ñayɨ̄vɨ́.

SAN JUAN 20:22

Yūcuán na te ni tɨ̄vɨ tachī yā nuū de jíjnáhan de. Te ni cahān yā: Vijna te ni canihīn rō Espíritu Santo.

SAN JUAN 6:14

Te ñayuu un ní cajito i jniñu jéhnu ni sáha Jesús jeē ni stéén yā poder yā. Te ni cacahān i: Jendaá ndije jeē tée yáha cúu jeē cahán tutu jeē quíji ini ñayɨ̄vɨ jéē nácani jnūhun Yaā Dios. Achí i.

SAN JUAN 7:12

Te yōhyo ni cacahān ñayuu jeē sɨquɨ́ yā, chi sava i cácahān: Tēe vāha cúu de. Te sava ga i cácahān: Tuú chi stáhú de ñayuu.

SAN JUAN 8:54

Te ni cahān Jesús: Núu ruhū sajéhnu ri maá rí, te tu níhín jníñu. Máá Tátá rī cúu jeē sajéhnu ruhū. Te cácahān rō jeē maá yá cúu Yaā Dios maá ró.

HECHOS 19:2

Te ni cajnūhún de tēe ún: ¿A ní canihīn ní Espíritu Santo ná ni cacandíje ní, chí ná tuú? áchí de. Te ni cacahān de jíín Pablo: Tuú, chi ni ná tu nihīn na jnúhun jeē iyó Espíritu Santo, achí de.

HECHOS 2:17

Achí Yáā Dios: Quɨvɨ̄ sándɨ̄hɨ́ na te tají rí Espíritu rī cunuú yá jiín táca ñáyuu, te sēhe yɨɨ́ ró jiín séhe sɨ́hɨ́ ró, nacani i jnūhun ri, te tāca tée lulí chi coto ndijin de jeē steén rī nuū de, te tāca tée jéhnu chi sáha ri jeē scóto jēni de.

HECHOS 2:33

Te ni ndujéhnu tucu ya ni sáha Yaā Dios jiín poder yā. Te nde nuū maá Yáā Dios, Yaā cúu Tátá yā, ni nihīn Jesús Espíritu Santo, chi súcuan ni jejnūhun ya. Te ni tají Jesús Espíritu Santo, te suu ya sáha jniñu jeē cájito ní te cájini sōho ní vijna.

HECHOS 2:38

Te ni cahān Pedro jiín i: Nacani ni ni jéē stóo ni cuéchi ní jíjnáhan ní, te cuandute ní jéē ní cacandíje ní Jesucristo, návāha cone cáhnu ni Yaā Dios nuū cuéchi ní, te cuāha Yaā Dios Espíritu Santo yā condee yā ini anuá ni.

HECHOS 2:4

Te ndɨhɨ i, ni cunuú Espíritu Santo jiín i, te ni quejéé i cácahān i sɨ́ɨn sɨ́ɨn yuhu, ndese ni steén maá Espíritu nuū ná ɨɨn ná ɨɨn i cahān i.

HECHOS 3:13

Tuú chi máá Yáā Dios jií yō Abraham jiín Isaac jiín Jacob jiín táca gá jií yō, ni sáha ya jniñu yáha návāha cuni ñayuu jeē cujéhnu Sēhe ya Jesús, Yaā jeē ní cajendēca ní núū tée cácujéhnu. Te ná ni cuni Pilato jeē siaá de ya, te tu ní cájēhe ni jnúhun.

HECHOS 4:31

Te nuū ní ndɨhɨ ni cajicān tahú i, te nuū cáyūcu tútú i un ní sáha ya jeē ni jnáa. Te ndɨhɨ i ni cunuú Espíritu Santo jiín i, te ni jēhe ya fuerza te jéhnu‑ni ni canacani i jnūhun Yaā Dios.

ROMANOS 8:9

Te máá ró jijnáhan ró, chi tuá cájica ró jíín modo cuní maá ró, chi cájica ró nájnūhun cúní Espíritu, chi ndéé Espíritu Yaā Dios ini anuá rō. Te ñayuu jeē tu ndéé Espíritu Cristo ini i, tu cáyɨhɨ i ndaha ya.

2 CORINTIOS 3:8

te sa víhyá gā cujéhnu ndasɨ́ gá jnūhun cotecu yō jeē jéhe Espíritu nuū yō.

EFESIOS 4:30

Ma sáha ró cuéchi návāha ma cucuíhyá ni Espíritu Santo Yaā Dios. Chi Espíritu yā cúu nájnūhun sello jeē steén jeē cúu yó séhe Yaā Dios, nde quiji quɨvɨ̄ jínu jniñu jeē jnáma ya rohó.