1 JUAN 5:20 - New Testament in Mixtec Atatláhuca

²⁰ Te suni jíní yō jeē ní quiji Sēhe Yaā Dios, te ni sáha ya jeē jécūhun ni yō, návāha cuni yō ndese Yaā cúu máá Yaā ndaā. Te ndúú yó jiín Yaā ndaā, suu jíín máá Séhe ya Jesucristo. Máá yá cúu ndije Yaā ndaā, te máá yá sáha jeē cótecu yō nɨɨ́ cáni.

1 JUAN 5:20 ပူးပေါင်းရင်းမြစ်များ

SAN MATEO 13:11

Te ni cahān yā jiín de: Róhó jíjnáhan ró chi sáha ya jeē cájecūhun ni rō jnūhun ni yɨsāhi yáha, ndese quɨ́vɨcoo ñayuu ndaha Yaā andɨvɨ́ jeē ndacu ya jniñu nuū i. Te ñayuu yáha jéē tu cácandíje, chi ma jécūhun ni i.

SAN LUCAS 21:15

Chi ruhū cuāha ri jnūhun ndíchí cahān rō, návāha ñayuu jeē cájito uhū rohó, ma cúndeyɨ́ i jíín ró ni ma cúu cahān i sɨquɨ̄ rō.

SAN LUCAS 24:45

Te ni nune ya jeē níjnūní de, návāha cuu jecūhun ni de tāca jéē cahán tutu iī.

SAN JUAN 1:18

Tú ni ɨɨn ñayuu ni jíto cuɨtɨ nuū Yaā Dios. Te máñúhún‑ni Sēhe ya jeē ndeé yá jiín Tátá yā, suu ya ni steén nuū yō ndese Yaā cúu Yaā Dios.

SAN JUAN 10:30

Máá rí jiín Tátá rī, chi ɨɨn‑ni cúu ri, achí yá.

SAN JUAN 14:20

Te quɨvɨ̄ ún te cuni rō jeē ɨɨn‑ni cúu ri jiín Tátá rī, te máá ró ɨɨn‑ni cúu ró jíín rí jeē ndeé rí ini anuá rō jijnáhan ró.

SAN JUAN 14:23

Te ni cahān Jesús: Ñayuu jeē maní jiín rí, chi cásquícu i jeē cahán rī. Te coo manī Tatá rī jiín i. Te Tátá rī jiín máá rí quijicoo ri cundúú rí jiín i.

SAN JUAN 14:6

Te ni cahān Jesús jiín de: Máá rí cúu ichi jinū rō andɨvɨ́, te máá rí cúu jnūhun ndaā jiín jnúhun cotecu rō nɨɨ́ cáni. Te ni ɨɨn ma jinú nuū Tatá rī te núu tú ruhū.

SAN JUAN 14:9

Te ni cahān Jesús: Felipe, je ni cuu cuehē quɨvɨ̄ jíca ri jiín ró jijnáhan ró, ¿te á ná tu cuni rō ndé ɨɨn cúu ri naún? Tēe jeē jíto ruhū, suu Tátá rī jíto de. Núu súcuan ¿te najehē cahán rō jeē steén rī Tatá rī nuū rō?

SAN JUAN 15:4

Na cúndúú ró jiín rí, te suni máá rí cundúú rí jiín ró. Ɨɨn ndaha uva ma cúu cuāha ndehē jeē maá, te núu tu yɨ́jnɨ̄ɨ jicā yóho. Te suni súcuan máá ró, ma cúu sáha ró jniñu váha te núu tu cúndúú ró jiín rí.

SAN JUAN 17:14

Ni castūhun ná jnūhun ní núū i. Te ni caquɨtɨ̄ ni ñayuu ñayɨ̄vɨ núū i, chi tuá cácuu i cuenta ñayɨ̄vɨ́, nájnūhun máá ná tu cúu ná cuenta ñayɨ̄vɨ́.

SAN JUAN 17:25

Yaā ndaā cúu ní, Tátā, te ñayuu ñayɨ̄vɨ́ tu jíní i níhín, te máá ná chi jíní na níhín. Te ñayuu yáha chi cájini i jeē maá ní ni tají sáña.

SAN JUAN 17:3

Te suhva cúu jnūhun cotecu i nɨ́ɨ́ cáni: suu jeē na cúni i níhín jéē mañúhún‑ni ní cúu Yaā ndaā, jiín jéē cúni i sāñá jeē cúu ná Jesucristo, Yaā ní tají ní.

SAN JUAN 20:28

Yūcuán na te ni cahān Tomás jiín yá: Aī, Jitoho maá ná jiín Yaā Dios maá ná cúu ní, áchí de.

SAN JUAN 8:42

Te ni cahān Jesús: Núu Yaā Dios cúu ndije tátá rō, te coo manī rō jiín rí nuú. Chi nde nuū Yaā Dios ni quenda ri vēji ri. Te tú vēji ri jeē cuní maá rí, chi máá yá ni tají rúhū.

HECHOS 20:28

Núu súcuan te coto vāha ní máá ní jiín ndɨhɨ ñayuu cácandíje, chi Espíritu Santo ni jeni ya nihín jéē cóndito ní ñáyuu maá Jítoho yō, chi ni nacuaan ya i jíín nɨ́ñɨ̄ yā.

ROMANOS 9:5

Te máá i cácuu yucūn tāca jíí yō jeē ní cacujéhnu, te suni yucūn maá i ni cacu Cristo jeē ní nduu ya tēe. Te máá yá cúu Yaā Dios jeē jnɨ́ɨ ndɨhɨ‑ni, te nɨ́ɨ́ cáni cahān ñayuu jeē cujéhnu ya. Amén.

1 CORINTIOS 1:30

Te máá ró jijnáhan ró chi ni sáha Yaā Dios jeē nduú ró jiín Cristo Jesús. Chi nde nuū maá yá ni canihīn yō jnūhun ndíchí, te ni ndahva yā cuēchi yó, te ni sáha ya jeē iyó ndoo íyó íī yō nuū yā, chi ni jnama ya yohó.

2 CORINTIOS 4:6

Chi ná ni sáha Yaā Dios ñayɨ̄vɨ́ te ni cahān yā jeē na cúndijin nuū néē. Te suni súcuan ni sáha ya jeē ní cundijin nuū anuá yō jeē cájecūhun ni yō sɨquɨ̄ Jesucristo, ndese ndíndēe núū yā, cúu jeē yōhyo luu cújéhnu ya nájnūhun cúu Yaā Dios.

2 CORINTIOS 5:17

Chi núu ɨɨn ñayuu yɨ́hɨ i ndaha Cristo, te je ni ndujeé i. Te tāca modo neé ní nevāha i, je ni yāha cuahān, te vijna je ni ndujeé ndɨhɨ.

EFESIOS 3:18

Te súcuan te cuu jecūhun vāha ni rō jiín táca ñáyuu candíje, ndese cáa jnūhun cúndáhú ni Cristo yohó. Chi yōhyo jíté, cáni, cúnú, súcún jnúhun ún, chi yōhyo cuehē sáha.

FILIPENSES 3:9

te ndúú yá jiín rí. Te tuá nducú rí quendōo ndaā rī jeē jiín ley un, chi sa suhva Yaā Dios ni ndahva yā cuēchi ri jeē ní candíje ri Cristo. Chi súcuan squéndōo ndaā yā ñayuu cácandíje.

1 TIMOTEO 3:16

Te jendaá ndije chi jéhnu ndasɨ́ cúu jnūhun yáha jeē cácandíje yó, jeē ní yɨsāhi ndé jenahán: Yaā Dios ni steén yā maá yá, chi ni nduu ya tēe, te Espíritu ni steén jeē iyó ndáā jniñu ni sáha ya, te tācá ndajéhé andɨvɨ́ ní cajito jniñu ní sáha ya. Te ni jitē núu jnūhun ya nuū ñáyuu tācá nación, te ni cacandíje ñayuu nɨɨ́ ñáyɨ̄vɨ núū yā, te ni ndaa ya cuanuhun yā andɨvɨ́.

TITO 2:13

Te suni stéén nuū yō jeē cocuhun ni yō jeē quéndōo ndetū yō jeē quíji máá quɨ́vɨ̄ jéhnu jeē quénda ndijin Yaā Dios, Yaā cujéhnu ndasɨ́, suu Jesucristo, Yaā jnáma yóhó.

HEBREOS 1:8

Te jnūhun Sēhe ya chi sa suhva cáhán yā: Máá ró cúu Yaā Dios, te ndacu ró jniñu nɨ́ɨ́ cáni, te jniñu ndácu ró, máni jniñu ndaā cúu.

1 JUAN 2:23

Tāca ñáyuu jeē tu jéjnúhún i Sēhe ya, suni tu íyó máá Tátá jiín i. Te ñayuu jeē jejnúhún i Sēhe ya, suni íyó máá Tátá jiín i.

1 JUAN 2:24

Núu súcuan te chuhun vāha ni rō maá jnúhun ni cajini sōho ró ndé jeē xíhna ñúhún. Te núu ñúhun vāha ni rō jnūhun ní cajini sōho ró ndé jeē xíhna ñúhún, yūcuán na te suni ndúú ró jiín máá Tátá yō jiín Séhe ya.

1 JUAN 2:6

Núu cáhán ɨɨn ñayuu jeē nduú i jíín yá, cánuú jéē caca ndaā i nájnūhun ni jica Jesucristo.

1 JUAN 4:14

Te ni cajito ri te cácastūhun rí jeē maá Tátá yō ni tají yá Sēhe ya ni quiji návāha jnama ya ñayuu ñayɨ̄vɨ́.

1 JUAN 4:16

Te máá yó, je ni jini yō te ni candíje yó jéē cundáhú ni Yaā Dios yohó. Chi máni jnūhun cúndáhú ni iyó jíín Yaā Dios. Te ñayuu cundáhú ni jnáhan, ndúú i jíín Yaā Dios, te ndéé yá ini anuá i.

1 JUAN 4:2

Te súcuan nacuni rō ndé‑ni i cúu jeē jiín Espíritu Yaā Dios cahán: tāca ñáyuu jeē cácahān ndaā jeē ní quiji Jesucristo, ni nduu ya tēe, máá i cúu jeē jiín Espíritu Yaā Dios cácahān.

1 JUAN 5:1

Tāca ñáyuu jeē cácandíje i jeē Jesús cúu Cristo, Yaā ní tají Yaā Dios, máá i cácuu sēhe Yaā Dios. Te ñayuu manī jiín Yaā cúu Tátá, suni cácundáhú ni i ñayuu cácuu sēhe ya.

1 JUAN 5:15

Te núu jíní yō jeē jíni nahín yá jeē jicán yō, núu súcuan te suni jíní yō jeē sáha ya jeē jicán yō.

1 JUAN 5:18

Te jíní yō jeē tāca ñáyuu cácuu sēhe Yaā Dios, tu jíca i jíín cuéchi. Chi Yaā cúu Sēhe Yaā Dios, ndíto vāha ya i. Te tú na vé cúu sáha jexeén jiín i.

1 JUAN 5:5

Máá‑ni ñayuu jeē candíje jeē Jesús cúu Sēhe Yaā Dios, máá i cúu jeē cúndeyɨ́ sɨ́quɨ̄ jeneé íyó ini ñayɨ̄vɨ́.

APOCALIPSIS 15:3

Te cájita i yaa jeē ní tava Moisés, tēe cúu mozo Yaā Dios, jiín yaa maá Yaā cúu Londe. Te súcuan cáhán yaa ún: Yōhyo náā ni na cájito ná ndɨhɨ jniñu jéhnu teyɨ́ jéē sáha ní, Tátā Yaā Dios, chi jnɨ́ɨ ní ndɨhɨ poder. Te máni jniñu ndaā jniñu váha sáha ní, jeē cúu ní Rey nuū tācá nación.

APOCALIPSIS 19:11

Yūcuán na te ni jito ri jeē núne andɨvɨ́. Te ni cane ɨɨn caballo cuijín, te Yaā yosó sɨ́quɨ̄ tɨ̄ naní yá Yaā ndaā, Yaā squícu, chi squícu ya jeē ni jéjnūhun ya. Te ndaā sándaā yā jniñu te ndaā ndónda ya sɨquɨ̄ tāca jéneé.

APOCALIPSIS 3:14

’Te tee ró jnúhun yáha na quíhín nuū jeē cujéhnu nuū ñáyuu cácandíje ñuu Laodicea: Súcuan cáhán ruhū, maá Yaā cúu jnūhun ndaā, Yaā cúu testigo vāha jeē cahán ndaā. Te máá rí ni sáha ndɨhɨ jeē ni cáhān Yaā Dios jeē na jécōo.

APOCALIPSIS 3:7

’Te tee ró jnúhun yáha na quíhín nuū jeē cujéhnu nuū ñáyuu cácandíje ñuu Filadelfia: Súcuan cáhán ruhū, Yaā ndoo Yaā ndaā, te névāha ri ndacáa rey David. Te máá rí núne jeē quɨ́vɨ ñayuu nuū ndácu ri jniñu, te ni ɨɨn ma cúu casɨ, te máá rí jésɨ, te ni ɨɨn ma cúu nune.

APOCALIPSIS 6:10

Te ni cacana jee ánuá un: Jitoho ná Yaā Dios, maá ní cúu Yaā ndoo te vāha squícu ní jéē ni jéjnūhun ní. ¿Te nasaa ga tiempo coo te sándaā ni jéhē ná, te nacuāha ní jéē ndútahū ñayuu ñayɨ̄vɨ jéē ní cajehni sāñá? áchí.