Psalms 78:55 - Ohiatonhseratokénti

⁵⁵ Waʼsakohiatínekenhwe nonkweshónha né nón꞉we nihatiterónhtaʼkwe nó꞉hen thóh shahónhne; waʼtesakohiakónhase nonhóntsa nahontsénawasʼte tánon thóh nón꞉we nasakóteron Israerʼró꞉nons ne tsi rotinonshó꞉tonkwe ne nón꞉we nihatiʼterónhtaʼkwe.

Psalms 78:55 ပူးပေါင်းရင်းမြစ်များ

Psalms 44:2

Í꞉se kwáh sahtshanáke khók wásaste tsi waʼsehiatínekenhwe nonkweshón꞉has, ók í꞉se sheséhteron nonkweshón꞉has ne raʼononhontsáke; í꞉se waʼserihwahetkénten nonkweshónhas, í꞉se waʼsehiawí꞉hon ne ioiáneres athatahwí꞉tsheras ne shonkwetaʼshónhas;

Psalms 44:3

Ne shonkwetaʼshónhas iáh teonathatsiatakweniʼióston nonhóntsa nasarekówa ahonáts꞉ton, iáh teonatkwénion ne raotishaststénhsera ahonáts꞉ton; né꞉ne sahshaststénhsera tánon tsi nisehshást꞉te waʼkarihónhni, né tsi ní꞉ioh rihwíʼiokwe tsi éhʼtho í꞉seskwe, né wahakonatónhase tsi nisehnorónkwa.

Isaiah 34:17

Rahónha sakohiakhónhni, ratsanàke tehiakonarihthénhni né rókston ne ieseriʼiethenhtákwah; kwáh kí enhonatsenawastón꞉hake ne tsi nénhwe enkénhake, né tsi wahatinekwenhsatátie kwáh thóh nón꞉we nenhatinákereke.

Numbers 33:54

Tesewahiakhónhnion nonhóntsa ne tsi niatehotitsiókwahkes ó꞉ni tsi nihotitarótens sehwawastóhʼtshi tsi ehʼnenhsewáiere, kowaʼnénhak taietʼtsíhion ne kaientátshera ne roʼnatsiokowánen tánon kènk nihiohóntsa taietʼtsíhion ne ken nihotitsiokwá꞉a.

Joshua 13:7

Ó꞉nen káti, theshinárit kí꞉ken ohóntsas tsi naʼtehóntere nó꞉ia tióhton nihotitióhkwakes tánon ne shatekanenhrí꞉hen ne Manasseh, ne ronónha ahontié꞉nawatste tsi ahonawenhkón꞉weke.”

Joshua 19:51

Onhkweʼtakwé꞉kon ne Israerʼró꞉nonhke wahonteró꞉roke ahohénton ne Aterihwaʼseronhniá꞉tshera Wató꞉serothe né꞉ Shiloh nón꞉we. Thóh nón꞉we nahonteró꞉roke ne káti ne rokhá꞉res Eleazar, tánon ne Joshua, ó꞉ni ne sakotihenténhse ne rahotitióhkwas nahónton thasakotihià꞉konhase nonhóntsas ne tsi iaʼtewatséntos nòkwah ne Jordan Kaniataratátie. Wahatiwasthó꞉tsi ne nahatirihwaʼtshén꞉ri onh ní꞉ioht tsi tehotonhontsó꞉ni ne Roiá꞉ner tsi takahià꞉konhke nonhóntsas.

Joshua 21:43

Káti ne Roiá꞉ner thashaká꞉wen Nisraerʼró꞉nons akwé꞉kon nohóntsas ne kwáh rorihwanirá꞉ton tsi shakorahratstén꞉ni ne sakotisoʼthonkonhkén꞉en tsi enteshaká꞉wen. Ne nó꞉nen shihonatiaʼthakwehniióstons, thóh nón꞉we nahontená꞉taien.

Joshua 23:4

Tkwá꞉wi ne senhwenhtióhkwas akwé꞉kon ne tsi ionhontsá꞉iens né꞉ne Jordan Kaniatarathátie tiothásawe né꞉ne nà꞉kon nòkwah ne Mediterranean Kaniatarakeʼkowáhne né꞉ne tsi iaʼtewatséntos nòkwah. Tkwawí꞉hon akwé꞉kon nohóntsas ne ratikwé꞉kon né꞉tho nonhkweshón꞉a iethisénhnion, tánon ó꞉ni nonhóntsas né꞉tho nonhkweshón꞉as naré꞉kho teieʼthisénhnion.