Psalms 72:16 - Ohiatonhseratokénti

¹⁶ Wakaterenhnaien ahiokwátstonhake nó꞉natsias ne tsi iohontsáien; waʼkaterenhnaien ne tsi ionhniarón꞉nions né tahontahioróh꞉ronhke ne kaientʼthó꞉tsheras; waʼkaterenhnaien ne kahiksonhas thóh nahiotahionhnihake tsi ní꞉ioht ne Lebanon nón꞉we; wakaterénhnaien ne tsi kanatowáʼnens kwáh tahontakanenhrá꞉rahke tsi ní꞉ioht tsi ionthontónhni ne kahentáke.

Psalms 72:16 ပူးပေါင်းရင်းမြစ်များ

1 Kings 4:20

Nonhkweshón꞉as ne Judah ó꞉ni Nisraerʼró꞉nonhke thóh nihonatsókwas tsi níkonh tekanesaronhkótharon natsakʼtóntse; tehonskáhons tánon ratinekíra, tánon ronatʼtsenhnónhni.

Job Tánon ne Raoronhiakensera 5:25

Ní꞉se kwáh kí ensaterienʼtá꞉rake tsi waswatsiratátie tsi enhonatiohkowá꞉nenke, tánon ne seiohokón꞉as kwáh né꞉ne ohonteʼshón꞉as ne tsi ionwenhtsá꞉te.

Job Tánon ne Raoronhiakensera 8:7

Ethosà꞉ne tsi nithisatáshawe iáh tesatatkowánenhkwe, ki tsi niahisenonhátie kwáh ki eniokwátstonke.

Psalms 104:16

Né rahonrontasónhas ne Roiá꞉ner kwáh í꞉ken tsi iotineká꞉ton. Né꞉ne onenhtakwenhtétsheras ne Lebanon nón꞉we nihoronhtaientʼthósehron.

Psalms 72:6

Waʼkaterénhnaien thóh nahahiatoténhake tsi ní꞉ioht ne iohkenhnó꞉ron tsi nón꞉we nikaientʼthóhseron, tsi ní꞉ioht tsi iohtsatará꞉ties tsi iokenhnó꞉res nonhwenhtsáke.

Isaiah 29:17

Iáh onhtèken ne Lebanon kwák kénk nikariwésha né ienwáton ne kwáh í꞉ken tsi enkaiáneraste kahentàke, tánon ne hioianeráhston kahentàke thóh nentʼkonwáhthate tsi ní꞉ioht ne karakhonkówa?

Isaiah 30:23

Kwáh enhakenhnó꞉reste tsi nisatsinetarón꞉tion nonwenhtsàke, tánon nonátsias, tsi nentkáhawe nonwenhtsàke, né꞉ne enhiokwatsʼtónhake tánon enkanákerenhne. Nètho enwennhniseráteʼke ne satshenenhókons tionnónskwahrons thóh nón꞉we nenhkontekónhni tsi watenhenró꞉wanenke;

Isaiah 32:15

Tsi nió꞉re ne raonikónra ne Rawenni꞉io éhʼneken entkaiénthaʼkwe tsi entionkwahwerónhase, tánon ne iahonwenhtsiatʼthénhake ne iensewáton nahonsahkahetí꞉ione, tánon tsi nitsohetí꞉iohon karakonkówa ne iensewáton.

Isaiah 32:20

Sewatáskats ní꞉se tsi nítsion ne thóh nón꞉we nisewaiéntʼton kwáh tsi nón꞉we niʼkahionhaténions, í꞉se ietsirihwáwi ne tehotinákares tánon ne tewahóntes watenatowánen tsi ahontatewenhní꞉ioʼke.

Isaiah 35:2

kwáh í꞉ken tsi enkatsitsónten, tánon né enwatonnáren natʼtsenhnonhniátshera tánon tenhkaríhwaʼkwe. Né naoiatanerakwáhtshera ne Lebanon kwáh entʼkonhwénhnon, né nahonatkweʼnienstátshera ne Carmel tánon ne Sharon. Kwáh né entsiatʼkátho ne raoʼiatanerakwáhtshera ne Roiá꞉ner, né nah ne rahotʼkwenienstátshera nonkwahʼNí꞉io.

Jeremiah 33:22

Kwáh enkhetiokowáhnahthe tsi nienhatwahtsiríʼne ne akenhátshera Táwit ó꞉ni enkheʼtiokowahnáhten ne rothikháres ne rahotiʼtáhrahkon ne Levi, ne ne kwáh thóh nawenhtó꞉rehke nahonwahnháshete tsi ní꞉ioht ne tsi iotsistokwahrónnion ne tsi karonhiáte tó꞉ka ó꞉ni tsi níkonh kanesahronkwáhien natsatʼtóntie.”

Acts 1:15

Tohkára nónta onakènʼke wahontʼkenʼnísa ne thoʼnethákwens, kakʼnon ne énskat tewenʼniáwe tánon tewásen nihátikwe, tánon ne Tiér wahthátaʼne nahatáti.

Acts 2:41

Rohnatiokowánen tahonʼnétakwe ne rahoteʼriwanothátsera tánon wahontenekwéheste, tánon kákʼnon neh asenʼniwenʼniawehetserásen nihionkwétaʼke sahonwanatsiátaraʼse neh siwenʼniseráte.

Acts 4:4

Nók hiakotiokowánen ne wahakothónʼteʼne nateriwanothátsera tahiakétaʼkwe; tánon wahakotiokowána kákʼnon ne wísk tewenʼniawehetserásen.

Revelation 7:14

Wahiiénhase, “Sénhshon, í꞉se khók saterièn꞉tare.” Ethò꞉ne wahakénhase, “Né꞉ne ronón꞉ha tontahonhnótkawe ne tsi nateiotenonhianì꞉ton tsi niioteriwatiérenhkwe; shotinhoharéhnion ne teontewehiarákwas tánon sahatirakénste thóh raonekwénhsake ne teiotinaʼkaronhtónha owí꞉ra.

Revelation 7:9

Shontóhetste kí꞉ken iakatkáto, tánon wakhé꞉ken kwáh í꞉ken tsi kanenhrowá꞉nen né꞉ne iáh thaón꞉ton nahonwanaséhte, né꞉ne kwáh tsi niateiakahontsá꞉ke, né꞉ne kwáh tsi niateiakotará꞉kes ó꞉ni nonkwehó꞉kons ó꞉ni nakoronkhá꞉tsheras, thóh ronhné꞉te ohén꞉ton tsi wanitskwaratseró꞉te ó꞉ni raohén꞉ton ne teiotinaʼkarontón꞉ha owí꞉ra, teonateweiá꞉here kará꞉ken, ne rathihawáhnion ne ionerá꞉tes onenhrashón꞉as.