Philippians 2:17 - Ohiatonhseratokénti

¹⁷ Tsi thisetákwen tsi nòkwa ne Roiá꞉ner tanon tsi ní꞉ioht tsi teseriwhaʼiérits ne teskaieróntare tsi ní꞉ioht nasatsienkwarónniate ne rahohénton. Tánon nakenekwénsa tòka nónwa ónen tsi neskátne entewahʼwéronke ne iontsienkwaronʼniathákwa. Tóhka káthiʼki ehʼneniáwen꞉ne, Enkatsennónʼni ó꞉ni skátne entewathonʼnáren.

Philippians 2:17 ပူးပေါင်းရင်းမြစ်များ

Numbers 28:6

Né kí꞉ken ne iatewenhniseráke ienhiontkaʼwásehke né꞉ne kwáh iotʼtshon, thóh kíʼ ken ní꞉ioht ne tiotserénhton iewatʼkáwen né ká꞉khwa né꞉ne tsi tionónhte ne Sinai, né꞉ne tenwenhserateníhon rawerienhtiʼióstha ne Roiá꞉ner.

Numbers 28:7

Né onenharatasehontserákeri né enhkenikweʼkonhátie nenhthatiérenhte teiotinakaronhtónʼa owíra, ietsienharakwáʼke tasehwáweron tekhatshétake ne onenharatasehontserákeri.

Acts 20:24

Kheʼrenkátiʼken ni꞉i tsi kónʼnhe iáh thé꞉nen satèkena tèken; nek khók níhkere ne hiatakókʼten ó꞉ni niákʼsa kíʼ ken kahioténsera tsi nithakáwi ne Roiá꞉ner Ié꞉sos, nahkateriwatsʼtéristhe, nehne akatʼróhri ne kariwí꞉ios nehne tsi nithoriwaiéri ne Rawenni꞉io tsi nókwa nonkwesónhas.

Acts 21:13

Nók wahtariwaseráko, “Nisewatsérah, kíʼ ní꞉ioht tsi tesewasénthos ó꞉ni teskweriasarítha? Iáh nek khók tèʼken tsi wakatateweiennentáʼon nahionkʼnerénken ne Jerusalem nónwe nók kíʼ ó꞉ni ne kwáh thóh nónwe iakíʼheie ne rahoriwá꞉ke ne Roia꞉ner Ié꞉sos.”

Romans 12:1

Éhʼtho káti, tewatenrosónhas, neh tsi nikowánen ne Rawenni꞉io shonkwenténras, kwahnekénnis; kwáh ieʼiokontakwénhak tsi tátʼtsion ne Rawenni꞉io tsi tiónʼnhe ók ó꞉ni nehʼne aihsewárioʼte tsi nikaríwes tionnhétie, kwáh sewariwahtokénhak tsi nòkwa ne rahohioténsera ó꞉ni thaʼtsisewanikonraʼiérit, thókiʼ nikarihóten ne kwáh ahonwasénnaien ne Rawenni꞉io.

Romans 15:16

Ne tsi rihiótense ne Kerístos Ié꞉sos nakhehiótense ne iáh tehatiʼsitaeronons. Watsióte tsi ní꞉ioht ne ratsihénstatsi ne kateriwahnhótha ne kariwí꞉ios ne Rawenní꞉ioke nitsawénon, ehnahontáwe ne iáh tehotiʼiánere nahontatiatakéna nahontahonwanikonraiériʼte ne Rawenni꞉io, neh tsi nihoriwathokenstén꞉ni ne Ronikonriʼióston ne Rawenni꞉io.

2 Corinthians 12:15

Ne káti karihón꞉ni kwáh akwatshennonniahtsherà꞉kon tsi énttion tsi niwátien, ó꞉ni kwáh akonháhtsiwa. Ká꞉ron káti kenʼ nenskwanorónhkwe tsi ní꞉ʼi niiaweʼtowá꞉nen tsi kwanorónhkhwa.

2 Corinthians 4:12

Ne káti kí꞉ken kén꞉tons ne kenhé꞉ion tsi tiótkon ionkwahnhonteráties, nok natónhnhets isè꞉ke nón꞉we niioioʼtáties.

2 Corinthians 6:10

Iáh teionkwakhwáhtshe nohontsakékhe, nok ionkwakwáhtshe tsi nonkwá꞉ti ne karonhiakékha.

2 Corinthians 7:4

Kwáh tokén꞉ʼen kwaniahé꞉sen. Tiótkon tekwarénhsarons tánon é꞉so tsi onkeʼnikonhrahníhrha. Aronhátien tsi niaʼté꞉kon teionkwaʼnikónhrhare shé꞉kon é꞉so tsi ionkwatonhnháhere.

Philippians 1:20

Kwá éhtho ní꞉ioht tsi kanontónʼnions ó꞉ni kaskáneks tóhsa nonwénton neh thènen nakátiere nahonkatéhate. Neh thokàken akónnheke khés nakíheie, Netewakathonwentióni tiókonte ehnahonkenikonrhatsaníton tsi nónwa ní꞉ioht tánon Kerístos nokwáh niáwe ne kakweniensthátsera.

Philippians 2:18

Thóh kathiʼnonʼníse nahʼióton sewhatsenʼnonʼníhak tánon skátne tewatonnáren.

Philippians 2:30

Serèka ahawehéion tsi Kerístos rohiótense, tánon ehʼronnárakwe tsi nahatsniénon neh tsi nahóten ne iáh tesewakwénion nahontaskwawike.

Philippians 4:18

Kwá akwékon sewakatkarhiákʼse, ó꞉ni tsiníkon ioteiarónhon. Kwá íken tsi wakerientí꞉ios tsi nahoténsons waskwawíhon neh Epaphroditus thakawitén꞉ni. Neh teskaieróntare ne kwá teiohtsikhétare tsiniwenserákon ionthatáwis tóhka ó꞉ni ne kwá tkariwhaiéri ne hiontsenkwaronniathákwa ne rawehrienthiʼióstha ne Rawenni꞉io.

Colossians 1:24

Onk ó꞉nen sewahkatʼtsennón꞉ni neh tsi nikwaroniá꞉kense, Asè꞉ken ne kéntons tsi niwakeroniáken ne tierónhke kastsnié꞉nons tsi nahóten sehkon iotaténron ne iakáshon tsi nihoronhiakén꞉on tsi nokwáh ne Kerístos raierónke, né꞉ne ononsatokénti.

1 Thessalonians 2:8

Tioríwa ne tsi nikwahnorónkwah ionkwahtateweienʼnentahónk taitewahiéna iáh nek tèken ne kariwí꞉ios tsi nitsiawenón ne Ni꞉ióʼne ónk tsi iatiónnhe ó꞉ni. Tsi nióʼre tsi kwahnorónkwahkwe!

2 Timothy 4:6

Nók ní꞉i, iakáhewe nahionkeronhiákenthe; ónwe ne tsi nikawistáheks ní꞉i tahiatiatetkhási tsi kén꞉en kónnhe.

1 Tiér 2:5

Kásewe tsi ní꞉ioht ne iónnhe onénias, tánon sewathóntat naʼietsiʼiastste tsi akanonsonníhake ne ionnheʼónwe ononsatokénti, thoʼnónwe nensahióten tsi ní꞉ioht ne rotokénti ratsihénstatsi nasétatʼtse kariwiʼiostóntsera tánon ne kaienawasétsera ó꞉ni naontatsenikonraiérite ne Rawenni꞉io rahonháke ne Ié꞉sos Kerístos.

1 Sawátis 3:16

Kén níʼ ní꞉ioht tsi ionkwateriéntare nahóten nèn꞉ne ne kanoronkwátshera: Kerístos tesonkwáwi tsi rónnhe. Í꞉i kíʼ ó꞉ni ahontaietʼthíʼion ne tsi tiónnhe nakorénson!