Jeremiah 7:23 - Ohiatonhseratokénti

²³ Ók kíʼ kheró꞉ri nahionkewenhnaráhkwahke, né꞉ne Í꞉i Raotiní꞉io akénhake tánon ronnónha nahkonhkwetahshón꞉a. Tánon kheró꞉ri thóh ní꞉ioht tsi ronónhnhek tsi nikheró꞉ri, ne ne ahothihianerásthen ne rahothiriwahshón꞉a.

Jeremiah 7:23 ပူးပေါင်းရင်းမြစ်များ

Job Tánon ne Raoronhiakensera 36:11

Tó꞉ka enhonwawenhnaráhkwe, tánon ahonwaiò꞉thenhse, kwáh kí ienhatikóntaʼkwe tsi nihonathenhniseraténions ne kakwasehtsherá꞉kon, tánon tsi nenhonhnónhneke enhonatsenhnonhní꞉hake.

Psalms 119:3

ronónha ne iáh othé꞉nen kentsehatiʼiéra nahó꞉ten ne karihwahéken í꞉ken, ók tsi roháthatse nón꞉we nihiakothaíthake.

Psalms 40:6

Karihwiʼiosehokónhas tánon ne thènenh aiesatátʼtie iáh né thaʼtesatonhontsóni, iáh ne tesehrihwaʼnónhtons ne katʼtshénen kaiatakwékon akonwaʼtsatát꞉tsahate ne ietsienhará꞉kwahke khés ne karihwiʼiosehokónhas né éhʼren ahonsakahá꞉wite ne karihwáʼneren. Khèkhok, teskahontakarónhtons né nakonhiatón꞉tene,

Psalms 81:13

Ó tsi nikaská꞉neks nakonkwetaʼshón꞉has nahionkatahónsathaʼte, nètho nʼIsraerʼró꞉nons nahionkewénhnaraʼkwe!

Exodus 15:26

Wahénron, “Tó꞉ka kwáh tohʼkènʼen enskwahʼwén꞉narahkwe tsi thóh nenhsewáiere tsi nahó꞉ten íkere ne tkariwaiéri tánon ensewateweiénton nakeriwaʼtáʼtseras, Iáh kíʼ thènnenh thaʼkwahréwaʼhte ne kannrahʼtariné꞉tsheras tsi né niʼkhehiérahse ne Egyptró꞉nons. Í꞉i, ne Watiá꞉ner, tsi nikáien né tsi skwatsiéntha.”

Exodus 16:32

Mahís wahénron, “Ne Roiá꞉ner shón꞉kwa ró꞉ri ostónha ahitewanónsthate ne kaʼnátaro, né naʼietʼthiʼiénraʼse tsi nientewatwatsiríne, né nahónton nahontkáto ne kákhwa ne teshonkwáwi nahítewake ne kaʼhenthaʼkekówa nó꞉nen saʼthontashonʼkwahiatí꞉nekenʼwe ne Egypt.”

Isaiah 3:10

Ietsiró꞉ri ne iakoiáneren tsi enhotiʼianerásten, asèken ne enhónhneke tsi nahó꞉ten rotiʼioténhen.

Jeremiah 11:4

Ne ne ateriwahsehronniátshera ne kheʼhionniénni ne sakothisotʼthonkonkénʼen ne ne sahthontatʼkhehiatínekenʼwe ne Egypt, nonhwénhtsia thóh niʼiotónʼne tsi ní꞉ioht ne kwáh tehiotsenhanonhiáni ne rahotiriwáhke. Kheró꞉ri nahionkewénhnarahkwe tánon éhtho nihatí꞉ier tsi niwahkatenná꞉hon. Kheró꞉ri tó꞉ka enhionkewénhnarahkwe, ronónha ne akonhkwetahshón꞉a enhónton tánon Í꞉i ne Raotí꞉io enkénhake.

Jeremiah 11:7

Sahthontakhehiatínekenhwe ne sakothisotʼthonkonhkénʼen ne Egypt, Kwáh tohkénʼen tsi wahkheretiaron nahionkewénhnaraʼkwe, tánon iewakʼkontákwen tsi kheretsiárons nonhkweshón꞉ʼa shé꞉kon nónhwa kénʼen wenhniseráhte.

Jeremiah 13:11

Kwáh tsi ní꞉ioht ne kén niʼwaniataréhsah tsi nihioienawáhkon ne rashionhontáhke, káti ne wakéron nonhkwetahkwékon ne Israel ó꞉ni ne Judah ahionníronhke tsi ahionkhatienawáston. Thóh kíʼ niwahtiéren ne káti ne í꞉i akonhkwetaʼshón꞉a akénhake tánon tenhionkenonhwerahtónsehke ó꞉ni tenhkonhwahrénsaron naksénna; ók iáh tehionkewenhnaráhkwen,”

Jeremiah 22:21

Ne Roiá꞉ner wahiathárahse ne shiʼshahianerasténni, ók iáh tesatʼthontáhton nahishaʼthahonsahtátonʼke. Kwáh éhtho nishiérahkwe tsi náhe shiʼshónʼne; kwáh iáh nonhwénton tahʼtsiatahónshaʼthaʼte ne Roiá꞉ner.

Jeremiah 22:3

“Í꞉i, ne Watiá꞉ner, konnháhon ne ne ahishaʼhióten ne tkariwahiéri tánon ne ioiánere. Tàsheʼne ne iontahtenikonhrahténnis tánon é꞉ren tsi sehwahiatenháwit ne shaʼkonikonhrahtén꞉ni. Tó꞉sa sehiatiéskwen tó꞉ka ó꞉ni ne thaʼsehianikonrhiákʼten ne kenkʼtiʼthoné꞉non, ne tehonthonnahkárhias, tó꞉ka ó꞉ni ne ionahteréhons; tánon tó꞉sa ó꞉ni sehnonhwaʼrhiakónnion ne iáh othènen tehothiníkonh ne kén nónhwe niwahtenátahien.

Jeremiah 24:7

Entheʼkhéhion naskanéktshera nahonatheriéntahraʼne tsi Í꞉i ne Watiá꞉ner. Ethóhʼne kíʼ ʼI꞉i ne akonhkwetahshón꞉a enhónton, tánon Í꞉i ne raothiʼNí꞉io enkénhake, tioríhwa tsi kwáh ronnerhiashaʼkwékon tsi Í꞉i nòkwah nahtentʼthónne.

Jeremiah 31:33

Ne áse aterihwahseronniátshera nenhkónni skátke nonhkweshón꞉a ne Israelronónke nónhwe tsi néntewe nenníseras kwáh kén ní꞉ioht, ráton ne Roiá꞉ner: Rahotinikonrakéson nónwe néntsien natianerénseras tánon rahonerianésons nónwe nenkʼkhiáton. Í꞉i ne raotiʼNí꞉io enkénhake, tánon roʼnónha nakonhkwetahshón꞉a enkénhake.

Jeremiah 32:23

Ók shonsahónneʼwe ne kénʼen ionhontsiáien ó꞉ni wahontsiénawasʼthe, iáh tehonatewenhnahráhkwen tsi nisehró꞉ri tó꞉ka ó꞉ni thóh ní꞉ioht tsi ahonnónhnheʼke tsi nisehrihonniénni; kwáh iáh othènen etʼtehothiʼiéren tsi nisehríhonte. Tánon káti tahshá꞉we akwékon kí꞉ken kakahronniátshera ne ronónhake.

Jeremiah 38:20

Wahkíron, “Iáh tsahiesátkaʼwe ne ronónha nòhkwah. Konhianiténthaʼse nahshaʼthewénhnahrakwe ne Roiá꞉ner rahotiʼriwahnhotátshera; ethóhʼne akwékon tienhiohiénerenhne ne sharihwáhke, tánon ne tsi shón꞉nhe enkanonhstá꞉thonʼke.

Jeremiah 42:6

Ahionhkwerientí꞉io tó꞉ka ó꞉ni iáh, enshakwahwénhnarahkwe ne Roiá꞉ner onhkwahNí꞉io, tsi nikáien ne kwahrihwahnonhtónhni asahterénnahien. Akwékon tienhiohiánerenhne nonhkwahriwáhke tó꞉ka enshakwahwénhnahrahkwe.”

Zephaniah 3:2

Iáh tehiotewenhnaráhkwen nowén꞉na; iáh tehioienàhon nahonsakonwatakwahríshion; iáh teoniahésen ne Roiá꞉ner; iáh ákta teiawéton ne aoní꞉io í꞉ken.

Zechariah 6:15

Ronhnón꞉kwe nahinónhson nón꞉we thathinahkerénion eʼthò꞉ne nahonshahatinonhsón꞉ni ne Raononhsatokénhti ne Roiá꞉ner. Tanon nó꞉nenh enskanónhshison, enshaterienʼtá꞉rahne né꞉tho tsi Roiá꞉ner iehakató꞉rion ne shonhà꞉ke. Tóh꞉ki nenhiá꞉wenhne tó꞉ka kwáh entiewén꞉narahkwe ne Roiá꞉ner Saní꞉io.

Zechariah 7:7

Ken nahó꞉ten ne Roiá꞉ner rá꞉wenh rohnonhà꞉ke ne thothihénton rothitokenséhakwe ne thóh sonthakahá꞉wi ne Jerusalem kwáh í꞉ken tsi iokwahtiehʼne ó꞉ni ionthonkwethakáhthekwe ó꞉ni iakotiohkowá꞉nenhne iáh kahná꞉thakon kók tehienahkeréhkwe ók kahnhatakʼthóntie ó꞉ni, ók ki ó꞉ni nenhtieʼnéhsons nokwá꞉ti ionwenhtsiakérons ó꞉ni ne tsi tiononhtharón꞉nions ne tsi iaʼtewatshéntos.

Romans 16:26

Nók kíʼ neh tsi nihotihiathónnions ne rothitokenséhakwe ne iorihónni iakotiokowánen nonkwesónha aiakonikonraiéntaʼne nʼoriwíʼio; ne ronnheʼónwe Rawenni꞉io rotennáʼon kwáh ken tiokwakwékon aiakoteriéntaraʼne nʼoriwíʼio, nekáti nakwékon ahontahonwétaʼkwe ne Rawenni꞉io ó꞉ni ahonwawénnaraʼkwe.

2 Corinthians 10:5

Ne nen né꞉ʼe shá꞉ka kenʼ norihwakwé꞉kon ne kanaiéhtshera tsi aʼé꞉ren akahawí꞉ton tóhsa ne akarihón꞉ni ne iáh thahonwaientéhrhaʼne ne Rawenni꞉io. Ieiakhiʼnikonhrénhas nonkweʼshón꞉ʼa nahonwawennaráhkwe ne Kerístos.

Deuteronomy 11:27

ne kahiataterí꞉tshera, tó꞉ka ensewatewénhnaraʼkwe tsi nihatón꞉nions ne Roiá꞉ner sewaNí꞉io né꞉tho tkwá꞉wis nón꞉wa wenhniserá꞉te;

Deuteronomy 13:4

Tsi sewáser ne Roiá꞉ner tánon tsisewakwénienst; tsi sewawénhnarak ó꞉ni sewateweiénton ne rahoriwatà꞉tsheras; tsi sewasenhnaiénsek tánon sewariwatokénhak ne rahonhà꞉ke.

Deuteronomy 13:5

Ók ietsinonhwarià꞉kon ónhka ne tehatiriwathétha natetshénseras tó꞉ka ó꞉ni ne rotitokénhse ne ieʼtshiró꞉ris ne tó꞉sa atsisewawénhnaraʼkwe ne Roiá꞉ner, tsi raónha setsisewaniakénton ne Egypt nón꞉we, tsi thóh nónwe nisewanáskwa kén꞉en. Né꞉tho onhkweshón꞉as kwáh ronhnonhkweʼtahétkens ó꞉ni ronhtenièn꞉tha naieʼtsihiatahará꞉kwaʼthe tsi nitsónhe ne Roiá꞉ner tsi nitsisewahró꞉ri nahitsónhnheke. Ó꞉nenk tsi enhonwatinonhwarià꞉kon, ne naónton nahisewá꞉ti kí꞉ken kariwahetkénhsera.

Deuteronomy 30:2

Tó꞉ka ní꞉se tánon tsi niensewatwatsí꞉rine tenhtsisewatkahraté꞉ni tánon Roiá꞉ner nòkwah nientsísewe tánon kwáh seweriasakwé꞉kon tsi ensewatewénhnaraʼkwe ne rahoriwatà꞉tsheras ne tkwá꞉wis nón꞉wa wenhniserá꞉te,

Deuteronomy 30:20

Tsi sewanorónhkwak ne Roiá꞉ner sewaNí꞉io, tsi sewawénhnarak tánon sewariwatokénhak ne rahonhà꞉ke, tánon ethò꞉ne ní꞉se tánon tsi niensatwatsí꞉rine kwáh entionhnhésonhke ne tsi tiohontsá꞉ien né꞉tho tsi sewarahratstén꞉ni nahontashaká꞉wen ne ietsisoʼthonkonhkén꞉en, Abraham, Isaac, tánon ne Jacob.”

Deuteronomy 30:8

tánon káti shé꞉kon ensetsisewawénhnaraʼkwe ó꞉ni ensewateweiénton akwé꞉kon ne rahoriwatà꞉tsheras ne tkwawí꞉hons nón꞉wa wenhniserá꞉te.

Deuteronomy 4:10

tsi nihioʼtónhne ne tewenhniserá꞉teʼkwe raohénton ne Roiá꞉ner waʼtesewá꞉taʼne ne sewaNí꞉io ne tsi tionónhte ne Sinai nó꞉nen sahá꞉kenhse, ‘Ietsihiaʼtaró꞉rok nonhkweshón꞉a naʼkénton. Tewakatonhontsóni nahonaʼthontè꞉ne tsi nahó꞉ten wá꞉tien nakí꞉ron, ne ká꞉ti ne kwáh ahatiweientéʼtaʼne naionkewenhnaráhkwe kwáh tsi nikarí꞉wes enhonʼnónhneke tánon ká꞉ti kwáh ashakotirihón꞉nien ne sakotihioʼonkónhas ne thóh nónhne nahatí꞉iere.’

Deuteronomy 4:40

Sewatewén꞉narak akwé꞉kon ne raoianerénseras tsi nonhtà꞉tion nón꞉wa wenhniserá꞉te, tánon akwé꞉kon tshienioiánerenhne ne sewarihwà꞉ke ó꞉ni tsi nenhsewatwaʼtsí꞉rine. Iensewakonhtà꞉kwe tsi thóh ensewanákereke ne tsi ionhontsá꞉ien ne Roiá꞉ner sewaNí꞉io tsisewawì꞉re nahisewawenkónhweke tsi nénhwe.”

Deuteronomy 5:16

“‘Sheʼkwénienst ne iaʼníha ó꞉ni ne sanisténha, tsi Í꞉i, ne Watiá꞉ner sewaNí꞉io wakwahró꞉ri, ne kwáh ahioianeréhake ne sarihwà꞉ke tánon káti nahónton karí꞉wes ashón꞉nheke tsi ionhontsá꞉te ne tkonhiawí꞉re.

Deuteronomy 5:29

Tó꞉ka shí꞉ken tió꞉konte ki é꞉tho nahonhnonhoténhseke! Tó꞉ka shí꞉ken tió꞉konte aiontkweniénstake tánon akwé꞉kon ahontewenhnaráhkwake nakeriwatà꞉tsheras, káti norihwakwé꞉kon tsiahioiánerenhne ne raotirì꞉wake ó꞉ni tsi nienhontwatsí꞉rine tsi nénhwe.

Deuteronomy 5:33

Akwé꞉kon sewatewénhnarak, ne káti norihwakwé꞉kon tsiahioiánerenke ne sewarihwà꞉ke tánon káti kwáh niahisewakónhtà꞉kwe thóh ahisewenhterónhtake ne tsi iohontsá꞉ien nenhsewatié꞉nawatste.

Deuteronomy 6:3

Sewatʼthónthe, O Israerʼró꞉nons, tánon sewatewénhnarak! Ethò꞉ne ki akwé꞉kon tsiensewaianerásten, tánon ensewenhtiokwashátsteke tánon thó꞉nonhwe nenhtiónheke ne ionhontsá꞉ien ne tentkonhtì꞉rake ne kontiʼtshé꞉nens ó꞉ni ne iaweʼtowá꞉nen kaienʼthó꞉tsheras, kwáh ki tsi ní꞉ioht ne Roiá꞉ner ne Sakoní꞉io nonkwasoʼtsheraokonhkén꞉en, tsi rorahrátston.

Hebrews 5:9

Tsi ónen watatónkothe, raónha ne kashatsténshera waháton ne ionnhehónwe kaiatahkeʼnhátshera né꞉ne tsi niiá꞉kon nenhonwahwénnarahkwe,

1 Samuel 15:22

Tánon ne Samuel wahén꞉ron, “Ne Roiá꞉ner tóh kénh nihatsennonniátha ne watʼtsaháhtons iaiéthate ó꞉ni ne watéskonte, tsi naiontewennará꞉kwe ne raowennaó꞉kons ne Roiá꞉ner? Oriwiʼiohónwe, naiontewennará꞉kwe sénha ne ioiá꞉nere tsi ní꞉ioht ne kariwiʼiosehokónhas, tánon ahiontahón꞉sathaʼte tsi ní꞉ioht ne ronarésens teotinakarontón꞉ʼahs owirasón꞉ʼahs.