Jeremiah 6:20 - Ohiatonhseratokénti

²⁰ Nahó꞉ten katsteristhákwa ne wenhnekeráhkon tionhkhawitenni ne Sheba nónhwe, ó꞉ni ne iekhwá꞉konhonsthákwa ne ahinónhson nióres tionhontsiaténion? Iáh thatiéna ne rahonahthatawítsheras iáh ó꞉ni tahonkherientí꞉io ne rahothiriwiʼiosehokónhas.

Jeremiah 6:20 ပူးပေါင်းရင်းမြစ်များ

2 Samuel 15:12

Tsi nikarí꞉wes ne Absalom ne wahateriwathéntsiaʼte wahatenaskwaʼtsahatá꞉nion, Ahithophel Giloró꞉non ne sahotiéten ne iahá꞉sa, ne roʼtenikonráwiskwe ne Táwit, thóh nón꞉we nithawénon raonatowanénhke Giloh. Ne kariwaséhton ontehiá꞉ron wakasháststenhne, tánon nonkweʼókons iakotsiokowanenhonhátie ne Absalom raoriwá꞉ke.

1 Kings 10:10

Taháwenh natathawítseras né tiohá꞉seron: thó꞉wah káknonh ne oiéri tewenhniawehetserásen nikakonhtseráke nihióksthe owistanó꞉ron tánon kwáh íken tsi iawetowánens ne ionhtekhwakonhonsthákwahs ó꞉ni nowistanoronhsónhas. Tsi nihiawetowánen ne ionhtekhwakonhonsthákwah wahá꞉wen né tsiahonháha tsawetowánen tsi níkon ahoienáhonhke tsi nitsawénon.

Psalms 40:6

Karihwiʼiosehokónhas tánon ne thènenh aiesatátʼtie iáh né thaʼtesatonhontsóni, iáh ne tesehrihwaʼnónhtons ne katʼtshénen kaiatakwékon akonwaʼtsatát꞉tsahate ne ietsienhará꞉kwahke khés ne karihwiʼiosehokónhas né éhʼren ahonsakahá꞉wite ne karihwáʼneren. Khèkhok, teskahontakarónhtons né nakonhiatón꞉tene,

Psalms 66:3

Tsisehwaʼró꞉ri ne Rawenni꞉io, “Tsi niioriwanerakwaténion tsi nihaié꞉ra! Né aoríhwa tsi nisashaststenserowánen ne iesáhshons waʼhontʼtókerihke ne sahénton.

Exodus 30:23

“Iahá꞉saf né kwáh wenhienakonhónson—12 iawénhre nikakonhtseráke ne watneʼkonhniáton myrrh, 6 nikakonhtseráke ne wenhseráhkon cinnamon, 6 nikakonhtseráke ne wenhserákons cane,

Proverbs 15:8

Roiá꞉ner rotonhnháhere nó꞉nen tionkweʼtaié꞉ri ronaterén꞉naien, nok ráhswens ne thatíhas karihwiioseʼokón꞉ʼa ne rotirihwanéren.

Proverbs 21:27

Roiá꞉ner ráhswenhs nó꞉nen iáh tetionkweʼtaié꞉ri aontahonwahawíhten ne karihwiioshokón꞉ʼa naterennaientatsherá꞉kon ne tsi wanonhtonnionhtseráksens tsi ní꞉ioht tsi ronnonhtonniónhkwas.

Isaiah 1:11

Nahó꞉ten nènhneʼe kástha nakerihwáke thóh nahkonhá꞉ke ahietsiʼiatsiatátʼtsahate ne kontitshénenhs? Rá꞉ton ne Roiá꞉ner; Kwáh ísiʼnónhwe tsi iatewatserihse tsi nihsehiatsiaʼtátʼtsahatha ratiʼiathakwékon ne tehotinakaronhtónha ratítsinn tánon ne ióresens ne ietsiʼiarehsénston katshénens; Iáh ne tekhatsenhnonhniá꞉tha ne raotinekwénhsas ne kenhnithotiʼiónsas tionhnónskwarons ratítsinn, khés ne teiotinakaronhtónhas, khés ne kaiatákeras.

Isaiah 60:6

Ronaʼtiokwatsáni rotiʼniakwáher entiesaróroʼke, né꞉ne kennithontiʼiónha rotiʼniakwáher né꞉ne Midian tánon Ephah nón꞉we nenhtónh꞉ne; ratiʼkwé꞉kon ne Sheba nón꞉we kwáh enthón꞉ne. Kwáh né enthaʼtíhawe nowistanórons tánon ne kanetanóron, tánon enhatiʼrihówanaʼte ne raononweratón꞉tsheras ne Roiá꞉ner.

Isaiah 66:3

Ónhka akénhake nahononwarhiá꞉kon né tionhnónskwahron teonákares tsi ní꞉ioht náh né nón꞉kak wahonthatenonwarhiá꞉kon ónkwe; ónhka akénhake nahionteskónthen né teiotiʼnakaronhtónha owí꞉ra, tsi ní꞉ioht náh nónkak watonwaniá꞉rhiake éʼrhar; ónhka akénhake nahontahiéhaʼwe onátsa ahontahiéiesʼte, kwáh né꞉ne ónhkak tahiéiesʼte kwésʼkwés onekwénhsa; ónhka akénhake né arónhniaʼte né iontatehiarastákwah tsi ahontahá꞉ieste né kanetanó꞉ron, akwáh thóh ní꞉ioht né nónkak kaiatónhni akonwaiataʼtérisʼte. Né kí꞉ken né akahónha iakotaterakwénhni tsi nihieweienhnó꞉tens, tánon thóh raonatehenserákon ronatonhnáhere;

Jeremiah 14:10

Ne Roiá꞉ner ráton tsi nòkwah kí꞉ken onhkweshón꞉a, “Rohnonhwésʼkwahni nahionkwahtékwahse, ó꞉ni kwáh iáh tahonthahontaʼtheniaróh꞉tahrohke. Káti kwáh iáh othènenh tewahkerientí꞉ios tsi nòkwah ne rohnónha. Kwáh enkehiárahke ne wahétken tsi nihonahtieráhnion tánon enkheréwahte tioríhwa tsi nihotirihwáhneren.”

Jeremiah 14:12

Shé꞉kon ó꞉ni nahonnenhtóntieʼthe, Kwáh kíʼ iáh thakhehiatahónshathaʼte tsi naʼtehonséntʼthos nakheiénahwaʼseh; tánon ó꞉ni ne kwáh aterennaienthatsherákon tsi akonwahtsatatʼtsahaʼte ne katʼtshénen ó꞉ni nonátsa ahiontthátse, kwáh kíʼ iáh tahionkenikonhrí꞉iosʼthe. Khèʼkhók, ateriʼiosehráhke tsi enkhenonhwahrhiákon tánon athonkarhiákon ó꞉ni kanhrahtarihnétshera.”

Ezekiel 20:39

Ne Ronhnontí꞉io Roiá꞉ner ráton, “Tánon nónhwa, sehwahkwékon kíʼ Israerʼró꞉nons, Tó꞉ka thóh nisewaskanekseró꞉ten! Wáhs kíʼ ietʼtsihiótens ne sewahiatonhnishónhas! Ók kíʼ wahkwahronhkáten nónhwa kénʼen ienwatásahwenh tó꞉ka iáh taskwahwénhnarahkwe; ók kíʼ naksenhnatokénti iáh shé꞉kon nonhwénhton tahonsehsewahsenhnaiésate ne tsi iaietʼtsítaʼtshe ne sewahiatonhnisónhas.

Ezekiel 27:22

Né sawenhsónha ne rontkéronhs né Sheba nónhwe ó꞉ni ne Raamah owistanoronhsónhas, owisthanórons tánon ne kwáh tiohiáneres iotekkhwakonhonsthákwah wathisehwahtháton.

Hosea 8:13

Eʼthó꞉sane ne iehatí꞉tats ne kwáh tsoiánere wateskón꞉te, tánon ratiwá꞉raks, ne Roiá꞉ner iáh kí teshakoié꞉nas. Ó꞉nen kí kwáh enhrehiá꞉rake ne raotirihwaneraháktsheras, tánon ensakoré꞉wate ne raotirihwaneraháktsheras; kwáh Egypt nienshón꞉ne.

Hosea 9:4

Kwáh iáh tahontahatinekáweron nonenharákeri nahatinekí꞉ra né꞉ne ahonwatatʼtse ne Roiá꞉ner, tánon tsi nikonwanateskontʼtha kaʼtshé꞉nens iáh ne thahonwanikonhrí꞉ioste. Ne ní꞉ioht tsi wateskónte kwáh thóh nenhiotónhake kwáh né꞉ne iakotsionhniónkwen akonà꞉taro í꞉ken; tsi nihiá꞉kon né꞉ne énhieke kwáh kí thenhiakoiatatiónhne; asè꞉ken ne raotinátaro ne khók enkénhake ne tsi ronhtonhkáriaks; tánon kwáh iáh tehiówenk nahontahónhne ne Raononsatokentikówahne ne Roiá꞉ner.

Malachi 1:10

Weh, ónhka naionská꞉neke naienientháhrho ne tsi kahnhoká꞉ronte tánon aionté꞉kaʼte ne tsi ktsenhahráhkhwa ne iáh oh thé꞉non tshiaʼtákene? Iáh tewakerienʼtiióhstha ne tsonhá꞉ke, Rá꞉ton ne Sakoiá꞉ner ne ratironhiaʼkehró꞉nonʼs. Tánon kwáh iáh thatié꞉na naontesewá꞉iehste ne sewahtsaʼnà꞉ke naontá꞉we.