Jeremiah 51:53 - Ohiatonhseratokénti

⁵³ Iawerohátien ne Babylon tsi iéwas tsi nitiótʼte ne tsík karonhiáte, ó꞉ni iawerohátien tsi sénha ioshastsʼteserowahnenhenhátie, kwáh kíʼ entekhehiaténieʼte ne tehontátʼtions nakonhwahnénhsko,” ráton ne Roiá꞉ner.

Jeremiah 51:53 ပူးပေါင်းရင်းမြစ်များ

Genesis 11:4

Eʼthó꞉ne wahonní꞉ron, “Ánion kiʼ ó꞉nen kanatowá꞉nen tewatenatón꞉ni, ó꞉ni noʼnikáhtha, ne ne iaón꞉we tsitʼkaronhiá꞉te, ne ne aetewahsennowanénhake ó꞉ni ne ne tóhsa ohontsakwé꞉kon taetewaré꞉ni.”

Job Tánon ne Raoronhiakensera 20:6

Shé꞉kon ne thóh nahathinenhiéshonke tsi nió꞉re tkaronhiá꞉te, tánon ne ratinontsí꞉nes iéwas tsi tsioʼtsatarón꞉nions,

Isaiah 13:17

Satkátho, wakheioriáneron ne Medes niaʼsakonatsatónhti, ronónha ne iáh othènen tehatikweniénstha ne kawistaráken tánon iáh ne tehotinikonrotákwahs nowistanóron.

Isaiah 41:25

Saiá꞉ta wahiʼiatorhiá꞉neron nothorèke nonkáhti, tánon kí wáh꞉rawe, kwáh tsinentʼkarakwínekenʼne ienhakenáton Kwáh kí tensakoskwahserón꞉kwahte ne ratikoráshons tsi ní꞉ioht nonawástha, tsi ní꞉ioht ne ratʼtsetónhni teonawatsʼthawénrie ne ionawastʼthakarí꞉io.

Isaiah 47:5

Shá꞉tien sák thasatatónhni, tánon tsi tetiókaras niaʼháse, saiénha ne Chaldea! Asèken ní꞉se iáh ó꞉nen ské꞉kon thaʼhonsaiesanatónhkwahke tsoniaró꞉taron tsi kanakeraserá꞉ien.

Isaiah 47:7

Í꞉senh, “Kwáh kí entewakeniaró꞉taron tsi nènhwe enkénhake,” né ká꞉ti tsi iáh tesarihwakéron kí nahorihoténsons ne seriá꞉ne khés nahisisehiaráhon ne tsi ieionateríhokʼte.

Jeremiah 49:16

Ne tsi nisehnáhie ne weshaʼnikonhráhten. Iáh ónhka tehiesatʼtsánis tsi nióre tsi ísere iesatʼtsánis. Tsi ionitstenrhiákon nónhwe nishíteron, ne ne kwáh ononhthaʼkénhiaʼte; ók iawerohátien thóh nióre tsi éhneken ieshíteron tsi ní꞉ioht ne ákweks, nék kík sáhka ne Roiá꞉ner kwáh ki enthiaiátenhte. Ne Roiá꞉ner rothatíhon.”

Jeremiah 50:21

Ne Roiá꞉ner ráton, “Iahetsihiatsatónti nonhkweshón꞉a ne Merathaim ó꞉ni ne Pekod nónhwe. Ietʼtsinonhwahrhiakónhnion tánon ietʼtsihiáthont. Akwékon éhtho nahsewáhier tsi nikwahnáhon. Í꞉i, ne Watiá꞉ner, wakatáti.

Jeremiah 50:25

Ne Roiá꞉ner wahthononhónti tsi rathaʼkweniaientákwah ne rateriʼiostáhkwahs, tánon tahahiákenhwe ne rateriʼiostáhkwahs ne tsi nihonahkwénʼen, asèken ne Ronhnonhtí꞉io Roiá꞉ner Roshastsʼtenseroʼwáhnenh rohiotenseráhien nahohióten ne Babylonia nónhwe.

Jeremiah 50:45

Káti satahónshaʼtat tsi niwahkatenikonhríson tsi nòkwah ne kanatowáhnen ne Babylon tánon tsi níkereh natkheiérahse nahonkwetaʼshón꞉a. Iehióhe ne ahokʼshatashón꞉a kwáh tienhonwahtiʼhiatísehre, tánon ne tsi rohthinonhshó꞉ton ononhshóskonh enwáhton.

Jeremiah 51:11

Sehwahiotiʼhiónnion ne kaiénkwires! Tésehwak ne tehioniatástha! Asèken ne Roiá꞉ner wahshaʼkahorhiáneronh ne rathiʼshástsʼtes ne Ronhthiʼnonhtí꞉ios ne꞉ne Medes niahathiʼnenhrahsehrónhni tsi nòhkwah ne Babylon tánon akonhwáhthonʼthe. Né kí꞉ken tsi nenh shaʼkarhiákʼthe tsi nòkwah nónhka ne iáh tehiakorihwahkweʼniénston ne Raononhshaʼtokentiʼkó꞉wah. Ne iesakonatsiatóntses ronaterihón꞉tons wahonwatirihónten, “Sewahiotiiónhnion ne sewaienkwí꞉res! Sewaweienénhta ne tesewanientenstáhkwa!

Jeremiah 51:25

“Satkátho, O shastsʼtenserowáhnen ionónhte, sonhontiéntʼtos! Í꞉i ne tetsiatátʼtions” ráton ne Roiá꞉ner. “Kwáh ienkonhiéna, tenkonhionhontsoʼiénhten, tánon ne wahkenrontáhkwen ne iotetʼkháhon nónhwe ienkonhiatónti.

Jeremiah 51:48

Rahtiʼkwékon ne karonhiáke ó꞉ni ne onwenhtsáke rononhnhénions tenhatiríhwahkwe natonnahráhtshera, othoréhke nónhwe enthatiʼiénthakwe tsi nenhtʼthónʼne ne sahkonahtóntha ronhterí꞉ios niakonwahtiatónhti ne Babylon.” Ráton ne Roiá꞉ner.

Jeremiah 51:56

Ne rathiʼnenhrahtóntha ronterí꞉ios iekonhwahtsathóntion ne Babylon. Ne rathishástsʼtes ahonkwetashón꞉a ronwahtiʼiénenh, tánon ne ronhteriʼiostákwah ronhtsanáhke tekáris. Asèken ne Roiá꞉ner Rawenni꞉io rahónʼa tatʼkáhwas ne tkaiéri karewahtátshera, tánon tahahawihátie ne Babylon akwékon tsi natehioténhtion.

Jeremiah 51:58

Ne tehiotenhenrahnónhiaʼni ne wahtenhénrohte ne Babylon nónhwe onhwenhtsáke enwáhtionhke, tánon ne éhneken tiotʼthónnions ne ioʼtenhenrenhtónnions enwatʼtsahathónhake. Ne raotiʼhioténsehras nonhkweshón꞉a kwáh iáh othènen tsatakéhne; ne raotiʼronhiakénsehra tenhiotónkwahkwe. Í꞉i, ne Watiá꞉ner Keshastsʼtenseroʼwáhnenh, wakatáti.”

Daniel 4:30

Ne ronnontí꞉io wahén꞉ron, “Sewatkáhtho tsi niionatatshà꞉ni ne Babylon! Ne wakonniá꞉ton nʼakanatakweʼní꞉ioke naweʼnéhston nʼakesatsténhsera ó꞉ni teiotenonhianíhton, nʼakerenhsarónhtshera ó꞉ni kahsennowá꞉nen.”

Amos 9:2

Ethó꞉sane niahatisonhiónhni ne Sheol, kwáh kí thóh nónh꞉we ne katsánake nienhiakoiathénhawe; eʼthó꞉sane iahatirát꞉then karonhiá꞉ke, kwáh kí thóh nónh꞉we thentekhehiathénte.

Amos 9:4

Tánon ethosà꞉ne niahontatenó꞉ton raotihénton ne tehontat꞉tions, thóh kí nón꞉we nenhkénane nasareʼkó꞉wa ahiakowent꞉to; tánon kí kwáh thenkhehiatkáneren ne nahotikaréwate tánon iáh ne naotihianerásthen.

Habakkuk 2:9

Wasehkwatsésthen ne sakwáhtsire ne tsi nahoʼténhsons shekwenhá꞉ton nakorénhsons ne tsi nithesehianonthón꞉ni, tánon wasathenonhsonhniánion ne kanonsí꞉ios ó꞉ni iononsaní꞉rons ne nasehiatanónsthate ne sawá꞉tsires tsi nokwáh ne atkarónhniat. Tiorì꞉wa tsi kíʼ ken orihwakwé꞉kon tsi thóh násehre, ne Rawenni꞉io kwáh kíʼ enhiaré꞉waʼte.