Jeremiah 51:11 - Ohiatonhseratokénti

¹¹ Sehwahiotiʼhiónnion ne kaiénkwires! Tésehwak ne tehioniatástha! Asèken ne Roiá꞉ner wahshaʼkahorhiáneronh ne rathiʼshástsʼtes ne Ronhthiʼnonhtí꞉ios ne꞉ne Medes niahathiʼnenhrahsehrónhni tsi nòhkwah ne Babylon tánon akonhwáhthonʼthe. Né kí꞉ken tsi nenh shaʼkarhiákʼthe tsi nòkwah nónhka ne iáh tehiakorihwahkweʼniénston ne Raononhshaʼtokentiʼkó꞉wah. Ne iesakonatsiatóntses ronaterihón꞉tons wahonwatirihónten, “Sewahiotiiónhnion ne sewaienkwí꞉res! Sewaweienénhta ne tesewanientenstáhkwa!

Jeremiah 51:11 ပူးပေါင်းရင်းမြစ်များ

1 Kings 11:14

Káti ne Roiá꞉ner wahahiónhnien ne Hadad, né꞉ne kanonhtiʼiótshera kawátsire íken ne Edom, tahotirihwárahne ne Solomon.

1 Kings 11:23

Né Rawenni꞉io kwáh ó꞉ni wahahónhnien ne Rezon né꞉ne Eliada roiénha tahiatátʼtson ne Solomon. Né Rezon thohʼtehotékwaʼse ne roʼnáskwe, ronhnontí꞉io Hadadezer né Zobah nónhwe,

1 Chronicles 5:26

Sók kíʼ ne Rawenni꞉io wahahónhnien ne Rakora Pul né Assyriaró꞉non (né ó꞉ni raoʼsénhna ne Tiglath Pileser) niashaʼkonenhrénhten ne raoʼtinakeraserákon. Shaʼsakorékwahte tsi ratiʼtsiókwahien ne Reuben, Gad, tánon ne Tsit-karakwínekens nòkwati ne Manasseh tánon né꞉ne tsi nénhwe Halah, Habor, tánon ne Hara, tánon ákta ne Gozan Kaniataratátse thóh nón꞉we ienshontenatónhni né꞉ne tsi nénhwe enkénhake.

2 Chronicles 36:22

Né sonhtonhthoseratsérenhte ne Cyrus né꞉ne Persiaró꞉non shiʼhakóra, né Roiá꞉ner né waʼrón꞉niaʼte tsi nihá꞉wen rahonhá꞉ke ne rotokenséhakwe Jeremiah né thóh naiá꞉wenhne. Waʼhonikonráhreʼke ne Cyrus nahaianerenhserónh꞉ni kén nahiotónhake tsi ashakoró꞉ri tánon iehateniethánion akahiátonke ahiorahkarenitónhake tsi akawenhnanó꞉thaʼke kwáh tsikʼnón꞉we ne raonakeraserákon:

Ezra 1:1

Ne sonthonthosehratsérenhte ne Cyrus ne Persia shahakó꞉ra, ne Roiá꞉ner ne waharihwí꞉sa etʼnaiá꞉wenhne tsi nihá꞉wen rahonhà꞉ke ne rotokenséhakwe Jeremiah. Wahonikonhrá꞉reke ne Cyrus nahaianerenhserón꞉ni né ken ahiótsete ne karihwisahátshera tánon iehathéniet nakahiátonhke tánon iorahkareníhak tsi akawenhnanhóthake ne kwáh tsiknonhwéson ne rahonhnonhtiiotsherá꞉kon:

Isaiah 10:26

Ne Sakoiá꞉ner ne ronterí꞉ios ratironhiakeró꞉nons kwáh né enráts꞉te nó꞉kwire niaʼsakotsatónhti, tsi kí né nisakohién꞉ton ne Midianró꞉nons ne iotstenhráhke ne Oreb; tánon kwáh enhaharáthate ne raoténhnits èhʼneken ne kaniatarakhekó꞉wane, tánon kwáh kí ensahará꞉thaʼte tsi kí ne nihoiéren ne Egypt nón꞉we.

Isaiah 21:2

Né꞉ne kwáh ioriwaní꞉ron tsi ní꞉ioht tsi wahontʼró꞉ri; tánon ne ranikonrátha, sakotenhnínons, tánon ne sakotónhtha ratóntha. Thóh iaháse, Ó Elam, tetswának, Ó Media; akwékon tsi niʼtsiakahonníserens ahónha iorihonhníhon kwáh kí èntsake.

Isaiah 21:5

Waʼhontekhwaratsheraʼserónhni, wathatiʼtakwáhrihte nokénha ietskarónkwah, watʼthotskáhon, wahatinekíra. Tesewátat, ne sewentsiokwakweʼní꞉ios, wahonhnehienárhoh ne teioniatátstha.

Isaiah 41:25

Saiá꞉ta wahiʼiatorhiá꞉neron nothorèke nonkáhti, tánon kí wáh꞉rawe, kwáh tsinentʼkarakwínekenʼne ienhakenáton Kwáh kí tensakoskwahserón꞉kwahte ne ratikoráshons tsi ní꞉ioht nonawástha, tsi ní꞉ioht ne ratʼtsetónhni teonawatsʼthawénrie ne ionawastʼthakarí꞉io.

Isaiah 45:1

Né kí aoríhwa rá꞉ton ne Roiá꞉ner rahonhàke né roiatará꞉kwen né꞉ne Cyrus, tsi nikáien ne saweientetákwen riʼnentsawá꞉kon né nasakotsatakwení꞉ioste niaʼkahontsakeró꞉nons ne raohénton tánon naharíhsi ne rontiʼnontí꞉ios raonatiátawis wakóhses, né nahontenontonhkwehá꞉tons ne raohénton— tánon ne ioʼthenhenrenhtónhnions iáh thaʼhonsakanó꞉tonhke:

Isaiah 45:5

I꞉i ne Watiá꞉ner, tánon iah ónhka nakó꞉ren né꞉ne akénhake; né tsiaʼtákʼta iáh nó꞉ia tekáien ne Ní꞉io akénhake. I꞉i konshatstenhseráwi, iawerohátsien tsi iáh testsientérihkwe,

Isaiah 46:11

iehinatón꞉nions nètho akweksʼkówa, né꞉ne Cyrus, né tsitʼkarakwínekens nókwah nént꞉re, né nahinonkó꞉wa tkanakeraseráien né rónkwe riʼhiatarákwen nahasniénon. Tewakewenhniʼnekénʼen, tánon kwáh énkhewe né naiáwenhne; Wakatenikonrónhni, tánon kwáh kí thóh nénhtiere.

Jeremiah 46:3

“Ne Egypt ratisenhnowáhnenhs wahthoʼthihénrehte, ‘Sehwahweienénhtan ne sehwatʼrohostáhkwah tánon iaʼsehwahténhti tsi tewahtherí꞉io niahásehwe!

Jeremiah 46:4

Ietsihiakweʼniáren ne sewatʼtsenenhókon kosáhtens tánon sewahshá꞉ten! Sewahnenhrahsehrónhni tánon sewahnonhwahró꞉rok ne iononhwahrotserahní꞉ron! Sehwahiothiʼhión꞉ion ne sewahiénkwiʼrehs! Sewatʼtserónhniat ne tehioniatátstha!’

Jeremiah 46:9

Ethóhʼne iaháseweh, ne kosahtens tánon ne tekeniʼtehiokahkwénhthonte otsiónkwahs tánon ne rahtiʼshástsʼtes ronhterí꞉ios ne Egypt nónhwe! Tásehwe, sehwahkwéhkon ne thiʼsehwahtenhró꞉hons ne Ethiopia nónhwe, ó꞉ni ne Libya, tánon ne Lydia nónhwe tsi nikáien ne rohthirenhnáhon náhonste ne tehioniatátstha ó꞉ni nahénhna!’”

Jeremiah 50:25

Ne Roiá꞉ner wahthononhónti tsi rathaʼkweniaientákwah ne rateriʼiostáhkwahs, tánon tahahiákenhwe ne rateriʼiostáhkwahs ne tsi nihonahkwénʼen, asèken ne Ronhnonhtí꞉io Roiá꞉ner Roshastsʼtenseroʼwáhnenh rohiotenseráhien nahohióten ne Babylonia nónhwe.

Jeremiah 50:3

“Othoréke enthaʼtiʼiénthaʼkwe ne kentiókwah ne iakonhwahtsatónti káti káiase enhonnónhniaʼte nahonhóntsa, tánon kwáh iáh ónhka nonhwénhton éhtho tahonsahienáhkereʼke; tetsáronh ne rónhkwe ó꞉ni ne konhtírhio enhontèko.”

Jeremiah 50:45

Káti satahónshaʼtat tsi niwahkatenikonhríson tsi nòkwah ne kanatowáhnen ne Babylon tánon tsi níkereh natkheiérahse nahonkwetaʼshón꞉a. Iehióhe ne ahokʼshatashón꞉a kwáh tienhonwahtiʼhiatísehre, tánon ne tsi rohthinonhshó꞉ton ononhshóskonh enwáhton.

Jeremiah 50:9

Kwáh enkhetiokorhiáneron ne rotiʼtiokwahsháststes nothoréhke nónhwe tánon enkheʼhiónnien niaʼhonwahnahtsatónti ne Babyloniaró꞉nons. Tenhathinenhráhthaʼte nahonterí꞉io nahonakeráhsera tánon enkhonhiónheʼwe. Ronthirenhnáhon nahontó꞉rahte, nienhonrónhthaʼte ne kaienkwére iáh nonhwénhton tesohnatewáhthon.

Jeremiah 51:12

Sewahniataʼrahkétsko ne ionterihiostáhkwah tsi nòkwah ne Babylon! Shaʼietʼtsitsiokwahiésten ne ratiʼnikónhrahre tánon teietʼtsítas nahontenhnikonhráhren. Sewahtaʼtewenienhnénhtan nahisehwahnénhrenhte,” asèken ne Roiá꞉ner kwáh enharihwahiérihte tsi nihotenikonrónhni tsi nòhkwah ne Babylon.

Jeremiah 51:24

“Tsi nenh shaʼteróhroke, kwáh ensetʼkhárhiaʼse ne Babylon ó꞉ni nonhkweshón꞉a ne Babylonia nónhwe ne tsi niwahétken tsi nishaʼkonahtiérahse nakonkwetaʼshón꞉a ne Jerusalem nónhwe,” ráton ne Roiá꞉ner.

Jeremiah 51:35

Aiáwenhs ne Babylon ahonshaʼkonhwahkárhiaʼtse tsi níkonh ionkwahteniakatsʼténhni,” rónton ne Jerusalemró꞉nons. “Aiáwenhs ne Babyloniaró꞉nons kwáh akanahnónhake tsi ahonshaʼhonatʼkárhiaʼse tsi níkonh shaʼkothinetkwáhthon,” wáthon ne Jerusalem.

Jeremiah 51:36

Ne Roiá꞉ner warénhase ne Jerusalem, “Kwáh Í꞉i tenkonhriwahkénahse ne sariwahshón꞉a, tánon kwáh Í꞉i ensetʼkhárhiaʼke ne shaʼrihwáhke. Enstátʼthaʼte nahoniatharáhshona, ó꞉ni nahonehkanos.

Daniel 5:30

Kwáh né shaoʼkaráhtshera ne Belshazzar, ronnontí꞉io ne Babylonia, wahonwáhsehte;

Joel 3:10

Tesehwathakwénhtest ne iotsiwehiothí꞉ie ne sehwatharakaraʼthóstha ne sehwathasharón꞉niat, tánon ne shewatkwirhiátʼthas onióhkwas ne sehwaʼtsikwarón꞉niat. Áhnion shé꞉kon ne kwáh kenk nahoshatstenhseráske rén꞉ron, “Wakeshatstenhserowá꞉nen ní꞉i.”

Joel 3:9

Sewarihó꞉wanat kí꞉ken tsi ratinakeré꞉nion ne tihononhontsá꞉tes: Sewathateweienénhtan nahisewaterí꞉io, ietsinenrahserón꞉ni ne ronhterí꞉ios. Áhnion ratikwé꞉kon ne ronhterí꞉ios ákta nitón꞉ne, áhnion ratikwé꞉kon ne ronterí꞉ios thatirát꞉then.

Leviticus 26:25

Aterihrihiósera enthékhaʼwe ne sonháke ne nakonhréwaʼte tsi watéshiaʼke naʼterihwaseronhniátshera, tánon tó꞉ka tsi kanatowanénhke nienhénse nashatekwáhsen, kwáh kíʼ ienkaténieʼte né꞉ne iáh tetieiewénhtas kannratharihnétsheras ne tionháke, tánon kíʼ entietsihianónhtonse nahisewaniaʼtarakétsko rahotihénton ne tesewatátʼtions.

Zechariah 14:12

Ne Roiá꞉ner tehiotenonhianì꞉ton tehatenhrókwahte ne kannrahtariné꞉tsheras nonhkwè꞉ne nenhonteriiohserón꞉ni ne Jerusalem. Tsienhonnónhneke tsi enhothihiatátken; tsi rothikhá꞉ra ó꞉ni ne ronnáhhsahke enhiótʼken.

Zechariah 14:2

Ne Roiá꞉ner akaonwenhtsiakwé꞉kon enteshakohiaʼténhawe nahonteriiosehrón꞉ni ne Jerusalem. Ne kanahtowá꞉nenh enkonwahsén꞉ni, ronwahthinonhskarhiáshion, tánon ne konhnón꞉kwe thitkonhwanahnonhthón꞉ni. Sahtekanenhrí꞉hen enhionhnahkerá꞉ko, ók ne ronáhtiaʼkes iáh ne tahonwahnatekwáhte tsi nahnatowá꞉nen.