Jeremiah 50:3 - Ohiatonhseratokénti

³ “Othoréke enthaʼtiʼiénthaʼkwe ne kentiókwah ne iakonhwahtsatónti káti káiase enhonnónhniaʼte nahonhóntsa, tánon kwáh iáh ónhka nonhwénhton éhtho tahonsahienáhkereʼke; tetsáronh ne rónhkwe ó꞉ni ne konhtírhio enhontèko.”

Jeremiah 50:3 ပူးပေါင်းရင်းမြစ်များ

Genesis 6:7

Ka꞉ti ne Roiá꞉ner wahénron, “Kwáh ensekheiarékwahte kíʼ onhkweʼshón꞉ʼa ne kheiaʼtíson, tánon ó꞉ni ne kárioʼs ó꞉ni notsitenokón꞉a ne tsi iówerare, ne tsi skataterihwáhstani tsi kheiaʼtíson.”

Exodus 12:12

“Nètho enhiokaratserátheʼke kwáh iatenkatonhontsohétsthe ne Egypt, khenonhwarhiakonhátie ne tohʼnatierénton roʼnahnakeráton ne roʼtiskenràkete, tetsarónhkwen ne ónhkwe ó꞉ni ne katʼtshénen, tánon kherewahtonátie ratikwékon ne Egyptró꞉nons raotiʼníios. Í꞉i ne Watiá꞉ner.

Isaiah 41:25

Saiá꞉ta wahiʼiatorhiá꞉neron nothorèke nonkáhti, tánon kí wáh꞉rawe, kwáh tsinentʼkarakwínekenʼne ienhakenáton Kwáh kí tensakoskwahserón꞉kwahte ne ratikoráshons tsi ní꞉ioht nonawástha, tsi ní꞉ioht ne ratʼtsetónhni teonawatsʼthawénrie ne ionawastʼthakarí꞉io.

Isaiah 45:1

Né kí aoríhwa rá꞉ton ne Roiá꞉ner rahonhàke né roiatará꞉kwen né꞉ne Cyrus, tsi nikáien ne saweientetákwen riʼnentsawá꞉kon né nasakotsatakwení꞉ioste niaʼkahontsakeró꞉nons ne raohénton tánon naharíhsi ne rontiʼnontí꞉ios raonatiátawis wakóhses, né nahontenontonhkwehá꞉tons ne raohénton— tánon ne ioʼthenhenrenhtónhnions iáh thaʼhonsakanó꞉tonhke:

Jeremiah 21:6

Kwáh tsi niatehionkwétahke tsi enkhenonhwarhiákon ne kén ienáhkere kíʼ kanatowánenh; onhkweshón꞉a ó꞉ni ne katʼtshénen kwáh sahtenhiotónhake tsi tehiohnʼrahnonhnáni enhotírhiothe.

Jeremiah 50:9

Kwáh enkhetiokorhiáneron ne rotiʼtiokwahsháststes nothoréhke nónhwe tánon enkheʼhiónnien niaʼhonwahnahtsatónti ne Babyloniaró꞉nons. Tenhathinenhráhthaʼte nahonterí꞉io nahonakeráhsera tánon enkhonhiónheʼwe. Ronthirenhnáhon nahontó꞉rahte, nienhonrónhthaʼte ne kaienkwére iáh nonhwénhton tesohnatewáhthon.

Jeremiah 51:11

Sehwahiotiʼhiónnion ne kaiénkwires! Tésehwak ne tehioniatástha! Asèken ne Roiá꞉ner wahshaʼkahorhiáneronh ne rathiʼshástsʼtes ne Ronhthiʼnonhtí꞉ios ne꞉ne Medes niahathiʼnenhrahsehrónhni tsi nòhkwah ne Babylon tánon akonhwáhthonʼthe. Né kí꞉ken tsi nenh shaʼkarhiákʼthe tsi nòkwah nónhka ne iáh tehiakorihwahkweʼniénston ne Raononhshaʼtokentiʼkó꞉wah. Ne iesakonatsiatóntses ronaterihón꞉tons wahonwatirihónten, “Sewahiotiiónhnion ne sewaienkwí꞉res! Sewaweienénhta ne tesewanientenstáhkwa!

Jeremiah 51:48

Rahtiʼkwékon ne karonhiáke ó꞉ni ne onwenhtsáke rononhnhénions tenhatiríhwahkwe natonnahráhtshera, othoréhke nónhwe enthatiʼiénthakwe tsi nenhtʼthónʼne ne sahkonahtóntha ronhterí꞉ios niakonwahtiatónhti ne Babylon.” Ráton ne Roiá꞉ner.

Jeremiah 51:62

Ethòne enshíron, ‘Saiá꞉ner, ísenh tsi kwáh ensehriwáhthonʼte ne Babylon ne káti ne kwáh iáh ónhka nónhkwe tó꞉ka ó꞉ni ne katʼtshénenh ne kénʼen ahonshaʼienáhkerehke. Thóh enkaiénthake ahóskonh enkénhake tánon konhwahteʼwenhtéton tsi nénhwe.’

Jeremiah 7:20

Ne káti, Í꞉i, ne Wakenonhtí꞉io Watiá꞉ner, kwáh entʼkáweron nahkenahkwatsherowahnhátshera ne kénʼen Ononhsatokentiʼkówaʼne. Kwáh enthekhehiawerónhase nonhkweshón꞉a tánon kwáh sahtenhiothónhake ne konhtiʼtshénenhs, iekaníhare ó꞉ni ne tsi iorontó꞉tons tánon ne kaienthóhtsheras. Nakenahkwátshera thóh nenhióthon tsi ní꞉ioht nótsire iáh ónhka tahkakwéni nahónswahthe.

Jeremiah 9:10

Wakíron, “Tenkaséntʼthoseh ne tsi iononhtharónʼnions ó꞉ni tenkasénthoseh ne tsi konwathiʼteronthákwahs nahtenhenráhkonhs ne katshénenhs, tsioríhwah tsi akwékon iostatʼténhen, tánon iáh ónhka éhtho nónhhwe tetionthohénstha. Tsi nahionatʼtsiarokwáhtonke ne katshéʼnenh iáh ónenh ónhka tetsiakóthonʼte; otsitenokónhas ó꞉ni ne konhthitshénenhs kák tiehionénonh.”

Jeremiah 9:11

Ne Roiá꞉ner ráton, “Kwáh enkónhnien ne Jerusalem nahiothonhióthonke ne ioriwahiesáhsehrons, thóh nónhwe ne érhar nenhathináhkerehke; ne tsi kanahtowáhnenhs ne Judah karhákonh enwáhthon, thóh nónhwe ne iáh ónhka tahienáhkerehke.”

Zephaniah 1:3

Kwáh enkhehiátonte nonkweshón꞉as tánon ne kontiʼtshé꞉nens; Kwáh enkhehiá꞉tonte notsitenhokón꞉as ne tsi iowé꞉rahre kontitses tánon ne kentsonʼshón꞉as ne kaniatarakeʼkowáhne. Kwáh ne enkhehión꞉ni ne ionhkweʼtahétkens tahatirakwenhtá꞉raʼne tánon enkhehiátonte nonkweshón꞉as ne tsi ionhwenhtsá꞉te, ráton ne Roiá꞉ner.