Jeremiah 5:5 - Ohiatonhseratokénti

⁵ Ne ienkhehiató꞉renʼne ne rothishaststenseráhien tánon tenhiakwahtháren. Orihwiʼiohónwe tsi ronahteriénthare tsi niharihwahnónhtons ne Raotiní꞉io, tsi natehothonwenhtioni ne Roiá꞉ner tsi nahóntiereh.” Ók rathikwékon kwáh rothikenrahthaníhon ne Roiá꞉ner raohianerénsehra tánon iáh tehonatʼthontháton nahonwahwenhnahráhkwen.

Jeremiah 5:5 ပူးပေါင်းရင်းမြစ်များ

2 Chronicles 36:14

Né iehiowénhte, ne sakotihenténhse ne Judah nón꞉we, né ratiʼtsihénstatsis, tánon nonhkweʼshón꞉ʼa waʼhatí꞉sehre ne kwáh tkarihwáneren washakonatenonwará꞉kwahse nonhkweʼshón꞉ʼa ne akthatsesónha ratinakeré꞉nion tsi nikonwasénhnaiens ne kahiatonhnisónha, tánon ká꞉ti tsi nathatítionsʼte Nononsatokentiʼkówa, né꞉ne kwáh rahonhatsíwa ne Roiá꞉ner rotokentíston.

Exodus 32:25

Ne Mahís wahatkátho nètho Aaron tsi washaʼkoríhon nonhkweshón꞉ʼa ne tsitʼtiahatiʼhieránion tánon nahonthatenonhwarorithónti rahotihénton ne tehontátʼtsions.

Isaiah 1:23

Né ieshakoráshons iehonwatsatóntsies ne Ní꞉io tánon ne wahonteroserónhni ne ratinénskwas. Onkwetakwékon ne ienónhwes ne knahótenk tahionthaʼthetsikhetáhroʼse tánon ne ratiriwanóntons athatahwí꞉tsheras ahonwanawíhon. Kwáh iáh tethesakótines ne tehiontonhnakárias, tánon ne ionateréhons ahotirihwashónhas iáh rahotihénton tsewétha.

Jeremiah 2:20

Ne Ronontí꞉io Roiá꞉ner ráton, “Israel, wahónniseh tsi náhe tkénʼne wahsehriwáhson natianerénsehra; iáh tesatʼthontháton nahskewenhnahráhkwen ó꞉ni nahsekʼsénnaienhke. Ne kwáh tiótʼtes ionniarónnion tánon oronhthonkónhsons ne óhonthes niwahshokótens né tsénnahiens ne iáh thènenh tekarihwástha kahiatónnis.

Jeremiah 2:31

Israerʼró꞉nons, sahtahónshatat tsi nikáton. Tsi kénh ní꞉ioht ne kahráhkon thóh nitsiathótenʼne tsi nòkwah ní꞉se, tsi ní꞉ioht ne tetiókahras ó꞉ni iotonwenhtsiátʼteron? Nonhtséren, káti, tsi sáhton tsi thóh nénhsehre tsi nenhtesehnónhwehʼne, kwáh iáh nonhwénhton íhne nòkwah tahthahóntahse?

Jeremiah 30:14

Rathiʼkwékon ne sewahtenroshón꞉a; waheshaʼhiathanikónhren; tánon iáh ónenh thènenh thaʼthetiesahteriéntahre. Thóh ní꞉ioht tsi hiakonhiatiathónti tsi ní꞉ioht ne tehiatátʼtions; ne shaʼrehwahtátshera kwáh íken tsi ioníron tioríhwa ne sarihwahneraháktshera tsi niʼiawetowáhnenh tánon ne shaʼrihwahetkénsehras tsi níʼ kowáhnenh.

Jeremiah 6:13

“Onhkwetahkwékon, ahiesenhnowánenhke tó꞉ka ó꞉ni kentʼnaiesénhnaske, ronteniéntʼtha kanikonhráhthon tsi ní꞉ioht tsi ahontʼwisthónni; iekaníhareh ne rotitó꞉kense ó꞉ni ne rothikháres sahkotinikonhraténnis nonhkweshón꞉ʼa.

Jeremiah 8:7

Séhkon ne kawirahkaʼrénies ioteriéntahre kíʼ nónenh tahónthaʼwe; orítes, kentarakonhá꞉ka, ó꞉ni ne tsiskóko ronahteriéntahre nónenh tahonshahonnáthaʼkwe. Ók nakonhkwetahshón꞉a, iáh tesehwahianerenserahientéris tsi ní꞉ioht tsi tkwaniarotáhron.

Jeremiah 9:3

Kwáh tsiókonhte tsi ronahthateweiennenhtáhon nahonnhówenhte; kanikonhráhton tsi ní꞉ioht ne kariwahkwarishión꞉tshera né wahsáhrihʼne tsi ionwenhtsiáte. Ne Roiá꞉ner ráton, “Nakonhkwetashón꞉a kwáh tiehothithakwahrishiáton kén niehathihiéra ne kariwahétken tánon iáh tehionkeriwahniráthi tsi Í꞉i ne rahotiʼNí꞉io.”

Ezekiel 11:2

Rawenni꞉io wahakénhase, “Rónhkwe iaiénha, kí꞉ken ronónhkwe kariwahétken ronhtenikonhrónhnis tánon wahétken tsi nishakonahtenikonhráhwis ne kénʼen kanatowáhnenh.

Amos 4:1

Sewatahónhsatat kí꞉ken owennaʼshón꞉ʼahs, í꞉se ne tiohnhónskwarons nisewaiaʼtó꞉tens ne Bashan nón꞉we ne ne tsi ionón꞉te ne Samaria nón꞉we ní꞉sewes, í꞉se ne teietshiionhnharíkhons ne iakotenhténions, í꞉se ne teietshinènhstiaʼks ne teiontkáriahs, ietshihró꞉ris ne sewaniákkhons, “Taskwahnekenhawíhten!”

Amos 6:1

Ionikonráksat tsi nihiá꞉kon ne tsakoterákare ne Zion nón꞉we, tánon tsi niiá꞉kon ne ihiénhreh iakontaní꞉ron ne tsi Ionónhte ne Samaria, í꞉se ne sewasenhnowá꞉nens ne ietsihénthenhse ne kí꞉ken kentiohkowá꞉nen Nisraeró꞉nonke, tionháke nieiéntha nonhkweshón꞉as naieʼtsiié꞉nawaʼse!

Micah 3:11

Ne rahonhnonkweʼtashón꞉as ne ratirihwénhtha oʼwísta ronhwatikárhiakse ne nahatinikónhrate, ne ratitsihénstatsis ratikaráiens tsi sakotirihonhnién꞉nis, ne rotitokénhse tsi nishakotirihothashién꞉nis oʼwísta rotí꞉rare nahontahonhwénhnon; nek kíʼ sá꞉ka raonhà꞉ke ne Roiá꞉ner iehatihiatarákare tánon rón꞉ton, “Orihwiiohón꞉we ne Roiá꞉ner tsi tewakwé꞉kon! Iáh othé꞉nen ne karihwahetkénhsera tahionkwárane.”

Malachi 2:7

Aseʼkénh tsi ratihshaká꞉ronte ne ratitsihènhstatsiʼs aó꞉wenk naionteweièn꞉tonke nattokháhtshera, tánon nonkwehshón꞉ʼahs aó꞉wenk naiakéhsake ne karihonnienníhtshera ne tsi rahshaká꞉ronte, aseʼkénh ráonha rorihwakarenién꞉nis ne Sakoiá꞉ner ne ronterí꞉ios ratironhiaʼkehró꞉nonʼs.

Luke 18:24

Nok ne Iesos ȣahattoke tsi ȣahonikonraksen, ȣahenron: oriȣiio tsi ȣentore ne Karonhiake aiontaȣeiate ne iakokȣastse.

Luke 19:14

Kenh kaien ne thatinakere ronȣasȣanskȣe, nese ȣaonni iaonȣateriȣanietase ronȣarorihatie, rontonne: iah tateionkȣatonȣentsioni ne raonha kehiken asonkȣaststeriste.