Jeremiah 4:19 - Ohiatonhseratokénti

¹⁹ Ne karonhiakénsehra! Iáh tatkwéni nakathakátsthate ne karonhiakénsehra! Nakwéri! Nakwéri kwáh iosthóre tsi ní꞉ioht tsi tehiahonrhiákwa! Iáh tatkwéni ne thatakahtó꞉thaʼte; Wakátʼthonte ne iehonrahwátstha tánon tsi nihioronkwénhsthare ne wahtherí꞉io.

Jeremiah 4:19 ပူးပေါင်းရင်းမြစ်များ

Genesis 49:6

Aiá꞉wens tóhsa nonwén꞉ton akheiatiaʼtáhrhahse; Iáh ó꞉ni thakheiatiaʼtáhrhahse ne tsi rontkennisaʼáhtha— Aseʼkénh raotinaʼkwahtsherá꞉kon tsi shakonaʼwénthohs nonkwehshón꞉ʼa, tánon atswaʼtahtsherá꞉kon tsi tenhatitsinonhiáhtiaʼke nohná꞉ken ratihsinà꞉keʼs ne tehotiná꞉kareʼs tiohnhónskwaronʼs ratí꞉tsiʼn ne nahatiiaʼtakénheie.

2 Kings 4:19

Thonthaiawénhstsi iathohénrethe tsítres ne roʼníha, “Wakenonhtsistanónhwaks! Wakenonhtsistanónhwaks!” “Hionhtsiatsisewahiathénhaf tsitʼkénhteron né ronisténha,” ne roʼníha wahawénhase ne rahnhá꞉tsera.

2 Kings 8:11

Éhthoh ne Elisha kwáh í꞉ken tsi waʼtotkaróten né tsotónʼnekt tsi nihakonsóhten tsi nió꞉re ne Hazael ó꞉ia naronhnó꞉tenhne. Thonʼtaiawénstsi ne Elisha tsatewaterané꞉kare tsi wathaséntʼtho.

Psalms 103:1

Kwáh thenhinonhweráton ne Roiá꞉ner, Ó akwahtón꞉nhets! Tánon kwáh akwatonnhetsheraʼkwékon, tsi thenkatenonhweráton ne raosenhnatokénti!

Psalms 116:7

Nón꞉wa entkwéni ne shé꞉kon tahontakaterakáren tsioríhwa ne Roiá꞉ner tsi nihioiánere tsi nihakatiéraʼse, asèken ne Roiá꞉ner kwáh ioiánere tsi tehakerihwásnieʼse.

Psalms 119:136

Wé꞉so tsi watkaséntʼtho tsioríhwa nonhkweshón꞉has tsi iáh tehiontewenhnarákwa ne saianerénhsera.

Psalms 119:53

Nó꞉nenh enkhéken ne rononkwetahétkens tehatíʼiaks ne saianerénhsera, kwáh wakatenakwakwenráhtis.

Psalms 146:1

Tetsenonweráton ne Roiá꞉ner! Tetsenonweráton ne Roiá꞉ner, Ó akatónnhets!

Psalms 16:2

Waʼihiénhase ne Roiá꞉ner, “Í꞉se Natiá꞉ner í꞉ken; natianerétsera iáh tesanenhiakénhnies.”

Isaiah 15:5

Nakwéri tehoséntʼthoʼse Moab; ne rotiʼnathénhawis wahontèko Zoar niaʼhónhne, tánon Eglath Shelishiyah. Asèken tsi tsionontakàrenhre ne Luhith iahatinonhtarane tehonsentos; ne tsi niehiothahínon ne Horonaim wahatiʼtsitakétsko ne atkaronhniátshera;

Isaiah 16:11

Èʼthoh káti ne wahón꞉ni tewakerhiaʼsíshonkwah tsi ní꞉ioht onowakówa ne aorihwàke Moab, tánon ne kwáh akatónnhets né꞉ne aorihwàke ne Kir-heres.

Isaiah 21:3

Ne káti wahón꞉ni ne tionhʼhontáke ne ionánon ne iatetsokétoʼte ahiakoiatíshonʼkwe; kanon waʼhetʼkéntshera tewatwánen, kwáh tsi ní꞉ioht ne tsiotonwísen iowiraientásere; shó꞉tsi wakeronhiáken iáh tatkwé꞉ni nahonkatʼtónhteke, shó꞉tsi wakateronhienténhni iáh tatkwéni nakatkátho.

Isaiah 21:4

Tewakanitonhniénhni nakenikónra, katerónhtshera wakonhniénhnis nahontsatítshonʼkwe; tsi niʼkaskánekskwe niaʼkarákwenhne né꞉ne hiatkakaraténi nahontsatíshonʼkwe.

Isaiah 22:4

Èthoh káti wakíron: takatharónhtsens, takeríhon nahontkaserowáhnah; tó꞉sa sateniénten naskenikonrahníraʼte ne rahonatkaronhniátshera ne khenoronhkwahkó꞉wa akonkwetaʼshónha.

Jeremiah 13:17

Tó꞉ka iáh tahisehwathahonsahtháte, nakwahtónnhets hathaséhtonke tsi tenwahséntho né enkarihónni tsi nisewahnáie; kwáh íken tsi katsithowáhnen tsi tenkaséntho, tánon natkásehri tenwatnahwénhthe tioríhwa ne Roiá꞉ner rahonkwetaʼshón꞉a tsi iahonwathihiaténhaʼwe nahonwatinaskónhni.

Jeremiah 20:9

Ók nónen enkíron, “Kwáh enhihiatahnikónhren ne Roiá꞉ner tánon iáh ónen teskahtátis ne raosénnahkon,” thóhʼne ne saterihwanhotátshera thóh nenháwenhne tsi ní꞉ioht nótsire iothékha ne tsiathákon. Iaʼtewahkatatʼtsiaháton ne thóh ahonthónthaʼke, ók iáh tatkwéni nahonkathoráhrakon.

Jeremiah 23:9

Tewahkerhiashaʼríhon, tánon watsiaʼtisónkwah. Roiá꞉ner waharihónni, ne takarihónniaʼthe ne raowénhnaʼtokentísons, thóh niʼwahtiátawenhs tsi ní꞉ioht ne rónkwe ronnonhwahrahtónʼon, ne ne ónhka sóhtsi wéso otsítsa ronekíren.

Jeremiah 4:21

Tohʼnikaríwes tentʼkánerahke ne watherihioserowáhnen tánon wakatʼthónte tehiothónhare ne iehonrahwátstha?

Jeremiah 4:5

Sehwahthátists ne iehonrahwátstha nonhwenhtsiakwékon! Iohrahkarehníhak tsi tesehwahénret tánon ioronkathónhak! Ietʼtsiró꞉ri nonhkweʼshón꞉a ne Judah ó꞉ni ne Jerusalem iasehwahkwísron tsi tetkanathanákthon nosténrah ne kanahtowáhnenh.

Jeremiah 49:2

Ók táwe ne kawistáheks nónenh kwáh enkhehiónʼnenh nonhkweshón꞉a ne tsi kanatakweʼní꞉io ne Rabbah nahonatʼthóntheʼne tsi nihioronhkwéntstahre tsi wahterí꞉io, tánon kwáh káiaʼse enwáhton tánon nahonahtaʼshónʼas okenráhke enhionhníhake tsi enwatʼtsahátonke. Ethòne ne Israerʼró꞉nons enshatiʼiéna ne raononhontsaʼshón꞉a enshonwahtíkwah tsi nikáien ne ronhwahthiʼnénhskwenʼne.

Jeremiah 50:22

Tsi nihiorónhkat tsi nihiotʼtsaróh꞉kwen ne waterí꞉io ne onhontsáke, tánon tsi nikahriwahiesahtsherowáhnenh.

Jeremiah 6:24

“Wahakwariwahronhke,” ronton ne Jerusalemró꞉nons, “tionkwá꞉tianenhen; ne tehionkwawahnenh ne karonhiakensehra ó꞉ni ne kanonhwatʼthentshera tsi nʼi꞉ioht ne iónkwe ioronhiaken tsi iowirahienthasere.

Jeremiah 8:18

Nakenikonhrakʼséntshera iáh tahónton ne ahonsahkanikonhrentʼthóthon; Wahkerhiashanónhwaks.

Jeremiah 8:21

Tewakherhiasahkwentéhon tioríwah nakonhkwetashón꞉a tsi tehonwanaskwasehronkwáton; wakatʼtiónnion; kwáh íken tsi tewahkáthonʼne.

Jeremiah 9:1

Kaskáneks ne kenonhtsí꞉ne ahionahwehróthake nonékanos, tánon ne khará꞉ke ahionahóthake ne ohkáhsehri, ne nahónton konhthatiekówah tánon ashonthakwékon tsi takaséntho ne ne akonhkwetashón꞉ha rahothiriwáhke tsi niháti ne ronwahthinonhwahrhiákon.

Jeremiah 9:10

Wakíron, “Tenkaséntʼthoseh ne tsi iononhtharónʼnions ó꞉ni tenkasénthoseh ne tsi konwathiʼteronthákwahs nahtenhenráhkonhs ne katshénenhs, tsioríhwah tsi akwékon iostatʼténhen, tánon iáh ónhka éhtho nónhhwe tetionthohénstha. Tsi nahionatʼtsiarokwáhtonke ne katshéʼnenh iáh ónenh ónhka tetsiakóthonʼte; otsitenokónhas ó꞉ni ne konhthitshénenhs kák tiehionénonh.”

Lamentations 1:16

“Ne kíʼ aoríhwa ne kharáke kwáh thitewakʼkhaseráheʼrhe. Iáh ónka taiekwéni naionkenikonranírate; iáh ónka taiekwéni naionkenikonráhreke. Ne iónkswens ionkesénnion; nakonkwetaʼsónha kwáh iáh othénen tesohthíʼien.

Lamentations 1:20

“Satkátho, O Saiá꞉ner, tsi niwakeronhiáken, tsi niʼiokarárens nakwathónnhes! Tewakeriasaríʼon tsi niwakenikonráksens nakeriwaneraháktseras. Sakonasétas ne tsi tekanatokenhátons; iahióhe nòn꞉ne kanonskónsons thóh ronnihéions.

Lamentations 2:11

Wakʼkharanónwas tsi naʼtekasénthos; nahkwathónnhes kwáh ne íken tsi iokarárens. Kwáh tewakenákwaras tsi niwakenikonrákʼsens ne tsi natehionenraríhon nakihtiókwa. Rahtiksahokónhas tánon nowiráhas kanatakónsons rothinikonrátons.

Daniel 4:19

Eʼthó꞉ne, Daniel, raónha ó꞉ni Belteshazzar ronwá꞉iats, tsi nontahatónʼneke iáh tehokwénion ne thé꞉non ahá꞉wenke. Ne ronnontí꞉io wahawénhahse, “Belteshazzar, tóhsa natetshénhsera ó꞉ni tsi nikénton tisatonʼnékten.” Belteshazzar tonsaharihwaʼserá꞉ko, “Sanontí꞉io, aiá꞉wens ne eʼtho atetshénhsera tánon tsi nikaʼnikonhraientáhtha né ne iesáhswenhs aiakotónheke nók iáh ní꞉se.

Daniel 7:15

Tsi nahoʼténshons wakatkahthóhseron tonkwatonnékten, tánon kwáh í꞉ken tsi waʼtewakeʼnikonrháren.

Daniel 7:28

Né kí né tsi ieió꞉toʼkte norihwaʼshón꞉a. Eʼtho niió꞉re tsi ónkteronʼne kwáh watkatskennennaʼtón꞉ten, ó꞉ni kwáh orihwakwé꞉kon akonhá꞉ke waʼkateweiénton.

Daniel 8:27

Í꞉i Daniel kwáh wakaʼnikonhrókten ó꞉ni tóhka nón꞉ta onkenonhwákten. Eʼthó꞉ne tonsáktaʼne ionsakatahshónteren sontióʼten tsi nihakenhá꞉on ne ronnontí꞉io, nok wakaterihwakwé꞉ki tsi ní꞉ioht tsi wakatetshén꞉en tánon iáh tewá꞉tons naonkeʼnikonhraién꞉taʼne.

Amos 3:6

Rontatístha kenh ne iehonrawátstha ne kanatowanén꞉ke, tánon nonkwehó꞉konʼs iáh thaiakóhteronʼne? Ne karihwaiesáhtshera kaièn꞉tas kenh ne tsi kanatowanén꞉ke, nek khok tó꞉kaʼ ne Roiá꞉ner thóh nenháhsa?

Habakkuk 3:16

Wakaʼthón꞉te akwé꞉kon kí꞉ken, tánon onhtsiatí꞉shonkwe; tsi nió꞉re tsi wáterons waʼtewakenawirohó꞉khon. Tánon tahkwaʼáshon onkatiénhase ne tiéronhke, tánon waʼtiatishónkwa tsi nón꞉we niʼttákwe. Kwáh kíʼ skén꞉nonk thenkénhake tsi nenhkateráhrate ne iaʼkáhewe nó꞉nen ne Rawenni꞉io ensakorewaʼte tsi niháti ne tionkhiiatsatónhtses.

Numbers 10:9

“Nónen tsionhontsáke nónhwe nihiakoterí꞉io, tisehwatatèhnes tsi nó꞉kwah ne tesehwatáʼtshons tsi nikáien ne tsitʼieietʼtsihiatsiatónhtion, sehwatátis ne ionhteriʼiostákwah kíken kenihonrawatskówas. Í꞉i ne Watiá꞉ner ne Sewaní꞉io enkwahiénawase tánon enkwahiatanónstate tsi nó꞉kwah ne tesewatáʼtshons.

Romans 10:1

Tewahtorohsónhas, ohtsikwáh keriasakwékon tsi kaskáneks nah katatekénseras nahónton ahatiniákenʼne! Tsi nióre tsi wakhaterénʼnaien neh Rawenní꞉io꞉ke neh rahotiriwáke!

1 Corinthians 14:8

Tánon tóhkaʼ tsi nikáien ne iakoterénnothe ne iehonrahwátsʼta iáh tahontahaiérihthe tsi ní꞉ioht tsi enhaterénnothe onhʼní꞉ioht tsi ahontatheweiennéntaʼne nahonterí꞉io?

Galatians 4:19

Nók oh tekanóron kwaienokónha! Kwáh káti shékon ne teskaieróntare tsi ní꞉ioht ne kanisténsera iakowiraientásere, kwáh thóh ní꞉ioht tsi tewakawehéstha ne sewariwáke tsi nióre ienkáhewe níse naʼtsisewanonteratiéseke ne Kerístos.

Judges 5:21

Né wahenhnó꞉ton ne Kishon nónhwe né iahakohiaténhawe— né tsi nihionekashástsʼte ne Kishon kaniatarátatse. Ónenk tsi enkenenhrasehrónhni, enkenenhrasehrónhni, kashastsʼtensehrákon!