Jeremiah 36:7 - Ohiatonhseratokénti

⁷ Tó꞉ka kíʼ nónhwa shé꞉kon tensontkarahténi tsi nihatiʼweiennáksens tánon ahonʼwahriwahnónhtonse ne Roiá꞉ner ahonshaʼsakonikónhrenhse nohénton sóhtsi ahiokaraháthaʼne. Asèken ne Roiá꞉ner ne tehiotenonhianíthon rahonhakwáhtshera tsi ohénton tonwahnaronkahténni.”

Jeremiah 36:7 ပူးပေါင်းရင်းမြစ်များ

2 Kings 22:13

“Wáhs tánon iatserihwanón꞉tons ne Roiá꞉ner ní꞉i akerihwá꞉ke ó꞉ni nonkwetaʼkwé꞉kon ne Judah tsi nòkwah ne kaʼrihonnienhnítsera kí꞉ken kaiatónhsera. Né Roiá꞉ner shonkwahnákwahse tsiorí꞉wa ne ietishothonkonhkénʼen tsi iáh ètho tehotiʼiéren tsi niwá꞉ton kí꞉ken kaiatónhsera tsi ó꞉nenʼk ètho nahotiʼiérenhke.”

2 Kings 22:17

Onkʼkenronníʼon tánon kwáh iehonatʼkáwen nahonwaʼnateskóntʼthaʼse nakorénhsons niʼiohokónhas, tánon ká꞉ti waʼhonkenakónʼni né naʼkwé꞉kon taʼkakwé꞉te tsi niʼonatseráhnion. Nakenaʼkwáhtshera waʼkatsironni tsi nòkwah ne Jerusalem, tánon iáh tsataʼonsakenteróntaʼne.

2 Chronicles 34:21

“Wáhs iatierihwanón꞉tons ne Roiá꞉ner nakerihwáke tánon nonhkweʼshón꞉a ne Israerʼró꞉nonke tánon ne Judah nón꞉we shé꞉kon nihonathaténhron. Sehrihwísat nahorihonhnienhnítshera kí kén kahiatónhsera. Né Roiá꞉ner shonkwahnákwahse tsioríhwa ne ietisotʼthonkonhkénʼen tsi iáh tehonatewenhnaráhkwenh ne Roiá꞉ner raowénhna tánon iáh éhtho tehotiʼiéren tsi niwá꞉ton kí꞉ken kahiatónhsera tsi nihioterihwíson tsi nahiéiere.”

Jeremiah 1:3

tánon shé꞉kon sahothárahse nónenh ne Josiah roiénha Jehoiakim sihononhtí꞉io. Ne kén wahótiete, ne Roiá꞉ner wéso iorihwáhke rotharáhni, tsi nióre ne énska iawénhre siʼiosehrahtáhtie sihononhtí꞉io ne Zedekiah ne roʼníha ne ne Josiah. Ne wískaton siwenhnitahkehátie ne ne sahoséhrat ne Jerusalemró꞉nons wahonʼwenhnahnahkeráhkwahte.

Jeremiah 16:10

“Nónen kí꞉ken oriwahkwékon ensehró꞉ri, enhieshariwanónhtonʼse onhʼnihiotiéren tsi en nióre tsi wakateniaʼkátsthaʼte tsi wahkheréhwaʼte. Enhatiriwahnónhton onhʼní꞉ioht ne kariwahétken tsi ahothiníkhon tánon onhʼní꞉ioht ne kariwáhneren tsi tahonaʼterientahwehréhon tsi nòkwah ne Roiá꞉ner ronwahNí꞉io.

Jeremiah 19:15

nètho ne Roiá꞉ner Roshaststenserowáhnenh, ne ne Israerʼró꞉non sahkohʼNí꞉io, ráhwenh, “Entétkhaweh ne kén nónhwe kíʼ tsi kanahtowáhnenh tánon ó꞉ni ne aktatsesónhas kanahtaʼiénton akwékon ne karewahtátshera tsi ehʼnénhtiereh tsi niwáhken, tioríhwa tsi nisehwaʼnonhtsistaníron ó꞉ni kwáh iáh tesehwahthahónsahtats tsi nikáton.”

Jeremiah 21:5

Kwáh keshastsʼtenserahkwékon tsi entiaterí꞉io, naʼkaterhiatitkhóntshera, naʼkenahkwáhtshera, tánon tsi waʼkatenahkwahwenhráhti.

Jeremiah 25:5

Ietʼtsiró꞉ri ne tahonsehsewatkarahténi tsi nikariwáksen tsi ní꞉ioht tsi tiónnhe ó꞉ni tsi nikariwahétken tsi nisehwatiérah, ne ne ahisehwaterihwaténtiaseh ahitionnhétie tsi ionwenhtsáte nètho Roiá꞉ner teʼtsisehwáhwi ó꞉ni ne ietʼtsisotʼthonkonkénʼen ne ne sehwahwenhkʼónhwe akénhake.

Jeremiah 26:3

Tó꞉ka nónhwah nonhkweshón꞉a enhionthahónsahthaʼte ó꞉ni enhóntkaʼwe tsi nihatiʼweiennáksens. Tó꞉ka éhtho nenhatí꞉iere, ethóhʼne kíʼ tensewahʼkateriwahténien tsi niʼwahkatenikonhrónni nátienh ne kariwahiesáhtshera ne ronónhake ne ahiorihóntaʼke tsi nihatiʼhiotensehráksens.”

Jeremiah 36:3

Tó꞉ka nónhwah nónen nonhkweshón꞉a ne Judah nónhwe enhónronhke akwékon ne kakahronniátshera tsi niʼwahkatenikonhrónni nahontatkhehawíten, tsi tensontkahrahténi tsi nihatiʼweiennáksens. Ethóhʼne ensheʼkhenikónhrenʼse tsi nihonnonhkwetaʼhétkens tánon tsi nihotiʼrihwáhnerens.”

Jeremiah 37:20

Tánon káti nónhwah, Sahnonhtí꞉io, khonhianiténthaʼse naʼskahthahónsahthaʼte tánon thóh náhtiere tsi niʼkerihwahnónhtons. Asatʼthontátsheʼke tó꞉sa hionshaʼskhaʼténiet nahonsaʼhionkheʼnhóton ne tsi thohnónhsohthe ne Jonathan. Tó꞉ka thóh nénhshiehre, kwáh oriwihiohónwe tsi enthóh nónhwe nenhkíheʼie.”

Jeremiah 4:4

Sehwahtienawasthónhak ne sehwateriwahsehronniátsheras nakonháke, seh Watiá꞉ner, tánon sehwathaterihwahthokentísten nakonháke, íseh ne tiónkwe ne Judah ó꞉ni ne Jerusalem. Tó꞉ka iáh tothaisehwáhiere, nakenahkwátshera enhióteke tsi ní꞉ioht nótsire tioríwa tsi nikariwahétken tsi nisehwatiéren. Kwáh enhióteke, tánon iáh ónhka tahontetʼsénhri nahionskwáthe.”

Jeremiah 42:2

tánon wahonkwénhase, “Asatʼthontátʼtseke thóh nahtier tsi nenhkwahriwahnónhtonhse! Iashaʼterénnhaien nonhkwahrihwáhke rahonháke ne Roiá꞉ner onhkwaNí꞉io. Iakwahkwékon tsi thakwahterennhaiénhas tsi nihiátion ne iaʼtehionkwahthaténron. Ionhkwentiokowahnénhʼne; ók nónhwa ónenh kénk nitsiátion iaʼtetsionkwahthaténron, tsi kíʼ nisatʼkatkáthos.

Lamentations 4:11

Ne Roiá꞉ner kwáh thokén:en tsi kasastenserakwékon tahátkaʼwe ne rahonhakwátsera; Wahatsiróten ne Zion nónwe kwáh ohontsiáke wahónni.

Ezekiel 12:3

“Ónenh kíʼ, rónhkwe iaiénha, senokwakweʼnónhni kwáh tsi nihaiéra ne ronahtenháwis tánon teshatháhak nohénton nahontahiokárahwe. Kwáh onhkwetaʼkwékon ahiesáhken tsi washaténti tánon thóh niahisehnonhátie nóhia tkanáhthaien. Tó꞉ka nónhwa thí꞉ken tehatinenhrahrítha enhieshaiénterehne.

Ezekiel 13:13

Nónhwa kén nahó꞉ten ne Ronhnontí꞉io Roiá꞉ner ráton: “Akenahkwahtsherákon tsi ienkaténiethe ne kawerahshástsʼte, tionahkwáhweron tsi nihiokenhnóron, tánon iowisónhtion nahónthonte nasónhta.

Ezekiel 20:33

“Tsi nihioriwí꞉io tsi Í꞉i, ne Wakenonhtí꞉io Watiá꞉ner, tsi konhnhehónwe Ní꞉io, konhiaronhkaténhnis thóh nakenahkwahtsherákon kwáh entkonhniaró꞉tarohke né꞉ne kashástsʼte atsáhna, né꞉ne kwáh akeshastsʼtenserahkwékon.

Ezekiel 22:20

kwáh ne sáka ne karísthatsis ne kawistaráhken, kwénis, karístatsi, oristhakwénhthe, tánon ne owáhsa ne karistákon ahiakétha nakawistanahwénhton. Nakenhakwáhtshera ó꞉ni tsi niwakenahkwénhʼen enhiakowistanahwénhthe tsi ní꞉ioht ne ótsire tsi kawistanahwénhtha ne karísthatsi.

Ezekiel 5:13

“Ethóhʼne káti ónenh nakenakwáhtshera ahonhákek tshienwátʼtsahate, tánon kwáh enkenonhtónkon nakenakwáhtshera ne rononháke tánon enkathaterientí꞉ioste; tánon enhonateriéntarahne tsi Í꞉i, ne Watiá꞉ner, akenoshatsherákon tsi wakatáti, nónenh satewahtenonhónti nakenakwáhtshera ne rononháke.

Ezekiel 8:18

Kwáh enhóntʼthoke kashastsʼtenserahkwékon nakenahkwáhtshera. Kwáh iáh takhenónhsthate iáh ó꞉ni takhenahtónhase nataniténron. Kwáh tenhotihénreʼte nahterénhnaient nakonháke tsi nihiorahkaréhni tsi ahathikwéhni, ók iáh kíʼ taʼkhehiatahónshathaʼte.”

Daniel 9:13

Tsi táhstion akwé꞉kon ne kahrewahtáhtshera tsi ní꞉ioht tsi kahiá꞉ton ne Mahís raohianerenhserá꞉kon. Shekiʼnón꞉ne, O Saiá꞉ner onkwá꞉wen Ní꞉io, iáh teionkwateniénten naontakwaʼnikonhraié꞉rite né ne taonsaionkwatkarhaténion tsi nokwá nonkwarihwanerenʼáktshera tó꞉ka ó꞉ni ne aionkwáhseron ne sawennatokénhti.

Daniel 9:18

Takwatahónhsatat, O Sewenní꞉io; takwakenʼén꞉ion ó꞉ni satkáhtho tsi natekanikónrhare tsi non níiakwe tánon tsi niiotkenhrenserón꞉ni ne kanatowá꞉nen ne saná꞉ta. Iséʼke nón꞉we niionkwaterénnaien ne tsi sanitenráhtskon, iáh né té꞉ken tó꞉ka ken ne tsi ionkwatonkweʼtakwaríhshon.

Hosea 5:15

Kwáh shé꞉kon thóh iénske tsi nón꞉we tewakatená꞉taien tsi nió꞉re ienhatiriwaní꞉rate tsi rotiní꞉kon tánon enhonhnésake ne kontsá꞉ke. Ne tsi nihotironhiá꞉ken kwáh enhionkanithénthen nahatiié꞉na nakithénrat:

Joel 2:12

Iehió꞉he shé꞉kon nón꞉wa, ráton ne Roiá꞉ner, kwáh sewerhiasakwé꞉kon akonhá꞉ke natontásewe, sewenhthón꞉tiet, tánon tesewasénhtho, tánon shewatsiónhnion;

Joel 2:13

sewathaterhiasharaʼtiónko tánon iáh ne sewatserónhnia. Thóh nionshá꞉sawe rahonhá꞉ke né Roiá꞉ner, sewah Ní꞉io, asè꞉ken thorihwaié꞉ri tánon rotanithenráts꞉kon, rohiatakenhé꞉ion nahonà꞉kwen, tánon titʼkahé꞉re ne iorihwató꞉ken kanoronkwáhtshera, tánon satateriwástani tsi thatsisewaténieten ne kaʼnikonraronhiakénhsera.

Jonah 3:8

Kwáh onkweʼtakwé꞉kon tánon ne katshé꞉nenʼs ónenk tsi kà꞉iare eniotí꞉rake. Kwáh kátiʼ onkweʼtakwé꞉kon iakoterihwaién꞉ni akawé꞉riane aontaietáhko naʼionterén꞉naien Raonhà꞉ke ne Rawenni꞉io tánon ó꞉nenk tsi enióntkaʼwe tsi niiakorihwané꞉ren ó꞉ni tsi niiewehiennàksens.

Zechariah 1:4

Tó꞉sa shaieʼtsiiénrenk ne ietsisoʼthonkonhkén꞉en. Wahón꞉nise tsi náhe ne rothitokenséhakwe teshakoná꞉wi nahkateriwahnhothátshera, shakothiró꞉riskwe ne tó꞉sa kariwáksen tsi ní꞉ioht tsi ahonónhnheke, tó꞉sa ne kariwanerahaktsherá꞉kon akénhake tsi ahonnónhnheke. Ók iáh ki tehionkathahonshá꞉tahton khés nahionkewenhnaráhkwen.

Deuteronomy 31:16

Ne Roiá꞉ner wahawénhase ne Mahís, “Kwáh iostó꞉re enshí꞉heie, tánon nó꞉nen ensenheiónhke nonhkweshón꞉a iáh tahonsahothiriwatokénhake nakonhà꞉ke tánon tenhatihiáke nateriwaʼseronhniá꞉tshera ne watʼson skátke ne ronhnónha. Enhionkatewenhthéte tánon ne enskonhwatishén꞉naien ne thikáhiont nihioʼokón꞉as ne tsi ionhontsá꞉ien ne ó꞉nen thóhwa thoniahón꞉ne.

Deuteronomy 31:17

Nó꞉nen ne nenhiá꞉wenhne, kwáh ki enkhenákwase; kwáh enkhehiatewenhthéte, tánon kwáh enhonwatinonhwarià꞉kon. Wé꞉so ioriwákes ne kariwaieshá꞉tsheras enhotí꞉rahne, tánon nó꞉nen enhónhthoke kí꞉ken tsi nihotihiathawénhserons ne tiorì꞉wa Ní꞉i ne Raotiní꞉io, tsi iáh ó꞉nen tetiakwakwé꞉kon.