Jeremiah 31:7 - Ohiatonhseratokénti

⁷ Ne Roiá꞉ner ráton, “Tesehwahriwákʼkwas natonnahráhtshera ne Israel, ne ahonháʼa tkasennowáhnenh akahonhà꞉ke nonkweshónha. Tesehwahríhwak ne sehwahrénnas ne kanonhwerahtóntshera, ‘Ne Roiá꞉ner wahshakonónhsthaʼte ne rahonkwetahshón꞉a; wahshaʼkoniákenʼthe tsi nihiákonh ne iaʼtehiakothaténron.’

Jeremiah 31:7 ပူးပေါင်းရင်းမြစ်များ

Psalms 106:47

Saskwahiatanóns꞉tat, Ó Saiá꞉ner onhkwahNí꞉io, tánon sakwahiataróhrok tsi natehionkwahrénion nonkwéhne, ne nahónton taiakwahtenonhweráton ne sasenhnatokénti tánon ahiakwahtonnáren tánon takwahnonhweráton.

Psalms 126:2

Tsi nihionkwahiéson, tánon ne iakwenhnasáke ne watsiohénreʼte naʼtsienhnonhniátshera; eʼthóhʼne wahonhnirón꞉nion tsi ienakeré꞉nion nonhkweshón꞉has, “Né Roiá꞉ner iorihowánens tsi nisakotséraʼse.”

Psalms 14:7

Ó nètho nahotesenhniétsera ne Israel Zion nón꞉we nénhtewe! Nó꞉nen ne Roiá꞉ner ensehsakorihwakwahthákwaʼse tsi nihononnhétie ne rahonkwetashón꞉ha, aiáwens Jacob kwáh kíʼ enhatonhnháren; aiáwens ne Israel kwáh enwatsenhnón꞉ni.

Psalms 28:9

Ó sehnónstat né shonkwetaʼshónha Saiá꞉ner; tánon sehiathatérist né í꞉se sonhkwetaʼshón꞉has; ʼi꞉se sehiathenhnikonhráhren, tánon sehnikonhraratiések.

Psalms 67:1

Aiáwenhs ne Rawenni꞉io aotanitenhratskónhake nontionháke tánon ashonkwahiatatériste tánon ahontahorihwaiérike tsi ashonkwatkátho. Selah

Psalms 69:35

Asèken ne Rawenni꞉io enhanónsthate ne Zion tánon ensanatonhniánion ne Judah nón꞉we; tánon ne raonhatserashón꞉has kwáh kíʼ thóh nón꞉we nenhonhnónnheke tánon enhontsénawaste nonhóntsa;

Isaiah 1:9

Tó꞉ka né Roiá꞉ner roshaststenserowanenkówa iáh thahothontátonke toká꞉ra nihionkwétake iathahonathaténhron, ne Jerusalem kwáh tokénʼen tsi akonwatóntonʼke, tsi kíʼ ní꞉ioht ne Sodom tánon ne Gomorrah tsi niʼiotihiatawénhon.

Isaiah 11:11

Né thóh enwenhniseráte ne Roiá꞉ner kwáh kíʼ iaʼthensanéntseste ne tekeníhaton ienwàteratsʼte nahonshaʼsakohiataróhroʼke ne iatehonathaʼthénron ne rahonkwetaʼshón꞉has, né꞉ne Assyria, Egypt, tánon ne Pathros, Ethiopia Elam, Shinar, Hamath, tánon ne kawenhnokwátʼtonhtses ne kaniataraʼkhekowàʼne natentʼtónhne.

Isaiah 37:31

Né tsakoniakénʼen ne iateiakothaténron nonkweshónhas ne Judah kwáh kí shé꞉kon enskaterónhten tsi tenhwatonhontsawéheste, tánon enwahiaʼnihiónten né éhʼnekenh;

Isaiah 37:4

Tó꞉ka nón꞉wa ne Roiá꞉ner saní꞉io wahothónteʼne ne raowenhnashónhas ne Rabshakeh, tsi né꞉ne ronnontí꞉io ne Assyria rohiatakweʼní꞉io í꞉ken ieothó꞉rion ne thaʼoiéron ne ronnhehónwe Ní꞉io, tánon kwáh aharihwáiaʼke nowenhnashónhas nètho Roiá꞉ner Saní꞉io rotontéhon; èhʼtho ká꞉ti kwáh sewaharátat ne sewaterénhnaient ne akorihwáke tsi niʼiákon iateiakothaténhron.”

Isaiah 44:23

Tesehwaʼríhwak, Ó tsi karonhiátes, asèken Roiá꞉ner ehniʼóshon; tesehwahénret, Ó nonʼhontsokónsons ne tsi ionhwenhtsáte; thonʼtatiótkaf tsi tesewaríhwak, Ó tsi ionnontaʼrónhnions, Ó karhaʼkonkówa, tánon kwáh tsi niatekaronhtàkes né thóh iohrontótons! Asèken né Roiá꞉ner shoniakénton ne Jacob, tánon kwáh kí enhonwaiatanerá꞉kwahte NʼIsraerʼronónke nón꞉we.

Isaiah 52:8

Satahónsatat! Né shonkwetaʼshónhas ne ratiʼnikónrare wahthotiʼhénrethe, skát꞉ne tsi wathaʼtiríwakwe natonhnhárat; asèken kwáh tshiehióken tsi rontkáthos tsi nionsáre ne Roiá꞉ner ne Zion nón꞉we.

Isaiah 61:9

Né tsi wahatiʼwatsiratátie kwáh enhonwathiʼieteríhake tsi ratiʼnahkeré꞉nions ne ronhnonhontsaʼkeró꞉nons, tánon né ieʼsehshakotiʼiohokónhas ne tsi ienahkeré꞉nions nonkweshónhas; ratiʼkwé꞉kon nónhka enhonwatíken kwáh kí enierihwaníraʼte né꞉ne ronónha nonkweʼshónhas tsi nikáien ne Roiá꞉ner sakoiatateríston.

Jeremiah 20:13

Tehonwahriwáhkwas ne Roiá꞉ner! Tehonwanonhweráhton ne Roiá꞉ner! Sehshakoniaʼkéntha ne iontatwishá꞉tha tsi nòkwa ne rahotishastsʼténseras ne ionkwetahétkens.

Jeremiah 23:3

Ensheʼkhehiataróhroʼke nakonhkwetaʼshón꞉a tsi nonhwésons niʼkanakerahsehrakérons iaʼtekhehiareʼniáton, tánon tenthekheʼhiaténhaʼwe tsi nónhwe nihonahnakeráhton. Wéso enhotiwirahiénthaʼne ó꞉ni enhonatiokowáhna.

Jeremiah 3:23

Iáh othènenh tehionkwahiathakenáhon tsi hiakwahsénnaiens ne iáh tehioriwiʼiosthontsheráien nohnothoharahkeshón꞉s. Nahohiathakehnhátshera ne Israel Roiá꞉ner khók nónhwe nitehwétha nonhkwahNí꞉io.

Jeremiah 31:12

Kwáh tentʼthónʼne tánon tenhatiʼriwáhkweh naʼthonnharáhtshera ne tsi iononhtáhereh ne Zion tánon ne enhontsennonhniáthaʼkwe tsi nenhkhehiawíhon— enkhenahtsiawíhon óni ne iaʼkenʼiehwáhtha kénhie, enkheʼnaskwahwíhon ne teiotinahkarontónʼa óni ne tionónhskwahrons. Kwáh enthonenhiotónhake tsi enhonahtennisehraʼténionʼke tsi ní꞉ioht ne kwáh konwahtiʼnekanónhten ne kahéthaien; kwáh tsi nahó꞉ten ne tahonahthonwenhtsioníhaʼke kwáh akwékon enhathiʼiéna.

Lamentations 1:1

Iatetioʼiatíston ne Jerusalem, tewenniserátekwe kwáh titkanenráhrakwe! Tewenniserátekwe tsi niʼionwéntsia tekonwarensáronskwe, ó꞉nen nónwa thoníʼioht tsi síken ní꞉ioht ne ioteréʼons; Né kwáh tkasennowanénʼne tsi níkon ne kanahtowá꞉nens ó꞉nen kanáskwa iotónʼon.

Ezekiel 6:8

“Ók enkheríhon tohʼkàrah niháti nakonhkwetashón꞉ʼa nakonhwahniákenhse ne kariwahiesáhtshera, tánon kwáh tenhonwahnaréniathe tsi ienahkerénion nonhkweshón꞉ʼa ne tsi ionwenhtsáte.

Hosea 1:7

Nok ki enwatsientake ne kenténhron rononhà꞉ke nonkweshón꞉as ne Judah, tánon kwáh í꞉i ne Watiá꞉ner raotiní꞉io tsi enkenónstate; ók iáh ne thakáts꞉te nahénna, khés nasareʼkó꞉wa, khés nateriiósera, khés ne kosathénsa, khés ne rotishá꞉tens.”

Joel 2:32

Eʼthò꞉ne tsi nihiá꞉kon nenhienáton ne raoshén꞉na ne Roiá꞉ner kwáh kí enhionthatenónsthate; asè꞉ken ne tsi Iononte ne Zion tánon ne Jerusalem kwáh thóh nón꞉we nenhieniá꞉kenhne, tsi kí ninihá꞉wen ne Roiá꞉ner, tánon thóh nón꞉we tsi nihiá꞉kon ne iateiakotathénhron né꞉ne ronónha ne Roiá꞉ner sakoiatará꞉kwen.

Amos 5:15

Sehriwáshon nahó꞉ten ne kariwáksen, ne sehnó꞉ronk nahó꞉ten ne tkarihwaié꞉ri, tánon serihwaní꞉rat ne kaianéren ne tsi iothenhenrakáronhte; ne naiawenskénhen né꞉tho Roiá꞉ner, ne Sakowenní꞉io ne ratironhiakerononhs, kwáh enhontahorihwaié꞉rihke ne iatehonatathénron rahonhà꞉ke ne Só꞉se.

Micah 2:12

Kwáh orihwiiohón꞉we tsi enskwahiataró꞉roke sewakwé꞉kon, O Jacob, kwáh ensehkhehiataró꞉roke ne niatehonathaténhron Israerró꞉nonhke; kwáh skátne enkhè꞉teron tsi ní꞉ioht ne teiotinakaronhtón꞉a ne Bozrah nón꞉we, tsi nón꞉we nikonhwatiʼteronhtáhkwa tánon tsi nikowá꞉nen teiakonitonhniathén꞉nis nonkweshón꞉as.

Micah 7:18

Ónhka ne Ní꞉io akénhake thóh nahahiatoténhake tsi ní꞉se ní꞉ioht, sehsenikónrenhse ne karihwaneraháktsheras tánon tehatkarohestháhkwa ne ratiriwanón꞉we ne iatahonathaténronke ne raonkweʼtashón꞉as? Iáh tehatienawástha ne raonhakwáhtshera ne iahokonhtakwénhake, tiorì꞉wa tsi ne rawerientí꞉iostha tsi renéstha natanitenhrátshera.

Zephaniah 2:9

É꞉tho ká꞉ti, tsi nikónhnhe, ráton ne Roiá꞉ner ne kwáh è꞉neken tókte ne ratironhiaʼkehró꞉nons, ne Sakoní꞉io Israerʼró꞉nons; ne Moab thóh nenhiohiatáwen tsi nihiohiatawénhon ne Sodom tánon nahonkweʼtashón꞉as ne Ammon thóh nenhotihiatáwen tsi nihioiatawénhon ne Gomorrah, thóh nón꞉we niwatonhniátha ne kahontátsens tánon ne hiosonhwakarónhtons ne tiohió꞉tsis tánon kariwaiesáton né꞉ne tsi nén꞉we enkénhake; ne iatehonathaténhron nakonhkweʼtashón꞉as Judahró꞉nons kwáh enhatinenskwenhá꞉ton, ne nakonkweʼtashón꞉as ensatihiatakwení꞉ioke.

Romans 11:5

Kwáh káti sékon neh sáka nónwa nikaháwis. Kénk niháti iateshonatháteron tsi nikáien ne Rawenni꞉io sakoiatarákwen ne rahoténrat iorihonníʼon.

Romans 9:27

Tanon Isaiah wahanikonraiénthaʼte tsi nòkwa ne Israel, “Tòhka ó꞉ni thóh nahionthonkwetaʼkáteke neh Israel tsi níkon tekanesaronkhótharon neh ahtsakthóntie neh kaniatarakhekówa, nók khiʼkenk nenhatíhake enhathiniákenʼne;

Deuteronomy 28:13

Ne Roiá꞉ner saNí꞉io ne enhión꞉ni nasehéntenhse nonkwehshón꞉a tánon iáh nashé꞉sere, kwáh tió꞉konte tsi enshahianerastén꞉ni ó꞉ni iáh nonhwénton tahisariwanó꞉ron tó꞉ka enhioriwatokénhake tsi enshatewénhnaraʼkwe akwé꞉kon ne rahoriwatà꞉tsheras né꞉tho tkwawí꞉hons nón꞉wa wenhniserá꞉te.

Deuteronomy 32:43

“Tsónhkwes, ó꞉nenk tsi thenieʼtsinonhwerá꞉ton ne Rawenni꞉io rahonkweʼtashón꞉a— shakorewátha ratikwé꞉kon nónhka enhonwatinonhwarià꞉kon. Shakháriks tsi nokwáh ne ronhwáshons tánon shesakorikonhrénhse ne raotirihwanerahà꞉tsheras ne rahonkweʼtashón꞉a.”