Jeremiah 27:5 - Ohiatonhseratokénti

⁵ “Né nakeshastsʼténsera ó꞉ni tsi nikeshástsʼte né wakátston tsi wahkonhontiónni, khehiatísons nonhkweshón꞉a, tánon konhtiʼkwékon ne katʼtshénens ne nonhwenhtsiáke nónhwe nikonhnónnhe; tánon kwáh tsík ónhka entekhéhion tsi nenhtkheráhko.

Jeremiah 27:5 ပူးပေါင်းရင်းမြစ်များ

Genesis 1:25

Tánon ne Rawenni꞉io shakoiatíson ne kontírio ne tsi ionhwentsà꞉te né꞉ne tsi niiotitiohkoténhshons, ó꞉ni ne ienahskwáiens tsi niiotitiohkoténhshons, tánon kwáh tsi niiatehá꞉ti ne ronté꞉seres nonhwentsà꞉ke né꞉ne tsi nihotitiohkò꞉tens. Tánon ne Rawenni꞉io wahatkáhtho tsi niioiánere.

Genesis 9:6

Nónhka aiontatenonhwariá꞉kon nón꞉kwe, akó꞉ren nón꞉kwe entiontatenonhwariá꞉kon; aseʼkénh kwáh tsi nihatkathohtsheró꞉ten ne Rawenni꞉io tsi shakoiaʼtíson nón꞉kwe.

Ezra 1:2

“Né kí꞉ken ne Cyrus rahorihwisahá꞉tseras, Rakó꞉ra ne Persia. Ne Roiá꞉ner, Rawenni꞉io ne Karonhiá꞉ke, wahatʼkórasthe nohontsakwé꞉kon tánon thaká꞉wi nakaterihwatsté꞉risthe naʼkenonsónhni nononhsatokentihkó꞉wa ne rahorihwà꞉ke ne Jerusalem thóh nón꞉we ne Judah.

Nehemiah 9:22

Tánon ní꞉se thashé꞉ion ne kanakeráhseras tánon nonkweshón꞉as, tánon thóh wateshehiaré꞉niate kwáh tsi niió꞉re ne tehiotenontahwenhétkons. Tánon wahontié꞉nawatste tsi iohontsá꞉iens ne Sihon tánon ne rahóntsas ne ronhnontí꞉io thóh nón꞉we Heshbon tánon ne tsi ionhontsá꞉ien ne Og, né꞉ne ronhnontí꞉io ne Bashan.

Psalms 102:25

Waʼhonhnisekówa tsi ná꞉he thesiskwáhere ne tsi ionhwenhtsáte, tánon kwáh í꞉se shaʼtshanáke sháston tsi nishá꞉shon ne tsi karonhiáte.

Psalms 96:5

Asèken akwékon nonkweshón꞉has akoniʼiohokónhas kahiatonhnisónha í꞉ken, ók Roiá꞉ner, róhson ne tsi karonhiátes.

Exodus 20:11

Né iaʼiákʼkhaton siwenhniserakéhaton Í꞉i, ne Watiá꞉ner, waʼkonhontsíson, waʼkeronʼhíhson, ne kaniaʼtarakheʼkówa, tánon nʼoriwaʼkwékon né thóh íken, ók kí ne tsathákʼhaton siwenhniserakéhaton waʼkenhniseraiériʼte. Né káti aoríwa Í꞉i, ne Watiá꞉ner, waʼtiathatéristhe ne tsathákʼhaton tánon waʼkenhniseratokentísʼte.

Exodus 6:6

Káti ietʼtsiró꞉ri lsraeró꞉nons tsi káton, ‘Í꞉i ne Watiá꞉ner; kwáh enkwahniákenʼte tánon enskwahtaʼtewenhniʼiósehron tsi niʼietsinaskónhnis ne Egyptró꞉nons. Enʼtkharahthá꞉the ne kenenshaʼshatsʼte nahontátʼkhawe ne tehioʼtenonhiaʼnhíton karewahthá꞉tshera ne roʼnonhàke tánon enskwaniákenʼte.

Isaiah 42:5

Asèken rá꞉ton ne Rawenni꞉io, né Roiá꞉ner, tsi rahónha róshon ne tsi karonhiáte tánon waʼthatirónhten, rahónha teotakwahríton ne tsi ionwenhtsáte tánon tsi nahó꞉ten ne nón꞉we nitkáhas, rahónha shaʼkotonrietserá꞉wi nonkweshón꞉has ne tsi ionwenhtsáte ó꞉ni nonikónra tsi nihiákon né thóh nón꞉we naʼtehiontekhaʼhákwah:

Isaiah 44:24

Ká꞉ti rá꞉ton ne Roiá꞉ner, né shiaʼhiatákwen, ónhka iesaiatón꞉ni ne tsi watewiʼraráhkwah: I꞉i ne Watiá꞉ner, wakʼsahánion norihwakwékons, iatetiá꞉ti khók tsi tewakʼtakwahríhton ne tsi karonhiátes, iatetiá꞉ti khók tsi wakonhontsaʼkwénhtaron;

Isaiah 45:12

I꞉i wakonhontsíshon, tánon kehiatíson nonkweʼshónhas thóh khéteron; né꞉ne katsanákes tehiotakwahríhton ne tsi karonhiátes, tánon I꞉i kheriwáwi ratikwé꞉kon ne ratironhiakeró꞉nons.

Isaiah 48:13

Katshanáke iotskwáhere ne tsi ionwenhtsáte, tánon né kheweientethákwen watʼkatakwáhriʼte tsi karonhiátes; nó꞉nen shontakatáhti, óksak thóh nahá꞉wenhne.

Isaiah 51:13

Tsiaʼtanikonrénhen ne Roiá꞉ner, né iahiaʼtíshon, rahón꞉ha tehotíronhte né tsi karonhiátes tánon thononhkónhni ne tsi iohontsáte. Iesakontákwen sáterons ne tsi niwenhníseres tsioríhwa tsi nihotenakwahwenhráti ne sakowisátha, né rahónha thóh iatehotsátʼton karonhiakentserákon. Ók kaníwes ne raonhakwáhtshera ne sakowisátha?

Jeremiah 27:4

Ne Roiá꞉ner Roshastsʼtenseroʼwáhnen, ne ne shakoʼNí꞉io ne Israerʼró꞉nons, wahatró꞉ri nakhènahne nahonwahtiʼró꞉ri ne rontiʼnonhtí꞉ios nètho Roiá꞉ner tsi ráwenh:

Jeremiah 32:17

“Sahnonhtí꞉io Saiá꞉ner, i꞉se shá꞉son ne tsi ionwenhtsiáte ó꞉ni ne tsi karonhiáte ne sátsthon tsi sashastsʼtenserowáhnen ó꞉ni sehsátsʼte; kwáh iáh thahóthen ne ahisentoráhkwen.

Jeremiah 51:15

Ne Roiá꞉ner tsi rahonhontsíshon raoshastsʼténsera róhstʼton, rahónʼa raoʼnikonhrohwahnhátshera rótston tsi rahonhontsíshon tánon wahthaʼtirónhten ne tsi karonhiáte.

Daniel 2:38

Í꞉se wahiakó꞉wanahte tsi nón꞉we niienakerénion ne onhwentsiá꞉ke tánon enhsheiatenʼnikón꞉raren kontikwé꞉kon ne kontírio ó꞉ni né otsiʼtenʼokón꞉ʼa. Né kanontsíne neʼtho kaiaʼtón꞉ni ne ohwistanó꞉ron ionnià꞉ton í꞉se nenʼné꞉e séntons.

Daniel 4:14

Kwáh wahatewénnatehte, ‘Seróntiaʼk tánon tetsà꞉khon naoʼnenhraʼshón꞉ʼa; senerahtoskarónko tánon tesaréniaʼt naohikʼshón꞉ʼa. Sheiatékwahʼt ne kontírio ne karontó꞉kon ó꞉ni notsiʼtenʼokón꞉ʼa ne aoʼnenhraʼkéhshon.

Daniel 4:17

Né kiʼ tsi nihonohétston nowennaʼshón꞉ʼa ne ratironhiaʼkehró꞉non tsi nihonatateweiennentáʼon tánon ratiʼnikón꞉rare. Ne iorihón꞉ni akwé꞉kon nonkwehshón꞉ʼa aiakoterién꞉taraʼne ne Roʼshatstenhserowá꞉nen Rawenni꞉io kwáh thishakowenní꞉io ne tsi kanontiiotsherakè꞉ron tsi ionhwentsá꞉te tánon ó꞉ni kwáh thenhanónhton nónhka aontahshakáwen ne kaʼshatsténhsera kwáh tsi nenthanón꞉weʼne—shé꞉kon ó꞉ni ne kwáh kenʼ naontaiehsennáhska.’”

Daniel 4:22

“Kí karòn꞉ta, Sanontí꞉io, né ne í꞉se! Sakowanhà꞉on ó꞉ni saʼshatstenhserowannhà꞉onʼ. Ne tetsitsatié꞉ren ne kwáh karòn꞉tes ne iekaníharaʼs ne tsi tiohtsikerarónnion. Tánon ne saʼshatsténhsera tsik nonwéhshon non ne tsi ionhwentsiá꞉te iekaní꞉haraʼs.

Daniel 4:25

Eniesanakerákwahte tsi nón nihón꞉nes nonkwehshón꞉ʼa tánon kontírio skátne entsiʼsewakwekonhatié꞉sheke. Tsá꞉tak niiohserá꞉ke óhonte khók ensesékʼsheke tsi ní꞉ioht ne teiotiná꞉kares tionhónskwaront ó꞉ni kenʼk nón꞉we tsi iówerare non nenhsanonhwétsheke, thoʼ ó꞉ni nón꞉we nensaʼáweiahste. Tsi niaʼtenhsókten ne tsá꞉ta niiohserá꞉ke enhserihwahní꞉rate ne kwáh Roʼshatstenhserowá꞉nen Rawenni꞉io tehshakoniarotárhon onkweʼtakwé꞉kon tsi nón꞉we ne kanontiioʼtsherakéron tsi ionhwentsià꞉te tánon ó꞉ni kwáh thenhanónhton ónkha ahshakoiaʼtará꞉ko naiontenontí꞉iohste.

Daniel 5:18

“Ne Roʼshatstenhserowá꞉nen Rawenni꞉io taháon ne iaʼníha Nebuchadnezzar ki kanakeráhsera tshiewakwé꞉kon naoʼshatsténhsera ó꞉ni ne kaiaʼtanehrakwáhtshera tánon ne nahahsennowánnha.

Acts 14:15

“Onhnontiéren tsi éhʼtho naisewáiere? Í꞉i kwáh thóh naʼtehiakénonwe tsi kíʼ niseni꞉ióht! Kén꞉en hiákenes nahiakenirihówanaʼte ne kariwí꞉ios, nehne tahonsakwakaraténi tsi nisewasénnaiens ne iáh thènen tekariwástas nók kíʼ neh nahónton neh ahonsahtsisewasénnaien ne ronnhehónwe Ní꞉io, tsi nikáien ne rosahánion ne tsi karonhiátes ó꞉ni tsi ionwentsiáte, kaniatarakekówa, tánon kwáh tsi nahoténsons neh non nikonónnhes.

Acts 17:24

Rawenni꞉io, raónha róhson tsi ionwentsiáte ó꞉ni kwáh tsik nahoténsons, rahónha ne Roiá꞉ner tsi karonhiáte ó꞉ni nonwentsiáke tánon iáh ononsatokentíke nónhwe tehénteron tsi naʼkanonsonʼniáton ne ónkwe akosnónsas.

Acts 17:26

Tsi thoʼhiatíson ne saiátat rónkwe thóh nitsiaʼwénon tsi niaʼteienekwénsakes nónkwe tánon kwáh tsiknonwéson ne tsi ionwentsiáte nisakóteron. Kwáh rahonhatsíwa ohénton thóh kwahʼtákwen tsi nienkáhewe tsi ni kawistáheks ó꞉ni kwáh kathóʼkenk tsi nónweh nahathinákereke.

Deuteronomy 2:19

Ethò꞉ne kwáh ákta iensehwè꞉sehke tsi ronatonwenhtsá꞉ien ne Ammonró꞉nons, né꞉ne tsi tahawatsiratátie ne Lot. Tó꞉sa ki ieʼtsiritstón꞉nien tó꞉sa ó꞉ni tasewatáshawen ne ihsewaterí꞉io ne ronónha, tiorí꞉wa tsi kwáh iáh othé꞉nen tahontátion nohóntsa ne thekhehiá꞉wi.’” (

Deuteronomy 2:21

Thóh nihatiʼnenhié꞉sonhskwe tsi ní꞉ioht ne Anakim. Ronatioʼkowanénhne, tánon ratiʼshátstekwe. Ók ki Roiá꞉ner shakotòn꞉ton, ne káti nahónton ne Ammonró꞉nons ahatiʼié꞉na ne raononhóntsas tánon thóh nónhwe nahontená꞉taien.

Deuteronomy 2:7

“Sehwehiá꞉rak tsi ní꞉ioht ne Roiá꞉ner sewaNí꞉io tsi eʼtsisewahiataʼteríston né kwák tsi nahisehwatiérake. Waʼtsisewatenhnikònhraren tsi watesewatawénhrie tsi niahí꞉sehwe ne kén꞉en ne tehiotenonhianì꞉ton ahonwenhtsiathèn꞉ke. Sehwakwekonʼhátieskwe né꞉ne kaiéri-niwáshen nihioserà꞉ke nikarí꞉wes, tánon akwé꞉kon niesehwaiéntaʼkwe tsi natesehwatonhontsóni.

Deuteronomy 2:9

Ne Roiá꞉ner wahakró꞉ri, ‘Tó꞉sa teietsiʼnikónhraren nonhkweʼshón꞉ʼas ne Moab nónhwe, né꞉nenʼne ne Lot raowátsires, tó꞉sa ó꞉ni tasewatáshawen naterióshera ne rononhà꞉ke. Ronónha né tekhehiá꞉wi ne tsi kanatowá꞉nen ne Ar, tánon iáh thahontakwá꞉ion ne thé꞉nen akénhake ne raononhóntsa.’”

Deuteronomy 32:8

Nó꞉nen ne Rawenni꞉io ne naonhà꞉a tháshatste tsi ní꞉ioht nakorénhson nihiohokón꞉as, wasakahontsawí꞉hons ne niaʼteiakahontsà꞉kes. Waharakwenhá꞉ton tsi nonwéhson nahienákereʼke. Thasakowí꞉hon ne sohthitiokwà꞉tsons nahotinihioseraién꞉take,

Deuteronomy 4:17

konhtiʼtsé꞉nen tó꞉ka ó꞉ni otsiʼténhas akénhake,

Deuteronomy 4:25

“Iawerohátien tsi ó꞉nen karí꞉wes thóh tsi iohontsá꞉ien sewanakerè꞉kwe tánon wesewawiraientà꞉seron ó꞉ni wesewatereʼsenhá꞉ton, tó꞉sa sewariwánerak tsi ahisewatatiaʼthonhniserón꞉nien ne kwák tsi naioʼthónhake. Kariwáksen kí꞉ken í꞉ken raohénton ne Roiá꞉ner, tánon enhonaʼkonhniá꞉te.

Deuteronomy 4:32

“Sewariʼrísak tsi nitiawè꞉non, nohénton sehsewanakerà꞉te, thonió꞉re onà꞉ken shá꞉sewet né nó꞉nen ne Rawenni꞉io shasakohiaʼtón꞉ni nonhkweshón꞉as ne tsi ionwentsá꞉te. Kwáh ohontsakwé꞉kon tsi sewariwísak. Nonwenhtónken neknahò꞉tenk né nihiorihowánen nahiawénhon ne tiotierénhton? Nonwenhtónken nónhkak ahiakoriwarónhkenke né nataiotenonhianiʼtónhake tsi ní꞉ioht kí꞉ken?

Deuteronomy 4:35

Ne Roiá꞉ner tsi sewanathón꞉ni kí꞉ken, natsisewariwaní꞉raʼtse tsi raonhatsíwak ne Ní꞉io í꞉ken tánon kwáh iáh ónhka nakò꞉ren akénhake.

Deuteronomy 5:16

“‘Sheʼkwénienst ne iaʼníha ó꞉ni ne sanisténha, tsi Í꞉i, ne Watiá꞉ner sewaNí꞉io wakwahró꞉ri, ne kwáh ahioianeréhake ne sarihwà꞉ke tánon káti nahónton karí꞉wes ashón꞉nheke tsi ionhontsá꞉te ne tkonhiawí꞉re.

Deuteronomy 9:29

Asè꞉ken ronónha ne kwáh í꞉se shonkweʼtashón꞉as, ronónha ne teteseiaʼtinekénhen ne shátston ne kaʼshatstenhserowá꞉nen ó꞉ni ne sashatstenhserowaná꞉tshera tánon tsi nateshatewehiakaráhwen.’

Colossians 1:16

Asè꞉ken rahonhá꞉ke nón꞉we ne Rawenni꞉io orihwakwé꞉kon nihosahánion ne tsi karonhiá꞉te ó꞉ni nonwentsiá꞉ke, ne ióken tanon nahóten ne iáh teiókens, thóh í꞉kare ne kariwiiostóntsera ahosasténseras, Rotiʼianers, ratikorásons, tánon ne karíhtons. Rawenni꞉io kwáh orihwakwé꞉kon rahonhá꞉ke non rosahánion ne tsi karonhiá꞉te ó꞉ni ne tsi ionwentsiá꞉te tanon rahónha rahoriwà꞉ke.

Hebrews 1:2

nók kíʼ nonakènkha tsi niwenniseraténions raonháke ne roiénha nónwe nishonkwataránis. Raonháke nónwe nitsawénon tsi kashahánion ne kwáh tsík nahoténson, tsi nikáien ne Rawenni꞉io rohiatarákwen ne oriwakwékon ahowenkónweke ne tsi iehiótokʼte.

Revelation 4:11

“Í꞉se ne kakwenienstháhtshera í꞉ken, Onkwaiá꞉ner ó꞉ni Ónkwa Ní꞉io, nashé꞉na ne kaiatanerakwáhtshera ó꞉ni ne tekarénhsaron ó꞉ni kaʼshatsténhsera, asè꞉ken í꞉se norihwakwé꞉kon shasahánion, tánon né꞉ne tsi nitisanikonhrí꞉ioʼon kwáh wakaién꞉taʼne ó꞉ni ontón꞉nhete.”