Jeremiah 23:11 - Ohiatonhseratokénti

¹¹ Ne Roiá꞉ner ráton, “Ne rothitó꞉kense ó꞉ni ne rotikháres kwáh iáh tehothiniʼioseráhien; Iekènʼa kheʼharáhse kariwáksen tsi nihóntiera ne ononhsatokentiʼkówaʼne.

Jeremiah 23:11 ပူးပေါင်းရင်းမြစ်များ

2 Chronicles 33:5

Né tékeni iokwénhrahres natenhénrahkons Nononsatokentiʼkówaʼne warénhni ne ietsienharáhkwah né naʼkonwasenhnaiéntakwahke notsístos.

2 Chronicles 33:7

Tánon kahiatónhni kahiátare waʼharahnénhtatʼte né kanónskon Nononsatokentiʼkówaʼne, né꞉ne tsi nón꞉we ne Roiá꞉ner rohró꞉ri ne Táwit roiénha Solomon: “Kénʼen kí꞉ken Jerusalem nón꞉we, kénʼen Nononsatokentiʼkówaʼne, nón꞉we niwakeráhkwen né tsi niwatenáskwah ne tekeniʼiawénhre nihotitárahke Nisraeʼró꞉nonke tsi nón꞉we nenhiontsenhnaiénhsehke.

2 Chronicles 36:14

Né iehiowénhte, ne sakotihenténhse ne Judah nón꞉we, né ratiʼtsihénstatsis, tánon nonhkweʼshón꞉ʼa waʼhatí꞉sehre ne kwáh tkarihwáneren washakonatenonwará꞉kwahse nonhkweʼshón꞉ʼa ne akthatsesónha ratinakeré꞉nion tsi nikonwasénhnaiens ne kahiatonhnisónha, tánon ká꞉ti tsi nathatítionsʼte Nononsatokentiʼkówa, né꞉ne kwáh rahonhatsíwa ne Roiá꞉ner rotokentíston.

Ezra 10:18

Ne kí꞉ken ne ronhnónhkwes ratisenhnarónhnions ne rothiniakʼkhons thihiononhontsá꞉tes: Tsi raotitarasónha ne Joshua ó꞉ni ne rontatekenokónhas, raonekenterontserasónhas Jehozadak: Maaseiah, Eliezer, Jarib, tánon ne Gedaliah.

Jeremiah 11:15

Ne Roiá꞉ner ráton, “Nónhkwe ne khenorónkwa kariwahétken tsi nihontiéra. Kahnithatihianerensehrénhas nakenonhsatokéntiʼke ahonnésehke? Rónnereh onhtèken enhatikwéni ne tahatítasʼte ne kariwaiesáhtshera tsi ronrahratsthánions ó꞉ni tsi rathítats tsi konhwanatsiatatʼtsahátha ne katʼtshénens? Ethóhʼne onhtèken enshonthonnáren?

Jeremiah 23:15

“Ehthóh káti, éhtho kíʼ ní꞉ioht tsi nahó꞉ten ní꞉i, ne Watiá꞉ner Keshastsʼtenseroʼwáhnen, kheienni ne rotitokénhse ne Jerusalem nónhwe: Ne entekhéhion ne tehiohontahiótsis kaientʼthótsera nahónneke tánon kanonhkwahtsheʼráksen ne iakorhiótha ahatinekírah, tsioríhwah tsi tehonahrehniátons ne iáh thènen tahkaiénthake ne Ní꞉io ne tsi ionwenhtsáte.”

Jeremiah 32:34

Iehióhe iehotí꞉ien ne ioterihwahtéhas kahiatonnisónhas Nononhsatokentiʼkówahne né꞉ne kanonhsonniáton nahionksennaʼiénsehke, tánon wahtatítionsʼthe.

Jeremiah 5:31

tsi rontáhtis ne rotitó꞉kense nék khók nohnhówenhs; ne rothikháres enhatísehre tsi nenhthontáti ne rothitó꞉kense, tánon nahkonhkwetaʼshón꞉a iáh thahóten tehathirihwáhiaks. Ók káti nenhatí꞉iere nónenh ienhónnewe tsi iehiótokte?”

Jeremiah 50:6

“Nakonhkwetaʼshón꞉a tsi ní꞉ioht ne tehiotinakaronhtónʼa ionahtiathaʼtónʼon. Ne shaʼkónonhne wahshaʼkothaharáhkwahte tánon tsi tiononhtarónhnion iasahkótkaʼwe. Wakontiathá꞉ton tánon iáh teskonnéhiaʼre onhní꞉ioht tsi iahonsakónʼne ne iahonshaʼhiakonatsiátarahse nonáhtsiake.

Jeremiah 6:13

“Onhkwetahkwékon, ahiesenhnowánenhke tó꞉ka ó꞉ni kentʼnaiesénhnaske, ronteniéntʼtha kanikonhráhthon tsi ní꞉ioht tsi ahontʼwisthónni; iekaníhareh ne rotitó꞉kense ó꞉ni ne rothikháres sahkotinikonhraténnis nonhkweshón꞉ʼa.

Jeremiah 7:30

“Nonhkweshón꞉a ne Judah nónhwe kariwahétken tsi nihonahtiéren. Hiehothí꞉ien ne kahiatonnisónhas, né íksons, nakenonhsatokentíʼke tánon wahthathítionste.

Jeremiah 8:10

Káti kwáh ahonkwetahsehsónhas tentetʼkhéhion ne rahotihentahsónhas tánon ne rothiniákons né nonhnè sá꞉ka. Kwáh onhkwetahkwékon, ahiakonkwetowahnénhke tánon kénk nahiesénnaske, hionteniéntha kanikonhráhton tsi ní꞉ioht tsi ahiontʼwistónni. Akwékon ne rothitó꞉kenhse ó꞉ni ne rothikháres sahkothinikonhrahténnis nonhkweshón꞉a.

Lamentations 2:20

Skenhénʼion, O Saiá꞉ner! Onnihiotiéren tsi thóh ní꞉ioht tsi takwarewátha? Ne tionatʼthonwísen ne ionékon ne rahothiʼieróntas ne iakothiʼienokónha ne ronwathinorónkwakwe! Rathitsihénstatsis tánon ne iehathiriwákens kwáh ononsatokentíken non nihonwanaséhtha!

Ezekiel 23:39

Kwáh né sahennísehra iakotinonhwahrhiákon ne kheʼienhokónha tsi iakonahtsatatʼtsaháton rahotihénton ne kahiatónhnis, akenonsatokentikóhwahne nonhtáhke tánon wakʼkenitsiónhte!

Ezekiel 44:10

Ne Roiá꞉ner wahakénhase, “Kherewáhthaʼne tí꞉ken Levites roʼnónha, skátke ne ronáhtsiakes nonhkweshón꞉ʼas ne Israerʼró꞉nonhke, hionkatewenhthéton tánon kahiatonhnisónhas konwasénhnaiens.

Ezekiel 7:20

Iehioterátston tsi nihatináiekwe tsi nihioiánerekwe ne raonáwenk owistanoronsónhas, ók ne ronátston tsi ronatsatonniseronhniánion ne ioteriwatéhas. Né kíʼ aoríhwa ne Roiá꞉ner wahshakahónnien ne raotikwahtshéʼshehra nahonatéhate.

Ezekiel 8:11

Tsáta niwáhsen niháti ne ohénton iehonnéton ne Israerʼró꞉nonhke thóh rónhneskwe, thóh rahiatáhre ne Jaazaniah ne roníha ne꞉ne Shaphan. Ne shatihiatátʼtions ne ratíhawe ne kaienkwahráhkon ionhtekathákwah, tánon ioienkwahrakethothonhátse ne kaienkwahrákon.

Ezekiel 8:16

Sók kíʼ iahatsaténhawe ne atenhénrahkon ne Ononhsatokentiʼkówa. Éhtho ákta ne tsi iehiontawehiatákwah ne Ononhsatokentiʼkówa, tsi nahtetsátere ne ietienharáhkwah tánon ne ioskwénhnonhte, kàknon ne tewáhsen-wísk niháti ronónhkwe thóh rónhnes. Ohénton ronhnèton nononhsatokentiʼkówa tánon etàke tehonahtsátʼthon tsitkarahkwínekens nienhonatieráhton, ne konhwasénhnaiens tsi tahiorahkwinekenhenhátie.

Zephaniah 3:3

Ne rathirihwakweʼní꞉ios nahonkweʼtashón꞉as kwáh né꞉ne kénreks ronatonhriáien, nahonkweʼtashón꞉as ratirihwéntha kwáh né꞉ne oʼkarasné꞉ha nokwáho rotistsiokánon tsi nió꞉re ienhiórenhne

Zephaniah 3:4

Nahonkweʼtashón꞉as ne rotitokénhse, kwáh iáh othé꞉nen tehonsterístha, iotonhkweʼtákterons; nahotsihénstatsis rotihetkénhtons ne iotokéntis nahoʼténhsons; tehotihiákon ne kaianerénhsera.