Jeremiah 23:10 - Ohiatonhseratokénti

¹⁰ Ne tsi ionhwenhtsáte titkáhereh nonhkweshón꞉a ne iáh tehiakoriwahtóken rahonháke ne Roiá꞉ner; kariwáksen tsi nihononhnhétie tánon ó꞉ia ní꞉ioht tsi ronatstonhátie ne rahotiʼshastsʼténseras. Ne karihónnis tsi shaʼkorewéhtha ne Roiá꞉ner nohóntsa wahkahiésah tánon ne tsi konwahtiʼterontákwah ne katʼtshénenh onstátʼthen ne kahentáhke.

Jeremiah 23:10 ပူးပေါင်းရင်းမြစ်များ

Ezra 10:18

Ne kí꞉ken ne ronhnónhkwes ratisenhnarónhnions ne rothiniakʼkhons thihiononhontsá꞉tes: Tsi raotitarasónha ne Joshua ó꞉ni ne rontatekenokónhas, raonekenterontserasónhas Jehozadak: Maaseiah, Eliezer, Jarib, tánon ne Gedaliah.

Psalms 107:34

né kwáh tiohontsí꞉ios kwáh kíʼ káiase ienhwáʼton né entioróhroʼke ne iotenatentásta tánon tsioiótsis, tsioríhwa né nón꞉we nihatinákere tsi nihonhnonkwetahétʼkens.

Isaiah 24:6

Né thóh ní꞉iot ne kariwaieshá꞉hon enwá꞉ke ne tsi ionwenhtsàte, tánon èhʼthoh ienakerénion né enhiakoronhiákente nakonhí꞉tshera; né káti aoríhwa ne ienakerénion tsi ionwenhtsáte iáh tetiontonkwetaká꞉te, tánon kénk nihionkwé꞉take iatetsakothaténhron.

Isaiah 5:18

Ní꞉se enseshataʼteriwásthen, í꞉se neh shé꞉sereh ne kariwáneren ne sathironhtákwen nahosehrí꞉ie nonhówenhs tánon ne kariwahétkens kwáh thóh ní꞉ioht kwáh ne ne otsiónkwa aosehrí꞉ie.

Jeremiah 12:11

Kwáh káiase wahonónhniaʼte nonhóntsa; akʼkénton káien iohiesáhon. Kwáh ohontsaʼkwékon kahentahkekówa iothónʼon, tánon iáh ónhka thènenh tehiontsterístha.

Jeremiah 14:2

“Judah iotsiónnion; ne ahonatahshón꞉a ne kanatowáhnenhs iawenheionhátse, nahonkwetahshón꞉a onhkwentsiáke ratihiatahkérons tsi nihotinikonhráksens, tánon ne Jerusalem tewahséntʼthos nakonhwaiénahwahse.

Jeremiah 6:13

“Onhkwetahkwékon, ahiesenhnowánenhke tó꞉ka ó꞉ni kentʼnaiesénhnaske, ronteniéntʼtha kanikonhráhthon tsi ní꞉ioht tsi ahontʼwisthónni; iekaníhareh ne rotitó꞉kense ó꞉ni ne rothikháres sahkotinikonhraténnis nonhkweshón꞉ʼa.

Jeremiah 7:9

Nensehnénhsko, nensehiasehthe, nenshá꞉tenahkwaieshá꞉the, nenshá꞉nowenhte nónenh sahriwahniráton, tánon nentiatienkwaronniáten ne Baal, ó꞉ni nensehsénnaien ne kahiatónnis ne iáh tesehienteríhʼne ne tiotierénton.

Jeremiah 9:10

Wakíron, “Tenkaséntʼthoseh ne tsi iononhtharónʼnions ó꞉ni tenkasénthoseh ne tsi konwathiʼteronthákwahs nahtenhenráhkonhs ne katshénenhs, tsioríhwah tsi akwékon iostatʼténhen, tánon iáh ónhka éhtho nónhhwe tetionthohénstha. Tsi nahionatʼtsiarokwáhtonke ne katshéʼnenh iáh ónenh ónhka tetsiakóthonʼte; otsitenokónhas ó꞉ni ne konhthitshénenhs kák tiehionénonh.”

Jeremiah 9:12

Wakerihwahnónhton, “Saiá꞉ner, onhnonhtiéren nonwénhtsia tsi iohiesáhon tánon iostatʼténʼen tsi ní꞉ioht ne kehenthakeʼkówah, káti ne ne tó꞉sa ónhka éhthoh nónhwe ahonsahiontó꞉hetsthe? Ónhka iatekahiéri tsi nahiontenikonhratʼthókhaʼke nahiakonikonhrahiéntahne kí꞉ken? Ónhka ashenikonhrahientahténni káti ne ne ahathikwéni nakóren iahonsahshakotiró꞉ri?”

Jeremiah 9:2

Kaskáneks nahonkenaktaiénthake tsi nónhwe naketerónthake ne kahenthakeʼkówa tsi nónhwe nahónton ne akhehiatékwahse nakonhkwetahshón꞉ha. Kwáh rathikwékon tsi iáh tehothiriwahthóhken, ne ne kentiókwah ne sahkonahtennínons.

Hosea 7:4

Kwáh ratikwé꞉kon rontenakwahiesá꞉tha; thóh nihatiiatóten tsi ní꞉ioht ne tsi iontenatarontáhkwah ne watarihá꞉ton, né sakonataronhniénhni iáh tatehiotonhontsó꞉hon tahatsirawénrie, tsi enthontáhsawen enhontesehrónhni kwáh tsi nió꞉re ienwathénko.

Joel 1:10

Ne kahentà꞉kes iorihwaieshá꞉hons; nonhóntsa iáh othé꞉nen thatetkánios; asè꞉ken nonátsias karihwatón꞉ton, nonenhará꞉keri iehiostéhon, ne kénhie wathontkári.

Leviticus 5:1

Tó꞉ka nónhkwe waherihwánerake tsi iáh tiehiakokʼkáwen noríhwa nónen ienhionthatenáton naierihwaníraʼte. Tó꞉ka tkarihwaiéri tsi ieshahiatonhseráwi naʼserihwanírate tsi tehiehiatoretákwa tánon iáh thasatró꞉ri tsi nahó꞉ten satkáton tó꞉ka ó꞉ni sarihwarónhken, ónenk tsi enseronhiáke tsi nenhiáwenhne.

Zephaniah 3:4

Nahonkweʼtashón꞉as ne rotitokénhse, kwáh iáh othé꞉nen tehonsterístha, iotonhkweʼtákterons; nahotsihénstatsis rotihetkénhtons ne iotokéntis nahoʼténhsons; tehotihiákon ne kaianerénhsera.

Malachi 3:5

Eʼthó꞉ne kiʼ kwáh sewaiaʼtákta én꞉kehte nakwarí꞉wenhte; kwáh entiaʼtahstó꞉reke tsi enkerihwahní꞉rate tsi nonwá ne rontenʼèn꞉naras, tsi nonkwá ne rontenahkwaiesáhtha, tsi nonkwá ne ratirihwahní꞉rats nonó꞉wenʼs, tsi nonkwá ne shakotironhiakèn꞉tha ne ratihnhá꞉tsheraʼs tsi nihonatkariá꞉kse, ne ionatehré꞉ʼons tánon ne tehontonhnhakárhias, tsi niiá꞉kon ne é꞉ren iehonwatí꞉reks ne thihonnonhontsá꞉te, tánon ne iáh teiontatkweniènhstha, rá꞉ton ne Sakoiá꞉ner ne ronterí꞉ios ratironhiaʼkehró꞉nonʼs.

1 Timothy 1:10

Né ioteriwahtéha, né kentétsera ratinikonrátha, ne ratiwirahnénskwas, tsi niháti ne ronnowéntha ó꞉ni ronnowéntha ne thènen ahontʼróri tóhka ó꞉ni nónkak ne kwáh ó꞉ia ní꞉ioht tsi ahontróri tsi nòkwa ne kwáh tóhkenske íken noriwahshónha.

Hebrews 13:4

Ne kaniá꞉tshera kwáh onhkweʼtakwé꞉kon tsi teiotonwentióʼon naʼieriwahkweniénstake, tánon ne rotiniátʼkons ó꞉ni ne iotiniákons ioteriwíson ne ahotirihwahtokénhake tsi naʼtehónteron. Rawenni꞉io enshakoréwahte nónka ne ieweienʼnáksen ó꞉ni ónhka ne iontenakwaiesátha.

Ne꞉ne Sák Rohiaton 4:4

Ne iáh teiakoriwatóken nónkwe! Iáh kén tesewateriéntare né꞉ne ahisewaténroke né tsi ionwentsiáte ne kéntons tensewaterohserák꞉sen ne Rawenni꞉io? Tóh꞉ka íhsere neh ahisewaténrohke ne tsi ionwentsiáte, wahsathatónnien natsisewáshon ne Rawenni꞉io.