Jeremiah 2:20 - Ohiatonhseratokénti

²⁰ Ne Ronontí꞉io Roiá꞉ner ráton, “Israel, wahónniseh tsi náhe tkénʼne wahsehriwáhson natianerénsehra; iáh tesatʼthontháton nahskewenhnahráhkwen ó꞉ni nahsekʼsénnaienhke. Ne kwáh tiótʼtes ionniarónnion tánon oronhthonkónhsons ne óhonthes niwahshokótens né tsénnahiens ne iáh thènenh tekarihwástha kahiatónnis.

Jeremiah 2:20 ပူးပေါင်းရင်းမြစ်များ

1 Kings 12:32

Né Jeroboam kwáh ó꞉ni wahahianerenhserísha ne karihwiʼiosthónhtsera akakʼkhwárake né꞉ne wísk-iawénhre shískaʼre ne shatekonháton nenhwenhnítarake, kwáh ki tsi ní꞉ioht ne Judah nónhwe. Thóh ietsienharákwahke ne Bethel wahaterihwathénhtsate washakoteskóntʼthase ne owistanó꞉rons tèro owíras kaiatónhni í꞉ken né ró꞉sons, tánon thóh nónhwe ne Bethel nasakóteron ne ratitsihénstatsis nahonterihwatsʼtérisʼthe ne ionhterenhnaienthákwah ró꞉son.

1 Kings 14:23

Wahonnonhniánion tsi nónhwe nakonhwatiʼsenʼnaienthákwahke ne iáh othènen tekaniʼioserástas tánon wahatiʼnawahathothónhnions tánon wahatiʼswenhkarahnenhtatʼthánion né Asherah tsi akonhwasénhnaien ne tsi ionhnonthariónhnions ó꞉ni ne tsi iorakwahweróstons ne karonhthokónhsons.

Psalms 107:14

thontasakohiatínekenhwe ne tsi tetiókaras ó꞉ni tsi ratinhó꞉tonhkwe, tánon waʼtharonkwahshiá꞉kon ne ratineréntstonhne.

Psalms 2:3

“Áʼnion tsi tewathatewenhní꞉ioh tsi nòkwah ne raonatsientaniákstha, ó꞉ni tsitewatatewenhní꞉io tsi nihionkinaskónhni.”

Psalms 78:58

Waʼsakoʼnhákwahse ne Rawenni꞉io ne tsi waʼhonnonniánion ne ietsienharákwas ne thikaniʼiosehrátes áhontste; waʼsakotekhétfase né꞉ne raotiʼhiatonhnisónhas waʼkonhtirihónhni.

Exodus 19:8

Ethòne ratikwékon nonhkweshón꞉ʼa tehaʼtiwenhnasehrátie tsi waʼthatiriwahseráko, “Kwáh ohriwaʼkwékon thóh nenhiakwáhiere tsi niháwenh ne Roiá꞉ner,” tánon ne Mahís hionsahoʼróhri ne Roiá꞉ner.

Exodus 24:3

Ne Mahís iashaʼkoró꞉ri nonhkweshón꞉ʼa akwékon tsi nahó꞉ten wenhénron ne Roiá꞉ner tánon oriwakwékon ne kaianerenserasónhas, tánon ratikwékon nonhkweshón꞉ʼa tsi wathatiriwasehráko, “Kwáh akwékon thóh nenhiakwáhiere tsi nahó꞉ten ne Roiá꞉ner wahénron.”

Exodus 3:8

Tánon káti takátsʼnenhthe nahonsakʼkheniáʼkenthe tsi nòkwah ne Egyptró꞉nons tánon ne tahontaʼkhehiaʼtínekenʼwe ne Egypt nónhwe thóh nienkhehiaténhaʼwe tsi nónhwe tionhontsowáhnen, tsi nikáien ne ionhontsàreʼsen ó꞉ni ionhontsí꞉io tánon tsi nónhwe né Canaanites, ne Hitró꞉nons, ne Amorʼró꞉nons, ne Perizró꞉nons, ne Hivró꞉nons, tánon ne Jebusites ó꞉nen nihatináhkere.

Isaiah 1:21

Tsi nahohiátahwen ne iorihwatokénhne Né kanatowanénhke tsiotahkwakareni iahónton! Ieioterátston ne nahón꞉ha kwáh kaiatananónhne ne kaiáneren, ne karihwakwariʼshióntshera ahonhàke nón꞉we nikénteron— ók ó꞉nen sakonashé꞉thas satíteron nahonháke!

Isaiah 10:27

Né thóh enʼtewenhniseráteʼke né raoriéna kwáh enharáhko ne snhensá꞉ke, tánon ne raotsientaniáksta kwáh enhwatón꞉tonke ne seniaràhke. Heniehawénon tho iehotohétston Rimmon, tánon ne iontsientaniátstha ne seniaráke káhere kwáh enwatóntonʼke ne enkarihónhni ne iorésenhs

Isaiah 14:25

Kwáh kí thentsá꞉ke ne Assyria nakonhontsáke, tánon thóh tsi wakatenontáhere thenhiʼiaskwáhseron thenʼkarasitaʼkénserakwe; ne raoʼtsienhtaniáʼtstha èhʼren enkahawítonhke ne rononháke, tánon nʼoriéna tenhontsiotarisi ne ratinenhsàke.

Isaiah 9:4

Asèken ne ronteniarorókstha ne rotiʼrieniaksthénhni, tánon ne tekaniáronhwe ne ratironkwenakhe, ne raothí꞉nia né sakotiwisáthakwe, í꞉se tesahiákon kwáh tsi ní꞉ioh tón꞉ne tsi tewenhniseratékwen ne Midian nón꞉we.

Jeremiah 13:27

Iáken ètho nishaieráhnion tsi nahoténsons ne rahriwáhshons. Iáken tsi sehnonhteratiésons ne iatehothihiánere niʼiohokónhas ne tsi ionniarónnions ó꞉ni ne tsi kahenthakérons, tsi ní꞉ioht ne rónkwe shakoskáneks ne thehianonhsahnéken ró꞉ne tó꞉ka ó꞉ni tsi ní꞉ioht ne ranaskónhni ráhsehres ne onètien. Tiónkwe ne Jerusalem, sehwarihwaieshá꞉on! Tóh nióre né kwáh tahonthetionkwetaʼhiérihke?

Jeremiah 17:2

Ne shonkwetahshón꞉a iehonterénnaiens ne tsi tsetienharástha tánon tsi nikahiatonnisehʼrohárons ne onhothoharahkésons tánon tsi niaʼtekaróntahke ne ohónthe nikahrontótens né꞉ne Asherah kahiatónni aoriwáhke

Jeremiah 2:31

Israerʼró꞉nons, sahtahónshatat tsi nikáton. Tsi kénh ní꞉ioht ne kahráhkon thóh nitsiathótenʼne tsi nòkwah ní꞉se, tsi ní꞉ioht ne tetiókahras ó꞉ni iotonwenhtsiátʼteron? Nonhtséren, káti, tsi sáhton tsi thóh nénhsehre tsi nenhtesehnónhwehʼne, kwáh iáh nonhwénhton íhne nòkwah tahthahóntahse?

Jeremiah 3:13

Nek khók sehrihwahnírat tsi sahníhkon tánon iáh thetiewenhnahráhkwen ne Roiá꞉ner sahNí꞉io. Sehrihwahnírat kwáh tsi niatekahrónthake ne áse nikahrontó꞉ten thisakʼkáhwenh ne sahnoronkwáhtshera tsi nòkwah ne káhnionk ní꞉ios ó꞉ni iáh tesahthewenhnahráhkwen nahkwatsiawenhrátsheras. Í꞉ih, ne Watiá꞉ner, wahkatháti.

Jeremiah 30:8

Ne Roiá꞉ner Roshaststenseroʼwáhnenh ráton, “Nónen nètho ennísehrah énwahwe, Tentiáke ne waʼtsienthaniáktha ne tehonatniashaʼniátʼton tánon éhren entkháwiʼthe ne oronkwáhsa, tánon iáh ónenh thahonʼsahonwahtinaskónniʼke ne thihononhontsátes.

Jeremiah 5:5

Ne ienkhehiató꞉renʼne ne rothishaststenseráhien tánon tenhiakwahtháren. Orihwiʼiohónwe tsi ronahteriénthare tsi niharihwahnónhtons ne Raotiní꞉io, tsi natehothonwenhtioni ne Roiá꞉ner tsi nahóntiereh.” Ók rathikwékon kwáh rothikenrahthaníhon ne Roiá꞉ner raohianerénsehra tánon iáh tehonatʼthontháton nahonwahwenhnahráhkwen.

Ezekiel 16:28

“Tioríhwa ne rohnátsakes tsi iáh thetieshanikonhrahiéritsʼkwe, Assyriaró꞉nons né shé꞉sehresʼkwe. Í꞉se ne iorihwahiathathónhon rahononhkwéta kènhʼne, ók iáh nonhʼné꞉e tetseshanikonhrahieríhton.

Ezekiel 16:31

Kwáh tsi níkonh tekanahtokenháton shatenahthonhniánion tsi nonhwéhsons nahsehsénhnaien ne kahiathonnisónhas ó꞉ni né ahishahióten ne kariwahiathathóntshera. Ók iáh kíʼ owístha thaʼteskánerahkwe tsi ní꞉ioht ne thikáhionk ioriwahiathathónhon.

Ezekiel 16:41

Kwáh enhontenonhkwénthawe ne tsi sanónhsohthe tánon kwáh ionahtiokowáhnen ne konhnónhkwe enkhontkátho ne sharehwahtátshera. Tenhkóntasthe tsi sariwahiathathónhon tánon tenkhóntasthe tsi nisehʼhiawíhons ne saskarehókonhs.

Ezekiel 20:28

Tekhehiaténha ne tsi ionwenhtsáte ne keierahratsʼténhni nenhtekhéhion. Nónenh sahontʼkátho ne tiótʼthe ionhniarónhnions tánon ne óhonte nikaronhtó꞉tens, wahathítate nakonhwanatsienkwahronhniáten. Wahonkenakónhniate tsi nahontsienkwahrónhniate ne wahóntsahate tánon ne otsítsa ne tahatíhawe ne niahatítate.

Ezekiel 23:5

Ethosáne Í꞉i akonhkwéta kènhne, Oholah iahontasónteren tsi ioriwahiathathonhonháties tánon titkáhere naskanéktshera tsi nòkwah nahoskarehókonhs ne Assyriaró꞉nons.

Hosea 1:2

Nó꞉nen ne Roiá꞉ner shontonhtsérenhte wahatá꞉ti rahonhà꞉ke ne Hosea, ne Roiá꞉ner wahawénhase ne Hosea, “Wás, ne sathateniatʼthen ne wathenawaiesátha tánon ne sawiraientháseron ne kontenakwahiesátha, asè꞉ken ne tsi ionhontsá꞉te ne ioterihwathéntion ne kowá꞉nen kanakwahieshá꞉tshera ne tsi ronwatewentéton ne Roiá꞉ner.”

Hosea 2:5

Asè꞉ken ne konhwanisthénha ne iotswátonhne ne kanakwaiesátshera; tsi niká꞉ien ne iakawenhnakerátston atehenserákon tsi nihiotié꞉ren. Asè꞉ken iáwenh, “Kwáh kí enkheséhreson naskareshónhas; ronónha ionkenataranónhtens tánon ionkhenanóntens, ne teiotinaʼkarontónha ononwé꞉ron tánon nakeniatarahashónhas, nakénhie iakeiewáthas tánon ne katonhwesenhtákwah ohnekashón꞉as.”

Hosea 3:3

Tánon waʼkénhase, “Ní꞉se ó꞉nenk tsi thenthenihiaséhake ne kwáh wé꞉so wenhniserá꞉ke; iáh ó꞉nen tahonshasatenakwahiesáte, iáh ó꞉nen tahonsheseninawine ne rónhkwe, iáh ó꞉ni ní꞉i.”

Hosea 4:13

Ronteskontʼtas nonotoharakéhsons, tánon rontsienkwahronhniáta ne tsi ionhniarónhnions, né꞉ne noronthonkónsons karíhtons, ó꞉ni nonentakwenhtetsheró꞉kons, tánon karontó꞉kon ne takoskó꞉wa, tiorì꞉wa tsi niioiánere tsi nikarakwaweróstha. Ne káti aorì꞉wa ne saiatasetsherashón꞉as ne wakóntswate nakontenakwaiésathe, tánon ne shehionhsáfas wakontenakwaiésate nonhné꞉e

Hosea 9:1

Tó꞉sa satónhnare, O Israel! Tó꞉sa satatʼtsenhnakarátat nashatatonhkwetowá꞉nate tsi nihatiié꞉ra ne thihononhontsá꞉tes; asè꞉ken ne satswathákwen tsi satʼthokhóktha, éhren satatsiathenhawí꞉ton tsi nokwáh ne Saní꞉io. Ne sanonwéhon ne tsothakwahkaré꞉ni tsi nikonhwakariakséhakwe tsi nón꞉we nikaswenhkarakwénhtare ne tsi rathithetáhkwa.

Leviticus 26:13

Í꞉i, ne Watiá꞉ner Sewaní꞉io íken, tetʼkwahiatinekénhʼen ne Egypt ne káti ne tó꞉sa shé꞉kon ahonseietʼtsinaskónhni. Tewatsiákon ne kashaststénshera ne tesewahiatorahrá꞉konhne tánon shakwahríhon nahisehwatharaʼkétsko tsi tahonsehsewathekháhaʼkwe.”

Nahum 1:13

Tánon ó꞉nen kwáh tentsiá꞉ke ne raotsientaniátstha nakonráhkwahse tánon tentsiá꞉khon ne senhnenhrénhston.”

Deuteronomy 12:2

Ne tsi ionhontsá꞉ien ne sewatienawatstà꞉ne, sewariwáktont tsi nonhwé꞉sons nonhkweshón꞉as nikonhwatisén꞉naienskwe ne raoní꞉ioʼs ne onotoharakéhsons, ne tsi ionhniarónhnions, tánon ne tsi iorakwaweróhserons ne karontonkónhsons.

Deuteronomy 15:15

Sehwehiárak tsi í꞉se ó꞉ni sewanaskwahkén꞉ne ne Egypt nón꞉we tánon ki ne Roiá꞉ner sewaNí꞉io sehtsisewahiatotaríshion; ne káti aorì꞉wa nón꞉wa tkwá꞉wis kí꞉ken kariwatà꞉tshera.

Deuteronomy 26:17

Ón꞉wa wenhniserá꞉te wesewarihwaní꞉rate tsi Roiá꞉ner sewaNí꞉io í꞉ken; wesewarahrátste tsi entsisewawénhnaraʼkwe, nahisewatié꞉nawatste akwé꞉kon ne raohianerénhseras, tánon akwé꞉kon thóh nenhsewáhiere tsi nenhtsisewahró꞉ri.

Deuteronomy 4:20

Ók í꞉se kíʼ ne tsónhkwe ne tsi tsiʼsewaniakénton ne Egypt nónhwe, né꞉tho tehiotonʼkwanònhiani ioté꞉kha. Thatsisewahiaʼtínekenhwe natsiʼtsiónhnien ne raónha rahonkweʼtashón꞉a ahisewá꞉ton, tsi ki nónhwa ní꞉ioht nónhwa wenhniserá꞉te.

Deuteronomy 4:34

Ónhkak kén ne ní꞉io nonhwénton roteʼniénten niá꞉re tánon iashakoʼnónhke nónhkwe ne thihononhontsá꞉te tánon raónha rahonkwè꞉ta ashakaʼón꞉ni, tsi né nihoié꞉ren ne Roiá꞉ner sewaNí꞉io ne Egypt nón꞉we? Kwáh tesewakaʼnerá꞉kwe tsi wà꞉ratste ne raoshatstenhserowaná꞉tshera ó꞉ni ne kaʼshatsʼténshera; tahá꞉hawe ne kanaratarinétsheras ó꞉ni aterihiósera, tsi wahohiò꞉ten neioriwaneraʼkwaténions ó꞉ni ne ionerákwahs, tánon wahronhniá꞉nion ne kaʼteróntsheras tsi naiawénhseron.

Deuteronomy 5:27

Wás thóh nionhshá꞉se, Mahís, tánon shatahónsatat orihwakwé꞉kon né꞉tho Roiá꞉ner Onhkwaní꞉io rathónhnions. Ethò꞉ne tontáhse tánon saskwaró꞉ri tsi nahó꞉ten wahiaró꞉ri. Kwáh eniakwatahónshatate tánon enhiakwatewénhnaraʼkwe.’

Joshua 1:16

Wathonwariwaʼsehrákwahse ne Joshua, “Kwáh orihwakwé꞉kon thóh nenhiakwáhiere tsi naskwahró꞉ri tánon kwáh ienhiákwe ne tsi nón꞉we ienskwahtó꞉ri.

Joshua 24:24

Ethòne nonhkweshón꞉ʼa wahonwenhase ne Joshua, “Enshá꞉kwahiotense ne Roiá꞉ner onhkwa Ní꞉io. Enhiakwathewenhnarahkwe ne rahoriwahtatʼtseras.”

Joshua 24:26

Ne Joshua wahahiatonhnion ki ken karihwatatʼtseras kahiatonhsehrakons ne raoianerenseras ne Rawenni꞉io. Ethòne kanenhiowanen wát꞉rahkwe tánon karonhtó꞉kon ne okaratsi wahanenhioten thóh raononsató꞉kentike ne Roiá꞉ner.

Revelation 17:1

Eʼthò꞉ne saiá꞉ta ne raronhiakeró꞉non tsi niká꞉ien rahá꞉we ne tsá꞉ta nikatsetá꞉ke ákta nontá꞉re tánon wahakénhase, “Káts, enkonhnatónhase tsi ní꞉iot tsi enkonwariwénhte ne kashennhówane wathokótha, ne né꞉tho kanatowá꞉nens tsi niká꞉ien ne kaniataraktontses kanatón꞉nianions,

Judges 10:6

Shé꞉kon kíʼ á꞉re nʼIsraerʼró꞉nons sahatirihwánerake tsi nòkwah ne Roiá꞉ner tsi konwatisénhnaiens ne Baal tánon ne Astartes, kwáh satehioiánere tsi ní꞉ioht tsi konhwatisénhnaiens ne Syria ahoniʼiohokónhas, ne Sidon, ne Moab, ne Ammon, ne Philistia. Wahonwatiathonhthákwahse ne Roiá꞉ner tanon wahóntkaʼwe tsi ronhwasénhnaiens.

Judges 2:11

Ethòne kíʼ nonhkweshón꞉as Nisraerró꞉nonhke wahatiriwánerake tsi nòkwah ne Roiá꞉ner tánon tahontháshaʼwenh nakonwahiótenhse ne Baals.

Judges 2:13

Wahóntkaʼwe tsi ronhwasénhnaiens ne Roiá꞉ner tánon né sakonwahiótenhse ne Baals ó꞉ni ne Astartes.

1 Samuel 12:10

Eʼthó꞉ne iathonséntʼtho rahonhá꞉ke ne Roiá꞉ner, tánon wahonhní꞉ron, ‘Ionkwarihwanerenhákskon, tsioríhwa tsi entsitewaʼtewenhthéton ne Roiá꞉ner, tánon ne waeʼthiʼió꞉tense ne Baal tánon ne Astartes; ók ó꞉nenh kiʼ saskwaniá꞉kenk ne rontsanákes ne ionkíswens, tánon í꞉se enskwaiótenʼse.’