Jeremiah 2:15 - Ohiatonhseratokénti

¹⁵ Thóh ní꞉ioht tsi ronwahtewenhnhothánis tsi ní꞉ioht ne kénʼreks; tsi rahonhontsiáien karáhkon wahonnónhniaʼte, tánon ne rahonáhthakons iorihwenhthásehrons, kwáh onahtóskon íhken.

Jeremiah 2:15 ပူးပေါင်းရင်းမြစ်များ

Job Tánon ne Raoronhiakensera 4:10

Ne rotonrá꞉ien kénreks, tsi nihawénhnote ne rasheróhen kénreks, tánon tsi ratinotsótons ne ken nithotiiónsas kénreks tehonwatinawirià꞉khon.

Psalms 57:4

Kwáh tehionkehonwaʼrónhni ne iónkshons, ne ronhnónha thóh nihatihiatóten tsi ní꞉ioht ne ónhkwe sakotiwáʼraks kénreks. Ne tsi ratinotsiótons kwáh né꞉ne osìkwe tánon kaiénkwires, né ronhnasákes kwáh né꞉ne iosarotí꞉ie.

Isaiah 1:7

Né shonhontsáke watónthon, ne sewanatowáhnens ótsire iotenatatʼtsahátons; kwáh tshiaʼtesewahkanerónhnion, thihononhontsátes wahontekwísa tsi niʼtkánios ne tionhontsá꞉kes. Watewenhtéton, tihononhontsáte rotitakʼsáton.

Isaiah 24:1

Nón꞉wa ne Roiá꞉ner ó꞉nenh thóhwa ahatsiésate ne onwènhtsa tánon ne enronhniá꞉te iáh ónka tahonsaienákerehke, tánon kwáh tenhawahtáse ne éhʼneken tsi ionwenhtsàte tánon teshakokthó꞉kwahte né thóh ienakerénion.

Isaiah 5:29

Ronatonráien kwáh né꞉ne kénreks, kwáh né꞉ne kén titotihiónsas kénreks tsi ronatonhráien; ronatatenakónhni tánon wahonwaiéna ne raotirió꞉ta, iahatíhawe, tánon iáh ónhka taiekwéni nahonsahonwaniákenʼte.

Isaiah 5:9

Ne Sakoiá꞉ner ne ronterí꞉ios ratironhiakerónons kwáh rorihwaniráton tsi niwakathontéhon: Oriwiʼiohónwe tsi wé꞉so kanonsake tsi enkarihwéntʼtonhke, kanonsowánens tánon kanonsí꞉ios, iáh ónka tahonsaieterónhtake.

Isaiah 6:11

Eʼthó꞉ne wakíron, “Tóh nikaríhwes kíʼ thóh naiotónnhake, Ó Saiá꞉ner?” Tánon wahénron: “Tsi nió꞉re ne kanatowánens éhʼtake enkaiéntane iotkaronníhon kwáh iáh ónhka tahonsaienákereke, tánon ne tsi kanonsó꞉tons iáh ónhka taieterónhtake, tánon ne tsi ionhontsáien kwáh enkaieshah;

Jeremiah 10:22

Sewatahónsatat! Noríhwa ónhwe! Kwáh íken tsi ronatʼtsarokwáhton nonhkweshón꞉a nothoréhke nokwáhti; ne rahononhkwetaʼsón꞉a ne ronterí꞉ios kahentáke enhonnónhniaʼte ne tsi kanatowáhnens ne Judah, ethóh nónhwe ne érhar nihatinákere.”

Jeremiah 25:30

“Ní꞉se, Jeremiah, ónenhk tsi ensatró꞉ri kwáh tsi niatehioriwáhke tsi niwahken. Onenhk tsi kwáh ensehró꞉ri ki onhkwehshón꞉ʼa, ‘Ne Roiá꞉ner kwáh enthatonráien karonhiáke tánon enkawérer è꞉nekens tsi karonhiá꞉ke. Rahónha kwáh ensakotonrá꞉ien ne rahonkweʼtashón꞉as; kwáh tenhohénrete tsi ní꞉iot ne rónhkwe rasrahthátses nonenhará꞉kes. Kwáh onkweʼtakwé꞉kon tsi ionwentsá꞉te enhonwathónhteʼne,

Jeremiah 25:9

‘Ienkhehiaténieʼthe ratikwékon nonhkweshón꞉a ne othoréke thatiʼterónton ó꞉ni nakenhátsera, Nebuchadnezzar ne ne ronnonhtí꞉io ne Babylonia nónhwe. Entekheʼhiaténhaʼwe nahonterí꞉io ne Judah ó꞉ni tsi niháti né nónhwe nihatiʼnáhkere ó꞉ni ne tehonʼthonhontsaʼnekkhánions. Kwáh enkhehiáthonʼte kí꞉ken onhkweshón꞉a tánon ne tehonʼthonhontsaʼnekʼkhánions tánon ne iaʼtenkheiénrahseh ne ioriwenhthásehrons ne tsi nénhwe, ne ne tehiotenonhianíton ó꞉ni tsiotónnek nahiontktʼho. Í꞉i, ne Watiá꞉ner, wakatáti.

Jeremiah 26:9

Nonhtiéren tsi né wahshíron thóh rahosénnahkon ne Roiá꞉ner kí꞉ken Ononhsatokénti kwáh eh nenhiáwenhne tsi niʼhioiathawénhʼon ne Shiloh tánon kí꞉ken kanatowáhnenh kwáh enkariwénhtʼthonke tánon iáh ónhka tahonsahienáhkerehke?” Ethóhʼne nonhkweshón꞉a wationkenenhrónni.

Jeremiah 33:10

Ne Roiá꞉ner wahénron, “Nonhkweshón꞉a ionthónnions ne kénʼen watenáhthaien kwáh thóh ní꞉ioht tsi ní꞉ioht ne iahonwenhtsiaténhake, iáh tehiahonkwéthaien iáh ó꞉ni ne katʼtshénenh nahienáhkerehke. Tánon thaʼthihiérits; tsi kanhatheiénthons ne Judah ó꞉ni ne Jerusalem onhatóskonh íken; iáh nonhkweshón꞉a iáh ó꞉ni ne katʼtshénenhs tehatiʼnáhkere né nónhwe. Ók kí꞉ken nikanhatótens shé꞉kon ki entsisehwáhronhke

Jeremiah 34:22

Í꞉i enkaténnhaʼne, tánon tentʼthónʼne ne kénʼen kanatowáhnenh. Ienkonhwahtiatónti, enkonhwahiéna, tánon enhontenonhkwéntahwe. Ne enkónhniaʼthe ne tsi kanathaiéntons ne Judah tsi ní꞉ioht ne iahonwenhtsatʼténhhake tsi nónhwe ne iáh ónhka teienáhkere. Í꞉ih, ne Watiá꞉ner, wakatáti.”

Jeremiah 4:7

Tsi ní꞉ioht ne kénreks tsi nonhtahiaweʼnonhátie tsi nónhwe niwahthasehthákwa, ne shakorihwahthóntha nonhkweshón꞉ʼa wahahiákenʼne. Táhreh nahathónthe ne Judah. Ne kanahthowáhnenhs ne Judah kwáh íken tsi enkarihwénhthonke, tánon iáh ónhka étho nónhwe tahonsahienáhkerehke.

Jeremiah 44:22

Ne kwáh kénʼen wenhnisehráhte ne tionhontsashón꞉a ekahkérons iahontsahiesáhon tánon iáh ónhka thóh tetienáhkereh. Waʼtewahnithakwátʼtho, tánon nonhkweshón꞉a rahosénnha ióntstha tsi ieriwahieshá꞉tha ne ahoríhwa ne Roiá꞉ner iáh ónenh thahónthon nahonshaʼhathaʼkátsʼthaʼte tsi nitionkwethaʼhétken tánon kariwáksen tsi nisehwahtiérah.

Jeremiah 5:6

Né aoríhwa ne kénreks kahráhkon nénhtewe kwáh enhiakononhwahrhiákon; nokwáhos kahenthakeʼkówah néntʼthonʼne nashakothihiatahrahtiónko, tánon ne tá꞉kos iorahkwahrónnions tenwahthawénhrie ne raothináhthakons. Tó꞉ka nonhkweshón꞉ʼa ienhathihiákenʼne kwáh enhonwathihiatharahtiónko tsioríwa tsi nihiawehtowáhnenh ne rahothiriwahneraháktsheras tánon kwáh tiókonte tsi ronwatʼkahrahthénion ne Rawenni꞉io.

Jeremiah 50:17

Ne Roiá꞉ner ráton, “Nisraeró꞉nonhs kwáh ne ne teiotinahkaronhtónʼa né kénreks tehiakorieniáton. Thontiérente ne ne Assyria ronnonhtí꞉io wahshakowáhrahke. Ethóhʼne Ronhnonhtí꞉io Nebuchadnezzar ne ne Babylon nónhwe washaʼkostsiókaʼne.

Jeremiah 51:38

Ne Babyloniaró꞉non skátʼke tsi enhonthatenahkónhni tsi ní꞉ioht ne kénreks tánon enhontewenhnhóten tsi ní꞉ioht ne kénreks owírah.

Jeremiah 6:8

Jerusalemró꞉nons, kí꞉ken ne tekanikónrahre né ahisharonkáten, tó꞉ka iáh enkonhiatewénhthete; Ne tsi sahnahthowánenh ne enkónhniathe ne kahenthakeʼkó꞉wa, tsi nónh ne iáh ónhka teienáhkere.”

Jeremiah 9:10

Wakíron, “Tenkaséntʼthoseh ne tsi iononhtharónʼnions ó꞉ni tenkasénthoseh ne tsi konwathiʼteronthákwahs nahtenhenráhkonhs ne katshénenhs, tsioríhwah tsi akwékon iostatʼténhen, tánon iáh ónhka éhtho nónhhwe tetionthohénstha. Tsi nahionatʼtsiarokwáhtonke ne katshéʼnenh iáh ónenh ónhka tetsiakóthonʼte; otsitenokónhas ó꞉ni ne konhthitshénenhs kák tiehionénonh.”

Jeremiah 9:11

Ne Roiá꞉ner ráton, “Kwáh enkónhnien ne Jerusalem nahiothonhióthonke ne ioriwahiesáhsehrons, thóh nónhwe ne érhar nenhathináhkerehke; ne tsi kanahtowáhnenhs ne Judah karhákonh enwáhthon, thóh nónhwe ne iáh ónhka tahienáhkerehke.”

Ezekiel 36:3

“Iasehriwáhken, káti, tánon sehrihówahnat nahó꞉ten ni Í꞉i, ne Wakenonhtí꞉io Watiá꞉ner, katónhnions. Nónenh ne tehontonhontsanekʼkhánions kanahkeráhseras wahathiʼiéna ó꞉ni wahathinenhskwenháton tsi ionhnontarónnions ne Israel, onhkwetaʼkwékon thá꞉konhwaieronh ne Israel.

Ezekiel 5:14

Iatehionkwétake ne kanakeráhseras ne tiatatthóntie ratinákeres nenhonthóhetste kwáh enhieshastériste tánon ínonh nióre enthonʼnésehke.

Hosea 11:10

Kwáh Roiá꞉ner enhonwáhsere, raónha ratonhrá꞉iens kwáh né꞉ne kénreks; né nó꞉nen enhatonhráien, ne sakoioʼokón꞉as kwáh enhotiiatisónkwahne tsi iaʼtewatséntos nentónhne.

Hosea 5:14

Asè꞉ken thóh nentiatoténhake tsi ní꞉ioht ne kénreks tsi nokwáh ne Ephraim, tánon kwáh né꞉ne kenhnitohiónha kénreks tsi nokwáh nonkweshón꞉as ne Judah. Iathenwatsátiste tsi enkhehiaʼtaratiónko tánon ethò꞉ne é꞉ren enskéte; kwáh ienkhehiaʼthénhawe, tánon iáh tahonsaieniá꞉kenhne.

Amos 3:12

Né katíʼ aorí꞉wa rá꞉ton ne Roiá꞉ner: tsi ní꞉ioht ne teiotinaʼkarontón꞉ʼa rá꞉nonhne tekahsí꞉nake khok enshahnhontá꞉ko ne kèn꞉reks tsi iawé꞉kon khehs sewahònhtaʼ khok ne kenʼk nísewa, ne katíʼ nonkwehó꞉konʼs Israerʼró꞉nons tsi nihá꞉ti iehatinákere ne Samaria tsi enshonwatiʼniá꞉kenhte, enkenikwekonhátie ne teionitskwahraʼtsherahrí꞉ʼon tánon ne kenʼ ná꞉ʼonske ká꞉nakte.

Amos 3:4

Ne kèn꞉reks ratonrá꞉iens kenh ne kahrhahkonhkó꞉wa, nó꞉nen iáh oh thé꞉nen tehorió꞉taien? Ne kenʼnithotiión꞉ha kèn꞉reks thaiá꞉kenʼs kenh ne tsi rèn꞉teron ne tahohén꞉rehte, tó꞉ka iáh oh thé꞉nen teharioʼtaié꞉nen?

Amos 3:8

Ne kèn꞉reks wahatonrá꞉ien; ónhka ne iáh thaiakóhteronʼne? Ne Roiá꞉ner Rawenni꞉io rotatí꞉ʼon; ónhka aiekwé꞉ni nek khok kíʼ niaierí꞉wake?

Nahum 2:11

Kaʼnón꞉we nihionatsionwá꞉ien ne kénreks, ne tsi ionatsionwá꞉ien ne kénreks owiraʼshón꞉as, tsi nón꞉we nihonteriotaienthákwa ne kénreks, tsi nón꞉we nihatì꞉teron ne kénreks owiraʼshón꞉as, kwáh kíʼ iáh ónhka thatahonwaʼtinikónhraren?

Zephaniah 1:18

Sénha í꞉si nón꞉we ne raotiwístas kawistará꞉kens khés ne owistanó꞉rons iáh tkakakwé꞉ni nahiakonónsthate né꞉tho tewenhniséronhte ne Roiá꞉ner raonakwáhtshera; ók onhontsakwé꞉kon ótsire enwatsáhate ne tsi nihotekéfen, asè꞉ken ne enronhniáte ne tsi iehiotókte tenhiotenonhianí꞉tonhke kwáh ratikwé꞉kon tsi nihiákon ienákere ne tsi ionhontsá꞉te.

Zephaniah 2:5

Tsi nihiá꞉kon ne kaniataraktónhtie ienakerénion, tánon ne Cherethró꞉nons raotitióhkwas, ne raowén꞉na ne Roiá꞉ner sewatkónhte; Canaan, né꞉ne tsi rononhontsá꞉ien ne Philistiaró꞉nons, kwáh enkwahtónhte iáh ónhka thahonsaienákereʼke.

Zephaniah 3:6

Khehiákse nonkweshón꞉as; ne tsi kanikató꞉tons ne tsi tekashiosakérons ne wathenhénrote iorihwenhtásherons; wakatieshatánion ne tsi tekanatokenhátons ne raotinatákons, ne káti ne kwáh tó꞉sa ónhka thóh nón꞉we nahiontohéstake; iáh ónhka ne rónhkwe thóh nón꞉we tehanákere ne raotinatá꞉kons.

Zechariah 11:3

Ne ratikoráhsons tiatehotihenréhtha tsi nihotinikonhráksens; ne rahonaʼtsenhnionniá꞉tshera iototʼtáhon! Shatahónsahtat tsi nihionahthatenahkón꞉ni ne kénreks; tsi konthiʼterónhtakwe ne kahráhkon ákta ne Jordan karihwahthón꞉ton!

Judges 14:5

Káti ne Samson Timnah nónhwe niahón꞉ne ne ronhwaiénha. Tsi niahonenonhátieʼne tsi kanenharaientʼthóseron né nónhwe, wahothónteʼne kén nithohiónha kénreks rothatenakónhni.