Jeremiah 11:11 - Ohiatonhseratokénti

¹¹ Káti nónhwa Í꞉i, ne Watiá꞉ner, wakhehiaronkáten tsi enthékaʼwe ne kahkaronniátshera ne ronhnónhake, tánon iáh thahatiniákenʼne. Tánon nónen iatenhothihénreʼte nakonháke nakhehiénahwaʼse, iáh thakhehiatahónsahthaʼte.

Jeremiah 11:11 ပူးပေါင်းရင်းမြစ်များ

2 Kings 22:16

ne iononterahtse aterihwaʼnotáhtshera tsi nitsawénon raʼónháke ne Roiá꞉ner: “Kwáh kheʼrehwátahʼne ne Jerusalem ó꞉ni ratikwé꞉kon naonhkwetaʼshón꞉as, tsi kí nikaiáton ne kaiatonserákon nètho ronnontí꞉io waʼawennanóten.

2 Chronicles 34:24

né kén ní꞉ioht aterihwanothátshera né꞉ne Roiá꞉ner nón꞉we nitsawé꞉non: “Kwáh entré꞉waʼte ne Jerusalem tánon akwé꞉kon nahonkweʼtaʼshón꞉a né꞉ne karewathátshera tsi nikahiá꞉ton ne kahiatonhserákon né꞉ne ronwahwenhnanhó꞉tani ronnontí꞉io.

Job Tánon ne Raoronhiakensera 35:13

Orihwiiohón꞉we ne Rawenni꞉io tsi iáh teothón꞉tes ne iáh othé꞉non tekéntons tsi tahionsénhto, iáh ó꞉ni ne Roshatstenhserowanenhkó꞉wa othé꞉nen tehatókas.

Psalms 18:41

Í꞉se washeiónhnien ne iónstshons naionhkatswaténien, tsi nihiá꞉kon ne iónsshonkwe, wakheiá꞉tonhte;

Psalms 66:18

Tó꞉ka iáh othènen kaʼríhwa tahonkónhnike nakeriwaʼnerahát꞉tsheras, ne Roiá꞉ner iáh kí othènen tahothahonsathátonhke.

Proverbs 1:28

Thó꞉ne ó꞉nen entehskená꞉ton attokháhtshera, iáh kiʼ thaʼtakerihwaʼserá꞉ko. Tsik nón꞉we enhstiaʼtí꞉sake iáh kiʼ thahstiaʼtatshén꞉ri.

Proverbs 29:1

Tókaʼ sénha enhsatenontsistahní꞉rate tsi ní꞉kon ónhka aiesarihwakwaríhshion, éntewe nenhnísera akwáh tokén꞉ʼen ensateraʼswáksenʼne tánon iáh nonwén꞉ton thaonsahsatonhnhakwatá꞉ko.

Isaiah 1:15

Nó꞉nen iathenshatsá꞉nate nasaterienhnáien, kwáh kí iáh takonhiatʼkátho; iáh othènnon takarihontáko tsi níkon ahsaterénhnaien, Kwáh kí iáh takatahónsathate; ne satsanáke titkanewenhsáhere.

Isaiah 24:17

Kateróntshera, tánon ne iosonhwakáronhte, tánon ne tewanikarará꞉kon sewatʼráni, Ó ne tsi ionwenhtsàte sewanákere!

Jeremiah 11:14

Jeremiah, tó꞉sa saterénnaien nakonháke tó꞉ka ó꞉ni askaniténthaʼse ne ronónha rahotirihwáke. Ne nónen tehonanikónrhare tánon entionkenáton nakheiénahwaʼse, kwáh iáh tahkhehiatahónsahthaʼte.”

Jeremiah 11:17

“Í꞉i, ne Watiá꞉ner, Keshaststenserowánen, kwénteron ne Israel ó꞉ni Judah; ók kíʼ nónhwa kariwahiesáhtshera tkheteronkwáhtha. Kwáh ronónha iahontátʼkwahse tioríhwa tsi wahétken tsi nahóntiere; wahonkenakónhni né tsi wakonhwatátseh nakonhwatienkwaronniáten ne Baal.”

Jeremiah 14:12

Shé꞉kon ó꞉ni nahonnenhtóntieʼthe, Kwáh kíʼ iáh thakhehiatahónshathaʼte tsi naʼtehonséntʼthos nakheiénahwaʼseh; tánon ó꞉ni ne kwáh aterennaienthatsherákon tsi akonwahtsatatʼtsahaʼte ne katʼtshénen ó꞉ni nonátsa ahiontthátse, kwáh kíʼ iáh tahionkenikonhrí꞉iosʼthe. Khèʼkhók, ateriʼiosehráhke tsi enkhenonhwahrhiákon tánon athonkarhiákon ó꞉ni kanhrahtarihnétshera.”

Jeremiah 14:2

“Judah iotsiónnion; ne ahonatahshón꞉a ne kanatowáhnenhs iawenheionhátse, nahonkwetahshón꞉a onhkwentsiáke ratihiatahkérons tsi nihotinikonhráksens, tánon ne Jerusalem tewahséntʼthos nakonhwaiénahwahse.

Jeremiah 15:2

Nónen enhieshariwahnónhtonse kahnónhwe niahónʼne, sehró꞉ri tsi wáhken: Ótiake né tehonwahtihiathónkwen ne kanhrahtharinhétshera enhotírhiothe— kwáh ehʼnónhwe nienhonthahíʼne! Ótiake né tehonwahtihiatónkwen nateriʼiosehráhke nónhwe nahonníheie— kwáh kíʼ ehʼnónhwe nienhonthahíʼne! Ótiake né tehonwahtihiathónkwen né athonkarhiákon enhotírhiote— kwáh kíʼ ehʼnónhwe nienhonthahíʼne! Ótiake né tehonwahtihiatónkwen né hiahonwahtihiaténhaʼwe ne tsitiontatenonhtónkwah— kwáh kíʼ ehʼnónhwe nienhonthahíʼne!

Jeremiah 18:11

Né káti, sehró꞉ri nonhkweshón꞉a ne Judah nónhwe ó꞉ni ne Jerusalem nónhwe tsi kahtenikonhrónnis tsi nòkwa ne rohnónha tánon katatewehienénhtas natkheréwahthe. Sehró꞉ri nahóntʼkaʼwe tsi nikariwáhneren tsi ní꞉ioht tsi rohnonhnhétie—tehontáton tsi nihatewehienʼnótens tánon tsi nahoténsons rohthihiotáties.

Jeremiah 19:15

nètho ne Roiá꞉ner Roshaststenserowáhnenh, ne ne Israerʼró꞉non sahkohʼNí꞉io, ráhwenh, “Entétkhaweh ne kén nónhwe kíʼ tsi kanahtowáhnenh tánon ó꞉ni ne aktatsesónhas kanahtaʼiénton akwékon ne karewahtátshera tsi ehʼnénhtiereh tsi niwáhken, tioríhwa tsi nisehwaʼnonhtsistaníron ó꞉ni kwáh iáh tesehwahthahónsahtats tsi nikáton.”

Jeremiah 19:3

Ne Roiá꞉ner wahakró꞉ri nakíron, “Rotinonhtí꞉ios ne Judah ó꞉ni nonhkweshón꞉a ne Jerusalem, sewathahónsahtat ne Í꞉i, ne Watiá꞉ner Keshaststenserowáhnen, ne kheʼNí꞉io ne Israerʼró꞉nons, wáhtien nakíron. Thóh nióre tsi éntsien ne kariwahiesáhtshera ne kén nónhwe niwatenáhtaien né nónhka enhiónronhke kwáh entiontónnheʼke.

Jeremiah 23:12

Tsi enhonthahíta kwáh tenhiahotsiskwáhthonke ó꞉ni tentiokaráhsehke; Thenkhehniotáhko tánon enhatihiatiéʼnènhne. Enthékhawe ne karihwahiesáhtsera ne rononháke; ne rahonatrewahtátshera tsi tawéʼse ne iakáhewe. Í꞉i, ne Watiá꞉ner, wakatáti.

Jeremiah 25:35

Kwáh iáh kanèkah tiahísehwe naʼhisehwaniákenʼne.

Jeremiah 35:17

Káti nónhwa, Í꞉i, ne Watiá꞉ner Keshastsʼtenserowáhnen, ne kheʼNí꞉io ne Israerʼró꞉non, enkwaiénhaʼse ne tiónkwe ne Judah ó꞉ni ne Jerusalem oriwahkwékon ne kahkaronniátshera ne wahkarahrátston. Kwáh kíʼ thóh nénhtiere tsioríwa tsi iáh tesehwathahonsahtáton nónenh sahkwahthárahse, tánon iáh thaʼtesehwariwahseráhkwen nónenh siakwahnáhton.”

Jeremiah 36:31

Kwáh enhkonréhwahthe, ne sehiohokónha, ó꞉ni ne sonkwetaʼshón꞉a ne rotaterihóntons ne tsoríhwa tsi nikahriwáhnerens tsi nisehwahtiéren. Tánon níse ó꞉ni nonhkweshón꞉a ne Jerusalem ó꞉ni ne Judah kwáh iáh othénenh kariwahtetiónhni tsi nikwahronkahtenhni, tánon káti enthekhawe orihwahkwekon ne kakahronhniátshera tsi niwahkerihowahnáhton.”

Jeremiah 6:19

Shathahónsahtat, onhwénhtsia! Né꞉ne kahrewahthátsheras norihwahkwékon tsi nihonahtenikonhrónni takháwi ne kahkaronniátshera rononháke kí꞉ken onhkweshón꞉ʼa, tsioríhwa tsi wahathikénron nahkerihonniennítshera tánon iáh tehonahtewenhnaráhkwen nakewénhnas.

Lamentations 2:22

Wasehonráron ne iónkswens nahathinenrínekenwe nahionkterónkwen neh akonháke, Tánon kwáh iáh ónka tahónton nahiontèko neh thóh wenniseráte tsi nisanakwénhen. Wasakonásethe neh kehioʼokónha, tsi nikáien ne kheiehiáron óni khenorónkwaʼkwe.

Ezekiel 14:3

“Rónhkwe iaiénha,” wahénron, kí꞉ken ronnónhkwe iehonatkáwenh ne rahonérhiaʼne tsi nòkwah ne kahiatonhnisónhas tánon shakothiriwáhwis niahonwahnasáhrihne kariwahnerahatʼtsheráke. Ísewere onhtèken tenkheriwahseráhkwahse?

Ezekiel 7:5

Kén kíʼ nahó꞉ten ne Ronhnontí꞉io Roiá꞉ner ratónnions: “Énska ne kariwahiesáhtshera enhionónhterahtse nó꞉ia tsi táhwe ne shariwáhke.

Ezekiel 8:18

Kwáh enhóntʼthoke kashastsʼtenserahkwékon nakenahkwáhtshera. Kwáh iáh takhenónhsthate iáh ó꞉ni takhenahtónhase nataniténron. Kwáh tenhotihénreʼte nahterénhnaient nakonháke tsi nihiorahkaréhni tsi ahathikwéhni, ók iáh kíʼ taʼkhehiatahónshathaʼte.”

Amos 5:19

kwáh né꞉ne ónhkak sakonwaniá꞉kenhse ne kénreks, tánon né iathontérane okwá꞉ri; khés kanónskon iahontáwehiate tánon asonhtá꞉ke waheié꞉na nahonsahiontoríhsen, tánon oʼniá꞉re wahakokári.

Micah 3:4

Ethò꞉ne iathenhonsénhtho raonhà꞉ke ne Roiá꞉ner, ók iáh kíʼ tathasakorihwaʼserá꞉kwahse; enshakoʼkonsaséhthen né nenhkahá꞉wike, tiorì꞉wa tsi nihatiweienaksénhskwa.

Zechariah 7:13

Tiorì꞉wa tsi iáh tehonatahonshatháton nó꞉nen enkathá꞉ti, iáh thatekherihwasherahkwén꞉ni nó꞉nenh enhonterén꞉naien.

1 Thessalonians 5:3

Nónen nónkwe enhiaiéron, “Oriwahkwékon sakʼtíken ó꞉ni skénʼnonk tíken,” káti tontaiawénstsi kariwaiesátshera enhotiʼiénte! Kwáh thóh ní꞉ioht tsi énwahwe tsi ní꞉ioht nónen tehiowehétstha ne iónkwe nónen iowirahientásere, tánon iáh tahonsaieniáken꞉ne nonkwesónha.

Hebrews 1:3

Renésta tsi naʼteioswátʼte ne Rawenni꞉io raohiatanerakwátshera tánon kwáh teshiatiéren ne Rawenni꞉io tsi niʼrónnhe, ne tsi nihioshatstenserowánen ne raowennashón꞉ʼa ne iotsenawastánion tsi orihwakwé꞉kon. Sahariwaié꞉rite ne kaʼnikonrénhtsera tsi nihiakoriwáneren nokwetaʼkwékon, karonhiá꞉ke ionsahátien shaweientetákwen nokwáti ne Ní꞉io, ne Rohshatsʼtenserowáhnen.