Jeremiah 10:10 - Ohiatonhseratokénti

¹⁰ Ók í꞉se, Saiá꞉ner, ne kwáh oriwiʼiohónwe Ní꞉io, Í꞉se ne shonnhehónwe Ní꞉io tánon tsi nénhwe Sanontí꞉io. Nónen shaʼnakwénʼen, ne tsi ionwenhtsiáte tenhiowísonʼkwe; nonkweshón꞉a iáh tahiekwéni nahiontahkátsthaʼte ne sahnahkwáhtshera. (

Jeremiah 10:10 ပူးပေါင်းရင်းမြစ်များ

Genesis 21:33

Abraham tamarisk naʼkarontó꞉ten waharontaièntho thóh non ne Beersheba, tánon thóh nón꞉we nahohsén꞉naien ne Roiá꞉ner, ne ne Ronhnheʼón꞉we Ní꞉io.

1 Kings 18:39

Nó꞉nen nonkweshónhas sahontkátho kí꞉ken, ohontsáke wahonthatsatónhti tánon waʼthothihénreʼte, “Ne Roiá꞉ner séh ne Ní꞉io í꞉ken; né꞉ne Roiá꞉ner rahonhatsíwa Ní꞉io í꞉ken!”

1 Kings 8:60

Né káti nonhkwetaʼkwékon ne tsi nihiohóntsa ahiakoteriénhtaraʼne nètho Roiá꞉ner iatehahiáti khók tsi Ní꞉io í꞉ken—iáh ónhka nakóren tekáien.

1 Chronicles 29:11

Í꞉se ne sesátsʼte ó꞉ni shaʼsatsʼtenhserowánen í꞉ken, sahiatanerákwat, iorá꞉se, tánon sanontí꞉io í꞉ken. Orihwaʼkwé꞉kon ne karonhiáke ó꞉ni nonwenhtsáke tsi í꞉se sáwenk, tánon í꞉se ne sanontí꞉io í꞉ken, né kwáh tishaʼsastenserowánen orihwaʼkwé꞉kon í꞉se tisaniaró꞉taron.

2 Chronicles 15:3

Asèken karíhwes Nisraeʼró꞉nons tsi ronónnhekwe iáh tehatikwé꞉konʼne ne Rawenni꞉io, iáh tehotitsihenstaiénhthakwe nahonwatirihónhnien, tánon iáh ó꞉ni tehotiʼianerenhseraiénthaʼkwe.

Job Tánon ne Raoronhiakensera 9:6

ónhka ráwaks nonwénhtsa rarahthákwas tsi nón꞉we niká꞉rate, tánon nahonawahataʼshón꞉as wahó꞉wake;

Psalms 10:16

Né Roiá꞉ner né꞉se Nonkwahnontí꞉io í꞉ken né꞉ne tsi nénhwe tánon iáh tsahontótʼten. Nonkweʼshónhas kwáh kíʼ éʼrenh enhiontatsatenháwite ne rahohontsáke.

Psalms 100:3

Sehrihwanírat nètho Roiá꞉ner rahónha ne Rawenni꞉io í꞉ken. Kwáh rahónha sonkwahiatíshon, tánon rahónha shonkwaienhokónha; tánon né꞉ne tiónkwe ne teshonkwariwásnieʼse.

Psalms 100:5

Ne Roiá꞉ner roʼtennithenrátskon; ne ioriwaʼtóken raonoronkwátsera kwáh tsi nénhwe tsi thenkawisátsteʼke, tánon tsi waʼhatiwatsiratátse ne raoriwaʼtokentítsera tsi nénhwe enkátake.

Psalms 104:32

Onhwenhtsáke entʼtatʼká꞉tho tánon waʼtsiowí꞉sonhkwe, nék tsi ienhaiéna ne tsi ionón꞉te enwaʼtsienhkwarónh꞉ni.

Psalms 114:7

Tesawí꞉sont, Ó ionhontsáte, tsi nenhatotháshi ne Roiá꞉ner, tsi nenhatotháshi ne Raoní꞉io ne Jacob,

Psalms 145:13

Ne sanakenásera né꞉ne tsi nénhwe enkátake, tánon ne sanonhtiʼiótshera enkátake tsi wahewatsiratátse. Né Roiá꞉ner kwáh rorihwatóken akwékon tsi nihorahráts꞉ton; tánon kanoronhkwahtsherákon renéstha ne rahohiothénhsera.

Psalms 146:6

tsi nikáien ró꞉son ne tsi karonhiáte ó꞉ni tsi ionhontsáte, ne kaniatarakekó꞉wa, tánon tsi nahoténhsons né thóh nón꞉we nikónhnes; rahónha ranikonhrará꞉tses ne tewetákwen tsi nénhwe enkénhake;

Psalms 18:7

Ehʼthóhʼne waʼtsahonhontsíshonkwe tánon waʼhó꞉wake; ne tsitkenskwáʼhere ne tsi iohnonténion waʼtsowí꞉sonhkwe tánon waʼtiaonwentsíshonkwe, tsioríhwa tsi nihonakwénhen.

Psalms 29:10

Né Roiá꞉ner rénskote ne raonitskwáhrane éhʼneken ne tsi nitsaweʼnótonhkwe; ne Roiá꞉ner rénskote ne raonitskwáhrane rotenonhtiʼióston né꞉ne tsi nénhwe enkénhake.

Psalms 31:5

Sahʼnonstatierákon nón꞉we nakatathíteron; Kwáh kíʼ enstiatanóns꞉thate, Ó Saiá꞉ner, sarihwaʼtóken Ní꞉io.

Psalms 42:2

Kwáh tsi ní꞉ioht ne rónhkwe tsi nihoniatátʼtens nahanekíra nonékanos kwáh thóh natekonhiatonhontsóni Sewenní꞉io, né꞉ne ronnhehónwe Ní꞉io. Kátʼke ahontáke nakatkáto ne tsi rakonshón꞉te ne Rawenni꞉io?

Psalms 68:11

Né Roiá꞉ner rahónha totʼkáwen noríhwa ne tahionterihwaʼré꞉niaʼte; tánon ionatsiokowánen ne tsonatʼtonhwísen watʼkonterihwaréniaʼte:

Psalms 68:8

waʼtsiahontsíshonkwe, ne tsi karonhiáte tahiokénhnoʼre tsioríhwa tsi nontahawenonhátiene ne Rawenni꞉io ne Sinai nón꞉we, ne tsi nontahawenonhátieʼne ne Rawenni꞉io NIsraeronónke nón꞉we.

Psalms 74:12

Ók í꞉se nonkwahnontí꞉io shí꞉ken ne kwáh shiʼtiotásahwe, Ó Sewenní꞉io; wé꞉so nʼioríhwake takwasniénon tsi iakhiʼsénhnion ne ionkhí꞉shons kén tsi nón꞉we nihiakwahnákere nontionhontsáke.

Psalms 76:7

Ók í꞉se Saiá꞉ner ne onhkwetakwé꞉kon iesatʼtsánis! Iáh ónka taiekwéni naiétake ne sahénton nó꞉nen sanakwénhen?

Psalms 76:8

Karonhiáke nón꞉we nontasehríhwenhte ne iesáshons; ne ronhnonhontsakerónons waʼhonateronhiénhten tánon sakʼthahontatónhni,

Psalms 77:18

Né tsi iowé꞉renh kwáh né꞉ne iokakwenhtakárere thóh tsi tehioweratáse; né sáwenk tewaʼninekaráwas ohontsakwékon tsi watʼkaswátʼtheʼte; ne tsi ionhwenhtsáte waʼhówake tánon waʼtsiowísonhkwe.

Psalms 84:2

Nakatónnhets wasʼkáneks, kwáh í꞉ken tsi wakaskanetʼthennis ne raononsaʼtokentiʼkówa ne Roiá꞉ner; kwáh akatonnhetʼtserakwékon tsi tenhirihwákwahse natʼtsenhnonhniátshera ne ronnhehónwe Rawenni꞉io.

Psalms 9:8

Tsi tehahiatoréhtha ne tsi ionwenhtsáte né꞉ne tkarihwaiéri í꞉ken; sakokkoráston né ronhnonhontsakeró꞉nons né꞉ne tkarihwaiéri í꞉ken.

Psalms 90:11

Ónhka iakoteriéntare tsi nikashástste ne sanakwáhtshera? Nó꞉nen ne Rawenni꞉io ronakwénhen tsi nikarihwahét꞉kens nonkweshón꞉has tsi nihiontseránions.

Psalms 90:2

Nohénton sashónh꞉ni ne tsi ionhnontarónhnions, khés ne tsi ionhontsáte shontonhontiónhni, né꞉ne tsi iehiotót꞉te tánon ne tsi nénhwe enkénhake tsi í꞉se ne shonnhehónwe Sewenní꞉io í꞉ken.

Psalms 93:2

ne sanitskwáhra né꞉ne kwáh waʼhónhnise tsi nahé꞉tkenhne tioterihonhníhon; í꞉se ne tiotʼkonhónhwe enshón꞉nheke.

Psalms 97:4

Né raówenk tewaʼninekaráwas tekaswatʼthétha nonwenhtsáke; nonwénhtsa watkáthos tánon waʼtsiahonʼontsísonhkwe.

Isaiah 37:17

Satahonsí꞉iost, Ó Saiá꞉ner, tánon satahónsatat; tesateronwéksi, Ó Saiá꞉ner, tánon satkátho; satahónsatat akwé꞉kon ne raowenhnashón꞉has ne Sennacherib, tsi nithoteniéton ne thaʼoiéron ne ronnheónwe Ní꞉io.

Isaiah 37:4

Tó꞉ka nón꞉wa ne Roiá꞉ner saní꞉io wahothónteʼne ne raowenhnashónhas ne Rabshakeh, tsi né꞉ne ronnontí꞉io ne Assyria rohiatakweʼní꞉io í꞉ken ieothó꞉rion ne thaʼoiéron ne ronnhehónwe Ní꞉io, tánon kwáh aharihwáiaʼke nowenhnashónhas nètho Roiá꞉ner Saní꞉io rotontéhon; èhʼtho ká꞉ti kwáh sewaharátat ne sewaterénhnaient ne akorihwáke tsi niʼiákon iateiakothaténhron.”

Isaiah 40:15

Iekaníhare niaʼkahontsakeró꞉nons tóh niʼiehiaʼtóten tsi ní꞉ioht ne kastárens nonhtát꞉ne, tánon thóh nitonwátiʼte tsi ní꞉ioht nokénra ne iekontseʼrihará꞉kwahke; satkátho, thóh ní꞉ioht tsi tehá꞉kwah ne tsi kawenó꞉tons tsi ní꞉ioht nokénra.

Isaiah 40:28

Iáh kén tesateriéntaraʼkwe? Iáh kén tesarihwarónh꞉ken? Né Roiá꞉ner tsi nénhwe enkénhake tsi Rawenni꞉io í꞉ken, Rahónha Roshaʼáhnion kwáh tsitʼtsehiotonhóntsiókʼte. Iáh thehatesasthenserót꞉tha khés ne tahawisénheʼie, né raoʼnikonraientátshera iáh thaʼónton nawésakon.

Isaiah 57:15

Asèken né aoríhwa rá꞉ton ne éhʼneken tánon né kwáh tótʼte tsi rahónha thóh nón꞉we nihénteron tsi nón꞉we ne tsi nénhwe í꞉ken, né raosénhna né꞉ne Iotokénti: Thóh nón꞉we nikíteron ne kwáh éhʼneken ít꞉ken tánon iotenathatokénti, tánon kí ó꞉ni tsi nihiá꞉kon ne teiakaweriaʼsaríhon tánon tiakonikonrénhen, né náse ahonsónhton nakonikónhra ne tiaʼkonikonrénhen, tánon á꞉se ahonsónhton nakawariáʼne ne teiakaweriaʼsaríhon.

Isaiah 65:16

Ehʼthó꞉ne ónhka akénhake nahontahiontswanónhna ne kaiatateríhtshera ne tsi ionwénhtsaien kwáh kí ensakoiatatérisʼte ne Rawenni꞉io né rorihwatokenhónwe, tánon ónhka akénhake ahionhnentʼtsakétsko tsi aieriwaníraʼte ne tsi ionwénhtsaien kwáh kí né enhonwarihwaníratʼtse né Rawenni꞉io ne rorihwaʼtokenhónwe; tsioríhwa né tiotihénton tsi naʼtekanikonhráhraʼkwe kanikonhrénhon tánon karihwaséhton nakʼkhénton.

Jeremiah 23:36

Káti iáh ónen tahonshón꞉ton nahonshá꞉honsʼte nowénhnas ‘ne Roiá꞉ner raoʼrhienasthétshera,’ asèken tó꞉ka ónhka tsi niháti né énhonsthe, kwáh ne enkónʼniaʼte naʼkateriwahnhotátshera ne kwáh íken tsi ahiorhierniástheʼke ne ronónhake. Nonkweshón꞉a wathatiʼwahtáse ne raoʼwenhnashón꞉as ne raotiʼNí꞉io, ne ne ronnhehónwe, ne ne Roiá꞉ner Roshastsʼtenserowáhnen.

Jeremiah 4:2

tánon tó꞉ka ensehwarihwaníraʼte natsénnakon; ó꞉ni thisehwethákwen, tionkwetaiéris, ó꞉ni sehwahiánere, eʼthóhne káti akahonwenhtsiakwékon enhionkerihwahnónhtonseh nakhehiathatérisʼthe.”

Jeremiah 4:24

Iakatʼkátho ne tsi iononhtharónnions—kwáh iahówaks tánon ne tsi ionniarónnions tehiowénhtons.

Jeremiah 50:46

Thenhiahontsíshonkwe tsi nihiorahkaréhni nónenh ne Babylon enhkahiatiénenhne, tánon tsi nahtewahséntʼthos tsi naʼtehionikonhrhiákon kwáh ohontsakwékon enhiakotʼthóntehne.”

Jeremiah 51:29

Babylon tehiohiathishón꞉kwah tánon ioterahkén꞉rieh tsi nihioronhiáken, asèken tsi niaʼtehioriwáhke ne Roiá꞉ner rohtenikonhrónhni tsi nòkwah ne ahónha seh thóh ní꞉ioht iáh thènenh thateskahthénion. Ne Babylon kwáh enkariwahhiésha kwáh iáh ónhka éhtho tahonsahienáhkerahke.

Daniel 4:3

Tsi naʼteiotenonhianíhton ne ionehrákwaʼt, Rawenni꞉io shonkwarihotahshién꞉nihs! Tsi nikasatstenhserowá꞉nens ne iorihwanehrakwahténions tsi nihaieránions! Rawenni꞉io seʼ enhonontí꞉ioke tsi nén꞉we; kwáh tió꞉konte tsi raónha enthoniarotárhon!

Daniel 4:34

“Shontóhetste ne tsá꞉ta niiohserá꞉ke,” wahén꞉ron ne ronnontí꞉io, “Iaʼkatkáhtho ne tsi tiohtsíkerare, tánon kwáh ionsakeʼnikonhraié꞉riʼne. Wahihsénnaien ne Roshatsthenhserowá꞉nen Rawenni꞉io ó꞉ni wahikwénienhste tánon ne raoiaʼtanehrakwáhtshera tsi niká꞉ien ne ronnheʼón꞉we. Kwáh tsi nén꞉we enhawenní꞉ioke, tánon ó꞉ni ne raonakeráhsera tsi nén꞉we enkátake.

Daniel 6:26

Waʼtianerenhserón꞉ni kwáh tsik nonwéhshon né akeʼshatsténshera iekaníharaʼs tánon né tiaʼtakweʼní꞉io kwáh ioterihwí꞉son tsi niaʼteionkwè꞉take ahonwakwenién꞉stake ó꞉ni tahonwarenhsarónhsheke ne Daniel Raoʼní꞉io. Raónha ne Rawenni꞉io né ronhnheʼónʼwe, iáh ó꞉ni nonwén꞉ton thiaontókten. Iáh nonhka nonwén꞉ton thaiekwé꞉ni né aiónhtonʼte né raonakeráhsera, tánon iáh ó꞉ni nonwén꞉ton ne raoʼshatsténhsera thiaonʼtókten.

Daniel 6:27

Shakonónhstats tánon shakoʼniakénhtha; né roióʼtens né iorihwanehrákwa tánon né iorihwanehrakwahténions, né karonhià꞉ke ó꞉ni onhwentsià꞉ke. Sahoniá꞉kenhte ne Daniel, né kèn꞉reks ahonwaiaʼtaratsónkwen.”

Daniel 7:14

Kaʼshatsténhsera tahónion, kakwenienstátshera, ó꞉ni ne kanontiióʼtshera aoʼshatsténhsrera, ne káti kwáh tsi niaʼteienekwénhsake ne ón꞉kwe, tsi niionhsohkó꞉tenʼs, tánon tsi niiewennó꞉tens ne ahonterihwahtsterístaʼse. Ne raoʼshatsténhsera tsi nén꞉we, enkátake, tánon ne raonakeráhsera iáh nonwén꞉ton thiaontókten.

Joel 2:11

Ne Roiá꞉ner kwáh enhatá꞉ti raotihén꞉ton ne raonkweʼtashón꞉as ronterí꞉ios; ne raonkweʼtashón꞉as ronterí꞉ios iáh tewashé꞉ton tsi nionatiokowanen, nón꞉ka enhatewénhnaraʼkwe ne raorihwatatʼtsera enhashátsteke ki! Asè꞉ken ne rawenhní꞉sera ne Roiá꞉ner tsi enwenhniserowá꞉nen tánon thenhiotenonhianì꞉tonke! Ónhka iaiekwé꞉ni nahiontakátsthate?

Micah 1:4

Ethò꞉ne ne tsi ionhnontarónnions kwáh enkawistaná꞉wen tsi nón꞉we ní꞉res tánon nahonráhkwakons kwáh tenwateraneká꞉re tsi enwatenhotón꞉ko, kwáh tsi ní꞉ioht ne ohtsinaʼkontahkwaʼne otsikhé꞉ta kwáh enkawistaná꞉wen ákta ká꞉ien tsi iotékha, kí꞉ken otsikhé꞉ta enkanahó꞉ten kwáh tsi ní꞉ioht nohné꞉kanos tsi nón꞉we nihiotenontsá꞉kon.

Nahum 1:5

Watsionontishonkwánion ne raohénton, tánon ne tsi ionhniarónhnions wakawistanawénhseron; watsiahontsíshonkwe ne raohén꞉ton, ne tsi ionwenhtsá꞉te ó꞉ni ratikwé꞉kon ne thóh nón꞉we niiená꞉kere.

Nahum 1:6

Ónhka aiekwé꞉ni taietá꞉ne ohén꞉ton ne ranakwáhtshersa? Ónhka aiekwé꞉ni naionthá꞉katstate ne ioʼtarí꞉hen raonakwá꞉tshera? Ne raoterhiatitkhóntshera tewawéron tsi ní꞉iot ne ótsire, tánon raónha nosténras teorí꞉tons kenk ní꞉was.

Habakkuk 3:10

Nó꞉nen ne tsi ionontahrón꞉nions wahesá꞉ken waʼtsiowí꞉sonhkwe; nohné꞉kanos thonwerónhtane ne tsi karonhiá꞉te. Nohné꞉kanos ne nà꞉kon tsi ionwenhtsá꞉te waʼhonekákare, tánon ionontowá꞉nens ionontakwahronhtónhtses;

Habakkuk 3:6

Nó꞉nen thenhá꞉tane tsi teotekhahakwenhátie tenhiahontsí꞉shonhkwe; tsi natehakánere, akahontsakwé꞉kon nonkweshón꞉as waʼhakohiatísonhkwe. Ne kwáh onontakáhions waʼtewanitsthenróko; tánon ne tsi ionhniarón꞉nions eʼtà꞉ke niaháhe né꞉ne tsi nón꞉we natehatekhaʼhákwakwe ne wahón꞉nise tkénhne.

Malachi 3:2

Ók ónhka aiekwé꞉ni naiontahkátstate ne tsi nentewenhniserá꞉teke tsi nontahawenonhátie, tánon ónhka aiekwé꞉ni naiontahkátstate nó꞉nen enhoké꞉tohte? Aseʼkénh tho nihaiaʼtó꞉ten tsi ní꞉ioht ne raristanawènhtha raó꞉tsire tánon ne rahkwenióhares raonoharé꞉tha;

Matthew 16:16

Simon tahatati; ȣahenron: ise ne Keristos Niio Ronnheonȣe Iaienha.

Matthew 26:63

Iah oh tahenron ne Iesos Nok ne Ratsihenstoȣanen tontahenron: ȣakonriȣaneken raosennakon ne Niio, naskȣarori ise kenh ne Keristos, Niio Roienha.

John 17:3

Kenh kaien enhiakaonnhete onȣe: neh naiakoterientarake tsi sonhaa ok ne Niio, nok ne tetsiatorion, Iesos-Keristos.

Acts 14:15

“Onhnontiéren tsi éhʼtho naisewáiere? Í꞉i kwáh thóh naʼtehiakénonwe tsi kíʼ niseni꞉ióht! Kén꞉en hiákenes nahiakenirihówanaʼte ne kariwí꞉ios, nehne tahonsakwakaraténi tsi nisewasénnaiens ne iáh thènen tekariwástas nók kíʼ neh nahónton neh ahonsahtsisewasénnaien ne ronnhehónwe Ní꞉io, tsi nikáien ne rosahánion ne tsi karonhiátes ó꞉ni tsi ionwentsiáte, kaniatarakekówa, tánon kwáh tsi nahoténsons neh non nikonónnhes.

Deuteronomy 32:4

“Ne Roiá꞉ner se ne roshatstenhserowá꞉nen thiá꞉nes, toriwaié꞉ri tánon rohiá꞉nere akwé꞉kon tsi nihaweienhnó꞉tens; Ne sewaNí꞉io roriwató꞉ken tánon orihwí꞉io í꞉ken; eʼnihaié꞉ra nahó꞉ten ne tkariwaié꞉ri ó꞉ni ioiánere.

Deuteronomy 5:26

Ónhka kén nónhkwe nonhwén꞉ton shé꞉kon ahiakónhnheke nó꞉nen iakothontè꞉hon ne rónhnhe Rawenni꞉io ahontahatá꞉ti ne tsi ioʼtékha?

1 Thessalonians 1:9

Kwá onkwetakwékon iakotarákwen tsi ní꞉ioht tsi wahteskwaróton ne siakwanatarénase, tánon tsi ní꞉ioht tsi thonsehsewatkaraténi tsi nòkwa ne kahiatonnisónhas tánon Rawenní꞉ioke ionséhsewe, nasisewahiótense ne oriwiʼiohónwe ó꞉ni ne ronnhehónwe Ní꞉io

1 Timothy 1:17

Raonháke ne ronnheʼónwe Ronontí꞉io, tsi nénwe tánon iáh tehohiatáken, raonhatsíwa ne Ní꞉io—raónha tahonwarénsaron ó꞉ni kahiatanerakwátsera tsi nenwe! Éhthoh naiáwen꞉ne.

1 Timothy 6:17

Sherórih kí꞉ken nahorihoténsons tsi niháti ne rotikwátses ne kén꞉en ionwentsiáte tó꞉sa rotatonníhak, tó꞉sa ne rathiniahesénhak nahóten ne iáh tehioriwatóken tsi ní꞉ioht ne aktiokowátseras, ók Rawenní꞉ioke nónwe nihatiniahesénhak, kwáh rahotsennonniatserákon tesonkwáwis tsi nahoténsons tahionkwatonwentió꞉nike naitewatʼtsennonniátaʼkwe.

Hebrews 10:31

Kwáh íken tsi ioʼteronkó꞉wa ne ronnhehonwe Rawenni꞉io raotiana aisewahiena!

Joshua 3:10

Tsi iensewahténhti, kwáh oriwihiohón꞉we tsi enshakotekwáhthe ne Canaanites, ne Hitró꞉nons, ne Hivró꞉nons, ne Perizró꞉nons, ne Girgashró꞉nons, ne Amorʼró꞉nons, ó꞉ni ne Jebusites. Kwáh ki ensewaterienʼtará꞉ne ne ronhnhehón꞉we Ní꞉io tsi kén꞉en í꞉res tewahiataʼtónhtie

1 Sawátis 5:20

Ionkwateriéntare ne Rawenni꞉io Roiénha tsi thawénon ó꞉ni teshonkwáwi ne kanikonraienthátsera, neh꞉ne ahtsitewaientérahʼne ne kwá tókenske nʼoriwí꞉io Rawenni꞉io. Thóhnon nitión꞉ne tsi tehionkwateriwasóntere ne kwá tókenske Rawenni꞉io—ne ó꞉ni tehionkwateriwashóntere ne Roiénha Ié꞉sos Kerístos. Neh kí꞉ken ne kwá tókenske Rawenni꞉io, ó꞉ni ne kí꞉ken ne ionnheʼónwe natónnhets.

Revelation 20:11

Eʼthó꞉ne wakatkáto kowá꞉nen wanitskwaratserará꞉ken tánon tsi niká꞉ien ne thóh renskó꞉te; nohón꞉tsa tánon ne tsi karonhiá꞉te tsiatkontí꞉ten ne raohén꞉ton, tánon iáh ká꞉neka tahonsaiontʼká꞉tho.

Judges 5:4

Saiá꞉ner, nó꞉nen é꞉renh sathonthásehte ne tsi ionónhte ne Seir, nó꞉nen shathonthashiákenʼne ne tsi ionhontsáien ne Edom, watsahonhontsísonhkwe, tánon nóken norésehra ostharaténi tsi karonhiáte nonhtáwe. Hén, thakanekawerónhtaʼne ne tsi iotsikeraronhnions.

1 Samuel 17:26

Ne Táwit wahawénhase ne rón꞉kwe ne raiaták꞉ta rátahkwe, “Ónh nahonwatiérase ne rón꞉kwe nón꞉ka ahononhwarhiákhon kí꞉ken Philistiaró꞉non, tánon éhren ahaháwite natehénsera NÍsraerʼronónke? Asèken ónhka kí꞉ken ne iáh tehotewarahkwétaron Philistiaró꞉non ne ne rahón꞉ʼa asakonenrók꞉thaʼse ne ronwaterí꞉iose ne ronnheʼónwe Ní꞉io?”

1 Samuel 17:36

I꞉i kwáh kekononhwarhiákhon tetsá꞉ron ne kénreks ó꞉ni nokwáhri; tánon kí꞉ken ne iáh teotewarakwétaron Philistiaró꞉non kwáh nonhnéʼeh tho nenhoiátawe tsi kíʼne eh nihotiʼiatawénhʼen ne ró꞉nonha, neh tsi sakosenhnakʼsáton ne raotió꞉kwas ronterí꞉ios ne ronhnheʼón꞉we Ní꞉io,”