Isaiah 11:4 - Ohiatonhseratokénti

⁴ ók Karihwakwarihshionʼtsherákon tsi kwáh tensakoiatórehte ne iakóten, tánon thenhaiatóreʼte kwáh sathenhiotónhake ne tsakorihwaiéri ne tsi ionwenhtsáte; kwáh ne enhaiénte ne tsi ionwenhtsáte ne kánia rohnón꞉te tsi rasakarón꞉te, tánon né tsi nihatón꞉ries ne raskwenhtàke kwáh ensakononwarákon ne ronhnonkwetaʼhétkens.

Isaiah 11:4 ပူးပေါင်းရင်းမြစ်များ

2 Samuel 8:15

Káti ne Táwit wahatenontí꞉ioste tsi niwatenáskwah ne Israerʼronónke; tánon ne Táwit ne wahateriwathéntsiate nateriwakwarishióntshera ó꞉ni tkarihwaiéri rononhá꞉ke ne raonkwetaʼshón꞉ahs.

Job Tánon ne Raoronhiakensera 15:30

Kwáh iáh takonwatékwahse ne tetsiokaraskó꞉wa; notónhkwa kwáh enwastaʼthate ne raotì꞉teras, tánon ne rahonhní꞉sera enwá꞉ton ne tsi rashakà꞉ronte.

Job Tánon ne Raoronhiakensera 4:9

Rawenni꞉io ensakotonhniseraiénte tánon wahonnhí꞉heie, tánon tsi nihiówerare ne raonhakwáhtshera ne wahakotónhte.

Psalms 110:2

Né Roiá꞉ner Zion nón꞉we tahaténieʼte ne kasháste sáhnia. Né énshaste nasehiatkóraste ne ieshá꞉shons.

Psalms 18:8

Takaienhkwahrínekenʼne tsi tehanionhkáronhte, tánon nó꞉tsire ne iakothóntha tsi raʼsahkáronte takahiákenʼne; ne ioswenhthathékha rahonháke nontáwe.

Psalms 2:9

Kwáh thenséhiake karísthatsi enshathenhnitseronhniáthakwe né꞉ne tehioristhónton tsi iehiótʼte, kénk níwas tsi tesheiatʼthókwat tsi ní꞉ioht ne otára kátshe.”

Psalms 76:10

Sewenní꞉io Nónkwe akonakwáhtshera nék khók nenhnéʼe karihonthákwas ne sénha taiesanonweráton, kwáh eniesahsénhnaien ne wenniseraráhkwen tsi nisakwáhere.

Isaiah 1:17

sewatéweienst thóh nasewáier ne ne ioiánere; sewésat kaiáneren, saietʼtsiniákent ne iontateronhiakéntha, ietsiʼiénawas ne iáh tehiakonísen, taiétsine ne ionateré꞉ons.

Isaiah 13:11

Í꞉i kwáh entréhwaʼte ne tsi ionwenhtsá꞉te ne enkarihónhni ne kariwahét꞉ken, tánon ne rotiriwáneren ne tsi nihotirihwáneren; Ní꞉i kwáh ientsiástsi rononhá꞉ke ne ratináies ne rontatkowanáhtha; tánon èhʼtake enkheiónhni ne iáh tehonatehenseráien ne ratinataká꞉riaʼks.

Isaiah 14:30

Né thoʼnahtserénhton ronanahkeráton ne rotíten kwáh kíʼ enhontekhón꞉ni, tánon ne tehiontonhnakárias enhontsatiónhniʼte kwáh skénnonk thenkénhake; ók kwáh kí ne enkónhniate ne satèra atonhkariákon enhioró꞉te, tánon ne shonkwéta niaʼtehonataténhron enhkhenonwahrhiákon.

Isaiah 16:5

eʼthó꞉ne anitskwáhra enkakwatákwenhke tsi nón꞉we ne iorihwató꞉ken kanoronhkwáhtshera nikáien thóh rahothohserákon ne Táwit, tánon thóh nón꞉we nenhanitskwáhren ne raoʼrihwatokentitsherákon né꞉ne rakóra ne ré꞉saks kaiáneren tánon rahiatastó꞉re ne thóh naháiere ne tkarihwaiéri í꞉ken.

Isaiah 2:4

Kwáh tensakohiatórehte tsi natehónteres nonhkweʼó꞉kons, tánon ensakoteriwaʼshónterase ne iakotsokowáhnen ónkwe; ne rahonasarekówa ne sahonónhniate ne ietarakarahthóstha otsiiewéiontha, tánon ne raotishiʼkwáhras iontkwiraseronhniátah ne ohnió꞉kwas sahonnónhniaʼte; nonkweʼó꞉kons iáh shé꞉kon nonhwénhton tahonshahionterí꞉io, iáh ó꞉ni nonhwénton tahonshahatiweienʼtétonke nahonterihiosehrónhni.

Isaiah 26:6

Thóh ratiratáties, né꞉ne ionshitàke ne iakóten, Tsi natehontekhahákwah ne teiontkárhias.

Isaiah 29:19

Né tiʼiakawé꞉ron iaweronhátie enhieiéna náse atonhnarát꞉tshera rahonhàke ne Roiá꞉ner, tánon ne kwáh iakotenhténion nonkwehókons kwáh kí enhiontonhnáren rahonhàke tsi nikáien ne Roiatatokénti khók í꞉ken ne Israerʼronónke.

Isaiah 3:14

Ne Roiá꞉ner iahatáhweiaʼte nasakoriwenhtánion ne thohtí꞉ions tánon ne sakotihénthense rahonkweʼtashón꞉ʼahs: Kwáh í꞉se iesewasaháton ne tsi kanenharaientʼtóhseron; tsi nahoténsons ietsinenskwenháton ne iakothenténion sewanonskónsons ieskakérons.

Isaiah 30:28

né rahonhnísera kwáh né꞉ne iotnekawenhráton kahionhatátie né ièwas tsi tsiakoniaró꞉hare— nasakósehwe niakahontsaʼkerónons ne énratsʼte raosehwátha ne atkaronhniátshera, tánon thóh ratirhió꞉tsake nonkweshón꞉has ensakokonwaró꞉taroʼke né nahiakothahará꞉kwahte.

Isaiah 30:31

Né Assyriaró꞉nons kwáh kí enhonateronhiénthen nó꞉nen enhonwaʼwenhná꞉ronhke ne Roiá꞉ner nó꞉nenh enhá꞉iente ne rahònia énratste.

Isaiah 30:33

Asèken ne iotékha kanátaien wahónhnise tkaweienhnenhtáhon; oriwiʼiohónhwe tsi ne kasahathákwen tsi niʼkaweienhnenhtáhon ne ronnontí꞉io raorihwàke, tanon tsi iontsahatákwah iosónhwes í꞉ken tánon tewatakáron, né ótsire tánon nóiente wé꞉so káien; ne rahonhnísera ne Roiá꞉ner, kwáh né꞉ne iontenatentástha í꞉ken, ne enwatekátakwe.

Isaiah 32:1

Satkátho, ne ronnontí꞉io kwáh né enhatenonhtí꞉ioste ne karihwaʼkwahrihshióntshera; tánon ne ratiʼkoráshons kwáh ne enhontkóraste ne tkarihwaiérih.

Isaiah 32:7

Né iakonkwetaʼheténskwah né꞉ne ratiʼnikonrá꞉tha kwáh rononkwetaʼhétken; né rontenikonrónhnis ne kwáh kariwahétken tsi nahatí꞉iere nasakotikarónhni ne iakóten tsi nisakonanowenhténhnis, iawerohátien nónho꞉wen tsi iakorihwaʼnéken ne iakóten tsi tseiériʼtse.

Isaiah 33:22

Asèken né꞉ne Roiá꞉ner nonkwá꞉wenk rarihwéntʼtha í꞉ken, né꞉ne Roiá꞉ner nonkwahkóra í꞉ken, né꞉ne Roiá꞉ner nón꞉kwah nontí꞉io ní꞉ken; kwáh rahónha enshonkwahiatanónsthaʼte.

Isaiah 40:7

Nóhonte wastátʼthens, notsítsa watashó꞉kwas, nó꞉nenh ne rahonhnísera ne Roiá꞉ner thóh enwatón꞉rie; oriwiʼiohónwe nonkweʼshónhas tsi óhonte nahatiʼiató꞉tens.

Isaiah 49:2

Né warón꞉niaʼte ne tsitʼsaká꞉ronhte tsi ní꞉ioht ne iosarothíʼie, thóh tsi iotasátare ne ratshaná꞉ke wahatsatásehte; wahakónhnien ne teiostarát꞉the kaiénkwiʼre, thóh tsi watethahástha ne kaiénkwiʼre wahatsatásehte.

Isaiah 61:1

Ne Raoshatsʼténhsera ne Roiá꞉ner Rawenni꞉io onhtiaʼtórenhne, tsioríhwa ne Roiá꞉ner tsi ratiaʼtarákwen; thaʼkateniéton nahontátʼkhawe ne karihwí꞉ios rononhá꞉ke ne ronwatiʼwí꞉shaton, nahonshakhétienhte ne teiakawerhiaʼsaríhon, naʼkerihowanátenh natatewenhniʼiósera rononhá꞉ke ne ratinhó꞉tons, tánon nahonsahonwahtiʼnhotónhko ne ratiʼnhó꞉tons;

Isaiah 9:7

Né raʼoshatsténhshera kwáh enwahtehiá꞉ron ienhiokontákwen, tánon kwáh iáh tsahontókthen tsi skénnónk enkénhake ne raonitskwáhra ne Táwit tánon ne raonontiʼiótshera. Kwáh kí enhakwahtáko tánon entátswanónhna skát꞉ne ne kaiáneren tánon ne karihwakwahrihshión꞉tsheras kwáh kénhen ienwatáhsawen tánon tsi nénhwe enkénhake. Ne Roiá꞉ner Roshatstenseʼrowanenkówa iateorihwaién꞉tase ne thóh kíʼ ken nenhá꞉iere.

Jeremiah 33:15

Nén nenhkaháwiʼke enhihiatharáhko ne ronnonhtí꞉io ne rohiánereh ne ne Táwit nónhwe nithotʼwahtsiríhnonh. Nètho ronnonhtí꞉io ne enhohióten ne tkarihwahiéri ó꞉ni ne kaiáneren ne tsi ionwenhtsiáte.

Jeremiah 5:28

nonhtiéren tsi ronahrésenhs ó꞉ni kwáh ioiánere tsi tehonskáhons. Iáh tiehiotókʼte tsi nihatiweiennákʼsens. Iáh tetheshakonáhwis ne tehionthonnahkárhias ne raothihianerénsehras khés nahonnénesʼthe ne tkarihwaiéri tsi nòkwa ne sahkotiwihsáhtha.

Hosea 6:5

Ne káti aorì꞉wa kherontsá꞉kon rotitokénse nón꞉we nitsawé꞉non, Khenonwarhiá꞉khon tsi nitsawé꞉non owén꞉na ne tsitsaká꞉ronte, tánon nakerihwenhthátsera ohén꞉ton niewé꞉tha tsi ní꞉ioht ne teioswát꞉te.

Zephaniah 2:3

Tsi sewahiatí꞉sak ne Roiá꞉ner í꞉se seweriasí꞉ios ne tsi nionhontsá꞉te, ronónha ratísehre ne raorihwataʼtsheras; sewésak ne karihwakwahrihsónhtsheras; sewésak ne skén꞉non nonhtié꞉rek kwáh enietsihiataséhte nenhtewenhniseráteke ne Roiá꞉ner.

Malachi 4:6

Kwáh ensehshakaweriahsahserón꞉ni rotiwiraièn꞉tonʼs tsi nokwá ne shakotiioʼokón꞉ahs neh non, ne shá꞉ka ne shakotiioʼokón꞉ahs tsi nonkwáh ne ronwatiioʼokón꞉ʼahs, ne ká꞉ti ne tóhsa aón꞉take ne átienhte nohóntsa ne kahrewahtáhtshera.

Matthew 11:5

Tsiekens ne teioronȣekonne, tsiontenties ne iesinaksen, tsiontons nʼiakoststaȣis, tsionronkas ne teionhontakȣekon, Tsiontonnhests niakaȣenheion, nok iontataronkatenti oriȣatokenti ne iakotent.

Matthew 5:5

Iakotaskat nʼok tiiakaȣeron iaȣeronhatie; aseken akoȣenk enȣaton nonȣentsia.

Acts 9:1

Sékon káti ne Saul neh roriwahiotháties tsi naʼtehotenonhianíton sakohʼrahrastén꞉nis nasakósehthe neh tsi niháti ronwanonteráties ne Roiá꞉ner. Ratsihenstowánen wahotkénsera

2 Corinthians 10:1

Káton ken íhsehre wakátshen nó꞉nen skátne í꞉tewes nok kwáh wakeʼnikonhráhsatste nó꞉nen í꞉non niió꞉re ítkes? Ánio kiʼ satahónhsatat, nek í꞉ʼi ó꞉ni tho niwatianerenserí꞉io, ó꞉ni keriasí꞉io tsi ní꞉ioht ne Kerístos.

Galatians 5:23

tiakoriwaiéri, akahóna tiakoniarótaron. Iáh tahóten tekaianerenseráien nahiotʼkónten kí꞉ken nahorihóten.

2 Thessalonians 2:8

Ethò꞉ne ne ranikonrákʼsen enhonwahiatotáshion, nók nónen énrahwe ne Roiá꞉ner Ié꞉sos, ne enhonnonwahriákon tsi nen hotonniseráhiente tánon né enhoríhiothe tsi nihohiataneráhkwat.

Titus 3:2

Ietʼtsiróhri ne tóhsa thènen ne wahétken ahsakonénhase nónka hakénhake, nók saktakénhake ó꞉ni ahonterohserihióhake, tánon tiotkonʼónwe skénnon hakénhake tsi nihonnonʼnóten tsi natehóntereh.

Ne꞉ne Sák Rohiaton 3:13

Ónhka kén tsi nítion naihsewatʼthókake ó꞉ni ahisewanikonraientáseke? Né seriwanírat tsi niʼioiánere tsi nishón꞉ne, tsi nikahiotenserí꞉io sahiotén꞉en né tsi nithisariwaiéri ó꞉ni sanikonraientáskon.

Revelation 1:16

Ne saweiententhákwen ne rahá꞉we tsá꞉ta nikatsistóhkwake, tánon tsi rashakáronte takaiá꞉kenhne ne iohiotí꞉ie, tetsarónhkwen tsi iohiotí꞉ie, tánon ne rakónhsake kwáh né꞉ne karáhkwa teiostwáte kwáh kashatstenhseraná꞉non.

Revelation 19:11

Eʼthó꞉ne wakatkáto onteronhianhotónko, tánon thóh nón꞉we ní꞉res kanaskwará꞉ken! Ne roʼshá꞉tentse ne ronwanaʼtónhkwa Roʼriwatóken tánon Oriwí꞉io í꞉ken, tánon thóh kariwakwarishontserá꞉kon tsi tehaiatoréhtha tánon rateriioserónhnis.

Revelation 19:15

Thóh tsi raʼsakáronhte tkaiá꞉kens iosarotí꞉ie ne enshakoièn꞉te ne ronhnonhontsakeró꞉nons, tánon kwáh rahón꞉ha enshakokʼkoraste ne enráste ne teioteristakwenónhni; kwáh tenharatatséshon ne otsí꞉tsa kanekonhniátha né꞉ne raonakwáhtsera ne raoterhiatitkhóntsera ne Ní꞉io ne Roshatstenhserowanenhkó꞉wa.

Revelation 2:16

Sasewatatré꞉wat káti. Tó꞉ka iáh, Í꞉i kwáh iostó꞉rent tsi enkoniaʼtorén꞉ne tánon enkateriioserónhni nakheiatkón꞉ten ne én꞉katste nashareʼkó꞉wa tsi nitsoiakén꞉en tsitʼsaká꞉ronhte.