Genesis 50:24 - Ohiatonhseratokénti

²⁴ Eʼthó꞉ne ne Só꞉se wahshakawènhahse ne rontateʼkoʼokón꞉ʼa, “Ó꞉nen thó꞉ha akíheie; ók kwáh orihwiioʼón꞉we, ne Rawenni꞉io tsi enhtshisewehiá꞉raʼne, tánon entehtshisewaiaʼtínekenhwe ne kenh nón꞉we niionhontsá꞉ien, ók thóh nón꞉we nientshisewaiaʼténhawe tsi tionhontsá꞉ien ne kwáh iorihwahní꞉ron rohrharatstén꞉ni ne Abraham, tánon ne Isaac tánon ne Jacob.”

Genesis 50:24 ပူးပေါင်းရင်းမြစ်များ

Genesis 12:7

Ethó꞉ne ne Roiá꞉ner wahototáhshien ne Abram tánon wahén꞉ron, “Tsi nienhsathwatsí꞉rine, né kí ne kanakeráhsera kheiawí꞉re.” Sók kíʼ thóh nón꞉we nahaónnien ne ietsenhahráhkwa ne Roiá꞉ner, ne ne rototahshién꞉ni.

Genesis 13:15

asèkenh akwé꞉kon tsi niiohón꞉tsa ne satkáhthohs entkón꞉ion tánon tsi niensathwatsí꞉rine ne ne tsi nén꞉we í꞉se sewawenkhón꞉we enkénhake.

Genesis 13:17

Téstaʼn, sateʼkhaharónnion ne tsi niiohón꞉tseʼs tánon tsi naʼteionhontsaká꞉ron; aseʼkénh í꞉se entkón꞉ion.”

Genesis 15:18

Né eʼthó tewenhniserá꞉tehkwe ne Roiá꞉ner wahaianerenhserón꞉ni skát꞉ne ne Abram, rá꞉ton tsi “Nienhsathwatsí꞉rine takhé꞉ion kí꞉ken ohóntsa, thóh entewatáhsawen tsitkaniataratátie ne Egypt ièn꞉wawe ne kaniataraʼkehkowanén꞉ke, ne ne tsi kaniataratátie Euphrates,

Genesis 15:7

Eʼthó꞉ne ne Roiá꞉ner wahawénhahse, “Í꞉i ne Watiá꞉ner tetkoniaʼténha ne Ur ne ne tsi nón꞉we nihatinákere ne Chaldearó꞉non, né naontakón꞉ion kí꞉ken ionhóntsaien naʼesawénhake.”

Genesis 15:8

Ók ne Abram wahariʼwanón꞉ton, “O Saiá꞉ner Ní꞉io, onhʼníʼioht tsi aonkaterién꞉taraʼne tsi Í꞉i aonkawénhake?”

Genesis 17:8

Tánon kwáh Entkón꞉ion, tánon tsi niensathwatsí꞉rine ó꞉ni nó꞉nen ensenhé꞉ionke, tsi nón꞉wa nón꞉we thisonhontsá꞉te í꞉ken, aontonhontsà꞉ke ne Canaan, né꞉ne tsi nén꞉we ensawenkhón꞉weke; tánon Í꞉i ne Raotiní꞉io enkénhake.”

Genesis 21:1

Né Roiá꞉ner sahrehiá꞉raʼne ne Sarah tsi kíʼ nihá꞉wen, tánon ne Roiá꞉ner tho kíʼ nahá꞉iere tsi kíʼ nihoʼrharátston.

Genesis 26:3

Nikarihwésha kén꞉ʼen tsi ionhwentsá꞉ien tsiʼ terón꞉tak, entenikwekónhake ó꞉ni enkoniaʼtaté꞉rihste; ní꞉se tánon tsi nienhsathwatsí꞉rine kwáh énttion akwé꞉kon kí꞉ken ionhwentsá꞉ienʼs, kwáh kíʼ énkenahne tsi niwakerihwahnirá꞉ton tsi nihihrharatstén꞉ni ne Abraham iaʼníha.

Genesis 28:13

Tánon ne Roiá꞉ner raiaʼtákta í꞉rate tánon wahén꞉ron, “Í꞉i ne Watiá꞉ner, ne ne Abraham iaʼníha Raoní꞉io í꞉ken ó꞉ni Raoní꞉io ne Isaac; né nonhwentsà꞉ke tsi nón꞉we nihshiaʼtión꞉nikwe kwáh í꞉se enkón꞉ion tánon tsi nienhsathwatsí꞉rine;

Genesis 3:19

Ó꞉nenk tsi Tenhsáʼtarihenserón꞉hkohte ne skonhsà꞉ke ne naʼón꞉ton nohwénhtsa thé꞉nen aontaká꞉nio; kwáh tsi niió꞉re ohwentsá꞉ke nón꞉we nienséhse; tsi tho nón꞉we nitiesaiaʼténha; okèn꞉ra ní꞉se í꞉ken, tánon shé꞉kon kiʼ oʼkèn꞉ra iensehsá꞉ton.”

Genesis 35:12

Ne ohóntsa nétho tekheiá꞉wi ne Abraham tánon ne Isaac, kwáh í꞉se enskón꞉ion, tánon ó꞉ni iensekhé꞉ion tsi nienhsathwatsirí꞉ne.”

Genesis 46:4

Enkoniatiaʼtónʼthahse tsi nienhénhse ne Egypt, tánon kwáh shé꞉kon tentkoniaʼténhawe; tánon kwáh Só꞉se rahtsaʼnà꞉ke tenhiaròn꞉weke nó꞉nen enhsíheie.”

Genesis 47:29

Nó꞉nen ákta sí꞉weʼs ne Israel nahrénheie, iahó꞉nonke ne roién꞉ʼa Só꞉se tánon wahawènhahse, “Tókaʼ waketshénrion naontesarihwaié꞉rike ní꞉se, iaʼsahtsaʼnó꞉roʼk ne knitshó꞉kon tánon sahrhá꞉rats tsi ensarihwatokénhake tánon eniorihwiióhake nakonhá꞉ke. Tóhsa Egypt nón꞉we naʼtatiaʼtáta.

Genesis 48:21

Eʼthó꞉ne ne Israel wahawènhahse ne Só꞉se, “Ó꞉nen thó꞉ha akíheie, ók kiʼ ensenikwekónhake ne Rawenni꞉io tánon ó꞉ni iensiaiaʼténhawe tsi nón꞉we thóh nonhontsá꞉ien ne shasottsheraʼokonkén꞉ʼen.

Genesis 50:5

Ne rakeʼníha rakonnién꞉ni nakerihwahní꞉rate; rá꞉wen, ‘Ó꞉nen thó꞉ha akíheie. Ne wakatatshonhonnién꞉ni tsi tionhontsá꞉ien ne Canaan, thóh nón꞉we ienhstiaʼtáta.’ Ó꞉nen kiʼ takeríhon neh nón꞉we iá꞉ke, ne naón꞉ton ahiiaʼtataʼáhnha ne rakeʼníha; eʼthó꞉ne téntke.”

Job Tánon ne Raoronhiakensera 30:23

Wakaterièn꞉tare ní꞉se tsi kwáh ienstiathénhawe ne kenhé꞉iatne, tánon tsi kanónshote iontateweienhtón꞉ni nonkweʼtakwé꞉kon ne iakónnhe.

Exodus 12:41

Né shiʼwenhnisehráteʼkwe ne 430 niʼiosehràke shiaʼhontókten, rahtiʼtarahkwékon ne Roiá꞉ner rahonkwetashón꞉ʼa é꞉ren wahón꞉nethe ne Egypt.

Exodus 12:51

Thóh wenhniseráteʼkwe ne Roiá꞉ner thasakohiaʼtí꞉nekenʼwe ne lsraeró꞉nons rahoʼtiʼtiókwas ne Egypt nónwe.

Exodus 13:19

Ne Mahís iahá꞉haʼwe ne Só꞉se rahoʼstsienʼsónhas, tsi kíʼ nisaʼkahonhniénhni ne Só꞉se ne lsraerʼrónons kwáh ioriwaníron tsi roʼnahraráston tsi thóh nenhatí꞉ieʼre. Rawen ne Só꞉se, “Nó꞉nen ne Rawenni꞉io entsiʼtshesewaʼniákenthe, ónenk tsi èhren ientsiʼsewahá꞉we naʼstsienʼsónhas èhren sewaháwit né ken nónhwe niwaʼtenáhtaien.”

Exodus 3:8

Tánon káti takátsʼnenhthe nahonsakʼkheniáʼkenthe tsi nòkwah ne Egyptró꞉nons tánon ne tahontaʼkhehiaʼtínekenʼwe ne Egypt nónhwe thóh nienkhehiaténhaʼwe tsi nónhwe tionhontsowáhnen, tsi nikáien ne ionhontsàreʼsen ó꞉ni ionhontsí꞉io tánon tsi nónhwe né Canaanites, ne Hitró꞉nons, ne Amorʼró꞉nons, ne Perizró꞉nons, ne Hivró꞉nons, tánon ne Jebusites ó꞉nen nihatináhkere.

Exodus 33:1

Ne Roiá꞉ner wahawénhase ne Mahís, “Èren íset né ken nónhwe niwatená꞉taien, i꞉se tánon nonhkweshón꞉ʼa ne tethesehiaʼtinekénhon ne Egypt, tánon thóh nónhwe iahásewe tsi tiohóntsaien ne kheʼierahratsʼténhni entekhéhion ne Abraham, Isaac, tánon ne Jacob ó꞉ni tsi nienhontwaʼtsiríne.

Exodus 4:31

Tahonnhétaʼkwe, tánon ne sahatiʼriwáhronʼke né Roiá꞉ner tsi sakohiaʼthoʼrènʼen tánon rotkathó꞉sehron tsi nihonwahʼnateniaʼkatsʼténhni, waʼthonsáhkeʼte tánon wahonterénhnaien.

Ecclesiastes 12:5

Kwáh kíʼ enshetsanísehke kanónhwe ne é꞉neken tiótʼtes, tánon enhiotʼteronhthónhake ne thakésons niáse. Tsi sanonhkwísehrothe karáhken nenhiá꞉wenhne; kwáh tensnhióten sheronhkenéhak tsi nisaktsinhokátha, tánon akwékon naskanéktshera kenkʼtshiénwe. Thóh nón꞉we niahonkwenonhátie nonahkénka iéken naetewatoríhsen, tánon ehthò꞉ne kwáh enwatsiónhnionke ne kanatakónsons.

Ecclesiastes 12:7

Nonhkwahieronhtasónhas okènrah iensehwáton ne tsi ionhwenhtsáte, tánon nahonhnísehra ne tsi iakónhnhe kwáh nenhné꞉e Rawenní꞉ioke niénsehwe, tsi nikáien ne tesonhkwáhwi.

Numbers 32:11

‘Waʼkaráratste né aoríhwa tsi iáh tiehothikonhtákwen tehotirihwatóken nakonháke, kwáh iáh ónhka ne tewá꞉sen natahahoserihiákon khès ne sénha ahonthahóhionke né Egypt natethawénon tsi iáh tsiá꞉re ne tsi tsohontsáien né khehiararatsʼténhni ne Abraham, Isaac, tánon ne Jacob.’

Romans 5:12

Kariwaneren tsawenon tsi ionwentsiate neh꞉ne saiatak khók rorihonʼni꞉on, tánon ne rahoriwanerahaktsera tsioha ne kenhéion. Tsi ehniʼiawenhen, kenhéion watewareni ne kwáh tsi niateiakahontsiake ne iorihon꞉ni tsi kwáh iateionkwetake iakoriwaneren.

Deuteronomy 1:8

Akwé꞉kon ne kí꞉ken nohóntsa ne Í꞉i, ne Watiá꞉ner, wakarahrátston tsi entekhéion ne sewasótsheras, Abraham, Isaac, tánon ne Jacob, tánon tsi nienhontwatsirì꞉ne. Wás tánon iaʼsewaná꞉taien.’”

Deuteronomy 6:10

“Akwáh ki ne Roiá꞉ner sewaNí꞉io tsi nishakorahratstén꞉ni ne sewasoʼtsheraokonhkén꞉en, nʼAbraham, Isaac, tánon ne Jacob, entsitsonhóntson skátke ne iókwats kanatowá꞉nens ne tsi niká꞉ien ne iáh í꞉se tesewatenatón꞉ni.

Hebrews 11:22

Tewehtákwen seh wahahónʼnien ne Só꞉se, nónen ákta shiʼrenheiónsere, wahatárahkwe ne Israerʼró꞉nons tsi nishonanahkerákwen ne Egypt, tánon wahaténnhaʼne tsi nakaiéren ne raoierónta.

Hebrews 9:27

Onhkwetaʼkwékon ónenk tsi énskak khók tsi enhiaiéheie, tánon eʼthò꞉ne ónen Rawenni꞉io teshakohiatórethe.

Joshua 24:32

Ne rahó꞉ieronhtha ne Sose, né nonhkweshón꞉ʼa tethó꞉tiha ne Egypt nónhwe, Shechem né nónhwe nihonwahiathaten, né꞉ne ken nihiohonsa ne Jacob ró꞉ninon ne Hamor roiénha, né roní꞉kenʼen ne Shechem, né꞉ne énska tewenhniáwe nikawisthake kawistharaken rokarhiakon. Ki ken ohontsa né꞉ne Sose rahowatsires rotiienahon.