Genesis 46:34 - Ohiatonhseratokénti

³⁴ kwáh iorihwiióhak tsi ehtshisewahró꞉ri ‘kwáh tsi nitiónhnhes tsi katshé꞉nen iethiʼnikón꞉rare, iakwakwé꞉kon tánon ne iakhisothokonʼkénhen’—ne katíʼ naón꞉ton tsi ionhontsá꞉ien ne Goshen nón꞉we naesewenʼterón꞉take, tiorí꞉wa ne Egyptró꞉nons kwáh iáh oh thé꞉nen tehon꞉nehre tahonterihwahsónteren ne teiotinaʼkarontón꞉ʼa shakotí꞉nonhne.”

Genesis 46:34 ပူးပေါင်းရင်းမြစ်များ

Genesis 13:7

tánon waʼthonterihotaʼhrók꞉kon kíʼ tsi naʼtehóntere ne shakotí꞉nonhne Abram raotshenenʼó꞉konʼs tánon ne Lot raotshenenʼó꞉konʼs. Neʼthó shontakahá꞉wi ne Canaanites ó꞉ni ne Perizró꞉nons tho nón꞉we tionhwentsá꞉ien nihatinákerehkwe.

Genesis 13:8

Eʼthó꞉ne ne Abram wahawénhahse ne Lot, “Ánion tóhsa ohthé꞉nen kaièn꞉taʼn naterihotahrhóktshera tsi naʼtetewátere, tánon tsi naʼtehóntere nonkenihnaʼtsheraʼshón꞉as; tiorí꞉wa tsi tewatátenonhkwe.

Genesis 26:20

ne katshé꞉nen shakotiʼnikón꞉rare ne Gerar nón꞉we waʼthonterihotáhrhoke ne Isaac raotshenenʼó꞉konʼs sakotiʼnikón꞉rare tánon wahonní꞉ron, “Kí kahné꞉ko Í꞉i onkwá꞉wenʼk.” Sók kíʼ ne Isaac ne iohnáwerote Esek wahaná꞉tonhkwe.

Genesis 30:35

Nok ne shahenhnísera ne Laban wahshakoiaʼtohtáhrho ne ratí꞉siʼn kaiaʼtákeras ne rotihaharónnion tánon ne rotirahkwarónnion, kontikwé꞉kon ne otiʼnhéhtshienʼs kaiaʼtákeras né iotitsistohkwarónnion tánon iotirahkwarónnion, kontikwé꞉kon ne karà꞉ken aiotirahkwarónnionke, tánon kontikwé꞉kon nowiraʼshón꞉ʼahs ne kontihón꞉tsiʼs, tánon raonekenhteronʼtsheraʼshón꞉ʼa wahshakorihón꞉ten nahshakonatenʼnikón꞉raren;

Genesis 34:5

Nón꞉wa ne Jacob rorihwahrón꞉ken nétho Shechem tsi shakohsennaksá꞉ton né shakoièn꞉ʼa Dinah; ók ne raonekenhteronʼtsheraʼshón꞉ʼa kahentà꞉ke neʼ skátne rón꞉neʼskwe ne raotshennenʼó꞉konʼs tiohnhónskwarons, káti ne Jacob wahatatié꞉na tsi sakʼthahatatón꞉ni tsi niió꞉re ionsahón꞉newe.

Genesis 37:12

Énskat wenniserá꞉tehkwe nó꞉nen ne Só꞉se rontateʼkoʼokón꞉ʼahs kahentà꞉ke iekonwatiʼnikón꞉rarahkweʼ ne ronwaʼníha raotshenenʼó꞉konʼs teiotinaʼkarontón꞉ʼa tánon ne kaiaʼtákeras ákta ne Shechem,

Genesis 37:2

Ne ki꞉ken ne raotikaraʼshón꞉ʼa né Jacob rahowá꞉tsire. Ne Só꞉se, tsá꞉ta iawén꞉re shaʼtehaohseriiá꞉kon, ráonha tánon ne rontateʼkoʼokón꞉ʼa shakotiʼnikonhrarátieʼskwe ne teiotinaʼkarontón꞉ʼa tánon kaiaʼtákeras; shakohshnié꞉nonskweʼ ne aotinekenhteronʼtsheraʼshón꞉aʼhs ne Bilhah tánon ne Zilpah, ne ne roʼníha ró꞉ne; tánon ne Só꞉se ronwaʼnihnéha iaharihwénhawe ne iáh tekarihwí꞉io ne raotirihwá꞉ke.

Genesis 43:32

Ne Só꞉se kwáh raonhá꞉ak khók sewatekhwahrá꞉tshera tsi nón꞉we nahonwakhwahéhrhahse neh non ne shá꞉ka ne rontatekoʼoʼkón꞉ʼahs, neh non ne shá꞉ka ne Egyptró꞉nons ne tehonatón꞉ton, tiorí꞉wa ne Egyptró꞉nons iáh thaón꞉ton ne skátne tahón꞉tonte ne Hebrews, aseʼkénh ne raotirihwiiohstónhtshera ne Egyptró꞉non iáh tehonwaná꞉wis ne skátne tahón꞉tonte ne Hebrews.

Genesis 45:10

Tsi watonhontsá꞉ien ne Goshen nón꞉we nenhsenákereke, tánon katíʼ ákta tsi nón꞉we nikenákere enhsiʼterón꞉take, ní꞉se tánon ne sheioʼokón꞉ʼahs tánon sheiatereʼokón꞉ʼa, satshenenʼó꞉kon teiotinaʼkarontón꞉ʼa, kaiaʼtákeras, tiohnhónskwaronʼs, tánon kwáh tsi nahoʼtén꞉shon noiá꞉shonʼs aesaièn꞉take.

Genesis 45:18

Wáhs sahtshisewenhnónksa ne tshisewaʼníha ó꞉ni ne sewahwá꞉tsireʼs tánon akonhá꞉ke naʼtontásewe, ne naón꞉ton naontakhé꞉ion ne kwáh tionhontsí꞉io ne Egypt, tánon ní꞉se khek í꞉siʼk nón꞉we tsi ní꞉kon ensewaièn꞉take naesewatónhnhetste.’

Genesis 46:32

Ne ronnón꞉kwe teiotinaʼkarontón꞉ʼa shakotiʼnikón꞉rare, aseʼkénh kontitshé꞉nenʼs tehshakotirihwahshnié꞉se; tánon tahshakotiiaʼténhawe ne teiotinaʼkarontónʼahs ó꞉ni ne kaiaʼtákeras, tánon ne tiohnhónskwaronʼs, tánon akwé꞉kon tsi nihotiièn꞉tahkwe.’

Genesis 47:11

Eʼthó꞉ne ó꞉nen ne Só꞉se wahóʼteron ne roʼníha ó꞉ni ne rontateʼkoʼokón꞉ʼahs, tánon wahshaká꞉wen ne kwáh tionhontsí꞉io ne Egypt, ne ne tsi watonhontsá꞉ien ne Rameses, tsi kiʼ nihotenhnhá꞉ʼon ne Pharaoh.

Genesis 47:3

Ne Pharaoh wahshakawènhahse ne Só꞉se rontateʼkoʼokón꞉ʼahs, “Oh nisewaioʼtenhseró꞉tenʼs?” Tánon wahonwahró꞉ri ne Pharaoh, “Ne sahnhaʼtsheraʼó꞉konʼs katshé꞉nenʼs iakhiʼnikón꞉rare tsi kiʼ niiohtón꞉ne ne iakhihsothonkonʼkénhen.”

Genesis 47:4

Wahonwènhahse ne Pharaoh, “Taiákwe kén꞉ʼen nón꞉we nikanakerahserá꞉ien naiakwenʼterón꞉take ne ne kenʼk nakarihwé꞉sonke; aseʼkénh iáh oh thén꞉nen tetsotekhón꞉ni ne tsi shakotiʼterontáhkhwa ne raotitshenenʼó꞉konʼs ne sahnhaʼtsheraʼó꞉konʼs ne tsi wateʼenhrowanén꞉ke tiorí꞉wa natonhkariá꞉kon tsi naʼteiotenonhianíhton ne tsi tionhontsá꞉ien ne Canaan. Ó꞉nen kiʼ kwariʼwanontón꞉nis, sheríhon ne sahnhaʼtsheraʼó꞉konʼs nahontená꞉taien ne tsi ionhontsá꞉ien ne Goshen.”

Genesis 47:6

Ne tsi ionhontsá꞉ien ne Egypt kwáh sahén꞉ton ká꞉ien; shéʼteron ne iaʼníha tánon ne sewatatekoʼokón꞉ʼahs tsi nón꞉we ne kwáh tionhontsí꞉io; sheríhon ratiʼterón꞉tak ne tsi ionhontsá꞉ien ne Goshen; tánon tókaʼ ónhka tsi nihá꞉ti nahotikwénion, sherihón꞉ten nakonwanatenʼnikón꞉raren nakitshenenʼó꞉konʼs.”

Exodus 8:22

Ók kíʼ enkenónsthate nènhne tsi kanakerahseráien ne Goshen, tsi nónwe nihatináhkere nakonhkwetashón꞉ʼa, kwáh káti nènhne nʼotsíʼks iáh thóh tsakonhne. Kwáh kíʼ thóh nénhtiere ne káti nahiʼsaterién꞉tarahʼne tsi Í꞉i, ne Watiá꞉ner, tsi wahtió꞉the né kènʼen ionhwenhtsàte.

Exodus 8:26

“Iáh tetʼkariwahié꞉ri né thóh naʼiáwenhne,” tsi watariwasehráhko ne Mahís, “tsioríwa ne Egyptró꞉nons tsi enthonaʼtiéraʼse tsi enhiaʼkhiʼiatsaʼtáʼtsahate ne konhtitshénens né nʼasakwáʼtatsʼtse Nʼònkwahʼiá꞉ner onhkwaʼNí꞉io. Tó꞉ka né enhiáʼkwasthe kí꞉ken konhtiʼtshénens tánon ahiaʼkiriwahʼientáʼten ne Egyptró꞉nons tsi enhiaʼkihiaʼtsiátatʼtsaʼahte tsi nónhwe nahónton ahionkhíken, kwáh kí enhionkhiʼnenhióhiaʼke tsi enhiaʼkwénheʼie.