Deuteronomy 4:20 - Ohiatonhseratokénti

²⁰ Ók í꞉se kíʼ ne tsónhkwe ne tsi tsiʼsewaniakénton ne Egypt nónhwe, né꞉tho tehiotonʼkwanònhiani ioté꞉kha. Thatsisewahiaʼtínekenhwe natsiʼtsiónhnien ne raónha rahonkweʼtashón꞉a ahisewá꞉ton, tsi ki nónhwa ní꞉ioht nónhwa wenhniserá꞉te.

Deuteronomy 4:20 ပူးပေါင်းရင်းမြစ်များ

1 Kings 8:51

Í꞉se shonkwetaʼshónhas, ronónha ne thetesheʼhiatinekénʼen ne Egypt nón꞉we, ethohʼnónhwe ne tehiotienhanón꞉hiani karístatsi íken.

Psalms 135:4

Asèken ne Roiá꞉ner Jacob rohtonkwetarákwen, ne Israerʼró꞉nons kwáh rahónha rahonkwetaʼshón꞉has í꞉ken.

Psalms 28:9

Ó sehnónstat né shonkwetaʼshónha Saiá꞉ner; tánon sehiathatérist né í꞉se sonhkwetaʼshón꞉has; ʼi꞉se sehiathenhnikonhráhren, tánon sehnikonhraratiések.

Psalms 33:12

Iakotáskats nonkweshón꞉ha rahónha ne Rawenni꞉io Raotiʼiá꞉ner í꞉ken, nonkweshón꞉has ne sakohiatará꞉kwen rahónha kíʼ rahonkwetashón꞉has ronatón꞉hon.

Exodus 1:13

tánon wahonwanonhnáksate tsi tahonwaʼnahnónhtonʼse wahonwanahteniákatsʼtatse tsi wahonwatinaskónhni. Wahonwenhnónhnien nahotihióten nahoténsons kahiotenseráhien ne tsi rotinonhsóhtons tsi ní꞉iot ne tahatisténrote, ó꞉ni ne raotihentàkes, tánon iáh othé꞉nen tekàien ne tahonwanahró꞉ton.

Exodus 34:9

Wahénron, “Saiá꞉ner, tó꞉ka kwáh tókenske serientí꞉ios nakonhàke, Konriwanonhtónhnis nahitewaʼteró꞉shen. Kíʼ onkweshón꞉a ne rotinonhtsistanírons, ók shaʼsanikónhren nonhkwariwahetkénsera tánon nonhkwahriwanerenháktshera, tánon takwahiéna tsi í꞉se shonkwéta akénhake.”

Exodus 6:7

Entsiónhnien í꞉se ne kwáh akonhkweʼtashón꞉ha enkénhake, tánon Í꞉i ne sewahʼNí꞉io enkénhake. Kwáh ensewateriéntarahʼne tsi Í꞉i ne Watiá꞉ner ne sewaʼNí꞉io ó꞉nen enskaniakènthonʼke tsi niʼhietsinaskonhnisʼkwe ne Egypt nónwe.

Isaiah 30:6

Ne tsi niwáton tsi nókwa ne kontitshénens ne Negeb. Thóh tsi ionhontsáien ne teionikonráhrat tánon ionhnikonraronhiákent, né꞉ne otinétsens kénreks tánon ne ratonriá꞉iens kénreks, ne óniare tánon ne kátshes óniare, iehatíhas ne raoʼtikwahséhtseras tsi nihiotíkete ne tewahóntes, tánon ne raonatʼtsiokowátsheras thóh kará꞉tse tsi nihiotinowakwáhronhte ne iotiniaʼkwáhere, rononhàke nonkweókons ne iáh thahatikwéni naʼsakonateriwatsʼterísthase.

Isaiah 48:10

Sewatʼkátho, I꞉i wá꞉hi skwahiathaʼkwahtákwen, ók iáh thóh tewahtieren ní꞉ioht ne kawistará꞉ke aiakóhetste tsi iotékha; wakwahteniénten thóh tsi iotékha ne waterihwentore.

Jeremiah 11:4

Ne ne ateriwahsehronniátshera ne kheʼhionniénni ne sakothisotʼthonkonkénʼen ne ne sahthontatʼkhehiatínekenʼwe ne Egypt, nonhwénhtsia thóh niʼiotónʼne tsi ní꞉ioht ne kwáh tehiotsenhanonhiáni ne rahotiriwáhke. Kheró꞉ri nahionkewénhnarahkwe tánon éhtho nihatí꞉ier tsi niwahkatenná꞉hon. Kheró꞉ri tó꞉ka enhionkewénhnarahkwe, ronónha ne akonhkwetahshón꞉a enhónton tánon Í꞉i ne Raotí꞉io enkénhake.

Daniel 3:26

Sók ne Nebuchadnezzar kanhohákta niahá꞉re ne teioʼthónhkwakwen karístatsi tanon iashakoná꞉ton, “Shadrach! Meshach! Abednego! Etshisewaioʼténhse ne kwáh thoʼsatstenhserowá꞉nen Rawenni꞉io! Tasewaiá꞉kenʼt!” Tánon kwáh óksaʼk tahatiiá꞉kenʼne.

Ephesians 1:11

Oriwakwékon thóh niʼiawén꞉en tsi nihotenikonrónni ne Rawení꞉io ó꞉ni iatehoriwaiéntase; tánon Rawenni꞉io sonkwahiatarákwen ne rahónha rahonkwétha ahkénhake tahionkwateriwasónterake ne Kerístos ne tsioríhwa tsi rahónha ehnihotenikonrónni, neh rokenserákwen tsi nahóten hiatehoriwaiéntase neh kwáh sonthontásawen.

Ephesians 1:18

Kwahnekènʼnis sewanonthonkwenháton ne sewanikonrakésons nahisewatkátho ne rahoswatʼthétsera, nahisewateriéntaraʼne nahóten nen꞉ne neh tewetákwen tsi ietsisewanáton, thóh nihiókwas ne kahiatanerakwátsera kahiataterítseras sakorahrasténʼnis ne rahonkwetaʼsónha,

Deuteronomy 14:2

Roiá꞉ner sewaNí꞉io ní꞉se rahonkweʼtashón꞉as; raónha tsi sewahiatarákwen ní꞉se rahonkweʼtashón꞉as ahisewá꞉ton né꞉ne tsi nihiá꞉kon nonhontsà꞉ke ienákere.

Deuteronomy 26:18

Ón꞉wa wenhniserá꞉te ne Roiá꞉ner watsisewaié꞉na tsi kwáh raónha rahonkweʼtashón꞉as í꞉ken, kwáh ki tsi nitsisewarahratstén꞉ni; tánon tsi sewahró꞉ris akwé꞉kon sewatewénhnarak ne raohianerénhseras.

Deuteronomy 32:9

ók ki ne Jacob tsi nitotwatsirí꞉non raónha nénhne wahathonkweʼtará꞉ko.

Deuteronomy 7:6

Tó꞉ki naʼsewáhier ne tsi Roiá꞉ner sewaNí꞉io ní꞉se rahonkweʼtashón꞉as. Tsi nihiakotióhkwa nonhkweshón꞉as ne tsi ionwenhtsá꞉te í꞉se watsisewahiatará꞉ko ne kwáh ahionkweʼthatokénhake raonkwè꞉ta ahisewá꞉ton.

Deuteronomy 9:26

Tánon ki rahonhà꞉ke ne Roiá꞉ner iakaterénhnaien, ‘O Saiá꞉ner Ní꞉io, tó꞉sa sehiá꞉tont ne kwáh í꞉se shonkweʼtashón꞉a, tsi ronónha sheseniakénhton thóh sashatstenʼserá꞉kon, ronónha tethesehiaʼtinekénhen ne Egypt ne wáshatste ne kaʼshatsténhsera ó꞉ni ne sashatstenhserowaná꞉tshera.

Deuteronomy 9:29

Asè꞉ken ronónha ne kwáh í꞉se shonkweʼtashón꞉as, ronónha ne teteseiaʼtinekénhen ne shátston ne kaʼshatstenhserowá꞉nen ó꞉ni ne sashatstenhserowaná꞉tshera tánon tsi nateshatewehiakaráhwen.’

Titus 2:14

Iehotatatʼkáwen ní꞉i onhkwariwáhke, nahonsahshonkwaniákente ne kwák tsi nahiotónhake ne kariwáksenke tánon nashontiónnien kwáh orihwí꞉io rahónha khók rahonkwetaʼsónha ahitewáhton ó꞉ni kwáh tahionkwasterihénseke ioiánere tsi naitewáhtiere.

1 Tiér 2:9

Nók í꞉se ne kentiókwa ne ietʼtsiʼiatarákwen, ne Ronontí꞉io rahotsihénstatsis, ne otiokwatokénti, ne kwáh Rawenni꞉io rahonkwetaʼsónha, kahiatarákwen nahontʼróri ne ionerakwathénion ne Rawenni꞉io rahoweiénnas, ietsisewennónkon tsi tetiókaraskwe tánon thonónwe nonsatsisewátʼkawe ne ioriwanerákwat raoskwatetʼtserákon.