Daniel 8:24 - Ohiatonhseratokénti

²⁴ Enhaʼshátstenʼne, nok iáh ki raonháʼak raoʼshatsténhsera thakénhake. Tenhatenónianihʼte tsi enshakokaronniánion nonkwehshón꞉ʼa ó꞉ni kwáh enhoianeráhsten tsi nahoʼténshon enhaterihwahténtiaʼte. Enshakoʼwéntho ne ronnonkweʼtowá꞉nenʼs ó꞉ni ne kwáh Rawenni꞉io raonkweʼtaʼshón꞉a.

Daniel 8:24 ပူးပေါင်းရင်းမြစ်များ

Psalms 37:35

Énska riʼienterínhe ne roriwahneraʼákskon kwáh íken tsi raniakátstekwe; tánon kwáh ratikwékon niesakoneiakénhnion tsi ní꞉ioht ne onentakwénte ne Lebanon tsoterontónni;

Daniel 11:23

Tsi enhaterihwahseronniánion enhshakoʼnikonhrhá꞉ten ne tehontonhontsanekhánion, tánon sénha enhashátstenʼne, iaweronhátien tsi kenʼk nihaonhóntsa tsi nón꞉we nihotkoráhston.

Daniel 12:7

Ne raronhiaʼkehró꞉non tetsá꞉ron tsi wahanentshakétsko tánon karonhiá꞉ke niahaié꞉raʼte tánon kwáh orihwiioʼón꞉we waharháratste eʼtho raosén꞉nakon ne ronhnheʼón꞉we Rawenni꞉io. Onkathón꞉teʼne tsi wahén꞉ron, “Áhsen niiohserá꞉ke tánon tsiaʼtewasén꞉nen. Né nó꞉nen ienwatókten tsi nihonwatironhiakéntha ne Rawenni꞉io raotióhkwa, kwáh kiʼ orihwakwé꞉kon ó꞉nenk tsi tho neniá꞉wenʼne.”

Daniel 7:25

Kwáh enhoriwá꞉roʼse ne Roʼshatstenhserowá꞉nen Rawenni꞉io ó꞉ni tenhshakoʼnikonhkáriakte ne Rawenni꞉io raonkweʼtaʼshón꞉ʼa. Enhateʼniénten ne tahatá꞉ton tsi nikaianerenhseró꞉ten ne raotirihwiiohstónhtshera ó꞉ni tsi ní꞉ioht tsi tehontenónwerons, tánon ne Rawenni꞉io raonkweʼtaʼshón꞉a raónha raoʼshatsténhsera enthotiʼniarotárhoke né ne áhsen shaʼtsewahsén꞉non niiohserá꞉ke nenkarihwéshon.

Daniel 8:10

Kwáh iaʼtekaié꞉ri tsi wakasátsteʼne né iaiaʼkotiaʼtón꞉ti ne Rawenni꞉io raonhatsheraʼó꞉kon ne karonhiaʼkékha ó꞉ni né kwáh tsi ioʼtsistóhkwarónnion tánon ó꞉tiaʼke watiakaʼonhontsó꞉ienhte tánon waʼtiakohskwaʼserónkwahte.

Daniel 8:11

Kwáh ó꞉ni wahonenhró꞉thaʼse ne thentiohkwakweʼní꞉io ne karonhiá꞉ke né ne Rawenni꞉io, waʼthátaste naterennaientátsera ó꞉ni tsi konwatiaʼtatsaʼáhtha ne katshé꞉nen né ronwatienʼkwaronniaténnihskwe né Rawenni꞉io, ne niaʼtewenhniserá꞉ke, ó꞉ni kwáh eʼtho tsi naʼhentáksahte ne tsi ionterennaientáhkhwa.

Daniel 8:12

Ne onkwehshón꞉ʼa tsi ní꞉ioht né aterennaienthatserá꞉kon tsi akonwatiaʼtátsaʼahte ne katshé꞉nen nahontienkwarónniate tsi nihotirenʼnaʼòn꞉nen niaʼtewenhniserá꞉ke, kek tho nón꞉we nihsatirihwanérakskwe, tánon nʼetho onà꞉kare ehtà꞉ke wahó꞉ti ne kwáh orihwiioʼón꞉we né karihwiióhston. Ne onà꞉kare kwáh thiewakwé꞉kon tsi ioianerahsténniskwe tsi naʼká꞉iere.

Daniel 8:23

“Ne nó꞉nen ákta én꞉we ne iahontókten ne tho tsi kanakerahseraké꞉ron tánon eʼtho niió꞉re tsi rotirihwanerenʼákskon kwáh káti ioterihwíson nahonwatihréwahte, kwáh káti eʼtho tsi nenhokonsaníronke, enronkweʼtaksénhake, enhanikonhràtake ne ronnontí꞉io.

Revelation 16:6

tiorì꞉wa tsi sakotinekʼkwáhton ne rotiiatatokentískwe ó꞉ni rotitokenséhakwe, í꞉se tesheiá꞉wi nonekwénhsa ahatinekí꞉ra. Eʼtho senateonathéntion!”

Revelation 17:17

Asè꞉ken Ní꞉io iateoriwaientáse ne rawerhiá꞉ne ne thóh nakaiéren tsi nihotenikonrónhni tsi roriwanonwéhon nahontasaká꞉wen ne raotinontiió꞉tsera raonhà꞉ke ne katsinonhiowá꞉nen, tsi niió꞉re ne raowenhnaó꞉kons ne Ní꞉io kwáh iewatésha.

Revelation 17:6

Tánon wák꞉ken né꞉tho iónkwe tsi ne iononwarathónton ne raotinekwénhsas ne rotiiatatokéntis ó꞉ni raotinekwénhsas ne rotiriwatokénʼne rahonhà꞉ke ne Ié꞉sos. Nó꞉nen sák꞉ken, ní꞉i teiotenonhiá꞉niton tsi onkeriwanerá꞉ko.

Revelation 19:2

asè꞉ken ne raoriwenhtá꞉tshera orihwí꞉io í꞉ken tánon tkariwaié꞉ri; raónha rariwénhton ne kashennowá꞉nen wathokótha aónha iohetkénton tsi ionwenhtsá꞉te ne ióston naówenk kentétsera, tánon ne rarehwathákwen tsi iakokonwarhakhónhnion ne raonnhatseraó꞉kons.”