Amos 3:14 - Ohiatonhseratokénti

¹⁴ Nentewenhniserá꞉teke nó꞉nen enkhehré꞉wahte ne Israerʼró꞉nons ne ne raotirihwaneraʼáktshera entkarihón꞉ni, kwáh enkerihwáhtonʼte ne ietsenhahráhkhwaʼs ne Bethel, kwáh tsi ní꞉kon tekahiohsaké꞉ronʼs akwé꞉kon ne ietsenhahráhkhwa kwáh kiʼenkaiá꞉khonke tánon kwáh ohontsá꞉ke ienkaièn꞉taʼne.

Amos 3:14 ပူးပေါင်းရင်းမြစ်များ

2 Kings 23:15

Ne Josiah kwáh ó꞉ni saharihsónhko tsi nonʼwé꞉sons nihonterénhnaiensʼkwe ne Bethel nón꞉we, Né꞉ne Ronnontí꞉iokwe Jeroboam rosahánionkwe né꞉ne roienkénʼen ne Nebat, rahón꞉a iesakosaríhnon Nisraeʼró꞉nons ne karihwanerahakʼtsherákon. Ne Josiah waʼharihsónko ne ietsienharákwahs, kénʼk ní꞉wahs tsi watharihthánion, tánon okènra iahón꞉ton; kwáh ó꞉ni wahát꞉tsahate tsi kaiátare ne Asherah.

2 Chronicles 31:1

Shiaʼhontókʼten ne katkhwárahkwe, onhkwetaʼkwé꞉kon Nisraeʼró꞉nonke kwáh tsi niaʼtekaná꞉takes né Judah nonhtahónneʼte tánon waʼthatirihthánions nonénhias kanawahathóthonhkwes, tahón:tahasenhthánion tsi kahiatarónh꞉nions ne kaní꞉io Asherah, tánon waʼthatirihtánions ne ietienharáhkwahs ó꞉ni tsi nonwéhsons ne kahiatonhnisónhas konwasennaienhthákwas. Kwáh ó꞉ni éhtho nahatiʼieráhnion tsikʼnonwéhsonhs ne Judah nón꞉we, tánon ne kanakerahseráhkons ne Benjamin, ó꞉ni ne Ephraim, tánon ne Manasseh; ethóhʼne kíʼ ó꞉nen ratikwé꞉kon sahonhténhti.

Exodus 32:34

Wáhs kíʼ ó꞉nen, sehhéntes nonhkweshón꞉ʼa né tsi tewatenáhtaien tsi ní꞉ioht tsi konhró꞉ri. Sehiárak akeronhiaʼkerónonh enhiaʼhéntenhse, ók ienkáhewe nónen kwáh enkheréwathe kí꞉ken onhkweshón꞉ʼa tsi nihotiriwáneren.”

Amos 2:8

Enhontiaʼtión꞉nite ákta ne ietsenhahrahkwà꞉ke ne ronatsheronniá꞉ton ne iakotenhténion shakotíhkhwen ne iakotkaraientahkwèn꞉ne; tánon tho raonónhskon ne raotiní꞉io rotihnekí꞉ren nonenharákeri ne rotihninón꞉ton tsi nihshakotikaraièn꞉ni.

Amos 4:4

Kats Bethel nontá꞉se—tánon serihwanéraʼk; eʼthó꞉ne Gilgal nionsá꞉se—kwáh tontasatnaʼnetárion tsi iaʼserihwanéraʼk; táshaf ne sarihwiiosehokón꞉as niaʼteiohrhonʼkehtserá꞉ke, tsi nentéhsheste tió꞉konte nenʼne ʼeh nahsénhaton niwenhniserakéhaton;

Amos 7:10

Ethò꞉ne ne Amaziah, ne ratsihénstatsi kénhne ne Bethel nón꞉we, iahoterihwaniétase ne Ronnontí꞉io Jeroboam ne Israerró꞉nonhke, ratónhnions, “Ne Amos roteʼnikonronníhaties ne kariwahetkénhsera tsi nokwáh ní꞉se kwáh raotinenhrí꞉hen nonkweshón꞉as Nisraeró꞉nonke; nonkweshón꞉as iáh taiekwé꞉ni nahonwarihwáiakse tsi niwé꞉so ne raowenhnashón꞉as kwáh kí enkanakeraserénto.

Amos 7:13

Ók tóh꞉sa shé꞉kon nonhwén꞉ton niahonsaserihwáken ne Bethel nón꞉we, asè꞉ken Ronnonhtí꞉io raononsatokentihkó꞉wa í꞉ken, tánon ne nahonhnonsatokentihkó꞉wa ne tsi kanakeráhsera.”

Amos 7:9

Ne tsi ionhnontarónhnions tsi nón꞉we ne Isaac raowá꞉tsires nihonterenhnaientáhkwa kwáh ki enkarihwentʼtonhke, tánon ne raotinonsatokentikowátʼtions nʼIsraerʼró꞉nons kwáh ki eʼtake enwatiónke, tánon kwáh kí iekehiatsiatónhti ne rahonkweʼtashón꞉as ne Jeroboam asareʼkó꞉wa én꞉katste.”

Amos 9:1

Wahí꞉ken ne Roiá꞉ner ákta í꞉rathe ne tsi ientsienharáhkwake, tánon wahèn꞉ron: Sewaientanion ne tsi karasestánion ne eʼnékens tsi kanawaható꞉tons nononsatokentikówane tsió꞉re ne tsitkenskwáhere enwatoriáneron, tánon thóh iatewát꞉toko ratinonhtsiné꞉sons nonkweshón꞉as; tánon tsi nihá꞉ti ne iathenhonátatere kwáh kí enkenonwarià꞉kon asareʼkó꞉wa enkátsʼte; iáh ne saiá꞉ta tahatéko, iáh ne saiá꞉ta tahaniá꞉kenhne.