Amos 2:4 - Ohiatonhseratokénti

⁴ Ne katíʼ aorí꞉wa ne Roiá꞉ner rá꞉ton: Asè꞉ken áhsen nieioterátston iorihwaneraʼáts꞉kon ne Judah, tánon ne kaieríhaton, kwáh ki nenhnè꞉e iáh thaʼtaonsonkaterihwaténien ne kahrewahtáhtshera; tiorí꞉wa tsi wahatikèn꞉ron ne raoianerénhsera ne Roiá꞉ner, tánon iáh tehonatienawáhston ne raorihonnienníhtseras, ók ne wahonathaharákwahte ne kwáh ne shá꞉ka nonó꞉wens tsi ní꞉ioht ne shakotihsothonkonhkén꞉en rotiioʼtén꞉ʼen.

Amos 2:4 ပူးပေါင်းရင်းမြစ်များ

2 Kings 17:19

Shé꞉kon kíʼ nón꞉ne ne Judahró꞉nons iáh tehonatewenhnaráhkwen ne Roiá꞉ner rahoianerénhseras ne Raotiní꞉io; né thontahontenienténste tsi nikarihó꞉tens tehonékwen nonkweʼshón꞉ʼas Nisraeʼró꞉nonke.

2 Chronicles 25:14

Nó꞉nen ká꞉ti ne Amaziah sonhsáraʼwe tsi shakosenhnionhátie ne Edomró꞉nons, taʼhahá꞉sheron ne raotiʼiatonhnisónhas, waʼhanionhthónhnion, né washakosenhnaiénthakwe, tánon waʼshakoktiaháthaʼse ne kanethanórons.

2 Chronicles 30:7

Tó꞉sa thóh niʼiohtónhak tsi ní꞉ioht ne ietsisotʼthonkonhkénʼen tánon ne Israerʼró꞉nons sewathátenonkwes né꞉ne iáh tehotirihwatókenhne rahonháke ne Roiá꞉ner Sewaní꞉io í꞉ken. Tsi kíʼ nisewatkáthos, kwáh í꞉ken tsi sakorewáton.

Nehemiah 1:7

Thóh nihionkwahtshéren ne karihwahetkénhsera tsi nokwáh ní꞉se; tánon iáh tehionkwatienawáston ne karihwatatʼtsheras khehs ne kahianerénhsera khéhs ne kahiatorehtháhtshera ne ní꞉se tsi nitsró꞉rih ne Mahís, ne sanhá꞉tsera.

Nehemiah 9:26

“Ók iáh tehontewenhnaráhkwa tánon rotinontsistahní꞉ron tsi nokwáh ní꞉se tánon í꞉se iehonátses ne sahianerénhsera thóh ratishón꞉ne tánon sakotinonwarhiaʼkhónhnion s rotitokenséhakwe né꞉ne ronónha rotirihwaní꞉raton tsi nokwáh ne ronónha ne nahónton tahonsahontkarahté꞉ni isé꞉ke niahonsahón꞉ne tánon tsi nihonahtié꞉ren kowá꞉nen rotirihwaiesá꞉ton.

Isaiah 28:15

Tsioríwa tsi í꞉sewenh, “Iontsiónhni ne aterihwaseronhniátshera skát꞉ne ne kenhé꞉ion, tánon ne tsi tsiohontsáien ne kenhéion ionkwaienʼnateriwasehronhniátshera; nó꞉nenh ne teiotenonhianíton karehwatátshera iatenhiót꞉kaʼwe kwáh iáh kíʼ tahionkwahiatórenhne; asèken ionkwanhowènton nonkwané꞉tshera, tánon thóh onowénhtake nón꞉we iehionkwataskwáhereh”;

Isaiah 44:20

Né ranón꞉tens né wakenronʼtákwen; né kanikonraʼtátshera onikónra né wahotʼthaharákwahte, tánon iáh thaʼhakwéni nahatatenónsthate khés nahénron, “Iáh kén kí꞉ken nahó꞉ten niʼkháwe ne tsi kaweientethá꞉kwen kanikonrá꞉ton í꞉ken?”

Jeremiah 16:11

Ethóhʼne káti iettsiró꞉ri nètho Roiá꞉ner ráhwen, ‘Iettsisotʼthonkonhkénʼen hionkatkarahthénion tánon wakonhwathisénnaien ó꞉ni wakonhwathihiótenseh ne thikontíthe niʼiohokónhas. Wahonkatewénhthete tánon iáh tehonahtewenhnaʼráhkwenh naʼkerihonniennítsheras.

Jeremiah 16:12

Ók káti sénha i꞉se wahétken tsi nisehwatiéren tsi ní꞉ioht ne ietʼtsisotʼthonkonkénʼen. Kwáh sehwakwékon tsi sewaʼnontsisthaníron tionkwetahétken, tánon iáh teskwahwenhnaráhkwah.

Jeremiah 17:27

Ók ónenk tsi enhionkewénhnarahkwe tánon enhatikwéniensʼte ne tsatákhaton nónhta ne tsi iawenhthatokénti. Kwáh iáh tehiówenhk ne thènenh ahathikaréni ne iorhiénatsthe ne tahonnhóhetsthe tsi iotenhenrahkáronthe ne Jerusalem né nenhwenhniseráhteke, asèken tó꞉ka éhtho nenhatíhiere, kwáh enkahté꞉kaʼthe ne tsi iotenhenrénton ne Jerusalem. Enwahtenonhkwentsahatónhake tsi rotinonhsóhtons ne rontinonhtí꞉ios ne Jerusalem, tánon kwáh iáh ónhka thahiekwéni nahiónswahthe.”

Jeremiah 6:19

Shathahónsahtat, onhwénhtsia! Né꞉ne kahrewahthátsheras norihwahkwékon tsi nihonahtenikonhrónni takháwi ne kahkaronniátshera rononháke kí꞉ken onhkweshón꞉ʼa, tsioríhwa tsi wahathikénron nahkerihonniennítshera tánon iáh tehonahtewenhnaráhkwen nakewénhnas.

Jeremiah 8:2

Tsi ní꞉ioht nakaró꞉ronhke tánon akahiathátenhke, ne raotiʼstienhokónhas thóh nenhʼhiothónhake tsi ní꞉ioht ne óhtha iakonhonsahresensthákwah onhwenhtsiáke kahkéhron. Tánon tsi tenhwahrehniáthonke thóh tsi iohráhkhothe, tánon ne asontʼténhnekhe karáhkwah, tánon ne tsi iotsistokwahrónʼnions, né kí꞉ken nonhkwehshón꞉a ienonhrónhkwahkwe tánon ne tahieriwásniehʼne, tánon ne konhwaterihwaiénhnisʼkwe ó꞉ni konhwathisénhnaiensʼkwe.

Jeremiah 8:9

Ne tionkwetahshón꞉a ne rontenikonhratʼthókha kwáh enhonwanahtéhaʼte; tehonahnithonniénni tánon rothihiathotaréhon. Rothikenronníhon nakewenhnaʼsónhas; nahó꞉ten ónenh rothí꞉ien ne kanikonhrowahnáhtshera?

Jeremiah 9:14

Khékok, ronahtenontsistahniʼráton tánon konwahthiʼsénnaien ne kahiatonnishón꞉a ne Baal ne tsi nihonwatirihonniénni ne sahkothisotthokonkénʼen.

Ezekiel 13:22

“Tsi nishanhówenhs watesehhianikonhrhiátʼten ne tionkwetaiéris, tsi nikáien ne iáh tèkereh nakhekaréwahte. Tesehtástha ne iakonhkwetahétken nahónkʼkaʼwe ne kariwahétken tánon tsi ahathinónhsthate tsi ronónhnhes.

Ezekiel 20:13

Ók ki shé꞉kon ki ó꞉ni ne kahentakekowa wahontsenhnaksate. Wathá꞉tihiake natianerensehras tánon wahatikenron nakeriwahtátʼtsheras, né꞉ne tkáhas natónhnhets nónhka enhiontewénhnarahkwe. Kwáh í꞉ken tsi iáh tehotikweniénston nawenhtatokéntike. Kwáh wakathateweiennenhtáhonʼne nahóntʼtoʼke ne kashastsʼtenseranánon nakenahkwáhtshera thóh ne kahentakekówa tánon akhehiathónton.

Ezekiel 20:16

Wakaráhratsʼte tioríhwa tsi wahatikénronh nakeriwahtátʼtsheras, wathatíhiake natianerénhsehras, ó꞉ni wahathihétkente nawenhtatokénhtike—ne tahathiráhko né akonhwathisénhnhaien ne kahiatonhnisónhas.

Ezekiel 20:18

Khèkok, wakheronhkáten ne kén nithotihiónsa ne skátke rahtináhkereh: Tó꞉sa sehwateweiénhthon ne kaianerénsehrah ne ietʼtsisotʼthonkonhkénʼen rothíson; tó꞉sa sehwáhser ne raothiriwahkáhion tó꞉sa ó꞉ni ne tesewahthatsatátions ne raothihiatonhnisónhas akarihónhni.

Ezekiel 20:24

Ne kíʼ aoríwa tsi étho nátiere ne tsi rothikenronhníhon nakeriwahtátʼtsheras, tehothihiákonh natianerénsehras, rothihetkénton nawenhthatokéntike, tánon kwáh ne sahkahiathonhnísehra wakonhwathisénhnaien tsi ní꞉ioht ne sakotisotʼthonkonhkénʼen.

Ezekiel 20:30

Ónen ietʼtsiró꞉ri ne Israerʼró꞉nons tsi nahó꞉ten katónhnions: Nonhtiéren tsi né kwáh ethohʼní꞉ioht tsi ahisehwariwáhnerahke tsi nihotiʼiéren ne ietʼtsisotʼthonkonhkénʼen tánon ne wahitsísehre ne raothihiatónhnis?

Ezekiel 22:28

Ne rotitó꞉kense rothiriwahséhton kí꞉ken kariwahneraháktsheras tsi ní꞉ioht ne rathináhtsheras kentarahkeríthon rahthinékaros nasonhtáke. Rontkátos ne iáh tó꞉kenske tèken tánon onówenh tsi iehatiriwáhkens. Rónhton tsi ronhtátis ne꞉ne raowenhnahókonhs ne Ronhnontí꞉io Roiá꞉ner, ók Í꞉i, ne Watiá꞉ner, kehʼtharáhri.

Ezekiel 22:8

Waskénron ne iotokéntis nakawenhsónha, tánon iáh tesenhtanorónhston nawenhthatokentíke.

Hosea 12:2

Ne Roiá꞉ner ró꞉ien nasakorihwáro ne Judahró꞉nons; tánon ó꞉ni enhoré꞉wate ne Jacob ne entsoianénhawe tsi nihaweienó꞉tens, tánon ne enshokariákten tsi nihahiothenseró꞉ten.

Hosea 12:3

Ethò꞉ne tsi watewiraráhkwa wahateʼnién꞉ten ne tahonatákwen ne iatateʼkénha Esau, tánon ó꞉nen rónhkwe sihotónhon Rawenni꞉io wahiaterí꞉io.

Hosea 6:11

Asè꞉ken kwáh í꞉se ó꞉ni, O Judah, nenhsehshientwá꞉ko wenhniserará꞉kwen. Nó꞉nen ensetkwahtá꞉ko ne raonateraswí꞉iotseras nakonkweʼtashón꞉a,

Amos 1:3

Ne kí꞉ken aorihwá꞉ke ne Roiá꞉ner rá꞉ton: Aseʼkénh áhsen nieioterátston iorihwanéren ne Damascus, tánon ne kaieríhaton, kwáh kíʼ nenhné꞉eh iáh thahonsonkeʼnikónhren ne kahrewahtáhtshera; tiorí꞉wa waʼkonhwahwá꞉ʼekte ne Gilead ne wáhontsteʼ ne iehwaʼéktha ká꞉sere karístatsi nahó꞉ten ionniá꞉ton.

Amos 3:2

Tsonhá꞉ʼa khok kwaienterí꞉ne ne tsi niiehwatsí꞉ra tsi ionhontsá꞉te; kwáh ká꞉ti enkwahré꞉wahte tho í꞉kare akwé꞉kon ne sarihwaneraʼáktsheras.

Micah 6:12

Ne raotikwahtsénions kwáh titkáhere ne iáh othé꞉nen teioianerés; ne skátne sewanakerénion rotinó꞉wenhs, ne nawenhná꞉sons ne kanikonrá꞉tha ne tsi ratisaká꞉rontes.

Habakkuk 2:18

Nahó꞉ten nenhné꞉e karihwásta ne kahiatón꞉ni rónkwek khok nenhné꞉e tihóshon, karístatsi khés oiénhte nahó꞉ten rahonhniáton, iehiokonhtákwenh nenhné꞉e sanowenhténhnis? Nahó꞉tenh nenhné꞉e kástha ne ró꞉shon né꞉ne ahontaré꞉takwe, né꞉nenh ne enrón꞉ni ne iáh tewatá꞉ti kahiatón꞉ni!

Romans 1:25

Ne tehontathawísta ne Rawenni꞉io rahoriwakwarishióntsera ne ohnhówen; neh konwasénʼnaiens tsi nahoténsons ne Rawenni꞉io rohsahánion tsi ní꞉ioht neh raónha ahonwasenʼnaien tsi nikáien neh kwáh raónha rohsahánions, neh꞉ne raónha ahonwasénʼnaien tsi nénwe! Éhʼtho naiewen꞉ne.

1 Thessalonians 4:8

Kwáh káti, nónka neniekénron kí꞉ken karihonniennítsheras iáh seh ónhkwe tahonwahkénron, nok Rawenni꞉io, tsi rahónha thiʼáwis ne Raonikonratokénti.

1 Tiér 1:18

Asèken sateriéntare tsi nahóten kahkariák꞉ton tsi tsiʼsatatewenniʼió꞉on tsi ní꞉iáh thènen tekásthakwe tsi niʼiotónne tsi iakónnhekwe ne tsi nitiesáwi ne sehsotʼtonhonkonkén꞉en. Iáh neh tèken nahónton akariwathónton, kwáh neh satetionátʼthe ne kawistaráken tánon ne owistanóron;

Judges 10:6

Shé꞉kon kíʼ á꞉re nʼIsraerʼró꞉nons sahatirihwánerake tsi nòkwah ne Roiá꞉ner tsi konwatisénhnaiens ne Baal tánon ne Astartes, kwáh satehioiánere tsi ní꞉ioht tsi konhwatisénhnaiens ne Syria ahoniʼiohokónhas, ne Sidon, ne Moab, ne Ammon, ne Philistia. Wahonwatiathonhthákwahse ne Roiá꞉ner tanon wahóntkaʼwe tsi ronhwasénhnaiens.