Amos 2:1 - Ohiatonhseratokénti

¹ Né kí꞉ken aorihwá꞉ke rá꞉ton ne Roiá꞉ner: Asè꞉ken áhsen nieioterátston iorihwanéren ne Moab, tánon ki ne kaieríhaton iáh nenhnè꞉e thaʼtaonsonkaterihwaténien ne kahrewahtáhtshera; tiorí꞉wa tho niió꞉re tsi wahonwatiaʼtátshaʼahte kenʼtarakeríhton iahón꞉ton ne raostsienʼshón꞉as ne ronnontí꞉iohkwe ne Edom.

Amos 2:1 ပူးပေါင်းရင်းမြစ်များ

2 Kings 3:9

Káti ne Ronhtinonhtí꞉io Joram ó꞉ni ne ronhtinonhtí꞉ios ne Judah ó꞉ni ne Edom wathontáhakwe. Nó꞉nen tsáta nónhta shiʼhonhthahíneʼe, wahontʼnekókʼthen nonèkanos, tánon káti iáh othènen tetsothathénhron né ronhnónhkwe khés ne konhtitshénen rahotirihwàke.

Proverbs 15:3

Roiá꞉ner tehaká꞉nere tsi niiá꞉wenʼs tsik nón꞉we, tetehshonkwaká꞉nere tsi nitewatiéhrha tókaʼ kenh tkariwaié꞉ri tókaʼ ó꞉ni tewarihwanérakʼs.

Isaiah 11:14

Ók kwáh kí iathenhonhnitiónkwahʼkwe ne ratiʼhnenhshá꞉kes ne Philistines ne tsiʼiatewatʼtsénthos nón꞉we, enthonthénroʼwe nasakotiʼnenskwenháton nonkweshón꞉has ne tsitʼkarakwínekens ratiʼnakeré꞉nion. Kwáh iaʼthenhonhnentsáthaʼte rononhàke ne Edom tánon ne Moab, tánon ne Ammonró꞉nons enhonwatiʼwénhnaraʼkwe.

Isaiah 16:6

Hionkwahrihwáronhke tsi nikanáʼie ne Moab —tsi nió꞉re tsi ratatónhni!— né tsi niʼhatatkowánen, raná꞉ie, tánon rohianerenhserát꞉sen; tsi naʼtehathaterenhshá꞉rons iáh tókenske tèken.

Isaiah 25:10

Asèken ne ratsanàke ne Roiá꞉ner kwáh enká꞉rane kí kénhen ionónte. Ne Moabites kwáh enhonwatiʼratatsiéson tsi nón꞉we nihotinákʼte tsi ní꞉ioht ne kawá꞉he ieráthatses tsi iehiakotsetákwah.

Amos 1:11

Ne kí꞉ken aorí꞉wa Rá꞉ton ne Roiá꞉ner: Asè꞉ken áhsen nieioterátston iorihwanéren ne Edom, tánon ki ne kaieríhaton, kwáh ki nenʼneʼeh iáh thaʼtaonsonkaterihwaténien ne karewahtáhtshera; tiorí꞉wa tsi aʼshareʼkó꞉wa wáhonste tsi wahonwanató꞉rate ne rontatekoʼokón꞉as tánon akwé꞉kon wahatirihwáhtonʼteʼ natanitèn꞉ron; onterihwató꞉kenhste tsi wahatháwa ne raonaʼkwáhtshera tánon iáh nonwén꞉ton tshaʼtetsoientá꞉ʼon.

Amos 1:13

Ne ká꞉ti aorí꞉wa Rá꞉ton ne Roiá꞉ner: Aseʼkénh áhsen nieioterátston iorihwanéren ne Ammonró꞉nons, tánon kí ne kaieríhaton, kwáh ki nenʼneʼeh iáh thaʼtaonsonkaterihwaténien ne kahrewahtáhtshera; tiorí꞉wa tsi thaʼkonwatiiaʼtaratsón꞉ko ne kontinekwenʼtàkeʼs ne konnón꞉kwe ne kontíhawe naiotiwiraièn꞉taʼne ne Gilead nón꞉we ne naón꞉ton ahatikó꞉wanahte ne raotinakeráhsera.

Amos 1:3

Ne kí꞉ken aorihwá꞉ke ne Roiá꞉ner rá꞉ton: Aseʼkénh áhsen nieioterátston iorihwanéren ne Damascus, tánon ne kaieríhaton, kwáh kíʼ nenhné꞉eh iáh thahonsonkeʼnikónhren ne kahrewahtáhtshera; tiorí꞉wa waʼkonhwahwá꞉ʼekte ne Gilead ne wáhontsteʼ ne iehwaʼéktha ká꞉sere karístatsi nahó꞉ten ionniá꞉ton.

Amos 1:6

Ne kí꞉ken aorihwá꞉ke Ne Roiá꞉ner rá꞉ton: Aseʼken áhsen nieioterátston iorihwanéren ne Gaza, tánon kí ne kaieríhaton naorihwaneraʼáktshera kwáh kí nenʼneʼeh iáh thaʼtaonsonkaterihwaténien ne kahrewahtáhtshera; tiorí꞉wa tsi wahonwatiié꞉na tsi wahonwananakerákwahte kwáh ratinakerahserakwé꞉kon, né niahonwanahtsakwahríhshien ne Edom nón꞉we.

Amos 1:9

Ne kí꞉ken aorí꞉wa ne Roiá꞉ner rá꞉ton: Aseʼken áhsen nieioterátston iorihwanére ne Tyre, tánon ne kaieríhaton, kwáh ki nenʼneʼeh iáh thaʼtaonsonkaterihwaténien ne kahrewahtáhtshera; tiorí꞉wa tsi kwáh ratinakerahserakwé꞉kon tsi iehonwanahtsakwaríhshion ne Edom nón꞉we, tánon iáh teshonné꞉iahre naterihwahseronniáhtshera ne ateró꞉sera rotíhson.

Amos 2:4

Ne katíʼ aorí꞉wa ne Roiá꞉ner rá꞉ton: Asè꞉ken áhsen nieioterátston iorihwaneraʼáts꞉kon ne Judah, tánon ne kaieríhaton, kwáh ki nenhnè꞉e iáh thaʼtaonsonkaterihwaténien ne kahrewahtáhtshera; tiorí꞉wa tsi wahatikèn꞉ron ne raoianerénhsera ne Roiá꞉ner, tánon iáh tehonatienawáhston ne raorihonnienníhtseras, ók ne wahonathaharákwahte ne kwáh ne shá꞉ka nonó꞉wens tsi ní꞉ioht ne shakotihsothonkonhkén꞉en rotiioʼtén꞉ʼen.

Amos 2:6

Né katíʼ kí꞉ken aorí꞉wa ne Roiá꞉ner rá꞉ton: Asè꞉ken áhsen nieioterátston iorihwanéren ne Israel, tánon ki ne kaieríhaton iáh nenʼneʼeh thaʼtaonsonkaterihwaténien ne kahrewahtáhtshera; tiorí꞉wa tsi shakonatenhní꞉nons ne tionkweʼtaié꞉ris kahwistará꞉ken ronwatikariákʼtén꞉nis, tánon ne iakotenhténion tsoiá꞉na áhta neʼ tehontatawístha tsi shakonatenhní꞉nons—

Micah 6:5

O akonkweʼtashón꞉as, sasewehiáran ó꞉nen tsi nahó꞉ten ne Ronhnontí꞉io Balak ne Moab sakotenikonrá꞉wi, tsi nahó꞉ten ne Balaam ne roiénha ne Beor waʼthorihwaʼserá꞉kwahse, tánon tsi nitsawénhen ne Shittim tsi nió꞉re ne Gilgal, ne nahónton ahisewahterienʼtá꞉rahne ne iakonónstats rahoiaʼtaterí꞉tsheras ne Roiá꞉ner.”