Amos 1:3 - Ohiatonhseratokénti

³ Ne kí꞉ken aorihwá꞉ke ne Roiá꞉ner rá꞉ton: Aseʼkénh áhsen nieioterátston iorihwanéren ne Damascus, tánon ne kaieríhaton, kwáh kíʼ nenhné꞉eh iáh thahonsonkeʼnikónhren ne kahrewahtáhtshera; tiorí꞉wa waʼkonhwahwá꞉ʼekte ne Gilead ne wáhontsteʼ ne iehwaʼéktha ká꞉sere karístatsi nahó꞉ten ionniá꞉ton.

Amos 1:3 ပူးပေါင်းရင်းမြစ်များ

1 Kings 19:17

Nónhka ahiontèko né tó꞉sa ashakononhwarhiákon ne Hazael kwáh kíʼ nènhne Jehu enshakononhwarhiákon, tánon ónhka ahionhteko ne tó꞉sa ne Jehu ashá꞉kononhwarhiakon kwáh ki nènhne Elisha enshá꞉kononhwarhiakon.

2 Kings 13:3

Káti ne Roiá꞉ner waʼsakonákwahse Israerʼró꞉nons, tánon waʼhoríhon ne Ronnontí꞉io Hazael ne Syriaró꞉non tánon ne roʼiénha Benhadad né kwáh tiókonte tsi ashakosénhniensehke Israerʼró꞉nons.

2 Kings 13:7

Né Jehoahaz iáh kíʼ othènen tesahonkwetaʼiénthakwe ne ronterí꞉ioskwe nek khók ne wísk-niwásen niháti ne rotisátens ronterí꞉ios iateshonathaténhron, oiéri nikaserétakes otsónkwahs, tánon oiéri tewenhniawehetsherásen niháti ne také꞉sons nienhónhne tsi ní꞉ioht tsi ronhterí꞉ioskwe, tsoríhwa ne Syriaró꞉non ronontí꞉iokwe tsi ratikwékon sakotónhton ne ronátiakes, tánon tesakoskwáhseron tsi ní꞉ioht nokénhra.

2 Kings 16:9

Né Tiglath Pileser, tsi watorihwaserákwahse ne Ahaz; iahanénhrihne ne raoʼtsiókwah ne ronterí꞉ios niasakotiatónhti ne Damascus, wahaiéna kíʼ, wahononwariákon ne Ronnontí꞉io Rezin, tánon nonkweʼshón꞉as Kir nón꞉we niashaʼkoiaténhawe tsi washakonóton.

2 Kings 8:12

“Onʼnontiéren tsi tesaséntʼthos, sénshie?” ne Hazael waharihwanónton. “Tsioríhwa tsi wakateriéntare tsi niwahét꞉kens tsi nenhseiérase nonkweshónʼas Nisraeʼró꞉nonke,” ne Elisha watharihwaseráko. “Entsirotónhnion ne watenhenró꞉tons, enseiawenhthóʼseron ne kén nithotiʼiónsas, ensenonwenhserário ne sakotihiohokónhas tsi nióre ienhonhníheʼie, tánon ensehiataratsónko ne rahonathonwisenhtseraʼsónhas ne kontíhawe nahiotiwiraiéntaʼne.”

Job Tánon ne Raoronhiakensera 19:3

Kí óié꞉ri nihiorì꞉wake ne washonhniáte naskeʼnikonrakaré꞉wate; iáh ken tesewatéhens tsi niskwahnowenhtanión꞉ni?

Job Tánon ne Raoronhiakensera 5:19

Kwáh enhiaiatanónsthate ne iá꞉iak nihiorì꞉wake ahisateraskwáksenhne; ne tsatá꞉khaton nienwatéraste iáh thaóthen ne kakaronhniá꞉tshera tiahisaié꞉na.

Proverbs 6:16

Tsá꞉ta niiorí꞉wake ne Roiá꞉ner rarihwáhswenhs, tánon kwáh shakorihwáhswenhs ó꞉ni roriʼwáhston: Nónhka iontatón꞉ni tsi niieiaʼtò꞉ten, nónhka ionnowenhtánions, nónhka nahshakotinonhwarhiakon ne iáh oʼthé꞉nen teiakohnhí꞉kon, nónhka kaʼnikonhráksen ionnonhtonniónkwas, nónhka teiakosteríhenhs ne wahétken naióntiere, nónhka ne iakonowénhton tsi nahò꞉ten iakorihwahnirá꞉ton tánon ieiakokontáhkwen, tánon ne nónhka teierihwenhawíhtha ne karihwakaʼténhtshera tsi naʼtehónteron natenró꞉sera.

Ecclesiastes 11:2

Tóh꞉ka nihiokwénrahre nónhwe iasathakweʼniáien tsi nisakarahtheniáton ne sahwísta—wéso iokwénhrahre ahkénhake—asèken iáh nónhwenhton tesateriéntare onhʼní꞉ioht nateraswakʼsénhtshera nenhshèna kíʼ kénʼen ionwenhtsáte.

Isaiah 28:27

Ne dill nenhatiwáheke iáh tewataskwíseres tehónstha, khéhs ne kásehre aokakwénhtas ahatiʼkaraténiaʼte tsi kakéron ne cumin; ók ne dill ne ne onekarahéhtsa óienʼte rónstha tsi nihatiʼientánions nahatiʼsahetí꞉nekenʼwe, tánon ne cumin ne nònhʼneʼe ne wenhnekeraʼhétʼtses rónstha nahatiʼsahetinékenhwe.

Isaiah 41:15

Nón꞉wa, kwáh kí enkonhiónhnien ne iewahék꞉tha kásehre, iohiothí꞉ie, áse í꞉ken, tánon kanotsótons; ní꞉se kwáh kí enswáheke ne tsi ionhnontarónhnions tánon tesaskwáhseron, tánon né enshónniaʼte ne tsi ionhniarónhnions tsi ní꞉ioht ne kawá꞉he.

Isaiah 7:16

Asèken nohénton ne raksáha ahoteriéntarane onhní꞉ioht tsi aharihwáson ne wahét꞉ken tánon ne ahataterákwahse ne ioiánere, nonhóntsa ónka kíʼ teninontiʼioseráke ní꞉se iesateronkwénhnis kwáh kíʼ enhonwanakerakwáhte.

Isaiah 7:8

Asèken naʼonón꞉tsi ne Syria né꞉ne Damascus, tánon ne aʼonón꞉tsi ne Damascus né꞉ne Rezin. (Ohénton ne iáhʼiak nenhioserásenhke ne Ephraim kwáh thenhonwanattókwahte, iáh ónhkwe tahonsakénhake.)

Isaiah 8:4

asèken nohénton ne raksá꞉ha ahoteriéntarahne nahénron “Rákeni” khés “Nisténha,” nahokwahséhtsheras ne Damascus tánon tsi nikanenskwenháton ne Samaria kwáh kí ienhá꞉hawe ne Assyria ronnontí꞉io.

Amos 1:11

Ne kí꞉ken aorí꞉wa Rá꞉ton ne Roiá꞉ner: Asè꞉ken áhsen nieioterátston iorihwanéren ne Edom, tánon ki ne kaieríhaton, kwáh ki nenʼneʼeh iáh thaʼtaonsonkaterihwaténien ne karewahtáhtshera; tiorí꞉wa tsi aʼshareʼkó꞉wa wáhonste tsi wahonwanató꞉rate ne rontatekoʼokón꞉as tánon akwé꞉kon wahatirihwáhtonʼteʼ natanitèn꞉ron; onterihwató꞉kenhste tsi wahatháwa ne raonaʼkwáhtshera tánon iáh nonwén꞉ton tshaʼtetsoientá꞉ʼon.

Amos 1:13

Ne ká꞉ti aorí꞉wa Rá꞉ton ne Roiá꞉ner: Aseʼkénh áhsen nieioterátston iorihwanéren ne Ammonró꞉nons, tánon kí ne kaieríhaton, kwáh ki nenʼneʼeh iáh thaʼtaonsonkaterihwaténien ne kahrewahtáhtshera; tiorí꞉wa tsi thaʼkonwatiiaʼtaratsón꞉ko ne kontinekwenʼtàkeʼs ne konnón꞉kwe ne kontíhawe naiotiwiraièn꞉taʼne ne Gilead nón꞉we ne naón꞉ton ahatikó꞉wanahte ne raotinakeráhsera.

Amos 1:6

Ne kí꞉ken aorihwá꞉ke Ne Roiá꞉ner rá꞉ton: Aseʼken áhsen nieioterátston iorihwanéren ne Gaza, tánon kí ne kaieríhaton naorihwaneraʼáktshera kwáh kí nenʼneʼeh iáh thaʼtaonsonkaterihwaténien ne kahrewahtáhtshera; tiorí꞉wa tsi wahonwatiié꞉na tsi wahonwananakerákwahte kwáh ratinakerahserakwé꞉kon, né niahonwanahtsakwahríhshien ne Edom nón꞉we.

Amos 1:9

Ne kí꞉ken aorí꞉wa ne Roiá꞉ner rá꞉ton: Aseʼken áhsen nieioterátston iorihwanére ne Tyre, tánon ne kaieríhaton, kwáh ki nenʼneʼeh iáh thaʼtaonsonkaterihwaténien ne kahrewahtáhtshera; tiorí꞉wa tsi kwáh ratinakerahserakwé꞉kon tsi iehonwanahtsakwaríhshion ne Edom nón꞉we, tánon iáh teshonné꞉iahre naterihwahseronniáhtshera ne ateró꞉sera rotíhson.

Amos 2:1

Né kí꞉ken aorihwá꞉ke rá꞉ton ne Roiá꞉ner: Asè꞉ken áhsen nieioterátston iorihwanéren ne Moab, tánon ki ne kaieríhaton iáh nenhnè꞉e thaʼtaonsonkaterihwaténien ne kahrewahtáhtshera; tiorí꞉wa tho niió꞉re tsi wahonwatiaʼtátshaʼahte kenʼtarakeríhton iahón꞉ton ne raostsienʼshón꞉as ne ronnontí꞉iohkwe ne Edom.

Amos 2:4

Ne katíʼ aorí꞉wa ne Roiá꞉ner rá꞉ton: Asè꞉ken áhsen nieioterátston iorihwaneraʼáts꞉kon ne Judah, tánon ne kaieríhaton, kwáh ki nenhnè꞉e iáh thaʼtaonsonkaterihwaténien ne kahrewahtáhtshera; tiorí꞉wa tsi wahatikèn꞉ron ne raoianerénhsera ne Roiá꞉ner, tánon iáh tehonatienawáhston ne raorihonnienníhtseras, ók ne wahonathaharákwahte ne kwáh ne shá꞉ka nonó꞉wens tsi ní꞉ioht ne shakotihsothonkonhkén꞉en rotiioʼtén꞉ʼen.

Amos 2:6

Né katíʼ kí꞉ken aorí꞉wa ne Roiá꞉ner rá꞉ton: Asè꞉ken áhsen nieioterátston iorihwanéren ne Israel, tánon ki ne kaieríhaton iáh nenʼneʼeh thaʼtaonsonkaterihwaténien ne kahrewahtáhtshera; tiorí꞉wa tsi shakonatenhní꞉nons ne tionkweʼtaié꞉ris kahwistará꞉ken ronwatikariákʼtén꞉nis, tánon ne iakotenhténion tsoiá꞉na áhta neʼ tehontatawístha tsi shakonatenhní꞉nons—

Zechariah 9:1

Ne kí꞉ken ne Roiá꞉ner raoterihwahnhothátshera: Rotsianerenseríhshion ne karewahthátshera né꞉ne tsi ionwenhtsá꞉ien ne Hadrach ó꞉ni ne tsi kanatowáhne ne Damascus aotiriwà꞉ke. Iáh nek khók tsi kentahrahkérons ne Israeronónhke ók kwáh ó꞉ni ne tsi kanathakweʼní꞉io ne Syria tsi Roiá꞉ner rahówenhk.

Zechariah 9:2

Hamath, ne tetsiatonwenhtsianéken ne Hadrach, raónha nónhne raówenhk, tánon ó꞉ni ne kanatowá꞉nens ne Tyre ó꞉ni ne Sidon, tshiewahkwé꞉kon tsi nahoʼténhsons rahtiwehientheténions.