1 Samuel 6:4 - Ohiatonhseratokénti

⁴ Tánon wahonní꞉ron, “Nahó꞉ten nenhnéʼe ne kaní꞉kon teieriwaserakwátha nètho ne kwáh iahonsetewaténieʼte ne raonháke?” Waʼthatirihwaserá꞉ko, “Wísk ní꞉kons ohwistanó꞉rons takwahá꞉sons tánon wísk ní꞉kons ohwistanó꞉rons ohtsiʼnionká꞉rons, ne enhioianénhaʼwe tsi nihá꞉ti ne rotiʼiá꞉ners ne Philistines; asèken kwáh ne shaʼkánra tsi sewaʼkwé꞉kon wesewahiatórenhne tánon waʼohtiʼiatórenhne ne sewaiá꞉ners.

1 Samuel 6:4 ပူးပေါင်းရင်းမြစ်များ

Exodus 12:35

Né lsraeró꞉nons thóh nahatíhiere tsi nasakoró꞉ri ne Mahís, tánon wahonwatiʼriwaʼnóntonhse ne Egyptró꞉nons ne owistanórons ó꞉ni ne kawistharákes owistanoronʼshónhas ó꞉ni nʼaʼtsherónhniat.

Joshua 13:3

ó꞉ni tsi tkanakerahserá꞉ien ne Avvim nenhtiè꞉ne nokwá꞉ti. (Ne iohontsá꞉ien tsi nitiawé꞉non ne kahionhatátie Shihor, ne tsit karistatátie ne Egypt, kwáh tsi nió꞉re nothorè꞉ke nokwá꞉ti tkaristatátie ne Ekron, akénhake né꞉ne Canaanite; ne ronhtinontí꞉ios Philistines ratinákereʼkwe ne Gaza, Ashdod, Ashkelon, Gath, ó꞉ni ne Ekron.)

Judges 14:19

Thontahiawénstsi ne Roiá꞉ner rahoshastsʼténhsera wahoshastsʼténhseron, tánon Ashkelon nónhwe niaháre, thóh nónhwe asenhniwáhsen niháti roʼnónhkwe iashakononhwariákon, washakosehronhniáshon, tánon né tashá꞉kaʼwe ne ronhnónhkwe ne iahatíheʼwe ne tekarihwakentónhkwen. Ethòne ónen, sahathénhti, ronakwenhenhátie tsi nahá꞉wenhne,

Judges 3:3

Tsi niká꞉ien ne iatehonathaténhrons ne tsi ionhwenhtsáien né꞉ne wísk nihotinátakes ne Philistiaró꞉nons, ratikwékon ne Canaanró꞉nons, ne Sidonró꞉nons, tánon ne Hivró꞉nons né꞉ne tsi iononhténions ne Lebanon nónhwe nihatinákeres thóh tsotásaʼwe ne tsi ionónhte ne Baal Hermon tsi nióre ne Hamath Pass.

1 Samuel 5:12

Tsi niʼiá꞉kon ne iáh teiakawenhé꞉ion ne waʼhotiʼiatórenhne takwaʼáhshon, tánon tsi nontsaró꞉ko ne kanatowanénhke iahontharátate tsik kaʼronhiáte.

1 Samuel 5:6

Ne Roiá꞉ner wahshakoteʼniakátsʼtatshe nonkweʼó꞉kons ne Ashdod nón꞉we, tánon waʼshakoteronkwenhniónhaʼse ó꞉ni waʼshakóienʼte ne takwaʼáhson, tetsá꞉ron thóh nón꞉we Ashdod tánon ne tsi waʼtonhontsá꞉ien.

1 Samuel 5:9

Nok ó꞉nen shiaʼhónwe thóh nón꞉we Gath, ne raotsá꞉na ne Roiá꞉ner tsi nahatʼkónten ne kanatowanénke, ne waʼkarihónhni teiotenonianíton tsi waʼthonnonhnaríkhon; ne waʼshakoiénʼte ne ienaʼkerón꞉nion ne kanatowá꞉kenʼke, kwáh ratiʼkwé꞉kon kenʼnithotiʼiónsas ó꞉ni ne thotí꞉ions, káti nètho takwahá꞉son waʼtewaréni ne waʼotinonwakʼtháten.

1 Samuel 6:5

Káti ó꞉nenk tsi ensewatsiaʼtonhniseronniáhnion niwásas tahonsakaierontárake tsi wesewatkarotakwarontáseron sewatsiatonhniseronniá꞉nion otsinionká꞉ron nètho waʼhatihétʼkente nohón꞉tsa, tánon taʼtsítson kaiatanerakwátshera ne sakoʼNí꞉io NʼIsraerʼró꞉nons; tokaʼnón꞉wa iáh thaʼtahonsahotsanátsʼteke ne tsonhá꞉ke ó꞉ni ne sewaní꞉ios tánon ne tsonhontsáke.

1 Samuel 6:8

Iasewáhaf ne raoʼneró꞉kwa ne Roiá꞉ner tánon thóh iasewá꞉ta wenhní꞉seresʼke, tánon kaʼnerókwakon sewatáron ietsiʼiatokerón꞉tat ne kaiatonhnisónhas nowistanó꞉rons í꞉ken, ne tsi ionshaʼtsisewateniéten ne ne kanhí꞉tshera tsi iekatá꞉ton. Eʼthó꞉ne iashesewaténiet, tánon háo tionhnónskwaron tiatirónten tsi nienhén꞉we.