1 Samuel 16:1 - Ohiatonhseratokénti

¹ Ne Roiá꞉ner wahawénhase ne Samuel, “Tohá꞉kwa nikarí꞉wes tsi entsationniónhkwen ne Saul? Ní꞉i rikenronníhon nahonontí꞉ioke ne NIsraerʼronónhke. Ne í꞉senanh ne katshénen aonakarakénʼen ne iakenʼiewá꞉tha kénhie tánon tho iahá꞉se, Ní꞉i kwáh ienkoniaténieʼte tsi thénhteron ne Jesse ne ne Bethlehemró꞉non, asèken ní꞉i neh wakathaterakwénhni ne iatetsiá꞉ti ne ahotinontí꞉ioke ne sakohiohokónʼahs.”

1 Samuel 16:1 ပူးပေါင်းရင်းမြစ်များ

1 Kings 8:16

‘Tsi nikaháwi thontakhehiatínekenhwe nakonhkwetashón꞉as ne Egypt, iáh arèko shiʼwakerákwen ne kanatowanénke tsi nihiohóntsa ne Israerʼró꞉nonhke tsi nónhwe naʼkanonhsonhníhake Nononhsatokentiʼkówa tsi nónhwe nahiontsenhnaiénthakwahke. Ók kíʼ í꞉se wakonhiataráko, Táwit, nasheiatkórasthe nakonhkwetaʼshón꞉as.’”

2 Kings 9:1

Ethòne ne rotó꞉kense Elisha iahó꞉nonke kentithoiónha rotó꞉kense tánon wahawénhase, “Sathateweienéntan tánon Ramoth Gilead nón꞉we niaháse. Iahá꞉saf kí꞉ken kát꞉tse ne iakeniewátha kénʼie í꞉kare,

2 Kings 9:3

tánon ranontsíne tasáweron kí꞉ken kèn꞉ie, tánon ensí꞉ron, ‘Né Roiá꞉ner rá꞉ton waʼiaienáro né naisanontí꞉ioke Nisraeʼró꞉nonke.’ Ethòne kwáh tsi niiostó꞉re éhʼren thontáset né nón꞉we.”

2 Kings 9:6

Ethòne kí꞉ken teniʼiáse kanóns꞉kon niahá꞉ne, tánon né kentithoiónha rotó꞉kense taʼreienáweron ne iakeniewátha ne Jehu ranontsíne tánon wahawénhase, “Né Roiá꞉ner, ne Shakó꞉ní꞉io Nisraeʼró꞉nonke, rá꞉ton: ‘Wakonʼienáro naʼsheiatenonʼtí꞉ioste nakonkwetaʼsónhas Nisraeʼró꞉nonke.

1 Chronicles 11:3

Ká꞉ti ratikwé꞉kon ne sakotihén꞉tenhse Israerró꞉nonhke niahónʼne tsi ténhteron ne Táwit né꞉ne Hebron nón꞉we. Kwáh iotokénti tsi ní꞉ioht tsi wathonterihwá꞉iesʼte, waʼhonwenhienáʼro, tánon rahón꞉a waʼonontí꞉ioʼne Nisraeró꞉nonke, kwáh kíʼ tsi nihorahrátston ne Roiá꞉ner rahonháke ne Samuel.

1 Chronicles 28:4

Né Roiá꞉ner sakoNí꞉io Nisraeʼró꞉nonhke, wahatiataráhko tánon tsi nienhkatwatsírihne nahiakwatʼró꞉raste Nisraeʼró꞉nonhke tsi nénhwe. Né washakoiataráhko ne Judahró꞉nons nahontahóntkaʼwe nashakotihéntenhse, tánon thóh nón꞉we ne Judahró꞉nonhke waʼsakoiataráhko ne rakeníha rahowátsire. Thóh ne rathiwatsirahkwé꞉kon kwáh rahotsionhniatsherákon tsi iahatsaténhaʼwe tánon wahakenontí꞉ioste tsi niwatenáskwah Nisraeʼró꞉nonke.

Isaiah 11:1

Né thenkarénharon kwáh thóh nón꞉we nènhtewe tsi thóh iotsinahá꞉rote ne Jesse, tánon nonàhte kwáh thóh entewatehiáron nahoterá꞉ke.

Isaiah 11:10

Nétho enwenhniseráteʼke ne raoterá ne Jesse kwáh enkátake tsi ní꞉ióth noniatará꞉ha ne nahiontkátho nonkweshón꞉has; niaʼkahontsakeró꞉nons kwáh enhonwahiatísake, tánon tsi nón꞉we nihotorí꞉sen kwáh enhioiatanerakwáts꞉tonʼke.

Isaiah 55:4

Satʼkátho, rahónha rihiónhni nahariwaníraʼte nonkwé꞉ne, asakohénthense tánon ahontasakoniarotárohke nonkweʼshónhas.

Jeremiah 11:14

Jeremiah, tó꞉sa saterénnaien nakonháke tó꞉ka ó꞉ni askaniténthaʼse ne ronónha rahotirihwáke. Ne nónen tehonanikónrhare tánon entionkenáton nakheiénahwaʼse, kwáh iáh tahkhehiatahónsahthaʼte.”

Jeremiah 15:1

Ethóhʼne ne Roiá꞉ner wahakénhase, “Shé꞉kon ne Mahís o꞉ni ne Samuel né kénʼen aníthake ahionkanitenthaséheke, kwáh iáh thaʼkhenatónhase kí꞉ken onhkweshón꞉a thènen ne kenténron. Sehiónnien ne ahéren ahónnhethe; sehiónnien ne éhren rónnhek tsi nónwe níhkes.

Jeremiah 6:30

Ne enhonwatinahthonkwahke iáh othènen tehathiriwasthas iáh othènen tehiorihonte, tsioríhwa Í꞉i, ne Watiá꞉ner, wakhekenron.”

Jeremiah 7:16

Ne Roiá꞉ner wahénron, “Jeremiah, tó꞉sa sheʼhiaterennaiénhas kíʼ onhkweshón꞉a. Tó꞉sa teshaséntho ne ronónha rahothiríwahke, tó꞉sa tahkahnítenthe, asèken iáh tahkonhiathahónsahthaʼte.

Zechariah 4:14

Ethò꞉ne wahèn꞉ron, “Ne kí꞉ken ne tehnihiá꞉se tsi niká꞉ien ne Rawenni꞉io shakohiatahrákwen tánon ne tahonwahriwasniéhse, raónha ne Roiá꞉ner rashá꞉rine nowenhtsiakwé꞉kon.”

Romans 15:12

Tánon áreh, tsi niháwen ne Isaiah, “Tsi nithotwahtsirínon ne Jesse enhatotáshon, Éntʼreh nasakohentéseh ne iáh tehatiʼsitaerónons, tánon rahonháke non nenhatíʼien neh rahonaskanéktseras.”

Hebrews 11:32

Iakatashonterénken? Iáh tewahkenákʼtothe ne Gideon akhetérahkwe, Barak, Samson, Jephthah, Táwit, Samuel, tánon ne iehatirihwáhkenskwe.

1 Sawátis 5:16

Tóhkaʼ entsisewáken ne tawetákwen nahariwánerake nók iáh tahóriote, sateriwaiénni nasaterénnaien rahonháke ne Rawenni꞉io, tsi rahónha entháwen nètho rónkwe natónnhets. Neh kíʼ kéntons tsi niʼiákon ne iáh taiakóriohte. Nók káien ne kariwáneren ne iakorióhtha, nók iáh neh tekíʼtons ne naihsewaterennaienthákwen rahonháke ne Ní꞉io nètho aorihónʼniat.

1 Samuel 10:1

Samuel wahtatʼtshétaʼkwe ne wateienará꞉kwa tánon ranontsíne ne Saul tareienáweron, tánon watonoronkwánion; wahén꞉ron, “Ne Roiá꞉ner wahiaʼiataráko nashehéntenhse raonkwetaʼshón꞉ʼahs Israerʼró꞉nons. Í꞉se kwáh ensheʼiateriwatsʼterístase ne raonkwetaʼshón꞉áhs ne Roiá꞉ner tánon í꞉se kwáh enshenónsthate tsi nòkwah ne rontsanákes ne ronwatíswenhs natʼtatsesónhas ratinakeréhnion. Nón꞉wa neh kí꞉ken nenhshenréstaʼkwe nètho Roiá꞉ner tsi í꞉se iahíaʼtarákwen nasheʼiateriwatsʼterístaʼse ne raonkwetaʼshón꞉ʼahs Israerʼró꞉non. Í꞉se kwáh iahiaʼtaráhkwen—nasheʼiateriwatsʼterístaʼse neh kwáh raón꞉ha rahonkwetaʼshón꞉ʼahs:

1 Samuel 15:11

“Skaʼtateriwástahni tsi rinontiʼióston ne Saul, asèken tonsahatkarahténi tsi ratʼnonteráhtieskwe, tánon iáh tehorihwaieríton nakatiawenhráseras.” Ne Samuel tsi nahonhákwen; tánon iathaséntʼtho rahonháke ne Roia꞉ner asontahkwé꞉kon.

1 Samuel 15:23

Asèken nahiontenontsistát꞉sate kwáh satewahét꞉ken ne karihwanerahák꞉tshera tsi ní꞉ioht ne tahióntʼkonste, tánon nahiontenontsistanírate kwáh ne ne karihwanerahák꞉tshera ó꞉ni ne kahiatón꞉ni konwasénhnaiens. Tsioríhwa ní꞉se tsi waskénron ne raowenhnaó꞉kons ne Roiá꞉ner, ne raónha kwáh nón꞉ne eh wahiakénron ní꞉se nahisanontí꞉ioke.”

1 Samuel 15:26

Ne Samuel tonsahorihwaserákwahse ne Saul, “Iáh thóh tiaʼhonsáke skát꞉ne ní꞉se; asèken sakenronníhon ne raowénhna ne Roiá꞉ner, tánon ne Roiá꞉ner kwáh iakenronníhon nasheiatenontí꞉ioste NÍsraerʼronónke.”

1 Samuel 15:35

Ne Samuel iáh shé꞉kon teshó꞉ken ne Saul kwáh tsi niʼió꞉re iarenhé꞉ie, ók ne Samuel wahotiónhnionhse ne Saul. Tánon ne Roiá꞉ner tsi sathateriwástani nètho tsi ne rahónhni ne Saul nahonontí꞉ioke NʼIsraerʼronónke.

1 Samuel 16:15

Tánon ne Saul raonhatserashón꞉ʼahs wahonwénhase, “Sát꞉kato ó꞉nenh, ne kanikonrahetʼkénsera tahaténieʼte ne Ní꞉io ne nahiaronhiákente.

1 Samuel 16:23

Tánon ne nó꞉nen ne kahnikonrahetʼkénsera enthaténiete ne Ní꞉io nenhó꞉rahne ne Saul, Ne Táwit iathenhanó꞉wakwe tánon enhaterenhnóten ne énratste ratshanáke, tánon ne Saul kwáh ensotʼrákwahse tánon ensronhní꞉ione, tánon ne kanikonrahetʼkénsera kwáh kíʼéhren énsewete ne rahonháke.

1 Samuel 17:12

Nón꞉wa ne Táwit ne roniʼkénʼen ne Ephrathite ne Bethlehemró꞉non ne ne Judah nón꞉we, Jesse ronwaiáts, ne raónha shaʼtékon nionekenterontseraien꞉takwe. Thóh tsi nihotenhniseraténionskwe ne Saul ne ne rón꞉kwe ó꞉nenk shiʼoksténha tánon kwáh thóh tsi nihahoserákwen.

1 Samuel 9:16

“Nenʼióhrhenʼne tó꞉kaʼ kiʼ tonenkaʼhá꞉wiʼke kwáh entiʼiatéʼnié꞉te shonháke rón꞉kwe thóh nèntʼre tsi tionhontsá꞉ien ne Benjamin, tánon kwáh í꞉se entiaʼtaráko naʼsakokʼkóraste nakonkwetaʼshón꞉ʼa Israerʼró꞉nons. Kwáh Rahón꞉ʼa ensakonónsthaʼte tsi nòkwah ne raoʼtishastsʼténsera ne Philistines; asèken kwáh í꞉i wakatká꞉thon ne raoʼtironiakénhsera nakonkwetaʼshón꞉ʼahs, tsioríwa tsi naʼteotihenrétha ontiaʼtórenhne.”