1 Samuel 1:26 - Ohiatonhseratokénti

²⁶ Tánon wakén꞉ron ne Hannah, “Ó, Atiá꞉ner, tsi nishón꞉nhe, Atiá꞉ner, Í꞉i ne kón꞉kwe ne kén꞉en ít꞉tawe sahén꞉ton, wakaterenhnaién꞉taʼkwe rahonháke ne Roiá꞉ner.

1 Samuel 1:26 ပူးပေါင်းရင်းမြစ်များ

Genesis 42:15

Kenʼ kiʼ ní꞉ioht tsi enietshiiateniénhten: Tsi nihrónhnhe ne Pharaoh, iáh thaonsesewahtén꞉ti ne kenh nón꞉we tsik ne tshisewaʼkén꞉ʼa kén꞉ʼen nèntre!

2 Samuel 11:11

Ne Uriah wahawénhase ne Táwit, “Ne ateriwaseronniátshera tánon NʼIsraeró꞉nons ó꞉ni ne Judah thóh ratiteróntons ne thiʼwaskwakarénhren; ne rateriʼioserakweʼní꞉io Joab ó꞉ni ne raonhatseraókons thóh ronaná꞉taien ne kénk nón꞉we thí꞉ken kahentá꞉ke; ónhní꞉iot tsi ahónton thóh niahonsáke tsi tewakenónsoʼte, ne takatská꞉on ó꞉ni natnekíra, tánon skát꞉ne aiatiá꞉rate ne ketsténha? Ní꞉se tsi nishón꞉nhe, tánon ne satón꞉nhets tsi nihiónnhe, Ní꞉i kwáh iáh èhʼthoh thátiere neh nikariʼóten.”

2 Samuel 14:19

Ne ronnontí꞉io wahén꞉ron, “Joab ontèken wahiaró꞉ri neh ne kí꞉ken ashiʼrónhnion?” Ne iónkwe wakʼkariwaserá꞉ko tánon wakén꞉ron, “Tsi niʼioriwí꞉io tsi nisón꞉nhe, natiá꞉ner ne ronnontí꞉io, iáh ónka taiekwéni ne tahonsaiekaraténi ne thènen nètho natiá꞉ner ne ronnontí꞉io ahawénhke. Asèken í꞉se sanhátsera Joab raónha rakenhá꞉hon; kwáh raónha róthen akwé꞉kon kíʼ owenhnaókons thóh tsik sakáronhte.

2 Kings 2:2

tsi niʼonahá꞉hes ne Elijah wahawénhase ne Elisha, “Ónenh kíʼ kénʼhen shé꞉sek; né Roiá꞉ner rakró꞉ri Bethel nónhwe niá꞉ke.” Ók ne Elisha watharihwaseráko; “Wakerihwanírathe tsi niwakerihwató꞉ken rahonháke ne ronnhehónwe Roiá꞉ner tánon ní꞉se tsi iáh takonhiatewénhtheʼte.” Káti tenitsáron Bethel niá꞉haʼne.

2 Kings 2:4

Ethòne ne Elijah wahawénhase ne Elisha, “Ónen kíʼ kénʼen shiterónhtak; ne Roiá꞉ner rakeríhonte ne Jericho nónhwe niáke.” Ók kíʼ ne Elisha watarihwaseráko, “Kerihwanírats tsi niwakerihwató꞉ken rahonháke ne ronhnhehónhwe Roiá꞉ner tánon ní꞉se tsi kwáh iáh thakonhiatewénhtheʼte.” Káti tenitsáron Jericho niahá꞉ne.

2 Kings 2:6

Ethòne ne Elijah wahawénhase ne Elisha, “Ónenh kíʼ kénʼen shiterónhtak; né Roiá꞉ner rakeríhonte ne Jordan kaniataratátse nón꞉we niá꞉ke.” Ók né Elisha wataʼrihwaserá꞉ko, “Kerihwanírats tsi niwakerihwató꞉ken rahonháke ne ronnhehónwe Roiá꞉ner tánon ní꞉se tsi kwáh iáh thaʼkonhiatewénhtheʼte.” Káti thóh nónh꞉we niahá꞉ne,

2 Kings 4:30

Né iónhkwe wahawénhase ne Elisha, “Wakerihwanírathe tsi niwakerihwató꞉ken ne tsi nironhnhehónwe ne Roiá꞉ner tánon ní꞉se tsi iáh thakonhiatewénhtheʼte!” Káti ne tenihiáse tahiathásawenh thóh nionhsáne tsi tsonónhshothe.

1 Chronicles 4:10

Ók kíʼ né Jabez rahonháke ne sakoʼNí꞉io Nisraeʼró꞉nons nón꞉we iahaterénhnaien, “Tatiatatérist, Sewenní꞉io, tánon wé꞉so nohóntsa táskon. Tenikweʼkónhak tánon takenóns꞉tat tsi nòkwah ne othénen karihwák꞉sen né tó꞉sa akakwé꞉ni ahonkeronhiakéntaʼkwe.” Tánon kíʼ ne Rawenni꞉io tahá꞉wen tsi nahó꞉ten wahaterenhnaiénthaʼkwe.

1 Samuel 17:55

Nó꞉nen ne Saul sahó꞉ken ne Táwit iahahiákenhne niahotiatónhti ne Philistiaró꞉non, ne raón꞉ʼa wahawénhase ne Abner, ne ne rateriʼioserakweʼní꞉io ne raotsió꞉kwah ronterí꞉ios, “Ne Abner ónhka ronhwahʼién꞉a kí꞉ken kén nithoiónha?” Ne Abner wahén꞉ron, “Ne satónnhets tsi nihión꞉nhe, Ó Sanontí꞉io, Iáh tewakateriéntare.”

1 Samuel 20:3

Ók kiʼ ne Táwit kwáh ó꞉ni waharihwanírate, “Ne ianí꞉ha roteriéntare ioiá꞉nere tsi roterién꞉tare ní꞉se tsi takenón꞉wes; tánon tsi nihanontónhnions, ‘Tó꞉sa rotókens ne Jonathan kíʼ, khéhs kwáh í꞉ken tsi enonikonrahkaréhwate.’ Ók oriwiʼiohónwe, tsi nihioʼriwí꞉io ne Roiá꞉ner tsi nirón꞉nhe tánon ní꞉se tsi nishón꞉nhe, thóh nón꞉we ók tsokháhak khók natehiatiátere tánon ne kenhé꞉ion.”

1 Samuel 25:26

Nón꞉was eʼthóhʼne, atiá꞉ner, tsi kiʼ nirón꞉nhe ne Roiá꞉ner, ó꞉ni ní꞉se tsi nishón꞉nhe, tsiksén꞉hak ne Roiá꞉ner wahiá꞉nese ní꞉se ne tó꞉sa ahisánike tsi ashenekwátʼte tánon tsi ahonsatskárhiake ne kwáh ní꞉se shatshanáke, ó꞉nenh kiʼ sheríhon ne iesáshons ó꞉ni tsi nihiá꞉kon ne ne ronhnésaks ne karihwahét꞉ken tsi nahonwatiérase natiá꞉ner kwáh tsi ní꞉ioht ne Nabal.