Tito 1:1 - Mixteco del suroeste de Tlaxiaco Oaxaca

¹ Maáníꞌ, Pablo, ya̱ kúvi ni̱ꞌ musúꞌ ya̱ jiátíñú Ndiosíꞌ. Jee suni níso ni̱ꞌ tiñu apóstol, ya̱ nchu̱ichí Jesucristo nuꞌuꞌ, sáva ku̱ꞌva ni̱ꞌ tu̱ꞌun re̱ꞌ nu̱u̱nꞌ rá ñɨvɨ, sáva rá ñɨvɨ ya̱ nka̱ji Ndiosíꞌ ráa kuneí iniꞌ ráa maa, jee sáva kuniꞌ noo ráa tu̱ꞌun na̱a̱ꞌ, jee sáva kunikɨnꞌ ráa ichi na̱a̱ꞌ nu̱u̱nꞌ Ndiosíꞌ sáni kuíni re̱ꞌ,

Tito 1:1 ပူးပေါင်းရင်းမြစ်များ

Lucas 18:7

Soo Ndiosíꞌ, ¿á ntu suni nasaꞌá na̱a̱ꞌ re̱ꞌ keꞌneꞌ re̱ꞌ tiñu chineí re̱ꞌ rá ñɨvɨ ya̱ nka̱ji re̱ꞌ, ya̱ yɨ́táꞌán kákua̱chi ráa nu̱u̱nꞌ re̱ꞌ nuví niñuꞌ rúja? Jee, ¿á kukuéé víꞌí re̱ꞌ jee chineí re̱ꞌ ráa? Ntu̱ví.

Hechos 13:48

Sáá nteso̱ꞌo rá ñɨvɨ ntu kúvi Israel yaꞌá, jee nku̱sɨ̱ɨ̱ꞌ iniꞌ ráa, jee nna̱kuetúꞌún ráa jie̱ꞌe̱ꞌ tu̱ꞌun I̱toꞌoꞌ‑ó. Jee ni̱nu̱ꞌ iniꞌ nɨꞌɨ ñɨvɨ na̱kua̱ꞌ nka̱ji Ndiosíꞌ ta ɨɨn kutekuꞌ‑u nɨ́ɨ́nkání jín re̱ꞌ.

Romanos 1:1

Nuꞌuꞌ Pablo, ya̱ kúvi ni̱ꞌ musúꞌ ya̱ sáꞌá ni̱ꞌ tiñu Cristo Jesús, jín ya̱ nkana re̱ꞌ nuꞌuꞌ kuvi ni̱ꞌ najiáꞌáꞌ re̱ꞌ ya̱ kunisotíñú ni̱ꞌ tiñu apóstol ya̱ chúichí re̱ꞌ nuꞌuꞌ, chi nsa̱ꞌá sɨ́ɨ́n re̱ꞌ nuꞌuꞌ sáva stekútu̱ꞌún ni̱ꞌ tu̱ꞌun váꞌa Ndiosíꞌ.

2 Corintios 1:1

Nuꞌuꞌ Pablo, Cristo Jesús nte̱tíñú re̱ꞌ nuꞌuꞌ, kuniso ni̱ꞌ tiñu apóstol ya̱ chúichí re̱ꞌ nuꞌuꞌ sáva stúvi ni̱ꞌ tu̱ꞌun re̱ꞌ, sáni kuíni Ndiosíꞌ. Nuꞌuꞌ jín ñaniꞌ‑ó Timoteo táji ránꞌ tutuꞌ yaꞌá nu̱u̱nꞌ ránoꞌó, ya̱ kúvi ñɨvɨ Ndiosíꞌ ya̱ jínúꞌ iniꞌ rán Jesús, ya̱ nééꞌ rán ñuunꞌ Corinto, ya̱ kútútú rán yukuán. Jee suni táji ránꞌ maa nu̱u̱nꞌ ntáká rá ñɨvɨ ya̱ nsásɨ́ɨ́n Ndiosíꞌ sáva kɨꞌɨ ráa nu̱u̱nꞌ re̱ꞌ, ya̱ nééꞌ ráa ntáká rá ñuunꞌ sánitɨ́ɨn Acaya.

Efesios 2:8

Chi jie̱ꞌe̱ꞌ ya̱ íyó mániꞌ iniꞌ Ndiosíꞌ néꞌyá re̱ꞌ ránoꞌó jee nna̱tavaꞌ re̱ꞌ ránoꞌó nu̱u̱nꞌ kua̱chi rán nsi̱káku re̱ꞌ ránoꞌó jie̱ꞌe̱ꞌ ya̱ kúneí iniꞌ rán Cristo, sú ntu íyó ni̱ꞌi̱nꞌ rán maa. Soo nsú ránoꞌó sáꞌá maa, chisaꞌ kúvi‑i ta̱ꞌvi̱ꞌ nsi̱kútaꞌviꞌ Ndiosíꞌ nu̱u̱nꞌ rán.

Filipenses 1:1

Maáníꞌ Pablo jín Timoteo, kúvi ránꞌ musúꞌ Cristo Jesús. Tée ránꞌ tutuꞌ yaꞌá nu̱u̱nꞌ nta̱ká ránoꞌó, ya̱ nsa̱ꞌá sɨ́ɨ́n Ndiosíꞌ ránoꞌó, sáva kɨꞌɨ rán nu̱u̱nꞌ Cristo Jesús, ya̱ nééꞌ rán ñuunꞌ Filipos, jín nu̱u̱nꞌ rá te̱e kúñáꞌnú nu̱u̱nꞌ rán, jín nu̱u̱nꞌ rá ñaniꞌ rán ya̱ chíneí ráa ránoꞌó.

Colosenses 2:2

Sáꞌá ni̱ꞌ suꞌva sáva nuneí iniꞌ ánímaꞌ rá ñaniꞌ vá, jín sáva nuún koo iniꞌ ráa jie̱ꞌe̱ꞌ ñúnúunꞌ ráa ɨɨn inka rá táꞌán ráa. Jee sáva kuéntáꞌ kukúká ráa ya̱ kino̱o kutú ánímaꞌ ráa, jie̱ꞌe̱ꞌ ki̱ku̱ꞌun iniꞌ ráa Tu̱ꞌun Ndiosíꞌ, sáva kuniꞌ ráa tu̱ꞌun re̱ꞌ ya̱ nyɨ́ꞌɨ se̱ꞌí ne̱ yanaꞌán nékúvi, jee jie̱ꞌe̱ꞌ maá Cristo ví tu̱ꞌun vá.

1 Timoteo 2:4

jee kuíni re̱ꞌ ya̱ nɨꞌɨ ñɨvɨ ni̱ꞌi̱nꞌ ráa ya̱ natavaꞌ re̱ꞌ ráa nu̱u̱nꞌ kua̱chi ráa nanitáꞌvíꞌ ráa, jín ya̱ kenta kukáꞌnú iniꞌ ráa ya̱ naáꞌ.

1 Timoteo 3:16

Va̱tu̱ꞌ nijia ya̱ kúvi ya̱ naáꞌ, ya̱ mánasɨ́ ví tu̱ꞌun yuꞌuꞌ jie̱ꞌe̱ꞌ ichi na̱a̱ꞌ Ndiosíꞌ, ya̱ sukuán ntañúꞌún nstúvi re̱ꞌ nu̱u̱nꞌ‑ó: Ndiosíꞌ ntu̱vi nu̱u̱nꞌ ñɨ̱vɨ́, jee ni̱yo yɨkɨkúñu re̱ꞌ, chi nkenta kúvi re̱ꞌ ɨɨn te̱e. Nstúvi kájí nijia Ta̱chi̱ꞌ Ííꞌ re̱ꞌ, ya̱ na̱a̱ꞌ ví re̱ꞌ. Ntu̱vi re̱ꞌ nu̱u̱nꞌ rá najiáꞌáꞌ ííꞌ Ndiosíꞌ. Nte̱ku̱tu̱ꞌún jie̱ꞌe̱ꞌ re̱ꞌ nu̱u̱nꞌ rá ñɨvɨ ñɨ̱vɨ́. Ni̱nu̱ꞌ iniꞌ ñɨvɨ ñɨ̱vɨ́ re̱ꞌ. Nnaa re̱ꞌ kua̱noꞌonꞌ re̱ꞌ súkún nu̱u̱nꞌ ñuunꞌ viiꞌ nasɨ́kuitɨꞌ nu̱u̱nꞌ tátúníꞌ Ndiosíꞌ.

1 Timoteo 6:3

Ré néni ɨɨn ñɨvɨ xínéꞌénꞌ tu̱ꞌun íyó sɨ́ɨ́n, ya̱ ntu káꞌánꞌ nuún jín tu̱ꞌun na̱a̱ꞌ I̱toꞌoꞌ‑ó Jesús ya̱ kúvi Cristo, jee ya̱ ntu íyó na̱kua̱ꞌ xínéꞌénꞌ Ndiosíꞌ jie̱ꞌe̱ꞌ ichi na̱a̱ꞌ sáni kuíni Ndiosíꞌ ya̱ kaka‑ó,

2 Timoteo 2:10

Saáva jiéꞌnéꞌ iniꞌ ni̱ꞌ nɨꞌɨ tu̱nóꞌó yaꞌá jie̱ꞌe̱ꞌ rá ñɨvɨ nkáji Ndiosíꞌ, sáva ni̱ꞌi̱nꞌ ráa ya̱ nanitáꞌvíꞌ ráa jie̱ꞌe̱ꞌ yɨ́ꞌɨ́ ráa nu̱u̱nꞌ Cristo Jesús, jee viiꞌ nasɨ́kuitɨꞌ kuneeꞌ ráa nɨ́ɨ́nkání jín re̱ꞌ.

2 Timoteo 2:23

Jee chusává nú tu̱ꞌun naanꞌ ya̱ káꞌánꞌ sɨ̱ɨ̱ꞌ ni, jie̱ꞌe̱ꞌ ya̱ kántátúꞌun ñɨvɨ, chi jíníꞌ nú ya̱ suvivá sáꞌá ya̱ íyó ti̱xi̱nꞌ.

2 Timoteo 2:25

jee íyó koo másúꞌ iniꞌ‑i sáá nachuꞌun‑u ichi váꞌa rá ñɨvɨ núníꞌin jín tu̱ꞌun na̱a̱ꞌ. Sa̱naanꞌ ku̱ꞌva Ndiosíꞌ nakani iniꞌ ráa, ne̱ kenta kukáꞌnú iniꞌ ráa tu̱ꞌun na̱a̱ꞌ.

Santiago 1:1

Maáníꞌ Jacobo, ya̱ kúvi ni̱ꞌ musúꞌ Ndiosíꞌ jín I̱toꞌoꞌ‑ó Jesús ya̱ níso re̱ꞌ tiñu Cristo, ya̱ ñani Ndiosíꞌ sáva tatúníꞌ nu̱u̱nꞌ nɨꞌɨ, tée ni̱ꞌ tutuꞌ yaꞌá nu̱u̱nꞌ ránoꞌó ya̱ kúneí iniꞌ Jesús, ya̱ kúvi rán sava ni uxúꞌ u̱vi̱ꞌ (12) rá tataꞌ ichiyúkúnꞌ nkene rán nu̱u̱nꞌ Israel, ya̱ ñéte̱nuun nu̱u̱nꞌ ñɨ̱vɨ́ yaꞌá. Tájí ni̱ꞌ tu̱ꞌun káva̱ꞌa nu̱u̱nꞌ rán.

2 Pedro 1:3

Chi jín fuersáꞌ ííꞌ níso Ndiosíꞌ jee ntaji re̱ꞌ nɨꞌɨ nu̱u̱nꞌ‑ó ya̱ jíniñúꞌún‑ó sáva kueꞌnu na̱a̱ꞌ‑ó ñɨ̱vɨ́ yaꞌá sáni kuíni re̱ꞌ jín sáva kɨtíñú‑ó nu̱u̱nꞌ Ndiosíꞌ. Ntaji re̱ꞌ maa jie̱ꞌe̱ꞌ jíníꞌ‑ó na̱ja iniꞌ maáréꞌ, chi maáréꞌ ví ya̱ nkana re̱ꞌ yó, jie̱ꞌe̱ꞌ ya̱ kúñáꞌnú nasɨ́kuitɨꞌ re̱ꞌ jín jie̱ꞌe̱ꞌ va̱ꞌa iniꞌ re̱ꞌ.

2 Pedro 3:11

Jee jie̱ꞌe̱ꞌ ya̱ kɨ̱naanꞌ nta̱ká rává sukuán, saáva íyó kueꞌnu na̱a̱ꞌ ninuꞌun rán sáni kuíni Ndiosíꞌ jee kɨtíñú rán nu̱u̱nꞌ re̱ꞌ,

1 Juan 2:23

Jee nta̱ká ñɨvɨ ya̱ kúíchi iniꞌ ráa Jesús, jee ni ntu̱ví íyó Tátáꞌ‑ó Ndiosíꞌ jín ráa. Jee ñɨvɨ ya̱ jiáꞌayuꞌú ya̱ Se̱ꞌya Ndiosíꞌ kúvi re̱ꞌ I̱toꞌoꞌ‑o, jee suni íyó Tátáꞌ‑ó Ndiosíꞌ jín‑i.

Apoclipsis 1:1

Tu̱ꞌun yaꞌá kúvi tu̱ꞌun ya̱ nxi̱nénu̱u̱nꞌ Jesús ya̱ níso re̱ꞌ tiñu Cristo ya̱ ñani Ndiosíꞌ maa sáva tatúníꞌ re̱ꞌ nu̱u̱nꞌ nɨꞌɨ, jee tu̱ꞌun vá ví ya̱ njia̱ꞌa Ndiosíꞌ nu̱u̱nꞌ re̱ꞌ sáva xinénu̱u̱nꞌ re̱ꞌ maa nu̱u̱nꞌ rá musúꞌ re̱ꞌ ya̱ yɨ́tíñú ráa nu̱u̱nꞌ re̱ꞌ. Nstúvi re̱ꞌ tu̱ꞌun vá jie̱ꞌe̱ꞌ rá tiñu ya̱ ñamani íyó kuvi. Jee nchu̱ichí re̱ꞌ najiáꞌáꞌ ííꞌ re̱ꞌ nkistúvi nijinꞌ re̱ꞌ nɨꞌɨ na̱ja koo rá tiñu vá nu̱u̱nꞌ Juan ya̱ kúvi‑i musúꞌ re̱ꞌ ya̱ yɨ́tíñú‑u nu̱u̱nꞌ re̱ꞌ.