Marcos 2:20 - Mixteco del suroeste de Tlaxiaco Oaxaca

²⁰ Soo kenta rá ki̱vɨ̱ꞌ jee siíyo rá inka ñɨvɨ te̱e sukuán tana̱ꞌá vá nu̱u̱nꞌ ráa, saájee kuneeꞌ niteꞌ ráa rá ki̱vɨ̱ꞌ yukuán.

Marcos 2:20 ပူးပေါင်းရင်းမြစ်များ

Mateo 26:31

Saájee nkachiꞌ Jesús nu̱u̱nꞌ ráa: ―Ntáká ránoꞌó kininkava nayu̱ꞌví rán jee xinóo métúꞌún rán nuꞌuꞌ yakuááꞌ vitan, chi sáni káchíꞌ nu̱u̱nꞌ Tutuꞌ níso Tu̱ꞌun Ndiosíꞌ jee nkachiꞌ re̱ꞌ: Kaꞌniꞌ ni̱ꞌ te̱e náka lanchi, jee kutenuun rá lanchi, káchíꞌ nu̱u̱nꞌ Tutuꞌ Ííꞌ.

Mateo 9:15

Soo nkachiꞌ Jesús nu̱u̱nꞌ ráa: ―¿Á kuvi kukuíꞌyáꞌ iniꞌ rá ñɨvɨ kútáꞌán jín te̱e sukuán tánáꞌá ni nééꞌ re̱ꞌ jín ráa rúja? Ntu̱ví. Soo kenta rá ki̱vɨ̱ꞌ siíyo rá inka ñɨvɨ te̱e sukuán tánáꞌá vá nu̱u̱nꞌ ráa, saájee kuneeꞌ niteꞌ ráa.

Marcos 2:19

Nkachiꞌ Jesús nu̱u̱nꞌ ráa: ―¿Á kuvi kuneeꞌ niteꞌ rá ñɨvɨ kútáꞌán jín te̱e sukuán tánáꞌá ni nééꞌ re̱ꞌ jín ráa rúja? Ntu̱ví, chi ni nééꞌ re̱ꞌ jín ráa, jee ntu kúvi koo niteꞌ ráa.

Marcos 2:21

Ni ɨɨn ñɨvɨ ntu náchuꞌun kúté saꞌma jiáá ya̱ ntiáꞌan naniyɨ nu̱u̱nꞌ ɨɨn saꞌma túꞌú ntéꞌneꞌ nakoto‑o vá. Chi naniyɨ saꞌma jiáá vá jee nátáꞌ‑a ka̱ꞌ vá, jee kukáꞌnú ka̱ꞌ nu̱u̱nꞌ téꞌné saꞌma túꞌú vá.

Lucas 17:22

Saájee nkachiꞌ Jesús nu̱u̱nꞌ rá te̱e kútáꞌán jín re̱ꞌ súkuáꞌa re̱ꞌ ráa: ―Kiji rá ki̱vɨ̱ꞌ ya̱ ne̱ kuꞌun ñúkúvi iniꞌ rán kune̱ꞌyá rán ɨɨn rá ki̱vɨ̱ꞌ ya̱ nenta ni̱ꞌ ñɨ̱vɨ́ yaꞌá, ya̱ nta̱jí Ndiosíꞌ nuꞌuꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee ni nsáꞌ kuniꞌ rán maa.

Lucas 5:35

Soo kenta rá ki̱vɨ̱ꞌ jee siíyo rá inka ñɨvɨ te̱e sukuán tana̱ꞌá vá nu̱u̱nꞌ ráa, saájee kuneeꞌ niteꞌ ráa rá ki̱vɨ̱ꞌ yukuán ―nkachiꞌ Jesús.

Juan 12:8

Chi sukuáni nééꞌ rá láꞌví jín ránoꞌó, soo nuꞌuꞌ chi nsáꞌ nɨ́ɨ́nkání kuneeꞌ ni̱ꞌ jín ránoꞌó ―nkachiꞌ Jesús.

Juan 13:33

’Ránoꞌó, ya̱ kúvi kuéntáꞌ se̱ꞌya ni̱ꞌ, vitan jee yakuꞌ ni tiempúꞌ ka̱ꞌ íyó kuneeꞌ ni̱ꞌ jín ránoꞌó. Jee kuíre nanukú rán nuꞌuꞌ, soo kuéntáꞌ ya̱ nkachiꞌ ni̱ꞌ nu̱u̱nꞌ rá te̱e kúñáꞌnú nu̱u̱nꞌ ñɨvɨ Israel, jee suni sukuán káchíꞌ ni̱ꞌ nu̱u̱nꞌ rán vitan ya̱: Nu̱u̱nꞌ kɨ̱ꞌɨ̱nꞌ ni̱ꞌ, jee nkúvi kɨ̱ꞌɨ̱nꞌ rán.

Juan 16:28

Nkene ni̱ꞌ va̱ji ni̱ꞌ ne̱ nu̱u̱nꞌ maá Tátáꞌ ni̱ꞌ, jee va̱ji ni̱ꞌ iniꞌ ñɨ̱vɨ́ yaꞌá. Jee vitan jee kene ni̱ꞌ iniꞌ ñɨ̱vɨ́ yaꞌá, jee kɨ̱noꞌonꞌ tuku ni̱ꞌ nu̱u̱nꞌ Tátáꞌ ni̱ꞌ ―nkachiꞌ Jesús.

Juan 16:7

Soo káchíꞌ ni̱ꞌ ya̱ naáꞌ nu̱u̱nꞌ rán ya̱ va̱ꞌa ka̱ꞌ kúvi nu̱u̱nꞌ ránoꞌó ya̱ kɨ̱ꞌɨ̱nꞌ noꞌonꞌ ni̱ꞌ, chi retánꞌ nkɨ̱ꞌɨ́nꞌ ni̱ꞌ, jee nsáꞌ kiji maáréꞌ ya̱ chineí chituvi re̱ꞌ nachuꞌun neí re̱ꞌ iniꞌ ánímaꞌ rán. Soo retú kɨ̱ꞌɨ̱nꞌ ni̱ꞌ, jee chuichí ni̱ꞌ re̱ꞌ kiji re̱ꞌ nu̱u̱nꞌ ránoꞌó.

Juan 17:11

’Jee nsáꞌ kuneeꞌ ni̱ꞌ ka̱ꞌ iniꞌ ñɨ̱vɨ́ yaꞌá. Jee suviráa kino̱o ráa kuneeꞌ ráa iniꞌ ñɨ̱vɨ́ yaꞌá, jee nuꞌuꞌ chi kua̱najiaaꞌ ni̱ꞌ nu̱u̱nꞌ nú, Tátáꞌ ni̱ꞌ ya̱ ííꞌ nasɨ́kuitɨꞌ. Jee jíkánꞌ táꞌvíꞌ ni̱ꞌ nu̱u̱nꞌ nú ya̱ kumaꞌñu kusava nú ráa jín fuersáꞌ ííꞌ nú ya̱ ntaji nú nu̱u̱nꞌ ni̱ꞌ, sáva saꞌá nú ya̱ ɨɨn ni kuvi ráa kuéntáꞌ kua̱ꞌ maánú jín nuꞌuꞌ.

Juan 17:13

’Soo vitan jee kua̱najiaaꞌ ni̱ꞌ nu̱u̱nꞌ nééꞌ nú, soo ni nééꞌ ni̱ꞌ ntíꞌ ka̱ꞌ iniꞌ ñɨ̱vɨ́ yaꞌá jee káchíꞌ ni̱ꞌ rá tu̱ꞌun yaꞌá, sáva chitú ya̱ kusɨ̱ɨ̱ꞌ nasɨ́kuitɨꞌ iniꞌ ánímaꞌ ráa, kuéntáꞌ kúsɨ́ɨꞌ iniꞌ nuꞌuꞌ.

Juan 3:29

Chi te̱e tánáꞌá ví ya̱ íyó re̱ꞌ jín ñaꞌan tánáꞌá jín re̱ꞌ. Soo te̱e ya̱ ma̱ni̱ꞌ jín te̱e tánáꞌá vá jee íñɨ́ re̱ꞌ jín te̱e tánáꞌá vá jee tésóꞌo re̱ꞌ rá tu̱ꞌun káꞌánꞌ‑a. Jee kúsɨ́ɨꞌ nasɨ́kuitɨꞌ iniꞌ re̱ꞌ tésóꞌo re̱ꞌ ya̱ káchíꞌ te̱e tánáꞌá vá. Saájee suni sukuán chítú ya̱ kúsɨ́ɨꞌ iniꞌ ni̱ꞌ.

Hechos 1:9

Sáá nnɨꞌɨ nkachiꞌ re̱ꞌ tu̱ꞌun yaꞌá, ni néꞌyá ráa re̱ꞌ, jee nxi̱náa Ndiosíꞌ re̱ꞌ súkún. Jee nki̱vɨ re̱ꞌ nu̱u̱nꞌ vi̱ko̱ꞌ jee ntu ka̱ꞌ niniꞌ ráa maa.

Hechos 14:23

Jee ñani Pablo jín Bernabé rá te̱e kúñáꞌnú, sáva kosoꞌ rává nu̱u̱nꞌ ta grupo rá ñɨvɨ kúneí iniꞌ ráa Jesús. Jee nneeꞌ niteꞌ ráa sáá nkaꞌanꞌ ráa jín Ndiosíꞌ, sáva nxi̱nóo ráa rává naꞌá I̱toꞌoꞌ‑ó, ya̱ kúneí iniꞌ ráa, sáva nachituvi re̱ꞌ ráa.

Hechos 3:21

Jee íyó kino̱o Cristo ne̱ súkún, ne̱ tiempúꞌ nasástákoo Ndiosíꞌ nujiáá nɨꞌɨ, sánikua̱ꞌ nkachiꞌ re̱ꞌ tu̱ꞌun ya̱ njiáꞌa re̱ꞌ sákachiꞌ rá te̱e nákani tu̱ꞌun kéne yuꞌú re̱ꞌ, ne̱ tiempúꞌ nasɨ́kuitɨꞌ. Yɨ́tíñú ráa nu̱u̱nꞌ Ndiosíꞌ.

1 Corintios 7:5

Jee saáva koto kúsáꞌán rán maárán nu̱u̱nꞌ te̱e kúvi yɨɨ́ rán, áxí nu̱u̱nꞌ ñaꞌan ya̱ kúvi ñasɨ́ꞌɨ́ rán. Kua̱chi retú natúꞌún ni núvíꞌ rán ya̱ nsáꞌ nune̱ꞌén rán yakuꞌ tiempúꞌ sáva kɨtíñú rán nu̱u̱nꞌ kaꞌanꞌ rán jín Ndiosíꞌ. Jee kuíre natuꞌva tuku rán táꞌán rán, sáva ntu sikúvi Satanás iniꞌ rán jee kusi̱kɨ́ iniꞌ rán jie̱ꞌe̱ꞌ kumaniꞌ rán nakeꞌen rán maárán.

2 Corintios 11:2

Chi ñúꞌún kuíñɨ́ iniꞌ ni̱ꞌ néꞌyá ni̱ꞌ ránoꞌó, sáni kuíñɨ́ iniꞌ maá Ndiosíꞌ néꞌyá re̱ꞌ ránoꞌó. Chi nsa̱ꞌá ni̱ꞌ kuéntáꞌ te̱e jíka na̱ꞌvi̱ꞌ, chi njia̱ꞌayuꞌú ni̱ꞌ ku̱ꞌva ni̱ꞌ ránoꞌó nu̱u̱nꞌ métúꞌún Cristo, kuéntáꞌ kúvi re̱ꞌ yɨɨ́ rán, ku̱ꞌva ni̱ꞌ ránoꞌó nu̱u̱nꞌ re̱ꞌ kuéntáꞌ jiáꞌa ráa ɨɨn ñaꞌan núún íyó ninuꞌun nu̱u̱nꞌ yɨɨ́ ña.

2 Corintios 11:27

Tiñu yɨ́ɨ́ nsa̱ꞌá ni̱ꞌ, jee nsa̱tíñú ni̱ꞌ ne̱ nkui̱tá ni̱ꞌ. Kue̱ꞌe̱ꞌ íchí ntu nkíxíꞌ ni̱ꞌ. Kéꞌín íchí niso̱ko ni̱ꞌ jee nichiꞌ ni̱ꞌ nute. Kéꞌín íchí nneeꞌ niteꞌ ni̱ꞌ. Nkuijin ni̱ꞌ jee nkumaniꞌ saꞌma kuꞌun ni̱ꞌ.

2 Corintios 6:5

jín nu̱u̱nꞌ ya̱ njia̱ꞌa ñɨvɨ ránuꞌuꞌ, jín nu̱u̱nꞌ ya̱ nchiꞌi ñɨvɨ ránuꞌuꞌ iniꞌ veka̱a, jín nu̱u̱nꞌ ya̱ nnenta kue̱ꞌe̱ꞌ ñɨvɨ si̱kɨ̱ꞌ ránuꞌuꞌ ya̱ nukú ráa tuntíxín jín ránꞌ, jín nu̱u̱nꞌ tiñu véi nsa̱ꞌá ránꞌ, jín nu̱u̱nꞌ kue̱ꞌe̱ꞌ íchí ntu nkixiꞌ va̱ꞌa ránꞌ, jín nu̱u̱nꞌ ya̱ nneeꞌ niteꞌ ránꞌ,

Apoclipsis 19:7

¡Na̱ ka̱ꞌ kusɨ̱ɨ̱ꞌ iniꞌ‑ó, jee sɨ̱ɨ̱ꞌ kuvi iniꞌ ánímaꞌ‑ó, nakuetúꞌún‑ó re̱ꞌ chi máá kúñáꞌnú kúvi re̱ꞌ! Chi ya̱ nkenta viko tánáꞌá maáréꞌ ya̱ kuvi Lanchi Lúlí, jee nkenta tana̱ꞌá re̱ꞌ. Jee rá ñɨvɨ yɨ́ꞌɨ́ xi̱ntíín Ndiosíꞌ kúvi ráa kuéntáꞌ kúvi ñaꞌan ya̱ ya íyó tu̱ꞌva ña ya̱ tana̱ꞌá ña jín re̱ꞌ.

Apoclipsis 21:9

Jee ɨɨn táꞌán rá ni uxáꞌ najiáꞌáꞌ ííꞌ ya̱ ínaꞌá ni uxáꞌ rá ko̱ꞌo̱ꞌ ya̱ ñúꞌún chitú ni uxáꞌ rá tu̱nóꞌó koo nu̱u̱nꞌ nɨ́ꞌɨ vá, nkenta re̱ꞌ nu̱u̱nꞌ ni̱ꞌ, jee nkachiꞌ re̱ꞌ: ―Neꞌenꞌ, jee xinéꞌénꞌ ni̱ꞌ noꞌó ñaꞌan ya̱ tana̱ꞌá ña, jee kuvi ña ñasɨ́ꞌɨ́ maáréꞌ ya̱ kúvi re̱ꞌ Lanchi Lúlí Ndiosíꞌ ―nkachiꞌ najiáꞌáꞌ ííꞌ vá.