Lucas 15:24 - Mixteco del suroeste de Tlaxiaco Oaxaca

²⁴ Chi se̱ꞌya yɨ́ɨ́ ni̱ꞌ yaꞌá jee kuéntáꞌ ya̱ ni̱ꞌi̱ꞌ‑i, jee nna̱tekuꞌ‑u, chi kuéntáꞌ nsu̱kuíta ni̱ꞌ maa jee vitan nna̱niꞌinꞌ ni̱ꞌ maa”, nkachiꞌ re̱ꞌ. Jee nka̱jiéꞌé ráa kúsɨ́ɨꞌ iniꞌ ráa viko sáꞌá ráa.

Lucas 15:24 ပူးပေါင်းရင်းမြစ်များ

Génesis 45:28

Saájee nkachiꞌ Israel (Jacob): ―Ya nkuvi suꞌva, tékúꞌ i̱i̱ꞌ se̱ꞌya yɨ́ɨ́ ni̱ꞌ José. ¡Kɨ̱ꞌɨ̱nꞌ ni̱ꞌ kɨ̱ne̱ꞌyá ni̱ꞌ re̱ꞌ ne̱ ntiáꞌan ka̱ꞌ kuviꞌ ni̱ꞌ!

Mateo 8:22

Soo nkachiꞌ Jesús nu̱u̱nꞌ‑u: ―Kunikɨnꞌ nuꞌuꞌ, ku̱ꞌva nú ya̱ rá ñɨvɨ kuéntáꞌ níꞌiꞌ ráa nu̱u̱nꞌ Ndiosíꞌ kɨ̱se̱ꞌí ráa rá ni̱yɨ ráa ―nkachiꞌ Jesús.

Marcos 8:22

I̱ña̱jée nkenta ráa ñuunꞌ Betsaida. Jee nki̱naka rá ñɨvɨ ɨɨn te̱e kuáá nu̱u̱nꞌ Jesús jee ni̱ka̱nꞌ táꞌvíꞌ ráa nu̱u̱nꞌ re̱ꞌ, ya̱ sikáchiꞌi re̱ꞌ te̱e vá.

Lucas 10:19

Kune̱ꞌyá rán, ntaji ni̱ꞌ nu̱u̱nꞌ ránoꞌó tiñu ñáꞌnú ííꞌ níꞌin níso ni̱ꞌ ya̱ kuvi kua̱ñu̱ꞌ ránú ko̱o̱ꞌ jín ti̱suꞌmaꞌ, jín ya̱ suni kuneí rán nu̱u̱nꞌ nɨꞌɨ fuersáꞌ rá kui̱ꞌna̱ꞌ ya̱ nkenta si̱kɨ̱ꞌ Ndiosíꞌ jee ni ɨɨn ntu̱náꞌ kúvi xtufíꞌ ránoꞌó.

Lucas 15:23

Jee kɨ̱keꞌen rán ɨɨn chelu máá nnañu jee kaꞌniꞌ rán maa kajiꞌ‑ó, chi saꞌá‑ó viko nusɨ̱ɨ̱ꞌ iniꞌ‑ó.

Lucas 15:25

’Jee se̱ꞌya yɨ́ɨ́ ñáꞌnú re̱ꞌ, íyó‑o nu̱u̱nꞌ tiñu sáꞌá‑a nu̱u̱nꞌ kuꞌúꞌ, jee sáá va̱niji‑i nnu̱yatin‑i veꞌi‑i, nteso̱ꞌo‑o ya̱ kuvi yaaꞌ jín ya̱ kátiéꞌé rá ñɨvɨ.

Lucas 15:32

Soo jíniñúꞌún ya̱ saꞌá viko yaꞌá vitan jee nusɨ̱ɨ̱ꞌ iniꞌ‑ó, chi ñaniꞌ nú yaꞌá kuéntáꞌ níꞌiꞌ‑i, jee nna̱tekuꞌ‑u, chi nsu̱kuíta ni̱ꞌ maa, jee vitan nna̱niꞌinꞌ ni̱ꞌ maa”, nkachiꞌ tátáꞌ‑a ―nkachiꞌ Jesús.

Lucas 15:4

―Retú néni ɨɨn ránoꞌó kúmí‑i ɨɨn sientúꞌ (100) lanchi jee sukuíta‑a ɨɨn rátíꞌ, jee, ¿á ntu su xínóo‑o rá ni kúmíxiko xa̱ꞌu̱nꞌ ku̱mi̱ꞌ (99) ka̱ꞌ rátíꞌ vá nu̱u̱nꞌ kuꞌúꞌ, jee kɨ̱nanukú‑u lanchi ya̱ nsu̱kuíta ti̱ꞌ maátíꞌ nekuaꞌ naniꞌinꞌ‑i ti̱ꞌ rúja?

Lucas 19:10

Chi nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, va̱ji ni̱ꞌ nánukú ni̱ꞌ rá ñɨvɨ súkuíta ráa maáráa síkɨ́naanꞌ ráa maáráa jee sáva sikáku ni̱ꞌ ráa ―nkachiꞌ Jesús.

Lucas 9:60

Jee nkachiꞌ re̱ꞌ nu̱u̱nꞌ‑u: ―Ku̱ꞌva nú ya̱ rá ñɨvɨ kuéntáꞌ níꞌiꞌ ráa nu̱u̱nꞌ Ndiosíꞌ kɨ̱se̱ꞌí ráa rá ni̱yɨ ráa. Soo noꞌó, kunikɨnꞌ nuꞌuꞌ jee kachitu̱ꞌún nú na̱ja ki̱vɨ ñɨvɨ xi̱ntíín Ndiosíꞌ tatúníꞌ re̱ꞌ nu̱u̱nꞌ ráa ―nkachiꞌ Jesús.

Juan 11:25

Jee nkachiꞌ Jesús nu̱u̱nꞌ ña: ―Nuꞌuꞌ kúvi ya̱ sáꞌá ni̱ꞌ ya̱ natekuꞌ i̱i̱ꞌ ñɨvɨ nako̱o ráa kene ráa nteñu rá níꞌiꞌ jín ya̱ sáꞌá ni̱ꞌ ya̱ kutekuꞌ ráa nɨ́ɨ́nkání jín Ndiosíꞌ. Jee rá ñɨvɨ ya̱ kúneí iniꞌ ráa nuꞌuꞌ, jee súnika̱ꞌ kuviꞌ ráa, jee kutekuꞌ ráa jín Ndiosíꞌ nɨ́ɨ́nkání.

Juan 5:21

’Chi kuéntáꞌ naxinákóo Tátáꞌ ni̱ꞌ rá níꞌiꞌ, jee saꞌá re̱ꞌ ya̱ natekuꞌ i̱i̱ꞌ tuku ráa, jee suni sukuán maáníꞌ, ya̱ kúvi ni̱ꞌ Se̱ꞌya re̱ꞌ, chi suni saꞌá ni̱ꞌ ya̱ natekuꞌ i̱i̱ꞌ néni ɨɨn ya̱ kuíni maáníꞌ.

Romanos 11:15

Chi jie̱ꞌe̱ꞌ ya̱ nku̱ichi iniꞌ Ndiosíꞌ rá ñɨvɨ ñuunꞌ Israel jee sukuán jee nkenta nnuma̱ni̱ꞌ re̱ꞌ jín rá inka ñɨvɨ ñɨ̱vɨ́. Jee jie̱ꞌe̱ꞌ sukuán, ¿na̱ja kuvi sáá nakeꞌen tuku re̱ꞌ ráa kuvi ráa ñɨvɨ re̱ꞌ, résa? Chi sukuán kúvi kuéntáꞌ natekuꞌ ráa kene ráa nteñu rá níꞌiꞌ.

Romanos 12:15

Jee kusɨ̱ɨ̱ꞌ iniꞌ rán jín rá ñɨvɨ ya̱ kúsɨ́ɨꞌ iniꞌ ya̱ va̱ꞌa kua̱ꞌa̱nꞌ jín‑i, jee jiaku iniꞌ rán jín rá ñɨvɨ jiáku iniꞌ.

Romanos 6:11

Jee suni sukuán ránoꞌó kuꞌun iniꞌ rán kuéntáꞌ ya̱ ya ni̱ꞌi̱ꞌ rán nu̱u̱nꞌ kua̱chi, soo tékúꞌ rán sáva kɨtíñú rán nu̱u̱nꞌ Ndiosíꞌ jie̱ꞌe̱ꞌ yɨ́ꞌɨ́ rán nu̱u̱nꞌ Cristo Jesús.

Romanos 6:13

Jee ni koto jiáꞌa rán ka̱ꞌ maárán nu̱u̱nꞌ kua̱chi sáva ntu kuatíñú rán yɨkɨkúñu rán saꞌá rán tiñu ya̱ ntu íyó na̱a̱ꞌ. Chisaꞌ ku̱ꞌva rán maárán nu̱u̱nꞌ Ndiosíꞌ, kuéntáꞌ ɨɨn ñɨvɨ ya̱ níꞌiꞌ jee nna̱tekuꞌ‑u nkene‑e nteñu rá ni̱yɨ. Jee ku̱ꞌva rán yɨkɨkúñu rán nu̱u̱nꞌ Ndiosíꞌ sáva kuvi‑i ɨɨn nantíñú ya̱ kuatíñú re̱ꞌ saꞌá re̱ꞌ tiñu na̱a̱ꞌ.

Romanos 8:2

Chi nku̱neí Ta̱chi̱ꞌ Ííꞌ Ndiosíꞌ sáꞌá re̱ꞌ ya̱ kutekuꞌ‑ó jín Ndiosíꞌ, jie̱ꞌe̱ꞌ yɨ́ꞌɨ́‑ó nu̱u̱nꞌ Cristo Jesús, jee nákani núne re̱ꞌ ránoꞌó ya̱ nsáꞌ kɨꞌɨ‑ó ka̱ꞌ xi̱ntíín kua̱chi jín nsáꞌ kenta‑ó kuéntáꞌ kuviꞌ‑ó nu̱u̱nꞌ Ndiosíꞌ.

1 Corintios 12:26

Chi retú nóꞌo ɨɨn rá pedasúꞌ yɨkɨkúñu‑ó tu̱nóꞌó, jee kua̱íyó nɨ́ɨ́nkáꞌnú rá pedasúꞌ yɨkɨkúñu‑ó nóꞌo jín‑i. Jee retú ɨɨn pedasúꞌ yɨkɨkúñu‑ó ni̱ꞌi̱nꞌ‑i ya̱ ñáꞌnú‑u, jee suni ne̱ kua̱íyó rá pedasúꞌ yɨkɨkúñu‑ó núsɨ́ɨꞌ iniꞌ ráa jín‑i ranika̱ꞌ.

Efesios 2:1

Jee ránoꞌó, ya̱ níꞌiꞌ rán nu̱u̱nꞌ Ndiosíꞌ nékúvi jie̱ꞌe̱ꞌ njiáꞌa rán nu̱u̱nꞌ ya̱ tátúníꞌ Ndiosíꞌ jín jie̱ꞌe̱ꞌ rá kua̱chi nsa̱ꞌá rán.

Efesios 2:5

Jee asúnika̱ꞌ nkuvi‑ó kuéntáꞌ ñɨvɨ níꞌiꞌ nu̱u̱nꞌ re̱ꞌ, jie̱ꞌe̱ꞌ ya̱ njia̱ꞌa‑ó nu̱u̱nꞌ ya̱ tátúníꞌ Ndiosíꞌ, soo nsa̱ꞌá re̱ꞌ ya̱ kutekuꞌ‑ó nɨ́ɨ́nkání jín Cristo. (Chi jie̱ꞌe̱ꞌ ya̱ íyó mániꞌ iniꞌ re̱ꞌ néꞌyá re̱ꞌ yó nna̱tavaꞌ re̱ꞌ yó nu̱u̱nꞌ kua̱chi‑ó nsi̱káku re̱ꞌ yó.)

Efesios 5:14

Jee jie̱ꞌe̱ꞌ vá káchíꞌ tu̱ꞌun yaꞌá suꞌva: Noto, noꞌó ya̱ kíxíꞌ iniꞌ nú, jee nako̱o nú nteñu rá ñɨvɨ ya̱ kúvi kuéntáꞌ ñɨvɨ níꞌiꞌ, jee Cristo stúúnꞌ re̱ꞌ ñuꞌunꞌ re̱ꞌ iniꞌ ánímaꞌ nú.

Colosenses 2:13

Jee ránoꞌó chi nkuvi rán kuéntáꞌ ñɨvɨ níꞌiꞌ nu̱u̱nꞌ Ndiosíꞌ jie̱ꞌe̱ꞌ kua̱chi sáꞌá rán, jín jie̱ꞌe̱ꞌ chi ntu níso yɨkɨkúñu rán seña Ndiosíꞌ, chi nsú ñɨvɨ Israel ví rán. Soo vitan chi nna̱xtekúꞌ re̱ꞌ ránoꞌó nɨ́ɨ́nkání jín Cristo, sáá nna̱xtekúꞌ re̱ꞌ maa, chi nne̱káꞌnú iniꞌ re̱ꞌ jie̱ꞌe̱ꞌ nta̱ká rá kua̱chi rán.

1 Timoteo 5:6

Soo ñaꞌan náꞌví núkú ya̱ sɨ́ɨ́ꞌ iniꞌ, íyó kuéntáꞌ ya̱ níꞌiꞌ ña nu̱u̱nꞌ Ndiosíꞌ, sú tékúꞌ ña.

Judas 1:12

Jee rá ñɨvɨ yaꞌá ya̱ xínéꞌénꞌ tu̱ntúꞌún, jee sáá yájíꞌ tútú rán jie̱ꞌe̱ꞌ ya̱ ñúnúunꞌ rán ɨɨn inka táꞌán rán, jee máá ñɨvɨ kini sátéꞌén kúvi ráa sáá yájíꞌ ráa jín rán súka̱ꞌ ntu kúkanuun ráa. Jee kua̱chi maáráa kúmí ráa. Ntu íyótiñu ráa kuéntáꞌ ntu íyótiñu rá vi̱ko̱ꞌ ntu níso sa̱vi̱ꞌ ya̱ xínéchi ta̱chi̱ꞌ víjin maa cháꞌá chúkuán. Jee suni kúvi ráa kuéntáꞌ kúvi yutun númáꞌ ya̱ ni ntu jiáꞌa‑á ya̱ vixíꞌ, sáá kenta tiempúꞌ ya̱ kúun ya̱ vixíꞌ rá yutun. Jee sukuán kúvi ráa kuéntáꞌ yutun níꞌiꞌ ya̱ ne̱ yoꞌo‑o ntavaꞌ ñɨvɨ maa jee kuéntáꞌ ni̱ꞌi̱ꞌ‑i u̱vi̱ꞌ íchí jee ni ntu̱né íyó na̱ja nene‑e ka̱ꞌ.

Apoclipsis 3:1

’Jee tee nú nu̱u̱nꞌ tutuꞌ kɨ̱ꞌɨ̱nꞌ nu̱u̱nꞌ ya̱ kúñáꞌnú nu̱u̱nꞌ grupo rá ñɨvɨ ya̱ jínúꞌ iniꞌ ráa nuꞌuꞌ, jee suviráa ví ya̱ nééꞌ ráa nu̱u̱nꞌ ñuunꞌ Sardes: “Nuꞌuꞌ ví ya̱ kúmí ni̱ꞌ ni uxáꞌ espíritu Ndiosíꞌ ya̱ ntu túvi nijinꞌ jín ni uxáꞌ tiu̱u̱nꞌ. Suꞌva káchíꞌ nuꞌuꞌ: Jíníꞌ ni̱ꞌ rá tiñu sáꞌá rán, jee súka̱ꞌ káchíꞌ rá ñɨvɨ ya̱ tékúꞌ rán, soo nu̱u̱nꞌ nuꞌuꞌ chi kuéntáꞌ ni̱yɨ kúvi rán.