Lucas 1:32 - Mixteco del suroeste de Tlaxiaco Oaxaca

³² Jee kuñáꞌnú re̱ꞌ, jee kuna̱ní re̱ꞌ Se̱ꞌya Ndiosíꞌ máá ñáꞌnú ka̱ꞌ nu̱u̱nꞌ nɨꞌɨ. Jee saꞌá I̱toꞌoꞌ‑ó Ndiosíꞌ ya̱ tatúníꞌ re̱ꞌ, kuéntáꞌ kua̱ꞌ nta̱túníꞌ David ya̱ kúvi tátáꞌ jííꞌ ichiyúkúnꞌ re̱ꞌ.

Lucas 1:32 ပူးပေါင်းရင်းမြစ်များ

Mateo 1:1

Yaꞌá ví rá súví rá ñɨvɨ tataꞌ ichiyúkúnꞌ yanaꞌán nu̱u̱nꞌ nkiji Jesús nkaku re̱ꞌ, ya̱ nísotíñú re̱ꞌ ya̱ kúvi re̱ꞌ máá Cristo [ya̱ ñani Ndiosíꞌ re̱ꞌ sáva natavaꞌ re̱ꞌ ñɨvɨ nu̱u̱nꞌ kua̱chi ráa]. Jee kúvi Jesús nu̱u̱nꞌ tataꞌ ichiyúkúnꞌ nkene nu̱u̱nꞌ David jee nu̱u̱nꞌ tataꞌ ichiyúkúnꞌ váji nu̱u̱nꞌ Abraham.

Mateo 12:42

Jee suni máá ñaꞌan ya̱ nta̱túníꞌ ña nu̱u̱nꞌ ɨɨn ñuunꞌ ichi sur, jee suni natekuꞌ ña jín rá ñɨvɨ íyó tiempúꞌ vitan ki̱vɨ̱ꞌ sanáaꞌ Ndiosíꞌ kua̱chi jie̱ꞌe̱ꞌ rá ñɨvɨ, jee sijíta ña rá ñɨvɨ íyó tiempúꞌ vitan, chi nkiji ña ne̱ íká nasɨ́kuitɨꞌ sáva teso̱ꞌo ña rá tu̱ꞌun níchí nkaꞌanꞌ Salomón ya̱ nta̱túníꞌ ñuunꞌ Israel yanaꞌán víꞌí. Soo ¡kune̱ꞌyá rán!, íyó ni̱ꞌ jín rán yaꞌá jee máá kúñáꞌnú nasɨ́kuitɨꞌ ni̱ꞌ ka̱ꞌ nsú káꞌ Salomón [jee ntu nákani iniꞌ rán].

Mateo 28:18

Saájee ña̱kuyatin Jesús nu̱u̱nꞌ ráa, jee nkachiꞌ re̱ꞌ nu̱u̱nꞌ ráa: ―Ntaji Tátáꞌ ni̱ꞌ Ndiosíꞌ ntáká tiñu ñáꞌnú kunisotíñú ni̱ꞌ antivɨ́ súkún jín iniꞌ ñɨ̱vɨ́ yaꞌá.

Mateo 3:11

’Jee nuꞌuꞌ chi máá naáꞌ nijia ya̱ síkuánuté ni̱ꞌ ránoꞌó jín nute kuíí ni, ya̱ stúvi ya̱ nna̱kani nijia iniꞌ rán nu̱u̱nꞌ Ndiosíꞌ jie̱ꞌe̱ꞌ kua̱chi rán. Soo ya̱ta̱ꞌ ni̱ꞌ kiji ɨɨn ya̱ kúñáꞌnú nasɨ́kuitɨꞌ re̱ꞌ ka̱ꞌ nsú káꞌ nuꞌuꞌ, ya̱ ni ntu̱né íyó ni̱ꞌi̱nꞌ ni̱ꞌ ya̱ kunaꞌá ni̱ꞌ sú kua̱chi ni̱jia̱nꞌ re̱ꞌ. Jee maáréꞌ chi sikuánuté re̱ꞌ sava ránoꞌó jín Ta̱chi̱ꞌ Ííꞌ re̱ꞌ sáva kɨꞌɨ‑ɨ ánímaꞌ ránú ya̱ nákani iniꞌ rán, jee rá inka rán, ya̱ ntu nákani iniꞌ rán, sikuánuté re̱ꞌ jín ñuꞌunꞌ xinóꞌo re̱ꞌ ránoꞌó.

Marcos 14:61

Soo níín íyó re̱ꞌ, jee ntu̱náꞌ nnáxiníkó re̱ꞌ. Jee inka íchí ka̱ꞌ ni̱ka̱tu̱ꞌún tuku su̱tu̱ꞌ kúñáꞌnú ka̱ꞌ maa, jee nkachiꞌ re̱ꞌ nu̱u̱nꞌ‑u: ―Noꞌó, ¿á kúvi nú Cristo, ya̱ kúvi nú Se̱ꞌya Ndiosíꞌ ííꞌ, ya̱ netuꞌ kúvi re̱ꞌ?

Marcos 5:7

Jee ni̱ꞌin xá nka̱najíín re̱ꞌ nsa̱ꞌá ta̱chi̱ꞌ néꞌí kákini, jee nkachiꞌ‑i: ―¿Na̱kui chi kíní nú maánú nteñu ráníꞌ, Jesús, Se̱ꞌya Ndiosíꞌ, máá kúñáꞌnú nasɨ́kuitɨꞌ nu̱u̱nꞌ kua̱íyó? Jíkánꞌ táꞌvíꞌ ni̱ꞌ nu̱u̱nꞌ noꞌó ichinúúnꞌ Ndiosíꞌ, ya̱ koto xínóꞌo nú nuꞌuꞌ.

Lucas 1:15

chi ichinúúnꞌ Ndiosíꞌ kuvi re̱ꞌ ɨɨn te̱e kúñáꞌnú. Jee ni nsáꞌ koꞌo re̱ꞌ nixiꞌ nu̱xi uva ni nixiꞌ xéénꞌ, jee ne̱ kɨꞌɨ chitú Ta̱chi̱ꞌ Ííꞌ Ndiosíꞌ iniꞌ re̱ꞌ ne̱ ñúchíji nánáꞌ re̱ꞌ maáréꞌ.

Lucas 1:35

Jee nna̱xiníkó najiáꞌáꞌ ííꞌ vá nu̱u̱nꞌ ña: ―Ta̱chi̱ꞌ Ííꞌ kiji‑i nu̱u̱nꞌ noꞌó, jee kiji fuersáꞌ níꞌin níso maá Ndiosíꞌ máá ñáꞌnú ka̱ꞌ nu̱u̱nꞌ nɨꞌɨ jee kenta‑a kikasɨꞌ kátɨ́‑ɨ noꞌó jee saꞌá‑a tiñu a̱nasɨ́ jín noꞌó. Jee saáva te̱e lúlí i̱i̱ꞌ ya̱ kaku vá kuna̱ní‑i Se̱ꞌya Ndiosíꞌ.

Lucas 1:76

Jee noꞌó, se̱ꞌya yɨ́ɨ́ lúlí ni̱ꞌ, ñani Ndiosíꞌ nó sáva kuvi nú ɨɨn te̱e ya̱ nakani nú tu̱ꞌun kene yuꞌú máá maá Ndiosíꞌ ya̱ máá ñáꞌnú re̱ꞌ ka̱ꞌ nu̱u̱nꞌ nɨꞌɨ. Chi xíꞌna nú kɨ̱ꞌɨ̱nꞌ nú kosoꞌ nú nu̱u̱nꞌ I̱toꞌoꞌ‑ó, sáva saꞌá tu̱ꞌva nú ánímaꞌ rá ñɨvɨ, jee kenta re̱ꞌ.

Lucas 3:16

Soo nkaꞌanꞌ Juan jee nkachiꞌ re̱ꞌ nu̱u̱nꞌ ntáká ráa: ―Nuꞌuꞌ chi, máá naáꞌ nijia ya̱ síkuánuté ni̱ꞌ ránoꞌó jín nute kuíí ni, soo íyó kiji ɨɨn ya̱ máá kúñáꞌnú nasɨ́kuitɨꞌ ka̱ꞌ nsú káꞌ nuꞌuꞌ, ya̱ ni ntu̱né íyó ni̱ꞌi̱nꞌ ni̱ꞌ nanají ni̱ꞌ ñɨɨn yɨ́ꞌɨ́ ni̱jia̱nꞌ yɨ́ꞌɨ́ jie̱ꞌe̱ꞌ re̱ꞌ. Jee maáréꞌ chi sikuánuté re̱ꞌ sava ránoꞌó jín Ta̱chi̱ꞌ Ííꞌ re̱ꞌ kɨꞌɨ‑ɨ ánímaꞌ ránú [ya̱ nákani iniꞌ rán], jee rá inka rán [ya̱ ntu nákani iniꞌ rán] sikuánuté re̱ꞌ jín ñuꞌunꞌ xinóꞌo re̱ꞌ ránoꞌó.

Lucas 6:35

’Soo kunu̱u̱nꞌ rán rá ñɨvɨ ya̱ túfíꞌ táꞌán ráa jín ránoꞌó jee saꞌá rán ya̱ váꞌa jín ráa. Jee ku̱ꞌvanúún rán nu̱u̱nꞌ ñɨvɨ sú ntu jíníꞌ rán ya̱ naniꞌinꞌ tuku rán maa. Jee máá ñáꞌnú ví ta̱ꞌvi̱ꞌ ni̱ꞌi̱nꞌ rán, jee kuvi rán se̱ꞌya Ndiosíꞌ máá ñáꞌnú ka̱ꞌ nu̱u̱nꞌ nɨꞌɨ, chi ñúnkúún iniꞌ re̱ꞌ rá ñɨvɨ ya̱ ntu jiáꞌa ráa ya̱ kútaꞌviꞌ ráa nu̱u̱nꞌ re̱ꞌ jín rá ñɨvɨ niváꞌa.

Juan 12:34

Saájee nna̱xiníkó rá ñɨvɨ nu̱u̱nꞌ re̱ꞌ: ―Ya nteso̱ꞌo ránꞌ ya̱ nu̱u̱nꞌ Tutuꞌ níso tu̱ꞌun ley Ndiosíꞌ káchíꞌ ya̱ máá Cristo kutekuꞌ‑u nɨ́ɨ́nkání. Jee, ¿na̱ja chi káchíꞌ nú íyó naneꞌen ráa maáréꞌ ya̱ nta̱jí Ndiosíꞌ re̱ꞌ nu̱u̱nꞌ ñɨ̱vɨ́ sáva kuvi Se̱ꞌya Ñɨvɨ nu̱u̱nꞌ kunintakaa? ¿Né ɨɨn kúvi maáréꞌ ya̱ nta̱jí Ndiosíꞌ re̱ꞌ nu̱u̱nꞌ ñɨ̱vɨ́ sáva kuvi re̱ꞌ Se̱ꞌya Ñɨvɨ rúja? ―nkachiꞌ ráa.

Juan 6:69

Jee ránuꞌuꞌ chi ya̱ ínúꞌ iniꞌ ránꞌ jee ya jíníꞌ ránꞌ ya̱ noꞌó vá ííꞌ ya̱ va̱ji ne̱ nu̱u̱nꞌ Ndiosíꞌ ―nkachiꞌ Pedro.

Hechos 16:17

Jee suviña níkɨ́nꞌ ña Pablo jín ránꞌ, jee kánajíín ña: ―Rá te̱e yaꞌá kúvi rá musúꞌ ya̱ jiátíñú Ndiosíꞌ, ya̱ kúñáꞌnú ka̱ꞌ nu̱u̱nꞌ nɨꞌɨ. Stékútu̱ꞌún ráa nu̱u̱nꞌ ránoꞌó na̱ja nanitáꞌvíꞌ rán ―nkachiꞌ ñasúchí vá.

Hechos 2:30

Jee nkuvi re̱ꞌ ɨɨn te̱e ya̱ nna̱kani tu̱ꞌun nkene yuꞌú Ndiosíꞌ. Jee nku̱káꞌnú iniꞌ re̱ꞌ ya̱ nchi̱sóyuꞌú Ndiosíꞌ nu̱u̱nꞌ re̱ꞌ, ya̱ koo ɨɨn te̱e ya̱ kuvi‑i ichiyúkúnꞌ ya̱ kene ne̱ nu̱u̱nꞌ maáréꞌ ya̱ kenta nakui̱ñɨ̱ꞌ te̱e vá nu̱u̱nꞌ tiñu nniso re̱ꞌ sáva kuneeꞌ‑e teyuꞌ ñáꞌnú tatúníꞌ‑i.

Hechos 2:36

―Saájee kukáꞌnú na̱a̱ꞌ iniꞌ ntáká ñɨvɨ tataꞌ Israel, ya̱ ñani Ndiosíꞌ Jesús yaꞌá ya̱ kuvi‑i I̱toꞌoꞌ‑ó jín ya̱ kuvi‑i Cristo, sáva natavaꞌ re̱ꞌ ñɨvɨ nu̱u̱nꞌ kua̱chi ráa. Jesús yaꞌá ví ya̱ nte̱kaa rán nu̱u̱nꞌ kurúsiꞌ jee ñaꞌniꞌ rán maa ―nkachiꞌ Pedro.

Hechos 7:48

Súnika̱ꞌ Ndiosíꞌ máá kúñáꞌnú ka̱ꞌ nu̱u̱nꞌ nɨꞌɨ ntu nééꞌ‑e iniꞌ veꞌi sáꞌá rá ñɨvɨ jín naꞌá ráa. Sukuán nkachiꞌ ɨɨn te̱e nna̱kani tu̱ꞌun nkene yuꞌú Ndiosíꞌ:

Romanos 1:4

Jee nstúvi Ta̱chi̱ꞌ Ííꞌ Ndiosíꞌ ya̱ Jesús kúvi re̱ꞌ Se̱ꞌya Ndiosíꞌ chi nna̱tekuꞌ i̱i̱ꞌ re̱ꞌ nkene re̱ꞌ nteñu rá ni̱yɨ, jín fuersáꞌ ííꞌ níso re̱ꞌ. Máá Jesús níso re̱ꞌ tiñu Cristo [ya̱ ñani Ndiosíꞌ re̱ꞌ tatúníꞌ re̱ꞌ nu̱u̱nꞌ nɨꞌɨ], ya̱ kúvi re̱ꞌ I̱toꞌoꞌ‑ó.

Apoclipsis 3:7

’Jee tee nú nu̱u̱nꞌ tutuꞌ kɨ̱ꞌɨ̱nꞌ nu̱u̱nꞌ ya̱ kúñáꞌnú nu̱u̱nꞌ grupo rá ñɨvɨ ya̱ jínúꞌ iniꞌ ráa nuꞌuꞌ, jee suviráa ví ya̱ nééꞌ ráa nu̱u̱nꞌ ñuunꞌ Filadelfia: “Nuꞌuꞌ vá i̱i̱ꞌ ni̱ꞌ jín nuꞌuꞌ vá na̱a̱ꞌ ni̱ꞌ. Ínaꞌá ni̱ꞌ nakáa David, ya̱ nísotíñú ni̱ꞌ kuéntáꞌ kua̱ꞌ nta̱túníꞌ re̱ꞌ nu̱u̱nꞌ nación Israel yanaꞌán. Saáva nuꞌuꞌ ví ya̱ jíne ni̱ꞌ nu̱u̱nꞌ ki̱vɨ rá ñɨvɨ nu̱u̱nꞌ tátúníꞌ ni̱ꞌ, jee ni ɨɨn ntu kuvi nakasɨꞌ maa. Jee nuꞌuꞌ nakasɨꞌ maa, jee ni ɨɨn ntu kúvi nakune maa. Suꞌva káchíꞌ nuꞌuꞌ: