Juan 21:15 - Mixteco del suroeste de Tlaxiaco Oaxaca

¹⁵ Sáá nkuvi nya̱siniꞌ ráa, jee nkachiꞌ Jesús nu̱u̱nꞌ Simón Pedro: ―Simón, se̱ꞌya Jonás, ¿á ñúnúunꞌ nú ka̱ꞌ nuꞌuꞌ nsú káꞌ rá yaꞌá? Jee nkachiꞌ Pedro nu̱u̱nꞌ re̱ꞌ: ―Saá I̱toꞌoꞌ, ya̱ jíníꞌ nú ya̱ ñúnúunꞌ ni̱ꞌ noꞌó. Jee nkachiꞌ Jesús nu̱u̱nꞌ re̱ꞌ: ―Kumí rá ñɨvɨ yɨ́ꞌɨ́ xi̱ntíín ni̱ꞌ ya̱ kúvi kuéntáꞌ rá lanchi lúlí ni̱ꞌ.

Juan 21:15 ပူးပေါင်းရင်းမြစ်များ

Génesis 33:13

Jee nna̱xiníkó Jacob nu̱u̱nꞌ Esaú: ―I̱toꞌoꞌ ni̱ꞌ, jíníꞌ nú ya̱ rá su̱chí kuáchí jee yúté ráa, jee náka ni̱ꞌ rá sa̱na̱ꞌ líꞌíꞌ jín rá vaca náka yɨ́kɨ́n rátíꞌ stítí rátíꞌ maa, jee retú xinúmíꞌ ni̱ꞌ rátíꞌ jee métúꞌún ki̱vɨ̱ꞌ ni jee kuvi kuviꞌ ntáká rá sa̱na̱ꞌ líꞌí chi jia̱ví rátíꞌ.

Mateo 10:37

Jee néni ɨɨn ñɨvɨ ya̱ ñúnúunꞌ‑u ka̱ꞌ tátáꞌ‑a áxí nánáꞌ‑a, nsú káꞌ nuꞌuꞌ, jee nsú ñɨvɨ ya̱ íyó ni̱ꞌi̱nꞌ‑i ya̱ kɨꞌɨ‑ɨ xi̱ntíín ni̱ꞌ, jee néni ɨɨn ñɨvɨ ya̱ ñúnúunꞌ‑u ka̱ꞌ se̱ꞌya yɨ́ɨ́‑ɨ áxí se̱ꞌya sɨ́ꞌɨ́‑ɨ, nsú káꞌ ya̱ ñúnúunꞌ nuꞌuꞌ, jee nsú ñɨvɨ ya̱ íyó ni̱ꞌi̱nꞌ‑i ya̱ kɨꞌɨ‑ɨ xi̱ntíín ni̱ꞌ.

Mateo 16:17

Saájee nkachiꞌ Jesús: ―Na̱ ka̱ꞌ netuꞌ ka̱ꞌ kúvi nú Simón, se̱ꞌya Jonás, chi ni ɨɨn ñɨvɨ ñunéꞌyúꞌ ntu̱ví nstúvi maa nu̱u̱nꞌ nú, chisaꞌ máá Tátáꞌ ni̱ꞌ Ndiosíꞌ ya̱ nééꞌ re̱ꞌ antivɨ́ súkún, ví ya̱ nstúvi maa nu̱u̱nꞌ noꞌó.

Mateo 18:10

’Jee koto kúníichiꞌ iniꞌ rán ni ɨɨn rá su̱chí lúlí yaꞌá. Chi nuꞌuꞌ káchíꞌ ni̱ꞌ nu̱u̱nꞌ rán, ya̱ rá najiáꞌáꞌ ííꞌ ya̱ íyó ne̱ antivɨ́ súkún, ya̱ kúmí ráa rá su̱chí lúlí yaꞌá, jee sukuáni íñɨ́ rá najiáꞌáꞌ vá ichinúúnꞌ Tátáꞌ ni̱ꞌ ya̱ íyó ne̱ antivɨ́ súkún nákani ráa jie̱ꞌe̱ꞌ rává.

Mateo 26:33

Soo nna̱xiníkó Pedro jee nkachiꞌ‑i: ―Súnika̱ꞌ ntáká ráa kininkava nayu̱ꞌví ráa jee xinóo ráa noꞌó, soo nuꞌuꞌ, chi ni nsáꞌ kininkava nayu̱ꞌví ni̱ꞌ jee ni nsáꞌ xinóo ni̱ꞌ noꞌó ―nkachiꞌ Pedro.

Mateo 26:35

Jee nkachiꞌ Pedro nu̱u̱nꞌ Jesús: ―Súnika̱ꞌ íyó kuviꞌ ni̱ꞌ jín noꞌó, soo ni nsáꞌ kachiꞌ ni̱ꞌ ya̱ ntu jíníꞌ ni̱ꞌ noꞌó ―nkachiꞌ Pedro, jee suni sukuán nkachiꞌ ntáká rá te̱e kútáꞌán jín Jesús ya̱ súkuáꞌa re̱ꞌ ráa.

Marcos 14:29

Saájee Pedro nkachiꞌ nu̱u̱nꞌ re̱ꞌ: ―Súnika̱ꞌ ntáká ráa kininkava nayu̱ꞌví jee xinóo ráa noꞌó, soo nuꞌuꞌ chi ntu̱ví.

Lucas 12:32

’Koto yúꞌví rán, ránoꞌó ya̱ kúvi rán kuéntáꞌ yakuꞌ lanchi ni̱ꞌ, chi Tátáꞌ rán Ndiosíꞌ kúváꞌa iniꞌ re̱ꞌ taji re̱ꞌ nu̱u̱nꞌ rán ya̱ ki̱vɨ rán xi̱ntíín re̱ꞌ nu̱u̱nꞌ tátúníꞌ re̱ꞌ nu̱u̱nꞌ rán.

Lucas 22:32

Soo nuꞌuꞌ jíkánꞌ táꞌvíꞌ ni̱ꞌ jie̱ꞌe̱ꞌ nú nu̱u̱nꞌ Ndiosíꞌ sáva níta ya̱ kúneí iniꞌ nú nuꞌuꞌ. Jee sáá nakani iniꞌ nú ya̱ nsa̱ꞌá nú jee nikó nú nu̱u̱nꞌ nuꞌuꞌ saájee nasáneí nú iniꞌ ánímaꞌ rá ñanitáꞌán nú kuiñɨ ni̱ꞌin ráa ―nkachiꞌ Jesús.

Juan 1:42

Saájee kua̱ꞌa̱nꞌ Andrés jín ñaniꞌ re̱ꞌ nu̱u̱nꞌ Jesús. Jee sáá niniꞌ Jesús Simón, jee nkachiꞌ re̱ꞌ: ―Noꞌó kúvi Simón, se̱ꞌya Jonás. Jee kuna̱ní nú Cefas ―nkachiꞌ Jesús. (Cefas kuíni káchíꞌ Pedro tu̱ꞌun griego.)

Juan 13:37

Jee nkachiꞌ Pedro nu̱u̱nꞌ re̱ꞌ: ―I̱toꞌoꞌ, ¿na̱ kuvi chi ntu kúvi kunikɨnꞌ ni̱ꞌ noꞌó ntañúꞌún? Chi íyó túꞌva ni̱ꞌ súka̱ꞌ kuviꞌ ni̱ꞌ jie̱ꞌe̱ꞌ nú ―nkachiꞌ Pedro.

Juan 16:27

Chi maá Tátáꞌ ni̱ꞌ kúvi ya̱ ñúnúunꞌ re̱ꞌ ránoꞌó, chi jie̱ꞌe̱ꞌ ni ka̱ꞌ ñúnúunꞌ rán nuꞌuꞌ, jee suni jínúꞌ iniꞌ rán ya̱ ne̱ nu̱u̱nꞌ maá Tátáꞌ ni̱ꞌ Ndiosíꞌ nkene ni̱ꞌ va̱ji ni̱ꞌ.

Juan 21:12

Saájee nkachiꞌ Jesús nu̱u̱nꞌ ráa: ―Neꞌenꞌ rán, kasini‑órán ―nkachiꞌ Jesús nu̱u̱nꞌ ráa. Jee ni ɨɨn rá te̱e ya̱ súkuáꞌa re̱ꞌ ráa ntu̱ví nkíji iniꞌ ráa katu̱ꞌún ráa né ɨɨn ví re̱ꞌ, chi jíníꞌ ráa ya̱ maáréꞌ kúvi I̱toꞌoꞌ.

Juan 21:7

Saájee te̱e ya̱ súkuáꞌa Jesús maa ya̱ nñunu̱u̱nꞌ re̱ꞌ nkachiꞌ te̱e vá nu̱u̱nꞌ Pedro: ―¡Máá I̱toꞌoꞌ‑ó kúvi‑i! Sáá nteso̱ꞌo Simón Pedro ya̱ suvire̱ꞌ ví I̱toꞌoꞌ, jee nna̱ku̱ꞌun Pedro saꞌma re̱ꞌ (chi ntavaꞌ re̱ꞌ maa), jee íchíni nnava re̱ꞌ nu̱u̱nꞌ nute.

Juan 8:42

Saájee nkachiꞌ Jesús nu̱u̱nꞌ ráa: ―Jee retánꞌ Ndiosíꞌ kúvi re̱ꞌ Tátáꞌ rán, jee kunu̱u̱nꞌ rán nuꞌuꞌ nékúvi. Chi nuꞌuꞌ, jee ne̱ nu̱u̱nꞌ Ndiosíꞌ nkene ni̱ꞌ va̱ji ni̱ꞌ. Jee nsú jie̱ꞌe̱ꞌ nkuini maáníꞌ jee va̱ji ni, chisaꞌ maáréꞌ nta̱jí re̱ꞌ nuꞌuꞌ va̱ji ni̱ꞌ.

Hechos 20:28

’Kumí rán maárán jee kumí rán ñanitáꞌán ya̱ kúneí iniꞌ ráa Jesús. Chi ñani Ta̱chi̱ꞌ Ííꞌ ránoꞌó, sáva kuvi rán rá te̱e kúñáꞌnú nu̱u̱nꞌ ráa, sáva kunaka rán rá ñɨvɨ kúneí iniꞌ ráa Ndiosíꞌ. Ñatɨ ni̱ñɨ̱ꞌ maá Se̱ꞌya re̱ꞌ, sáá ni̱ꞌi̱ꞌ‑i nu̱u̱nꞌ kurúsiꞌ, sáva nakeꞌen re̱ꞌ rá ñɨvɨ vá.

Hechos 20:29

Nuꞌuꞌ jíníꞌ ya̱, ré kua̱ꞌa̱nꞌ ni̱ꞌ, jee ki̱vɨ rá ñɨvɨ nteñu rán, jee nkɨ́kui̱ñɨ̱ꞌ ráa nukú ráa xináꞌví ráa rá ñanitáꞌán‑ó sáva xináánꞌ ráa rává, kuéntáꞌ váꞌúꞌ xe̱e̱nꞌ ya̱ jiáꞌníꞌ‑i rá lanchi.

Romanos 14:1

Jee koo ma̱ni̱ꞌ rán nu̱u̱nꞌ rá ñɨvɨ ya̱ táyáꞌ iniꞌ ráa nu̱u̱nꞌ ya̱ kúneí iniꞌ ráa Cristo. Jee koto síjíta rán ráa jie̱ꞌe̱ꞌ ya̱ sɨ́ɨ́n sɨ́ɨ́n jiáni iniꞌ ráa.

Romanos 15:1

Saájee rá yó ya̱ jíjia ka̱ꞌ iniꞌ‑ó kúneí iniꞌ‑ó Ndiosíꞌ jie̱ꞌe̱ꞌ ya̱ kuíni re̱ꞌ ya̱ saꞌá‑ó, jee íyó keꞌneꞌ iniꞌ‑ó nu̱u̱nꞌ rá ñanitáꞌán‑ó ya̱ táyáꞌ iniꞌ ráa kúneí iniꞌ ráa re̱ꞌ. Jee koto sáꞌá‑ó sáni kua̱chi kúváꞌa iniꞌ maáó ni.

1 Corintios 8:11

Jee sukuán sijíta nú ñanitáꞌán nú ya̱ táyáꞌ iniꞌ‑i jie̱ꞌe̱ꞌ ya̱ sáꞌá nú tiñu ya̱ jíníꞌ nú ya̱ íyó núne saꞌá nú maa. Jee kúvi‑i ñanitáꞌán‑ó jie̱ꞌe̱ꞌ ni̱ꞌi̱ꞌ Cristo.

Gálatas 5:6

Chi ntáká‑ó ya̱ yɨ́ꞌɨ́‑ó nu̱u̱nꞌ Cristo Jesús, ntu̱náꞌ íyótiñu koo circuncidado maáó, áxí ntu̱ví. Soo ya̱ yɨ́yáꞌvi ka̱ꞌ vá kúneí iniꞌ‑ó Jesús, jee ya̱ kúneí iniꞌ‑ó maa sáꞌá ya̱ kunu̱u̱nꞌ‑ó táꞌán‑ó.

Efesios 4:14

Sáva nkúvi‑ó ka̱ꞌ kuéntáꞌ rá súchí lúlí ya̱ ntu ɨɨn ni jiáni iniꞌ ráa, jee sáva ntu kúvi‑ó ka̱ꞌ kuéntáꞌ ɨɨn nantíñú xínó xíníji ta̱chi̱ꞌ víjin chínaꞌá‑a cháꞌá chúkuán ya̱ súkuíkó‑o, chi nsáꞌ síkívɨ inka tu̱ꞌun ka̱ꞌ maáó yaꞌá yukuán, ya̱ xínéꞌénꞌ rá te̱e xínáꞌví cháꞌá chúkuán, ya̱ nito nasɨ́kuitɨꞌ íyó ráa jee máñáꞌ ráa jín tu̱ꞌun jíta xínéꞌénꞌ ráa.

Efesios 6:24

Na̱ ka̱ꞌ íyó mániꞌ iniꞌ Ndiosíꞌ kune̱ꞌyá re̱ꞌ ntáká ránoꞌó ya̱ ñúnúunꞌ rán I̱toꞌoꞌ‑ó Jesús ya̱ kúvi Cristo, ya̱ ni nsáꞌ nuyakuꞌ ya̱ ñúnúunꞌ rán maa.

Hebreos 13:20

Jee maá Ndiosíꞌ ya̱ sáꞌá re̱ꞌ ya̱ nééꞌ va̱ꞌa ñunkúún‑ó, jee maáréꞌ nxi̱nákóo re̱ꞌ nna̱xtekúꞌ re̱ꞌ I̱toꞌoꞌ‑ó Jesús ya̱ kúvi Cristo nene‑e nteñu rá ni̱yɨ, ɨɨn pasto kúñáꞌnú nu̱u̱nꞌ‑ó ya̱ náka‑a yó kuéntáꞌ lanchi. Chi jín ni̱ñɨ̱ꞌ maáa ya̱ ñatɨ sáá ni̱ꞌi̱ꞌ‑i yukuán kúvi ya̱ ñakɨnꞌ kutú‑u tratúꞌ‑u ya̱ koo nɨ́ɨ́nkání.

Hebreos 4:13

Jee ni ntu̱né íyó ni ɨɨn ya̱ nsa̱ꞌá Ndiosíꞌ ya̱ ntu túvi nijinꞌ nu̱u̱nꞌ re̱ꞌ, chisaꞌ nɨꞌɨ kuitɨꞌ núne ráa nu̱u̱nꞌ re̱ꞌ chi túvi nijinꞌ‑i néꞌyá maáréꞌ, ya̱ nu̱u̱nꞌ re̱ꞌ naku̱ꞌva‑ó kuéntáꞌ nɨꞌɨ ya̱ sáꞌá‑ó.

1 Pedro 1:8

Maáréꞌ ví ya̱ ñúnúunꞌ rán re̱ꞌ súnika̱ꞌ ntu jíníꞌ jínúunꞌ rán re̱ꞌ, jee jínúꞌ iniꞌ rán re̱ꞌ sú ntu néꞌyá rán re̱ꞌ vitan jee ne̱ sɨ̱ɨ̱ꞌ kúvi iniꞌ rán kúsɨ́ɨꞌ iniꞌ rán ya̱ ntántúníꞌ nasɨ́kuitɨꞌ viiꞌ ya̱ ni ntu kúvi ni̱ꞌi̱nꞌ rán ka̱ꞌ tu̱ꞌun na̱ja vá kachiꞌ rán maa.

1 Pedro 2:2

Jee kuéntáꞌ ñúkúvi iniꞌ rá nchíkɨ́n yɨ́kɨ́n xu̱kui jíꞌíꞌ ráa, jee sukuán kuꞌun kúvi iniꞌ rán xu̱kui ninuꞌun, ya̱ kúvi Tu̱ꞌun Ndiosíꞌ, sáva sikújia‑a iniꞌ rán kueꞌnu na̱a̱ꞌ rán sáni nsi̱káku re̱ꞌ ránoꞌó nkɨ́ꞌɨ rán xi̱ntíín kua̱chi rán.

1 Pedro 2:25

Chi nékúvi jee kúvi rán kuéntáꞌ rá lanchi ya̱ nkene sɨ́ɨ́n, soo vitan nni̱kó rán nu̱u̱nꞌ Cristo, ya̱ maáréꞌ vá kúmí ránoꞌó kuéntáꞌ ɨɨn ya̱ kúmí‑i lanchi, jee néen kuéntáꞌ re̱ꞌ ránoꞌó.

1 Juan 4:19

Jee maáó chi ñúnúunꞌ‑ó Ndiosíꞌ jín ñɨvɨ chi xíꞌna maáréꞌ ka̱ꞌ vá nñunu̱u̱nꞌ re̱ꞌ yó.

1 Juan 5:1

Nta̱ká ñɨvɨ ya̱ jínúꞌ iniꞌ ya̱ Jesús ví Cristo, ya̱ ñani Ndiosíꞌ sáva tatúníꞌ‑i nu̱u̱nꞌ ñɨ̱vɨ́, jee suviráa sáꞌá Ndiosíꞌ ya̱ nna̱kaku ráa kúvi nijia ráa se̱ꞌya re̱ꞌ. Jee nta̱ká ñɨvɨ ya̱ ñúnúunꞌ ráa maáréꞌ ya̱ kúvi Tátáꞌ ráa, jee suni ñúnúunꞌ ráa rá inka ñɨvɨ ya̱ nsa̱ꞌá re̱ꞌ ya̱ nna̱kaku ráa kúvi ráa se̱ꞌya re̱ꞌ.

Apoclipsis 2:23

Jee kaꞌniꞌ ni̱ꞌ rá se̱ꞌya ña. ’Saájee ntáká rá grupo rá ñɨvɨ kúneí iniꞌ ráa nuꞌuꞌ, jee kukáꞌnú iniꞌ ráa ya̱ nuꞌuꞌ ví ya̱ kávii kuitɨꞌ jíníꞌ ni̱ꞌ nɨꞌɨ ya̱ jiáni iniꞌ antúníꞌ ñɨvɨ jín nɨꞌɨ ya̱ ñúꞌún ánímaꞌ ñɨvɨ. Jee naku̱ꞌva ni̱ꞌ nu̱u̱nꞌ ta ɨɨn ɨɨn rá ñɨvɨ na̱ja kua̱ꞌ sáni tiñu ya̱ nsa̱ꞌá ráa.