Juan 17:26 - Mixteco del suroeste de Tlaxiaco Oaxaca

²⁶ Ni̱stúvi ni̱ꞌ noꞌó nu̱u̱nꞌ ráa jee istúvi ni̱ꞌ ka̱ꞌ noꞌó, sáva kuéntáꞌ kua̱ꞌ ñúnúunꞌ nú nuꞌuꞌ, jee suni sukuán kunu̱u̱nꞌ ráa rá táꞌán ráa, jee kɨꞌɨ ni̱ꞌ iniꞌ ráa ―nkachiꞌ Jesús.

Juan 17:26 ပူးပေါင်းရင်းမြစ်များ

Juan 14:20

Jee ki̱vɨ̱ꞌ yukuán jee kuniꞌ rán ya̱ yɨ́ꞌɨ́ ni̱ꞌ iniꞌ Tátáꞌ ni̱ꞌ jín ya̱ yɨ́ꞌɨ́ rán nu̱u̱nꞌ ni̱ꞌ, jín ya̱ yɨ́ꞌɨ́ ni̱ꞌ iniꞌ ránoꞌó.

Juan 14:23

Jee nna̱xiníkó Jesús, jee nkachiꞌ re̱ꞌ nu̱u̱nꞌ‑u: ―Ɨɨn ñɨvɨ ya̱ ñúnúunꞌ‑u nuꞌuꞌ, jee sikúnkuvi‑i tu̱ꞌun ni̱ꞌ, jee kunu̱u̱nꞌ Tátáꞌ ni̱ꞌ maa, jee ni núvíꞌ ni̱ꞌ jín Tátáꞌ ni̱ꞌ kiji ránꞌ nu̱u̱nꞌ ñɨvɨ vá, jee koo ránꞌ jín‑i.

Juan 15:15

Ntu̱ví káchíꞌ ni̱ꞌ ka̱ꞌ ya̱ kúvi rán musúꞌ, chi ɨɨn musúꞌ jee ntu̱ví kúkáꞌnú iniꞌ re̱ꞌ ná kúvi ya̱ jiáni iniꞌ i̱toꞌoꞌ re̱ꞌ saꞌá‑a. Soo vitan jee nkachiꞌ ni̱ꞌ ya̱ ñɨvɨ ya̱ kámani jín ni̱ꞌ kúvi rán, chi ntáká tu̱ꞌun ya̱ nteso̱ꞌo ni̱ꞌ ya̱ nkachiꞌ Tátáꞌ ni̱ꞌ nu̱u̱nꞌ ni̱ꞌ, jee nɨꞌɨ nsi̱kúkáꞌnú ni̱ꞌ iniꞌ rán.

Juan 15:4

Jee íyó kuiñɨ ni̱ꞌin rán kino̱o kutú rán nu̱u̱nꞌ nuꞌuꞌ, jee nuꞌuꞌ suni kuiñɨ ni̱ꞌin ni̱ꞌ koo ni̱ꞌ jín rán. Chi ɨɨn naꞌá yokúꞌúꞌ lúlí ntu̱ví kúvi máá maáa ku̱ꞌva‑a uva, retú ntu̱ví tɨ́ɨn táꞌán‑a jín yokúꞌúꞌ káꞌnú vá. Jee suni sukuán ránoꞌó chi ntu̱ví kúvi kueꞌnu máá maárán sáni kuíni Ndiosíꞌ retú ntu̱ví íñɨ́ ni̱ꞌin rán jín nuꞌuꞌ.

Juan 15:9

’Kuéntáꞌ sánikua̱ꞌ ñúnúunꞌ Tátáꞌ ni̱ꞌ nuꞌuꞌ, jee suni sukuán ñúnúunꞌ ni̱ꞌ ránoꞌó. Jee íyó kino̱o kutú rán kuiñɨ ni̱ꞌin rán nu̱u̱nꞌ tu̱ꞌun ñúnúunꞌ ni̱ꞌ ránoꞌó.

Juan 17:23

Nuꞌuꞌ, jee yɨ́ꞌɨ́ ni̱ꞌ iniꞌ ráa, jee noꞌó, yɨ́ꞌɨ́ nú iniꞌ nuꞌuꞌ, sáva kenta kuna̱a̱ꞌ nuún koo iniꞌ ráa, sáva kuniꞌ rá ñɨvɨ ñɨ̱vɨ́ ya̱ maánú nchu̱ichí nú nuꞌuꞌ, jín ya̱ ñúnúunꞌ nú ráa kuéntáꞌ ñúnúunꞌ nú nuꞌuꞌ.

Juan 17:6

’Chi rá ñɨvɨ nka̱ji nú iniꞌ ñɨ̱vɨ́ yaꞌá ya̱ ntaji nú ráa nu̱u̱nꞌ ni̱ꞌ, jee nstúvi ni̱ꞌ noꞌó nu̱u̱nꞌ ráa. Rá ñɨvɨ nú nkuvi ráa jee ntaji nú ráa nu̱u̱nꞌ ni̱ꞌ, jee ntɨɨn ráa ñúꞌún iniꞌ ráa tu̱ꞌun nú.

Juan 17:8

Chi ntáká rá tu̱ꞌun ya̱ ntaji nú nu̱u̱nꞌ ni̱ꞌ, jee njia̱ꞌa ni̱ꞌ maa nu̱u̱nꞌ ráa. Jee ntɨɨn ráa ñúꞌún iniꞌ ráa maa, chi nku̱káꞌnú iniꞌ ráa ya̱ máá naáꞌ nijia kúvi ya̱ ne̱ nu̱u̱nꞌ maánú nkene ni̱ꞌ va̱ji ni̱ꞌ, jee suni ni̱nu̱ꞌ iniꞌ ráa ya̱ maánú nchu̱ichí nú nuꞌuꞌ va̱ji ni̱ꞌ jín tiñu sáꞌá ni̱ꞌ.

Juan 6:56

Chi ɨɨn ñɨvɨ ya̱ yájíꞌ‑i yɨkɨkúñu ni̱ꞌ jee jíꞌi‑i ni̱ñɨ̱ꞌ ni̱ꞌ, jee kínóo‑o yɨ́ꞌɨ́‑ɨ nu̱u̱nꞌ ni̱ꞌ, jee kínóo ni̱ꞌ yɨ́ꞌɨ́ ni̱ꞌ nu̱u̱nꞌ maáa.

Juan 8:50

Soo nuꞌuꞌ chi ntu̱ví núkú ni̱ꞌ ya̱ nakuetúꞌún ñɨvɨ nuꞌuꞌ. Chi íyó ɨɨn ya̱ núkú re̱ꞌ sáꞌá re̱ꞌ ya̱ kúñáꞌnú ni̱ꞌ jee maáréꞌ vá sánáaꞌ re̱ꞌ jie̱ꞌe̱ꞌ nɨꞌɨ.

Romanos 8:10

Soo nu̱u̱nꞌ yɨ́ꞌɨ́ Cristo iniꞌ rán, sú kɨ̱naanꞌ yɨkɨkúñu rán sáva kuviꞌ‑i jie̱ꞌe̱ꞌ kua̱chi rán, soo ánímaꞌ rán kutekuꞌ‑u jín re̱ꞌ jie̱ꞌe̱ꞌ ya̱ nsiíyo Ndiosíꞌ kua̱chi rán sáva nkino̱o na̱a̱ꞌ rán nu̱u̱nꞌ re̱ꞌ.

1 Corintios 1:30

Soo maá Ndiosíꞌ chi nsa̱ꞌá re̱ꞌ ya̱ kɨꞌɨ rán xi̱ntíín Cristo Jesús, jee ne̱ nu̱u̱nꞌ Jesús va̱ji tu̱ꞌun níchí tánɨ́ꞌ xi̱ni̱ꞌ táji Ndiosíꞌ nu̱u̱nꞌ‑ó, jee nsa̱ꞌá re̱ꞌ ya̱ kínóo na̱a̱ꞌ‑ó nu̱u̱nꞌ Ndiosíꞌ, jee nsa̱ꞌá sɨ́ɨ́n re̱ꞌ yó sáva kɨꞌɨ‑ó nu̱u̱nꞌ Ndiosíꞌ, jee nna̱kani núne re̱ꞌ yó nu̱u̱nꞌ kua̱chi ya̱ nkɨ́ꞌɨ‑ó ka̱ꞌ xi̱ntíín kua̱chi.

1 Corintios 12:12

Chi kuéntáꞌ ɨɨn yɨkɨkúñu métúꞌún ɨɨn ni ví‑i jee kue̱ꞌe̱ꞌ rá pedasúꞌ íyó nu̱u̱nꞌ yɨkɨkúñu vá, jee sú íyó kue̱ꞌe̱ꞌ rá pedasúꞌ soo ntáká ráa yɨ́ꞌɨ́ nu̱u̱nꞌ ɨɨn ni yɨkɨkúñu. Jee suni sukuán yɨ́ꞌɨ́‑ó nu̱u̱nꞌ Cristo.

Gálatas 2:20

Taꞌanꞌ ni̱ꞌ níꞌiꞌ ni̱ꞌ nu̱u̱nꞌ kurúsiꞌ jín Cristo. Saáva nsú káꞌ nuꞌuꞌ ví ya̱ tékúꞌ, chi maá Cristo ví ya̱ tékúꞌ iniꞌ ni̱ꞌ. Jee ni tékúꞌ ni̱ꞌ iniꞌ yɨkɨkúñu ni̱ꞌ yaꞌá, jee jiáꞌnu ni̱ꞌ ichi jie̱ꞌe̱ꞌ kúneí iniꞌ ni̱ꞌ Se̱ꞌya Ndiosíꞌ. Chi Cristo ví ya̱ ñúnúunꞌ re̱ꞌ nuꞌuꞌ jee nna̱sokoꞌ re̱ꞌ maáréꞌ ya̱ níꞌiꞌ re̱ꞌ jie̱ꞌe̱ꞌ ya̱ váꞌa kuvi ni̱ꞌ.

Efesios 1:6

Saáva jie̱ꞌe̱ꞌ vá íyó nakuetúꞌún‑ó Ndiosíꞌ ya̱ viiꞌ kúñáꞌnú re̱ꞌ jie̱ꞌe̱ꞌ ya̱ na̱ ka̱ꞌ vá íyó mániꞌ iniꞌ re̱ꞌ jín yó jee nsi̱kútaꞌviꞌ saɨn re̱ꞌ ya̱ váꞌa nu̱u̱nꞌ‑ó, jie̱ꞌe̱ꞌ ya̱ yɨ́ꞌɨ́‑ó nu̱u̱nꞌ Cristo, ya̱ ñúnúunꞌ re̱ꞌ maa.

Efesios 3:17

Sáva kɨꞌɨ Cristo iniꞌ ánímaꞌ rán jie̱ꞌe̱ꞌ ya̱ kúneí iniꞌ rán re̱ꞌ, sáva kuiñɨ ni̱ꞌin rán kuꞌun tu̱ꞌun ñúnúunꞌ re̱ꞌ iniꞌ ránoꞌó, kuéntáꞌ kúkutú yoꞌo yutun jín kuéntáꞌ veꞌi yósóꞌ kutú nu̱u̱nꞌ koo sámáꞌ,

Efesios 5:30

Chi yɨ́ꞌɨ́‑ó nu̱u̱nꞌ re̱ꞌ kuéntáꞌ kúvi‑ó pedasúꞌ yɨkɨkúñu re̱ꞌ.

Efesios 5:32

Jee tu̱ꞌun kúñáꞌnú nasɨ́kuitɨꞌ ka̱ꞌ kúvi tu̱ꞌun nyɨse̱ꞌí vá, chi káꞌánꞌ ni̱ꞌ tu̱ꞌun yaꞌá jie̱ꞌe̱ꞌ ɨɨn ni kúvi Cristo jín maáórán ya̱ kúneí iniꞌ‑ó re̱ꞌ.

Colosenses 1:27

Jee nkuini iniꞌ re̱ꞌ ya̱ sikúkáꞌnú re̱ꞌ iniꞌ ráa, ya̱ na̱ ka̱ꞌ viiꞌ kúñáꞌnú yɨ́yáꞌvi ka̱ꞌ ví ya̱ váꞌa, ya̱ níso tu̱ꞌun yuꞌuꞌ yaꞌá, ya̱ jiáꞌa re̱ꞌ nu̱u̱nꞌ rá ñɨvɨ ntu kúvi Israel. Tu̱ꞌun yaꞌá kúvi ya̱ yɨ́ꞌɨ́ Cristo iniꞌ ánímaꞌ rán. Jee saáva íyó tu̱ꞌun neí iniꞌ‑ó ya̱ kuneeꞌ‑ó nɨ́ɨ́nkání jín re̱ꞌ, ya̱ nu̱u̱nꞌ viiꞌ nasɨ́kuitɨꞌ ví‑i.

Colosenses 2:10

Jee kukánáa ánímaꞌ rán jín nɨꞌɨ kuitɨꞌ ya̱ váji ne̱ nu̱u̱nꞌ Ndiosíꞌ ne̱ natɨɨn rán iniꞌ maáréꞌ, jie̱ꞌe̱ꞌ ya̱ yɨ́ꞌɨ́ rán nu̱u̱nꞌ Cristo. Chi Cristo ví ya̱ kúñáꞌnú nu̱u̱nꞌ nta̱ká ya̱ nísotíñú ráa jín ya̱ kúñáꞌnú ráa, [va̱ni nu̱u̱nꞌ ñɨvɨ, va̱ni nu̱u̱nꞌ ta̱chi̱ꞌ, va̱ni nu̱u̱nꞌ najiáꞌáꞌ ííꞌ Ndiosíꞌ].

Colosenses 3:11

Jee saáva ntu̱náꞌ ítú iniꞌ retú ntu kúvi‑ó ñɨvɨ Israel, áxí kúvi‑ó ñɨvɨ Israel, retú níso yɨkɨkúñu‑ó seña ñɨvɨ Israel naní circuncisión, áxí ntu níso‑ó maa, retú kúvi‑ó rá to̱ꞌo̱ꞌ, áxí ñɨvɨ ñuunꞌ láꞌví, retú kúvi‑ó musúꞌ ya̱ kéꞌen ñɨvɨ maa, áxí ñɨvɨ ya̱ yɨ́tíñú nu̱u̱nꞌ tiñu maáa. Chi I̱toꞌoꞌ kua̱íyó kuitɨꞌ‑ó ví Cristo, jee yɨ́ꞌɨ́ re̱ꞌ iniꞌ kua̱íyó kuitɨꞌ‑ó.

2 Tesalonicenses 2:16

I̱ña̱jée, máá maá I̱toꞌoꞌ‑ó, Jesucristo, jín Tátáꞌ‑ó, Ndiosíꞌ, suviráa ñúnúunꞌ ráa yó. Saáva násaváꞌa ráa iniꞌ‑ó nɨ́ɨ́nkání, jee nsa̱ꞌá ráa ya̱ íyó tu̱neí iniꞌ‑ó ya̱ váꞌa saꞌá ráa nu̱u̱nꞌ‑ó, jie̱ꞌe̱ꞌ íyó mániꞌ iniꞌ ráa néꞌyá ráa yó.

Hebreos 2:12

Chi nu̱u̱nꞌ Tutuꞌ Ííꞌ níso tu̱ꞌun nkachiꞌ re̱ꞌ nu̱u̱nꞌ Tátáꞌ re̱ꞌ: Kachitu̱ꞌún ni̱ꞌ jie̱ꞌe̱ꞌ nú nu̱u̱nꞌ rá ñaniꞌ ni̱ꞌ jín ku̱ꞌva ni̱ꞌ [ya̱ yɨ́ꞌɨ́ ráa nu̱u̱nꞌ nú], jee nteñu nu̱u̱nꞌ nútútú ráa kata ni̱ꞌ yaaꞌ ya̱ nákuetúꞌún ni̱ꞌ ya̱ kúñáꞌnú nú.

1 Juan 3:24

Jee ñɨvɨ ya̱ síkúnkuvi ya̱ tátúníꞌ Ndiosíꞌ, jee kínóo kutú ñɨvɨ vá yɨ́ꞌɨ́‑ɨ nu̱u̱nꞌ re̱ꞌ, jín suni máá Ndiosíꞌ kínóo kutú re̱ꞌ yɨ́ꞌɨ́ re̱ꞌ iniꞌ‑i. Jee jie̱ꞌe̱ꞌ ya̱ ntaji re̱ꞌ Ta̱chi̱ꞌ Ííꞌ re̱ꞌ yɨ́ꞌɨ́‑ɨ iniꞌ‑ó, saáva jíníꞌ‑ó ya̱ kínóo kutú re̱ꞌ yɨ́ꞌɨ́ re̱ꞌ iniꞌ‑ó.