Juan 16:33 - Mixteco del suroeste de Tlaxiaco Oaxaca

³³ Ntáká rá tu̱ꞌun yaꞌá nkaꞌanꞌ ni̱ꞌ jín rán sáva ne̱ va̱ꞌa kino̱o ánímaꞌ rán, chi yɨ́ꞌɨ́ rán nu̱u̱nꞌ ni̱ꞌ. Chi kiji tu̱nóꞌó nu̱u̱nꞌ rán iniꞌ ñɨ̱vɨ́ yaꞌá, soo koo neí iniꞌ rán, chi ya nku̱neí ni̱ꞌ nu̱u̱nꞌ nɨꞌɨ ya̱ niváꞌa íyó iniꞌ ñɨ̱vɨ́.

Juan 16:33 ပူးပေါင်းရင်းမြစ်များ

Mateo 9:2

Jee yukuán nkuvi ya̱ nki̱naka rá ñɨvɨ nu̱u̱nꞌ re̱ꞌ ɨɨn te̱e kúꞌvíꞌ ya̱ ntu kúvi kantaꞌ‑a, jee yósóꞌ‑o nu̱u̱nꞌ tu̱nchi̱só. Jee sáá niniꞌ Jesús ya̱ jínúꞌ iniꞌ ráa kúneí iniꞌ ráa re̱ꞌ jee nkachiꞌ re̱ꞌ nu̱u̱nꞌ te̱e ntu kúvi kantaꞌ vá: ―Se̱ꞌya, nasáneí iniꞌ nú, chi ya nne̱káꞌnú iniꞌ ni̱ꞌ noꞌó jie̱ꞌe̱ꞌ kua̱chi nú ―nkachiꞌ Jesús.

Lucas 19:38

Jee nkachiꞌ ráa: ―Na̱ ka̱ꞌ netuꞌ ka̱ꞌ kúvi maáréꞌ ya̱ nísotíñú tátúníꞌ re̱ꞌ nu̱u̱nꞌ ñɨ̱vɨ́, ya̱ váji jín tiñu ñáꞌnú nu̱u̱nꞌ súví I̱toꞌoꞌ‑ó Ndiosíꞌ. Násaꞌá mániꞌ táꞌán re̱ꞌ yó jín Ndiosíꞌ ya̱ nééꞌ antivɨ́, jee na̱ ka̱ꞌ viiꞌ nasɨ́kuitɨꞌ ka̱ꞌ kúñáꞌnú Ndiosíꞌ ya̱ íyó re̱ꞌ ne̱ antivɨ́ súkún ―nkachiꞌ ráa.

Lucas 2:14

¡Na̱ ka̱ꞌ viiꞌ nasɨ́kuitɨꞌ ka̱ꞌ kúñáꞌnú Ndiosíꞌ ya̱ íyó re̱ꞌ ne̱ antivɨ́, jee nu̱u̱nꞌ ñɨ̱vɨ́ nakuneeꞌ va̱ꞌa rá ñɨvɨ jín Ndiosíꞌ ya̱ íyó ma̱ni̱ꞌ iniꞌ re̱ꞌ néꞌyá re̱ꞌ ráa! Nkachiꞌ rá najiáꞌáꞌ ííꞌ vá.

Juan 12:31

Vitan kúvi tiempúꞌ ya̱ saꞌá na̱a̱ꞌ Ndiosíꞌ kua̱chi jie̱ꞌe̱ꞌ rá ñɨvɨ ñɨ̱vɨ́ yaꞌá. Jee vitan jee tavaꞌ Ndiosíꞌ máá maá kui̱ꞌna̱ꞌ kúñáꞌnú ya̱ tátúníꞌ iniꞌ ñɨ̱vɨ́ yaꞌá kɨ̱ꞌɨ̱nꞌ iyo‑o.

Juan 14:1

Jee nkachiꞌ tuku ka̱ꞌ Jesús: ―Koto nániꞌvɨꞌ iniꞌ ánímaꞌ rán, chisaꞌ ya̱ ya kúneí iniꞌ rán Ndiosíꞌ jee suni íyó kuneí iniꞌ rán nuꞌuꞌ.

Juan 14:27

’Xinóo ni̱ꞌ ránoꞌó jee kɨ̱ꞌɨ̱nꞌ ni̱ꞌ, soo ne̱ va̱ꞌa koo iniꞌ rán kino̱o rán saꞌá ni̱ꞌ. Sáꞌá ni̱ꞌ ya̱ ne̱ va̱ꞌa kino̱o ánímaꞌ ránoꞌó kuéntáꞌ kúváꞌa iniꞌ ánímaꞌ ni̱ꞌ. Chi ntu nuún nótaꞌan sáꞌá ni̱ꞌ kuéntáꞌ kua̱ꞌ sáꞌá rá ñɨvɨ ñɨ̱vɨ́ yaꞌá ya̱ ntu yɨ́ꞌɨ́ ráa xi̱ntíín Ndiosíꞌ, chi ntu sáꞌá ráa ya̱ ne̱ va̱ꞌa koo iniꞌ rán kuéntáꞌ sáꞌá ni̱ꞌ. Saáva koto nániꞌvɨꞌ iniꞌ ánímaꞌ rán ni koto yúꞌví rán.

Juan 16:11

Jee stúvi kájí re̱ꞌ ya̱ keꞌneꞌ na̱a̱ꞌ re̱ꞌ kua̱chi si̱kɨ̱ꞌ rá ñɨvɨ ñɨ̱vɨ́, chi ya̱ nkuna̱a̱ꞌ kɨ̱naanꞌ ta̱chi̱ꞌ kíni kúñáꞌnú ya̱ tátúníꞌ iniꞌ ñɨ̱vɨ́ yaꞌá.

Hechos 14:22

Yukuán, nna̱chituvi ráa ánímaꞌ rá ñɨvɨ yɨ́ꞌɨ́ nu̱u̱nꞌ Jesús. Nna̱xiníꞌvɨ́ꞌ ráa iniꞌ rává kuni̱ꞌin rává kúneí iniꞌ rává Jesús. Nkachiꞌ ráa: ―Kue̱ꞌe̱ꞌ tu̱nóꞌó nínísaá kunoꞌo‑ó jee ki̱vɨ‑ó nu̱u̱nꞌ tátúníꞌ Ndiosíꞌ.

Hechos 23:11

Yakuááꞌ ki̱vɨ̱ꞌ steñu̱ꞌún yukuán ntu̱vi I̱toꞌoꞌ‑ó nu̱u̱nꞌ Pablo, jee nkachiꞌ‑i nu̱u̱nꞌ re̱ꞌ: ―Neí koo iniꞌ nú, chi kuéntáꞌ nna̱stúvi nú ya̱ naáꞌ jie̱ꞌe̱ꞌ ni̱ꞌ Jerusalén, sukuán íyó nastúvi nú ya̱ naáꞌ jie̱ꞌe̱ꞌ ni̱ꞌ ñuunꞌ Roma.

Hechos 27:22

Ntañúꞌún nákutíñú ni̱ꞌ nu̱u̱nꞌ rán, ya̱ nasáneí rán iniꞌ rán, chi ni ɨɨn rán nku̱víꞌ. Kua̱chi barkúꞌ ni vá naanꞌ.

Hechos 27:25

Saáva neí koo iniꞌ rán, chi ínúꞌ iniꞌ ni̱ꞌ Ndiosíꞌ ya̱ kuvi sáni nkachiꞌ najiáꞌáꞌ‑a nu̱u̱nꞌ ni̱ꞌ.

Hechos 9:31

Saájee rá ñɨvɨ kúneí iniꞌ ráa Jesús, ya̱ nééꞌ nɨꞌɨ ichi sánitɨ́ɨn Judea, Galilea, jín Samaria, jee nneeꞌ ñunkúún ráa. Jee jíjia iniꞌ ráa ka̱ꞌ kúneí iniꞌ ráa Jesús. Jee jiáꞌnu ráa jín ya̱ ñúyúꞌví iniꞌ ráa I̱toꞌoꞌ‑ó. Jee náchuꞌun neí Ta̱chi̱ꞌ Ííꞌ Ndiosíꞌ iniꞌ ráa. Jee va̱ji kúkueꞌeꞌ ráa.

2 Corintios 1:3

Nákuetúꞌún‑ó Ndiosíꞌ, ya̱ kúvi re̱ꞌ Ndiosíꞌ nu̱u̱nꞌ I̱toꞌoꞌ‑ó Jesús ya̱ kúvi Cristo jee Tátáꞌ Jesús kúvi re̱ꞌ. Kúvi re̱ꞌ Tátáꞌ‑ó ya̱ kúnáꞌví iniꞌ re̱ꞌ néꞌyá re̱ꞌ yó, jee kúvi re̱ꞌ Ndiosíꞌ ya̱ sukuáni násáneí re̱ꞌ iniꞌ‑ó.

2 Corintios 13:11

Nu̱u̱nꞌ nɨ́ꞌɨ, tátúníꞌ ni̱ꞌ nu̱u̱nꞌ ránoꞌó ñanitáꞌán ya̱, na̱ ka̱ꞌ kusɨ̱ɨ̱ꞌ iniꞌ ánímaꞌ rán, na̱ ka̱ꞌ kujia noo iniꞌ rán nu̱u̱nꞌ Cristo ne̱ kuna̱a̱ꞌ rán, jee na̱ ka̱ꞌ tɨɨn kuéntáꞌ rán rá tu̱ꞌun ya̱ xínániꞌvɨꞌ ni̱ꞌ iniꞌ rán, jee na̱ ka̱ꞌ nuún kuꞌun iniꞌ rán, jee na̱ ka̱ꞌ ñunkúún kuneeꞌ rán jín ɨɨn inka táꞌán rán. Jee maá Ndiosíꞌ, ya̱ sáꞌá ya̱ kunu̱u̱nꞌ‑ó ɨɨn inka‑ó jín ya̱ kuneeꞌ ñunkúún‑ó jín ɨɨn inka‑ó, jee koo re̱ꞌ jín rán.

2 Corintios 2:14

Soo kútaꞌviꞌ ni̱ꞌ nu̱u̱nꞌ Ndiosíꞌ, chi suvire̱ꞌ vá sukuáni náka re̱ꞌ ránuꞌuꞌ sáva stúvi re̱ꞌ ya̱ kúneí re̱ꞌ si̱kɨ̱ꞌ nɨꞌɨ jie̱ꞌe̱ꞌ ya̱ nsa̱ꞌá re̱ꞌ jín ránuꞌuꞌ, kuéntáꞌ ɨɨn desfile stúvi‑i ya̱ nku̱neí ɨɨn general sáá nka̱ntáꞌán re̱ꞌ. Náka Ndiosíꞌ ránuꞌuꞌ sukuán jie̱ꞌe̱ꞌ yɨ́ꞌɨ́ ránꞌ nu̱u̱nꞌ Cristo. Jee jiátíñú re̱ꞌ ránuꞌuꞌ sáva sikúténuun ránꞌ tu̱ꞌun váꞌa Cristo nta̱ká ichi, sáva kuvi kuniꞌ rá ñɨvɨ iniꞌ re̱ꞌ, kuéntáꞌ kua̱ꞌ jiéténuun xikoꞌ jiávi̱xi̱ꞌ.

2 Corintios 4:7

Sú stúúnꞌ re̱ꞌ iniꞌ ánímaꞌ ránꞌ ya̱ yɨ́yáꞌvi nasɨ́kuitɨꞌ soo kúvi kuéntáꞌ yɨ́ꞌɨ́ vá iniꞌ ɨɨn ki̱sɨ ñuꞌun. Chi maáránꞌ kúvi kuéntáꞌ ki̱sɨ ñuꞌun vá ya̱ ntu íyó fuersáꞌ ránꞌ sáva saꞌá ránꞌ tiñu re̱ꞌ. Va̱ji fuersáꞌ mánasɨ́ ne̱ nu̱u̱nꞌ Ndiosíꞌ sáva sikúnkuvi ránꞌ maa. Jee ntu va̱ji fuersáꞌ vá nu̱u̱nꞌ ránuꞌuꞌ.

2 Corintios 6:4

Chisaꞌ, nta̱ká nu̱u̱nꞌ ya̱ kúvi, stúvi ránꞌ ya̱ kúvi ránꞌ musúꞌ ya̱ sátíñú nu̱u̱nꞌ Ndiosíꞌ, jie̱ꞌe̱ꞌ ya̱ kúníꞌin ránꞌ íñɨ́ ni̱ꞌin rán jín Cristo, jín nu̱u̱nꞌ ya̱ kúmániꞌ nu̱u̱nꞌ ránꞌ, jín nu̱u̱nꞌ ya̱ víjí sáꞌá‑a nu̱u̱nꞌ ránꞌ,

2 Corintios 7:4

Jee káꞌánꞌ neí iniꞌ ni̱ꞌ jín ránoꞌó. Jee káꞌánꞌ téyɨ́ɨ́ ni̱ꞌ jie̱ꞌe̱ꞌ ránoꞌó. Chi núváꞌa iniꞌ ni̱ꞌ jee kúsɨ́ɨꞌ nasɨ́kuitɨꞌ iniꞌ ánímaꞌ ni̱ꞌ sú na̱sa ka̱ꞌ nta̱ká tu̱nóꞌó nóꞌo ráníꞌ.

Gálatas 1:4

Nso̱ko̱ꞌ Jesús maáréꞌ ya̱ níꞌiꞌ re̱ꞌ jie̱ꞌe̱ꞌ kua̱chi‑ó, sáva sikáku re̱ꞌ yó, sáva ntu íyó kaka‑ó ichi tu̱ꞌun kánéꞌén, sáni sáꞌá rá ñɨvɨ nééꞌ ñɨ̱vɨ́ vitan ya̱ ntu yɨ́ꞌɨ́ ráa nu̱u̱nꞌ re̱ꞌ. Nsa̱ꞌá re̱ꞌ suꞌva sáni kuíni Tátáꞌ‑ó Ndiosíꞌ.

Gálatas 6:14

Soo maáníꞌ ntu̱náꞌ káꞌánꞌ téyɨ́ɨ́ ni̱ꞌ. Kua̱chi káꞌánꞌ téyɨ́ɨ́ ni̱ꞌ jie̱ꞌe̱ꞌ ya̱ níꞌiꞌ I̱toꞌoꞌ‑ó Jesucristo nu̱u̱nꞌ kurúsiꞌ jie̱ꞌe̱ꞌ‑ó. Chi jie̱ꞌe̱ꞌ yukuán jee kúvi kuéntáꞌ níꞌiꞌ rá ñujiínꞌ jiáꞌnu ñɨvɨ ñɨ̱vɨ́ nu̱u̱nꞌ kurúsiꞌ nu̱u̱nꞌ ni̱ꞌ. Chi suni kúvi kuéntáꞌ níꞌiꞌ ni̱ꞌ nu̱u̱nꞌ rá ñujiínꞌ vá, chi ntu yɨ́ꞌɨ́ ni̱ꞌ ka̱ꞌ chi̱ji naꞌá rává.

Filipenses 4:7

Jee nu̱u̱nꞌ sáꞌá rán sukuán taji Ndiosíꞌ ya̱ kuneeꞌ va̱ꞌa rán. Jee saꞌ víꞌí káꞌ taji re̱ꞌ sukuán ya̱ ntu kúvi ki̱ku̱ꞌun iniꞌ ñɨvɨ maa. Jee ya̱ kuneeꞌ va̱ꞌa rán vá kúmí‑i ánímaꞌ rán jín antúníꞌ rán, jie̱ꞌe̱ꞌ yɨ́ꞌɨ́ rán nu̱u̱nꞌ Cristo Jesús.

Colosenses 1:20

Jee suni sɨ̱ɨ̱ꞌ nkuvi iniꞌ Ndiosíꞌ nnuma̱ni̱ꞌ re̱ꞌ jín nɨꞌɨ kuitɨꞌ jie̱ꞌe̱ꞌ Se̱ꞌya re̱ꞌ. Chi nnuma̱ni̱ꞌ re̱ꞌ jie̱ꞌe̱ꞌ níꞌiꞌ Se̱ꞌya re̱ꞌ nu̱u̱nꞌ kurúsiꞌ jee ñatɨ ni̱ñɨ̱ꞌ‑ɨ. Jie̱ꞌe̱ꞌ Se̱ꞌya re̱ꞌ nnuma̱ni̱ꞌ re̱ꞌ jín nɨꞌɨ, va̱ni nta̱ká ya̱ íyó iniꞌ ñɨ̱vɨ́ yaꞌá áxí va̱ni nta̱ká ya̱ íyó súkún.

1 Tesalonicenses 3:4

Chi ni nééꞌ ráníꞌ jín ránoꞌó, ya̱ nstúꞌva ránꞌ nu̱u̱nꞌ ránoꞌó, ya̱ sukuán kunoꞌo‑ó. Jee sukuán nkuvi, sáni jíníꞌ ránú.

1 Tesalonicenses 3:7

Saáva sáá íyó yɨ́ɨ́ tu̱nóꞌó si̱kɨ̱ꞌ ránuꞌuꞌ jee nóꞌo víꞌí ránꞌ, jee nnusɨ̱ɨ̱ꞌ iniꞌ ránꞌ jie̱ꞌe̱ꞌ ránoꞌó, ñanitáꞌán. Chi íñɨ́ ni̱ꞌin ránú kúneí iniꞌ rán Cristo.

2 Tesalonicenses 3:16

Saájee máá maá I̱toꞌoꞌ‑ó ví ya̱ sáꞌá ya̱ kuneeꞌ ñunkúún ñɨvɨ. Jee na̱ ka̱ꞌ saꞌá re̱ꞌ ka̱ꞌ ya̱ ñunkúún kuneeꞌ rán nɨꞌɨ tiempúꞌ jín nta̱ká íchí. Jee kuneeꞌ I̱toꞌoꞌ‑ó jín nta̱ká ránoꞌó.

2 Timoteo 3:12

Chi ya̱ nááꞌ ví nijia ya̱ koto u̱ꞌvi̱ꞌ ñɨvɨ nta̱ká rá ñɨvɨ ya̱ kuíni ráa kueꞌnu ráa ichi na̱a̱ꞌ sáni kuíni Ndiosíꞌ jie̱ꞌe̱ꞌ nika̱ꞌ yɨ́ꞌɨ́ ráa nu̱u̱nꞌ Cristo Jesús.

Hebreos 11:25

Chisaꞌ nka̱ji re̱ꞌ ya̱ kuiñɨ re̱ꞌ jín rá ñɨvɨ re̱ꞌ Israel, ya̱ kúvi ñɨvɨ Ndiosíꞌ, jee kunoꞌo re̱ꞌ jín ráa ya̱ nito u̱ꞌvi̱ꞌ ñɨvɨ Egipto ráa, nsú káꞌ kusɨ̱ɨ̱ꞌ iniꞌ re̱ꞌ saꞌá re̱ꞌ kua̱chi yakuꞌ tiempúꞌ.

Hebreos 7:2

Saájee njia̱ꞌa Abraham nu̱u̱nꞌ Melquisedec ni u̱ji̱ꞌ ni u̱ji̱ꞌ ta sientúꞌ nta̱ká nu̱u̱nꞌ ya̱ níꞌinꞌ re̱ꞌ sáá nku̱neí re̱ꞌ nka̱ntáꞌán re̱ꞌ. Jee xíꞌnañúꞌún, súví Melquisedec kuíni kachiꞌ “te̱e nísotíñú ya̱ na̱a̱ꞌ sáꞌá re̱ꞌ tiñu”, jee suni naní re̱ꞌ te̱e tátúníꞌ nu̱u̱nꞌ Salem, ya̱ kuíni kachiꞌ “te̱e tátúníꞌ ya̱ sáꞌá ya̱ kuneeꞌ ñunkúún”.

1 Pedro 5:9

Soo nunasɨ́ rán nu̱u̱nꞌ re̱ꞌ, jee kuiñɨ kutú rán kuneí iniꞌ rán ínúꞌ iniꞌ rán Ndiosíꞌ, chi jíníꞌ rán ya̱ suni sukuán ranika̱ꞌ nóꞌo rá ñanitáꞌán rán yɨ́ꞌɨ́ ráa xi̱ntíín Cristo ya̱ nééꞌ ráa nɨ́ɨ́nkáꞌnú né ni ví nkuvi iniꞌ ñɨ̱vɨ́ yaꞌá.

1 Juan 2:13

Tée ni̱ꞌ nu̱u̱nꞌ ránoꞌó, rá tátáꞌ, chi ma̱ni̱ꞌ rán jín maáréꞌ ya̱ ya íyó ne̱ tiempúꞌ xíꞌnañúꞌún. Tée ni̱ꞌ nu̱u̱nꞌ ránoꞌó, rá te̱e súchí, chi nku̱neí rán jín kui̱ꞌna̱ꞌ kúñáꞌnú ya̱ ntu kúvi sikúvi re̱ꞌ iniꞌ ránoꞌó nu̱u̱nꞌ kua̱chi. Tée ni̱ꞌ nu̱u̱nꞌ ránoꞌó rá kuáchí lúlí, chi ma̱ni̱ꞌ rán jín Tátáꞌ‑ó Ndiosíꞌ.

1 Juan 4:4

Ránoꞌó ya̱ kúvi kuéntáꞌ se̱ꞌya ni̱ꞌ, kúvi rán ñɨvɨ Ndiosíꞌ. Jee nku̱neí rán jín rá ñɨvɨ xínáꞌví vá, ya̱ ntu xínáꞌví ráa ránoꞌó, chi máá kúñáꞌnú ka̱ꞌ ví Ta̱chi̱ꞌ Ííꞌ Ndiosíꞌ ya̱ yɨ́ꞌɨ́ iniꞌ ánímaꞌ ránoꞌó, nsú káꞌ ta̱chi̱ꞌ kúneí jín rá ñɨvɨ yɨ́ꞌɨ́ ñujiínꞌ ñɨ̱vɨ́ yaꞌá.

1 Juan 5:4

Chi nta̱ká ñɨvɨ ya̱ nsa̱ꞌá Ndiosíꞌ ya̱ nna̱kaku ráa kúvi nijia ráa se̱ꞌya re̱ꞌ, jee kúneí ráa si̱kɨ̱ꞌ ñujiínꞌ ñɨ̱vɨ́ yaꞌá ya̱ ntu yɨ́ꞌɨ́ vá xi̱ntíín Ndiosíꞌ. Jee tu̱ꞌun kúneí iniꞌ‑ó Jesús vá kúvi fesáꞌ ya̱ kúneí‑ó si̱kɨ̱ꞌ ñujiínꞌ ñɨ̱vɨ́ yaꞌá.

Apoclipsis 12:11

Soo nku̱neí ráa nu̱u̱nꞌ Satanás vá jie̱ꞌe̱ꞌ ya̱ nñatɨ Cristo ni̱ñɨ̱ꞌ re̱ꞌ sáá ni̱ꞌi̱ꞌ re̱ꞌ nso̱ko̱ꞌ re̱ꞌ maáréꞌ nu̱u̱nꞌ Ndiosíꞌ jie̱ꞌe̱ꞌ ráa, ya̱ kúvi re̱ꞌ Lanchi Lúlí Ndiosíꞌ, jee suni nku̱neí ráa jie̱ꞌe̱ꞌ tu̱ꞌun ya̱ njia̱ꞌa ráa ya̱ naáꞌ jie̱ꞌe̱ꞌ re̱ꞌ, jee nku̱neí ráa jie̱ꞌe̱ꞌ ntu ñúnúunꞌ ráa maáráa ya̱ kutekuꞌ ráa jee ñeꞌneꞌ iniꞌ ráa maáráa súka̱ꞌ ne̱ kuviꞌ ráa jie̱ꞌe̱ꞌ tu̱ꞌun re̱ꞌ.

Apoclipsis 3:21

’Jee ñɨvɨ ya̱ kuneí‑i si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, jee ku̱ꞌva ni̱ꞌ ya̱ kuneeꞌ ñɨvɨ vá jín nuꞌuꞌ nu̱u̱nꞌ teyuꞌ ni̱ꞌ nu̱u̱nꞌ tátúníꞌ ni̱ꞌ, kuéntáꞌ kua̱ꞌ nku̱neí ni̱ꞌ si̱kɨ̱ꞌ tiñu níváꞌa jee nééꞌ ni̱ꞌ jín Tááꞌ ni̱ꞌ nu̱u̱nꞌ teyuꞌ re̱ꞌ nu̱u̱nꞌ tátúníꞌ re̱ꞌ.

Apoclipsis 7:14

Jee nkachiꞌ ni̱ꞌ nu̱u̱nꞌ‑u: ―Tátáꞌ ni̱ꞌ, noꞌó jíníꞌ ―nkachiꞌ ni̱ꞌ. Jee nkachiꞌ‑i nu̱u̱nꞌ ni̱ꞌ: Rá ñɨvɨ yaꞌá ví rá nku̱neí ráa njia̱ꞌa ráa nu̱u̱nꞌ máá maá tu̱nóꞌó xéénꞌ nnoꞌo ráa. Jee nno̱noo ánímaꞌ ráa jie̱ꞌe̱ꞌ ni̱ꞌi̱ꞌ maáréꞌ ya̱ kúvi re̱ꞌ Lanchi Lúlí vá, kuéntáꞌ nna̱kete ráa saꞌma ráa jee nnu̱kuíjín‑i sáꞌá re̱ꞌ jín ni̱ñɨ̱ꞌ maáréꞌ.