Juan 16:27 - Mixteco del suroeste de Tlaxiaco Oaxaca

²⁷ Chi maá Tátáꞌ ni̱ꞌ kúvi ya̱ ñúnúunꞌ re̱ꞌ ránoꞌó, chi jie̱ꞌe̱ꞌ ni ka̱ꞌ ñúnúunꞌ rán nuꞌuꞌ, jee suni jínúꞌ iniꞌ rán ya̱ ne̱ nu̱u̱nꞌ maá Tátáꞌ ni̱ꞌ Ndiosíꞌ nkene ni̱ꞌ va̱ji ni̱ꞌ.

Juan 16:27 ပူးပေါင်းရင်းမြစ်များ

Mateo 10:37

Jee néni ɨɨn ñɨvɨ ya̱ ñúnúunꞌ‑u ka̱ꞌ tátáꞌ‑a áxí nánáꞌ‑a, nsú káꞌ nuꞌuꞌ, jee nsú ñɨvɨ ya̱ íyó ni̱ꞌi̱nꞌ‑i ya̱ kɨꞌɨ‑ɨ xi̱ntíín ni̱ꞌ, jee néni ɨɨn ñɨvɨ ya̱ ñúnúunꞌ‑u ka̱ꞌ se̱ꞌya yɨ́ɨ́‑ɨ áxí se̱ꞌya sɨ́ꞌɨ́‑ɨ, nsú káꞌ ya̱ ñúnúunꞌ nuꞌuꞌ, jee nsú ñɨvɨ ya̱ íyó ni̱ꞌi̱nꞌ‑i ya̱ kɨꞌɨ‑ɨ xi̱ntíín ni̱ꞌ.

Juan 14:21

Chi néni ɨɨn ñɨvɨ ya̱ ñúꞌún iniꞌ‑i tu̱ꞌun ya̱ nta̱túníꞌ ni̱ꞌ jee sikúnkuvi‑i vá, jee ñɨvɨ yukuán ví ya̱ ñúnúunꞌ‑u nuꞌuꞌ, jee kunu̱u̱nꞌ Tátáꞌ ni̱ꞌ maa, jee nuꞌuꞌ kunu̱u̱nꞌ ni̱ꞌ maa, jee stúvi ni̱ꞌ na̱sa iniꞌ ni̱ꞌ nu̱u̱nꞌ ñɨvɨ vá ―nkachiꞌ Jesús.

Juan 14:23

Jee nna̱xiníkó Jesús, jee nkachiꞌ re̱ꞌ nu̱u̱nꞌ‑u: ―Ɨɨn ñɨvɨ ya̱ ñúnúunꞌ‑u nuꞌuꞌ, jee sikúnkuvi‑i tu̱ꞌun ni̱ꞌ, jee kunu̱u̱nꞌ Tátáꞌ ni̱ꞌ maa, jee ni núvíꞌ ni̱ꞌ jín Tátáꞌ ni̱ꞌ kiji ránꞌ nu̱u̱nꞌ ñɨvɨ vá, jee koo ránꞌ jín‑i.

Juan 16:30

Vitan jee jíníꞌ ráníꞌ ya̱ nɨꞌɨ kuitɨꞌ jíníꞌ nú, jee ntu̱ví jíniñúꞌún nú ya̱ ka̱ka̱tu̱ꞌún ni ɨɨn ñɨvɨ noꞌó, jee saáva jie̱ꞌe̱ꞌ vá jínúꞌ nijia iniꞌ ránꞌ ya̱ ne̱ nu̱u̱nꞌ Ndiosíꞌ nkene nú va̱ji nú ―nkachiꞌ ráa.

Juan 17:23

Nuꞌuꞌ, jee yɨ́ꞌɨ́ ni̱ꞌ iniꞌ ráa, jee noꞌó, yɨ́ꞌɨ́ nú iniꞌ nuꞌuꞌ, sáva kenta kuna̱a̱ꞌ nuún koo iniꞌ ráa, sáva kuniꞌ rá ñɨvɨ ñɨ̱vɨ́ ya̱ maánú nchu̱ichí nú nuꞌuꞌ, jín ya̱ ñúnúunꞌ nú ráa kuéntáꞌ ñúnúunꞌ nú nuꞌuꞌ.

Juan 2:11

Jee tiñu yaꞌá ya̱ nsa̱ꞌá Jesús nu̱u̱nꞌ ñuunꞌ Caná ya̱ tɨ́ɨn Galilea nkuvi seña a̱nasɨ́ xíꞌnañúꞌún ya̱ nsa̱ꞌá Jesús. Jee seña yukuán nstúvi‑i ya̱ kúñáꞌnú nasɨ́kuitɨꞌ re̱ꞌ, jee rá te̱e súkuáꞌa re̱ꞌ ráa ni̱nu̱ꞌ iniꞌ ráa re̱ꞌ.

Juan 3:13

’Chi ni ɨɨn ntu̱náꞌ nkáa kɨ̱ꞌɨ̱nꞌ antivɨ́, chisaꞌ métúꞌún ni ya̱ nééꞌ antivɨ́ ya̱ nki̱nkuun ne̱ antivɨ́ ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ.

Juan 7:29

Soo nuꞌuꞌ chi jíníꞌ ni̱ꞌ iniꞌ re̱ꞌ, chi né núꞌ maáréꞌ va̱ji ni̱ꞌ, jee maáréꞌ nchu̱ichí nuꞌuꞌ va̱ji ni̱ꞌ ―nkachiꞌ Jesús nu̱u̱nꞌ ráa.

Juan 8:42

Saájee nkachiꞌ Jesús nu̱u̱nꞌ ráa: ―Jee retánꞌ Ndiosíꞌ kúvi re̱ꞌ Tátáꞌ rán, jee kunu̱u̱nꞌ rán nuꞌuꞌ nékúvi. Chi nuꞌuꞌ, jee ne̱ nu̱u̱nꞌ Ndiosíꞌ nkene ni̱ꞌ va̱ji ni̱ꞌ. Jee nsú jie̱ꞌe̱ꞌ nkuini maáníꞌ jee va̱ji ni, chisaꞌ maáréꞌ nta̱jí re̱ꞌ nuꞌuꞌ va̱ji ni̱ꞌ.

Romanos 8:3

Chi máá maá Ndiosíꞌ nsa̱ꞌá re̱ꞌ tiñu vá ya̱ ntu nkúvi saꞌá ley nta̱túníꞌ re̱ꞌ ya̱ njiáꞌa re̱ꞌ nu̱u̱nꞌ Moisés. Jee ntu nkúvi saꞌá ley vá tiñu vá, chi táyáꞌ ley vá chi táyáꞌ iniꞌ‑ó jee ntu nkúneí‑ó sikúnkuvi‑ó ley vá jín yɨkɨkúñu‑ó. Jee máá maá Ndiosíꞌ nsa̱ꞌá re̱ꞌ tiñu vá chi nchu̱ichí re̱ꞌ Se̱ꞌya re̱ꞌ nu̱u̱nꞌ ñɨ̱vɨ́ yaꞌá jín yɨkɨkúñu‑u ya̱ kúnkunuún jín yɨkɨkúñu ñɨvɨ yɨ́ꞌɨ́ xi̱ntíín kua̱chi, sú ntu íyó kua̱chi re̱ꞌ. Jee nta̱jí re̱ꞌ Se̱ꞌya re̱ꞌ sáva kuviꞌ‑i so̱ko̱ꞌ‑o maáa jie̱ꞌe̱ꞌ kua̱chi‑ó, sáva sukuán nsi̱jíta Ndiosíꞌ kua̱chi‑ó ya̱ nna̱kuniso Jesús maa iniꞌ yɨkɨkúñu re̱ꞌ.

1 Corintios 15:47

Chi Adán ya̱ nkuvi te̱e xíꞌnañúꞌún jee nkiji re̱ꞌ ne̱ nu̱u̱nꞌ ñu̱ꞌún, chi jín ti̱ka̱cha̱a̱ꞌ ñuꞌun nsa̱ꞌá Ndiosíꞌ re̱ꞌ. Soo inka te̱e uvíꞌ, ya̱ kúvi Cristo, chi ne̱ antivɨ́ súkún nkiji re̱ꞌ.

1 Corintios 16:22

Retú néni ɨɨn ñɨvɨ ntu ñúnúunꞌ‑u I̱toꞌoꞌ‑ó, ¡kosoni̱nu ñɨvɨ vá! ¡I̱toꞌoꞌ‑ó neꞌenꞌ!

2 Corintios 5:14

Chi jie̱ꞌe̱ꞌ ya̱ ñúnúunꞌ Cristo yó ví ya̱ tétuvi‑i ránuꞌuꞌ ya̱ kɨtíñú ránꞌ nu̱u̱nꞌ re̱ꞌ. Jee ya̱ nku̱túníꞌ iniꞌ ránꞌ yaꞌá, ya̱ Cristo ni̱ꞌi̱ꞌ jie̱ꞌe̱ꞌ kua̱íyó ñɨvɨ jee saáva íyó kuéntáꞌ níꞌiꞌ nta̱ká‑ó jín re̱ꞌ.

Gálatas 4:4

Soo sáá nkenta tiempúꞌ ñani Ndiosíꞌ, jee nchu̱ichí re̱ꞌ Se̱ꞌya re̱ꞌ. Jee nkaku‑u chi̱ji ɨɨn ñaꞌan. Jee ne̱ nkaku‑u nyɨ̱ꞌɨ‑ɨ chi̱ji xi̱ntíín tu̱ꞌun ley njia̱ꞌa Ndiosíꞌ nu̱u̱nꞌ Moisés.

Efesios 6:24

Na̱ ka̱ꞌ íyó mániꞌ iniꞌ Ndiosíꞌ kune̱ꞌyá re̱ꞌ ntáká ránoꞌó ya̱ ñúnúunꞌ rán I̱toꞌoꞌ‑ó Jesús ya̱ kúvi Cristo, ya̱ ni nsáꞌ nuyakuꞌ ya̱ ñúnúunꞌ rán maa.

1 Timoteo 1:15

Tu̱ꞌun na̱a̱ꞌ ví yaꞌá. Jee íyó tɨɨn nɨꞌɨ ñɨvɨ tu̱ꞌun yaꞌá, ya̱ káchíꞌ, ya̱ Cristo Jesús ya̱ nkiji nu̱u̱nꞌ ñɨ̱vɨ́, sáva natavaꞌ re̱ꞌ rá ñɨvɨ kua̱chi nu̱u̱nꞌ kua̱chi ráa sikáku re̱ꞌ ráa. Jee nuꞌuꞌ, ña̱ko̱so̱ꞌ ni̱ꞌ ka̱ꞌ nu̱u̱nꞌ ya̱ nsa̱ꞌá ni̱ꞌ kua̱chi mánasɨ́ nijia.

Hebreos 12:6

Chi Ndiosíꞌ jee náchuꞌun na̱a̱ꞌ re̱ꞌ ichi rá ñɨvɨ ya̱ ñúnúunꞌ re̱ꞌ. Jee xínóꞌo re̱ꞌ ntáká ñɨvɨ ya̱ nákuayuꞌú re̱ꞌ ya̱ kúvi‑i se̱ꞌya re̱ꞌ.

1 Pedro 1:8

Maáréꞌ ví ya̱ ñúnúunꞌ rán re̱ꞌ súnika̱ꞌ ntu jíníꞌ jínúunꞌ rán re̱ꞌ, jee jínúꞌ iniꞌ rán re̱ꞌ sú ntu néꞌyá rán re̱ꞌ vitan jee ne̱ sɨ̱ɨ̱ꞌ kúvi iniꞌ rán kúsɨ́ɨꞌ iniꞌ rán ya̱ ntántúníꞌ nasɨ́kuitɨꞌ viiꞌ ya̱ ni ntu kúvi ni̱ꞌi̱nꞌ rán ka̱ꞌ tu̱ꞌun na̱ja vá kachiꞌ rán maa.

1 Juan 4:19

Jee maáó chi ñúnúunꞌ‑ó Ndiosíꞌ jín ñɨvɨ chi xíꞌna maáréꞌ ka̱ꞌ vá nñunu̱u̱nꞌ re̱ꞌ yó.

Apoclipsis 3:19

’Chi ntáká rá ñɨvɨ ya̱ ñúnúunꞌ ni̱ꞌ, jee núxeenꞌ ni̱ꞌ nu̱u̱nꞌ ráa jee xínóꞌo ni̱ꞌ ráa náchuꞌun na̱a̱ꞌ ni̱ꞌ ichi ráa. Saáva nakukáñá iniꞌ ráa nakunikɨnꞌ ráa ichi váꞌa jee nakani iniꞌ ráa.

Apoclipsis 3:9

Soo kune̱ꞌyá, rá ñɨvɨ kútútú ráa veꞌi sinagoga ñɨvɨ Israel ya̱ yɨ́ꞌɨ́ ráa xi̱ntíín Satanás jee káchíꞌ ráa ya̱ ñɨvɨ ñuunꞌ Israel kúvi ráa ya̱ ñɨvɨ Ndiosíꞌ kúvi ráa, soo ntu̱ví, chisaꞌ kátúꞌún ráa, jee saꞌá ni̱ꞌ ya̱ kenta ráa nu̱u̱nꞌ rán, jee nakui̱ñɨ̱ꞌ ítɨ́ ráa nu̱u̱nꞌ rán saꞌá ni̱ꞌ, sáva kuniꞌ va̱ꞌa ráa ya̱ ñúnúunꞌ nijia ni̱ꞌ ránoꞌó.