Juan 16:22 - Mixteco del suroeste de Tlaxiaco Oaxaca

²² Jee suni sukuán ntañúꞌún kúkuéká iniꞌ rán, soo tukuni nakuniꞌ ni̱ꞌ ránoꞌó, jee kusɨ̱ɨ̱ꞌ nasɨ́kuitɨꞌ iniꞌ ánímaꞌ rán. Jee ni ɨɨn ntu̱náꞌ kuvi sííyo ya̱ kúsɨ́ɨꞌ iniꞌ rán.

Juan 16:22 ပူးပေါင်းရင်းမြစ်များ

Mateo 28:8

Saájee kuísá ntañúꞌún kuitɨꞌ nkene ráña nu̱u̱nꞌ yaviꞌ veꞌi ni̱yɨ vá, jee kua̱ꞌa̱nꞌ ráña, jee yúꞌví ráña, jee suni kúsɨ́ɨꞌ ntántúníꞌ nasɨ́kuitɨꞌ iniꞌ ráña jínu ráña kua̱kachiꞌ ráña nu̱u̱nꞌ rá te̱e ya̱ nsu̱kuáꞌa Jesús ráa.

Lucas 10:42

Soo íyó métúꞌún ɨɨn jie̱ꞌe̱ꞌ jíniñúꞌún ñɨvɨ, chi María jee nka̱ji ña máá tiñu váꞌa ka̱ꞌ máá ñáꞌnú ka̱ꞌ, jee ntu̱náꞌ yó kaneeꞌ maa nu̱u̱nꞌ ña ―nkachiꞌ Jesús.

Lucas 16:25

’Soo nkachiꞌ Abraham nu̱u̱nꞌ re̱ꞌ: “Se̱ꞌya, naku̱ꞌun iniꞌ nú ya̱ nni̱ꞌi̱nꞌ nú rá váꞌa nú sáá ntekuꞌ nú iniꞌ ñɨ̱vɨ́, soo Lázaro chi nni̱ꞌi̱nꞌ re̱ꞌ rá niváꞌa. Soo vitan jee nániꞌinꞌ neí iniꞌ re̱ꞌ yaꞌá, jee noꞌó chi nóꞌo nú.

Lucas 19:26

Jee káchíꞌ ni̱ꞌ nu̱u̱nꞌ ránú ya̱ ntáká ñɨvɨ ya̱ ya kúmí‑i jee naku̱ꞌva ka̱ꞌ nu̱u̱nꞌ‑u, soo ñɨvɨ ya̱ ntu kúmí jeesaꞌ kaneeꞌ nɨꞌɨ súka̱ꞌ matíꞌínꞌ kúmí‑i.

Lucas 24:41

Soo ntiáꞌan i̱nu̱ꞌ iniꞌ ráa ya̱ néꞌyá ráa re̱ꞌ, jie̱ꞌe̱ꞌ ya̱ máá kúsɨ́ɨꞌ nasɨ́kuitɨꞌ iniꞌ ánímaꞌ ráa jín jie̱ꞌe̱ꞌ ya̱ máá tívɨ́ xá xíniꞌ ráa néꞌyá ráa re̱ꞌ, jee nkachiꞌ re̱ꞌ nu̱u̱nꞌ ráa: ―¿Á kúmí rán ná kúvi ya̱ íyó kajiꞌ‑ó yaꞌá? ―nkachiꞌ re̱ꞌ nu̱u̱nꞌ ráa.

Juan 14:1

Jee nkachiꞌ tuku ka̱ꞌ Jesús: ―Koto nániꞌvɨꞌ iniꞌ ánímaꞌ rán, chisaꞌ ya̱ ya kúneí iniꞌ rán Ndiosíꞌ jee suni íyó kuneí iniꞌ rán nuꞌuꞌ.

Juan 14:19

Yakuꞌ ni ka̱ꞌ ki̱vɨ̱ꞌ jee nku̱níꞌ ka̱ꞌ rá ñɨvɨ ñɨ̱vɨ́ yaꞌá nuꞌuꞌ, soo ránoꞌó chi kuniꞌ rán nuꞌuꞌ. Chi jie̱ꞌe̱ꞌ tékúꞌ ni̱ꞌ nɨ́ɨ́nkání, jee saáva suni sukuán ránoꞌó ranika̱ꞌ kutekuꞌ rán nɨ́ɨ́nkání jín ni̱ꞌ.

Juan 14:27

’Xinóo ni̱ꞌ ránoꞌó jee kɨ̱ꞌɨ̱nꞌ ni̱ꞌ, soo ne̱ va̱ꞌa koo iniꞌ rán kino̱o rán saꞌá ni̱ꞌ. Sáꞌá ni̱ꞌ ya̱ ne̱ va̱ꞌa kino̱o ánímaꞌ ránoꞌó kuéntáꞌ kúváꞌa iniꞌ ánímaꞌ ni̱ꞌ. Chi ntu nuún nótaꞌan sáꞌá ni̱ꞌ kuéntáꞌ kua̱ꞌ sáꞌá rá ñɨvɨ ñɨ̱vɨ́ yaꞌá ya̱ ntu yɨ́ꞌɨ́ ráa xi̱ntíín Ndiosíꞌ, chi ntu sáꞌá ráa ya̱ ne̱ va̱ꞌa koo iniꞌ rán kuéntáꞌ sáꞌá ni̱ꞌ. Saáva koto nániꞌvɨꞌ iniꞌ ánímaꞌ rán ni koto yúꞌví rán.

Juan 16:16

’Yakuꞌ ni ka̱ꞌ kúmániꞌ jee nku̱níꞌ rán ka̱ꞌ nu̱u̱nꞌ ni̱ꞌ. Jee nsú ki̱vɨ̱ꞌ kéꞌín jee kuniꞌ tuku rán nuꞌuꞌ, [chi kɨ̱noꞌonꞌ ni̱ꞌ nu̱u̱nꞌ nééꞌ Tátáꞌ ni̱ꞌ] ―nkachiꞌ Jesús.

Juan 16:20

Máá nááꞌ vá káchíꞌ ni̱ꞌ nu̱u̱nꞌ rán, ya̱ kunaꞌyuꞌ rán jee nukuéká iniꞌ rán, soo rá ñɨvɨ ñɨ̱vɨ́ chisaꞌ kusɨ̱ɨ̱ꞌ iniꞌ ráa. Soo súka̱ꞌ kukuéká iniꞌ rán, jee tu̱nkuéká iniꞌ rán vá nuvi‑i tu̱ꞌun sɨ́ɨ́ꞌ iniꞌ rán.

Juan 16:6

Chisaꞌ kúkuéká nasɨ́kuitɨꞌ iniꞌ rán chi nkachiꞌ ni̱ꞌ nu̱u̱nꞌ rán rá tu̱ꞌun ya̱ sukuán koo.

Juan 21:7

Saájee te̱e ya̱ súkuáꞌa Jesús maa ya̱ nñunu̱u̱nꞌ re̱ꞌ nkachiꞌ te̱e vá nu̱u̱nꞌ Pedro: ―¡Máá I̱toꞌoꞌ‑ó kúvi‑i! Sáá nteso̱ꞌo Simón Pedro ya̱ suvire̱ꞌ ví I̱toꞌoꞌ, jee nna̱ku̱ꞌun Pedro saꞌma re̱ꞌ (chi ntavaꞌ re̱ꞌ maa), jee íchíni nnava re̱ꞌ nu̱u̱nꞌ nute.

Juan 4:14

Soo ñɨvɨ ya̱ koꞌo nute ya̱ ku̱ꞌva ni̱ꞌ nu̱u̱nꞌ‑u, jee ni nsáꞌ kujichiꞌ ka̱ꞌ. Chisaꞌ nute ya̱ ku̱ꞌva ni̱ꞌ koꞌo‑o, jee kene vá iniꞌ‑i kuéntáꞌ kene nokoꞌ nute nu̱u̱nꞌ ñu̱ꞌún, jee saꞌá‑a ya̱ ni̱ꞌi̱nꞌ ñɨvɨ ya̱ kutekuꞌ‑u nɨ́ɨ́nkání jín Ndiosíꞌ ―nkachiꞌ Jesús.

Hechos 13:52

Jee rá ñɨvɨ ya̱ yɨ́ꞌɨ́ ráa nu̱u̱nꞌ Jesús kúsɨ́ɨꞌ iniꞌ ráa, jee ñúchitú Ta̱chi̱ꞌ Ííꞌ Ndiosíꞌ ráa.

Hechos 16:25

Soo yatin kuvi ñuún, Pablo jín Silas káꞌánꞌ ráa jín Ndiosíꞌ jee jíta ráa nákuetúꞌún ráa Ndiosíꞌ. Jee tésóꞌo rá inka ñɨvɨ násɨ́ꞌ iniꞌ veka̱a.

Hechos 2:46

Jee ta ki̱vɨ̱ꞌ kútútú ráa iniꞌ veñu̱ꞌun káꞌnú. Jee kútútú ráa veꞌi ta ɨɨn táꞌán ráa, sáva tasáva ráa i̱xta̱tíláꞌ, sáva naku̱ꞌun iniꞌ ráa Jesús. Jee yájíꞌ nkáꞌnú ráa jee kúsɨ́ɨꞌ iniꞌ ráa jee saɨn iniꞌ ráa.

Hechos 5:41

I̱ña̱jée nkene rá apóstol nu̱u̱nꞌ Justicia. Jee kúsɨ́ɨꞌ iniꞌ ráa, chi jíníꞌ Ndiosíꞌ ya̱ níkɨ́nꞌ na̱a̱ꞌ ráa Jesús jee saáva nnoꞌo ráa tu̱nkánuun jie̱ꞌe̱ꞌ re̱ꞌ.

2 Corintios 6:10

jín sáá kúkuéká iniꞌ ránꞌ, soo sukuáni íyó tu̱ꞌun kúsɨ́ɨꞌ iniꞌ ánímaꞌ ránꞌ, jín te̱e láꞌví kúvi ránꞌ, soo jiáꞌa ránꞌ nu̱u̱nꞌ kue̱ꞌe̱ꞌ ñɨvɨ ya̱ yɨ́yáꞌvi ka̱ꞌ ya̱ jiáꞌa Ndiosíꞌ, jín sáá ni ntu̱náꞌ kúmí ránꞌ, soo kúmí ránꞌ nɨꞌɨ ya̱ yɨ́yáꞌvi ka̱ꞌ ya̱ níꞌínꞌ ránꞌ nu̱u̱nꞌ Ndiosíꞌ.

2 Tesalonicenses 2:16

I̱ña̱jée, máá maá I̱toꞌoꞌ‑ó, Jesucristo, jín Tátáꞌ‑ó, Ndiosíꞌ, suviráa ñúnúunꞌ ráa yó. Saáva násaváꞌa ráa iniꞌ‑ó nɨ́ɨ́nkání, jee nsa̱ꞌá ráa ya̱ íyó tu̱neí iniꞌ‑ó ya̱ váꞌa saꞌá ráa nu̱u̱nꞌ‑ó, jie̱ꞌe̱ꞌ íyó mániꞌ iniꞌ ráa néꞌyá ráa yó.

Hebreos 10:34

Chi nku̱náꞌví iniꞌ rán rá ñɨvɨ ya̱ yɨ́ꞌɨ́ iniꞌ veka̱a jie̱ꞌe̱ꞌ íñɨ́ ráa jín tu̱ꞌun váꞌa Cristo. Jee suni ne̱ sɨ̱ɨ̱ꞌ ni̱yo iniꞌ rán sáá nka̱neeꞌ rá ñɨvɨ rá nantíñú kúmí rán, chi jíníꞌ rán ya̱ ne̱ antivɨ́ nu̱u̱nꞌ nééꞌ Ndiosíꞌ yukuán ñúꞌún ta̱ꞌvi̱ꞌ váꞌa nasɨ́kuitɨꞌ rán ka̱ꞌ ya̱ koo nɨ́ɨ́nkání.

Hebreos 6:18

Jee saájee íyó u̱vi̱ꞌ tu̱ꞌun nkachiꞌ re̱ꞌ vá ya̱ ni ntu̱né kúvi sama‑a, chi ntu kuvi katúꞌún Ndiosíꞌ. Saáva nsa̱náaꞌ re̱ꞌ sukuán sáva nuneí téyɨ́ɨ́ iniꞌ maáórán ya̱ numíjiꞌíꞌ nna̱tuꞌva‑ó nu̱u̱nꞌ re̱ꞌ nama re̱ꞌ yó, sáva ni̱ꞌi̱nꞌ‑ó tu̱neí iniꞌ‑ó ya̱ ni̱ꞌi̱nꞌ‑ó ta̱ꞌvi̱ꞌ taji re̱ꞌ nu̱u̱nꞌ‑ó.

1 Pedro 1:8

Maáréꞌ ví ya̱ ñúnúunꞌ rán re̱ꞌ súnika̱ꞌ ntu jíníꞌ jínúunꞌ rán re̱ꞌ, jee jínúꞌ iniꞌ rán re̱ꞌ sú ntu néꞌyá rán re̱ꞌ vitan jee ne̱ sɨ̱ɨ̱ꞌ kúvi iniꞌ rán kúsɨ́ɨꞌ iniꞌ rán ya̱ ntántúníꞌ nasɨ́kuitɨꞌ viiꞌ ya̱ ni ntu kúvi ni̱ꞌi̱nꞌ rán ka̱ꞌ tu̱ꞌun na̱ja vá kachiꞌ rán maa.