Juan 11:40 - Mixteco del suroeste de Tlaxiaco Oaxaca

⁴⁰ Soo nkachiꞌ Jesús: ―¿Á nsáꞌ nkachiꞌ ni̱ꞌ nu̱u̱nꞌ nú ya̱ retú jínúꞌ iniꞌ nú nuꞌuꞌ jee kuniꞌ nú ya̱ kúñáꞌnú nasɨ́kuitɨꞌ ví Ndiosíꞌ? ―nkachiꞌ Jesús.

Juan 11:40 ပူးပေါင်းရင်းမြစ်များ

Mateo 17:20

Jee nkachiꞌ Jesús nu̱u̱nꞌ ráa: ―Ntu nkúvi tavaꞌ rán maa jie̱ꞌe̱ꞌ matíꞌínꞌ kúneí iniꞌ rán Ndiosíꞌ. Chi máá naáꞌ vá káchíꞌ ni̱ꞌ nu̱u̱nꞌ rán, ya̱ retánꞌ kúneí iniꞌ rán Ndiosíꞌ, sú máá lúlí nijia kua̱ꞌ kuéntáꞌ íyó ɨɨn nikɨn lúlí yutun kúlíꞌ, yukuán jee kachiꞌ rán nu̱u̱nꞌ ɨɨn yuku yaꞌá: “Kuiyo nu̱u̱nꞌ íñɨ́ nú yaꞌá, jee kuáꞌán kuiñɨ nu̱u̱nꞌ yukuán”, jee kuiyo‑o, jee ntu íyó ɨɨn tiñu víjí ya̱ nkúvi saꞌá rán.

Marcos 9:23

Jee Jesús nkachiꞌ nu̱u̱nꞌ re̱ꞌ: ―¡Né núꞌ vá nkúvi ví! Nɨꞌɨ ni nu̱u̱nꞌ vá kuvi saꞌá ni̱ꞌ ya̱ kuvi nu̱u̱nꞌ ɨɨn ñɨvɨ ya̱ kúneí iniꞌ ñɨvɨ vá nuꞌuꞌ.

Juan 1:14

Jee maáréꞌ ya̱ kúvi Tu̱ꞌun vá nkenta nkuvi re̱ꞌ ɨɨn te̱e ñunéꞌyúꞌ jee nneeꞌ re̱ꞌ nteñu‑ó. Jee niniꞌ ránꞌ ya̱ viiꞌ nasɨ́kuitɨꞌ kúñáꞌnú re̱ꞌ. Kúñáꞌnú re̱ꞌ chi Se̱ꞌya métúꞌún Ndiosíꞌ kúvi re̱ꞌ ya̱ váji ne̱ nu̱u̱nꞌ Tátáꞌ‑ó Ndiosíꞌ. Jee ntántúníꞌ íyó mániꞌ iniꞌ re̱ꞌ néꞌyá re̱ꞌ yó jee mani kúvi re̱ꞌ ya̱ nááꞌ ya̱ saꞌ víꞌí káꞌ stúvi ya̱ nááꞌ jie̱ꞌe̱ꞌ Ndiosíꞌ.

Juan 11:4

Jee sáá nteso̱ꞌo Jesús rá tu̱ꞌun yaꞌá, jee nkachiꞌ re̱ꞌ: ―Kue̱ꞌi̱ꞌ yaꞌá jee nsú kue̱ꞌi̱ꞌ kuviꞌ re̱ꞌ kuvi‑i. Chisaꞌ sáva stúvi‑i ya̱ kúñáꞌnú nasɨ́kuitɨꞌ Ndiosíꞌ, sáva jie̱ꞌe̱ꞌ vá kuniꞌ rá ñɨvɨ ya̱ kúñáꞌnú ni̱ꞌ ya̱ kúvi Se̱ꞌya Ndiosíꞌ ―nkachiꞌ Jesús.

Juan 12:41

Nkachiꞌ Isaías rá tu̱ꞌun yaꞌá, chi nku̱káꞌnú ya̱chi̱ꞌ iniꞌ re̱ꞌ na̱sa kúñáꞌnú nasɨ́kuitɨꞌ Jesús, jee nkachiꞌ ya̱chi̱ꞌ re̱ꞌ jie̱ꞌe̱ꞌ‑e.

Juan 9:3

Jee nna̱xiníkó Jesús: ―Nsú jie̱ꞌe̱ꞌ ya̱ nsa̱ꞌá te̱e yaꞌá kua̱chi ni nsú jie̱ꞌe̱ꞌ tátáꞌ re̱ꞌ jín nánáꞌ re̱ꞌ kúvi‑i, chisaꞌ nkaku re̱ꞌ sukuán sáva stúvi Ndiosíꞌ nu̱u̱nꞌ rá ñɨvɨ rá tiñu ñáꞌnú ya̱ saꞌá re̱ꞌ nu̱u̱nꞌ te̱e yaꞌá.

Romanos 6:4

Saáva kuéntáꞌ nyɨse̱ꞌí nkáá‑ó jín Cristo sáá ña̱nuté‑ó, chi yɨ́ꞌɨ́‑ó nu̱u̱nꞌ re̱ꞌ ya̱ suni jíꞌín‑ó ni̱ꞌi̱ꞌ‑ó jín re̱ꞌ. Sáva sánikua̱ꞌ nnako̱o Cristo nna̱tekuꞌ re̱ꞌ nkene re̱ꞌ nteñu rá níꞌiꞌ nsa̱ꞌá Tátáꞌ re̱ꞌ jín fuersáꞌ ííꞌ kúñáꞌnú níso‑o jee suni sukuán kúvi nakaka‑ó ichi jiáá.

2 Corintios 3:18

Jee jie̱ꞌe̱ꞌ sukuán, váchóo nta̱ká maáó kuéntáꞌ ntu ka̱ꞌ násɨ́ꞌ nu̱u̱nꞌ‑ó. Chi kúvi‑ó kuéntáꞌ ɨɨn espejo néꞌyá‑ó ya̱ viiꞌ kúñáꞌnú I̱toꞌoꞌ‑ó jee jiánu̱te̱ꞌ‑ó nuva I̱toꞌoꞌ‑ó, chi maa Ta̱chi̱ꞌ Ííꞌ re̱ꞌ sáꞌá ya̱ ne̱ jíꞌín‑ó viiꞌ kua̱ꞌa̱nꞌ kua̱ꞌa̱nꞌ kúvi‑ó sánikua̱ꞌ viiꞌ kúñáꞌnú I̱toꞌoꞌ‑ó, chi ya̱ viiꞌ kua̱ꞌa̱nꞌ sáma re̱ꞌ iniꞌ‑ó sáva koo‑ó kuéntáꞌ íyó maá I̱toꞌoꞌ‑ó. Suꞌva sáꞌá I̱toꞌoꞌ‑ó ya̱ maáréꞌ ví Ta̱chi̱ꞌ Ííꞌ.

2 Corintios 4:6

Chi Ndiosíꞌ ví ya̱ nta̱túníꞌ re̱ꞌ ya̱ tu̱u̱nꞌ ñuꞌunꞌ nu̱u̱nꞌ neenꞌ sáá nsa̱ꞌá re̱ꞌ ñɨ̱vɨ́. Suni maá Ndiosíꞌ ví ya̱ stúúnꞌ re̱ꞌ iniꞌ ánímaꞌ‑ó sáva tu̱u̱nꞌ iniꞌ ánímaꞌ‑ó ya̱ kuniꞌ‑ó ya̱ viiꞌ nasɨ́kuitɨꞌ kúñáꞌnú re̱ꞌ chi jíníꞌ‑ó iniꞌ Jesús ya̱ kúvi Cristo, kuéntáꞌ jiánu̱te̱ꞌ nu̱u̱nꞌ re̱ꞌ.