Hebreos 1:3 - Mixteco del suroeste de Tlaxiaco Oaxaca

³ Jee ne̱ tu̱u̱nꞌ maá Se̱ꞌya re̱ꞌ viiꞌ kúñáꞌnú‑u mákua kúñáꞌnú re̱ꞌ, chi nuún náku‑u iniꞌ re̱ꞌ, chi ɨɨn ni kuvi ni núvíꞌ ráa. Jee tu̱ꞌun káꞌánꞌ Se̱ꞌya re̱ꞌ níso fuersáꞌ ííꞌ jee jín tu̱ꞌun tátúníꞌ Se̱ꞌya re̱ꞌ íyó kutú nɨꞌɨ ya̱ íyó. Jee sáá nkuvi nna̱sánoo‑o yó nu̱u̱nꞌ kua̱chi‑ó jie̱ꞌe̱ꞌ ya̱ nsa̱ꞌá‑a, jee nna̱kuneeꞌ‑e ichi kuáꞌá nu̱u̱nꞌ nééꞌ re̱ꞌ kúñáꞌnú re̱ꞌ tátúníꞌ re̱ꞌ ne̱ antivɨ́ súkún.

Hebreos 1:3 ပူးပေါင်းရင်းမြစ်များ

Mateo 22:24

―Mestrúꞌ, nkachiꞌ Moisés yanaꞌán víꞌí ya̱ retú kuviꞌ ɨɨn te̱e, jee ntu níyo se̱ꞌya re̱ꞌ jín ñasɨ́ꞌɨ́ re̱ꞌ, jee íyó natana̱ꞌá ñaniꞌ re̱ꞌ jín ñasɨ́ꞌɨ́ re̱ꞌ, sáva koo se̱ꞌya ña jín ñaniꞌ re̱ꞌ, sáva kuvi kuéntáꞌ se̱ꞌya re̱ꞌ, nkachiꞌ Moisés.

Marcos 16:19

Saájee sáá njia̱ꞌa ya̱ nkaꞌanꞌ maá I̱toꞌoꞌ‑ó Jesús jín ráa, jee nxi̱náa Ndiosíꞌ Jesús súkún. Jee ña̱kuneeꞌ re̱ꞌ ichi kuáꞌá Ndiosíꞌ nu̱u̱nꞌ tátúníꞌ re̱ꞌ jín‑i.

Juan 1:14

Jee maáréꞌ ya̱ kúvi Tu̱ꞌun vá nkenta nkuvi re̱ꞌ ɨɨn te̱e ñunéꞌyúꞌ jee nneeꞌ re̱ꞌ nteñu‑ó. Jee niniꞌ ránꞌ ya̱ viiꞌ nasɨ́kuitɨꞌ kúñáꞌnú re̱ꞌ. Kúñáꞌnú re̱ꞌ chi Se̱ꞌya métúꞌún Ndiosíꞌ kúvi re̱ꞌ ya̱ váji ne̱ nu̱u̱nꞌ Tátáꞌ‑ó Ndiosíꞌ. Jee ntántúníꞌ íyó mániꞌ iniꞌ re̱ꞌ néꞌyá re̱ꞌ yó jee mani kúvi re̱ꞌ ya̱ nááꞌ ya̱ saꞌ víꞌí káꞌ stúvi ya̱ nááꞌ jie̱ꞌe̱ꞌ Ndiosíꞌ.

Juan 1:29

Jee ki̱vɨ̱ꞌ steñu̱ꞌún jee niniꞌ Juan máá Jesús ya̱ váji‑i nu̱u̱nꞌ re̱ꞌ, jee nkachiꞌ re̱ꞌ nu̱u̱nꞌ rá ñɨvɨ: ―Kune̱ꞌyá rán chi te̱e yaꞌá kúvi kuéntáꞌ ɨɨn lanchi lúlí ya̱ nchu̱ichí Ndiosíꞌ maa, chi kuéntáꞌ jiáꞌníꞌ rá ñɨvɨ Israel lanchi lúlí sókóꞌ ráa maa nu̱u̱nꞌ Ndiosíꞌ jee sukuán sííyo te̱e yaꞌá kua̱chi si̱kɨ̱ꞌ rá ñɨvɨ.

Juan 1:4

Jee maáréꞌ ví ya̱ sáꞌá ya̱ kutekuꞌ ñɨvɨ jín Ndiosíꞌ. Jee ya̱ tékúꞌ ñɨvɨ jín Ndiosíꞌ kúvi ñuꞌunꞌ ya̱ túúnꞌ iniꞌ ánímaꞌ rá ñɨvɨ vá.

Hechos 2:33

Saáva Ndiosíꞌ nxi̱náa re̱ꞌ Jesús nu̱u̱nꞌ kúñáꞌnú‑u ya̱ nééꞌ‑e ichi kuáꞌá re̱ꞌ. Jee Ndiosíꞌ, Tááꞌ Jesús, njia̱ꞌa re̱ꞌ tiñu nu̱u̱nꞌ Jesús ya̱ tetíñú‑u Ta̱chi̱ꞌ Ííꞌ, sáni nchi̱sóyuꞌú re̱ꞌ, sáva sikúténuun‑u Ta̱chi̱ꞌ Ííꞌ nu̱u̱nꞌ rá ñɨvɨ. Jee yaꞌá ví ya̱ néꞌyá rán jín ya̱ tésóꞌo rán.

Hechos 7:56

Jee nkachiꞌ re̱ꞌ: ―¡Kune̱ꞌyá rán! Néꞌyá ni̱ꞌ núne antivɨ́ nu̱u̱nꞌ nééꞌ Ndiosíꞌ. Jee néꞌyá ni̱ꞌ Jesús, ya̱ nta̱jí Ndiosíꞌ re̱ꞌ nu̱u̱nꞌ ñɨ̱vɨ́ sáva kuvi re̱ꞌ Se̱ꞌya Ñɨvɨ, jee íñɨ́ re̱ꞌ ichi kuáꞌá Ndiosíꞌ ―nkachiꞌ Esteban.

Romanos 1:16

Chi ntu̱ví kúkanuun ni̱ꞌ jie̱ꞌe̱ꞌ tu̱ꞌun váꞌa Jesús, chi kúvi tu̱ꞌun vá fuersáꞌ ííꞌ Ndiosíꞌ sáva nátavaꞌ re̱ꞌ ntáká ñɨvɨ ya̱ kúneí iniꞌ ráa tu̱ꞌun vá nu̱u̱nꞌ kua̱chi ráa xinánitáꞌvíꞌ re̱ꞌ ráa, xíꞌnañúꞌún rá ñɨvɨ Israel jee suni rá ñɨvɨ ntu kúvi Israel.

Romanos 8:34

¿Né ɨɨn vá sijíta‑a yó nu̱u̱nꞌ Ndiosíꞌ résa? ¡Ntu̱ví!, chi maá Cristo Jesús ví ya̱ níꞌiꞌ re̱ꞌ jie̱ꞌe̱ꞌ‑ó, jee suni maáréꞌ ví ya̱ nna̱tekuꞌ re̱ꞌ jee nnako̱o re̱ꞌ nkene re̱ꞌ nteñu rá ni̱yɨ. Jee nééꞌ re̱ꞌ ichi kuáꞌá Ndiosíꞌ nu̱u̱nꞌ tátúníꞌ re̱ꞌ, jee suni yɨ́tuvi re̱ꞌ jíkánꞌ táꞌvíꞌ re̱ꞌ jie̱ꞌe̱ꞌ‑ó nu̱u̱nꞌ Ndiosíꞌ.

2 Corintios 4:4

Maá kui̱ꞌna̱ꞌ kúñáꞌnú ya̱ yósóꞌ nu̱u̱nꞌ rá ñɨvɨ ñɨ̱vɨ́ yaꞌá tiempúꞌ vitan kuéntáꞌ ɨɨn ndiosíꞌ, jee sáꞌá re̱ꞌ kuneenꞌ antúníꞌ rá ñɨvɨ vá, ya̱ ntu ínúꞌ iniꞌ ráa Cristo, ya̱ kuéntáꞌ kuáá ráa, sáva ntu̱ví jiáꞌa re̱ꞌ tu̱ꞌun váꞌa jie̱ꞌe̱ꞌ Cristo na̱tuunꞌ‑u iniꞌ ánímaꞌ ráa, sáva ntu kuniꞌ ráa ya̱ máá kúñáꞌnú Cristo ya̱ ɨɨn ni kúvi re̱ꞌ jín Ndiosíꞌ ya̱ tu̱vi nijinꞌ sáá íyó Ndiosíꞌ.

Colosenses 3:1

Saájee nu̱u̱nꞌ nna̱tekuꞌ rán jín Cristo nsa̱ꞌá Ndiosíꞌ, kuéntáꞌ nxi̱nákóo re̱ꞌ yó jín Cristo nteñu rá níꞌiꞌ, saáva kuꞌun iniꞌ rán ya̱ kuneenu̱u̱nꞌ rán ya̱ íyó nu̱u̱nꞌ ñuunꞌ íyó súkún, nu̱u̱nꞌ nééꞌ Cristo ichi kuáꞌá Ndiosíꞌ, nu̱u̱nꞌ kúñáꞌnú Cristo.

Tito 2:14

Chi njia̱ꞌa re̱ꞌ maáréꞌ ya̱ kuviꞌ re̱ꞌ jie̱ꞌe̱ꞌ‑ó, sáva chunáán nkáꞌnú re̱ꞌ maáréꞌ nu̱u̱nꞌ Ndiosíꞌ jie̱ꞌe̱ꞌ‑ó, sáva nakani núne re̱ꞌ yó naꞌá nta̱ká nu̱u̱nꞌ ya̱ niva̱ꞌa. Jee nna̱saꞌá noo nɨꞌɨ kuitɨꞌ re̱ꞌ kua̱chi níso ánímaꞌ‑ó, sáva kuvi‑ó ñɨvɨ maáréꞌ, sáva kuꞌun káñá iniꞌ‑ó saꞌá‑ó ya̱ váꞌa.

Hebreos 1:13

Jee ni nsáꞌ nkachiꞌ Ndiosíꞌ nu̱u̱nꞌ ni ɨɨn rá najiáꞌáꞌ ííꞌ re̱ꞌ [sáni nkachiꞌ re̱ꞌ nu̱u̱nꞌ Se̱ꞌya re̱ꞌ]: Kuneeꞌ ichi kuáꞌá ni̱ꞌ nu̱u̱nꞌ tatúníꞌ nú jín ni̱ꞌ, jee kuneeꞌ nú yukuán ne̱kua̱ꞌ kuneí ni̱ꞌ jín rá ñɨvɨ jíníꞌ u̱ꞌvi̱ꞌ néꞌyá ráa noꞌó, kakɨnꞌ ni̱ꞌ ráa chi̱ji jie̱ꞌe̱ꞌ nú kuéntáꞌ teyuꞌ.

Hebreos 10:12

Soo Cristo, jee ɨɨn ni íchí nso̱ko̱ꞌ re̱ꞌ maáréꞌ nu̱u̱nꞌ ntáká tiempúꞌ sáá ni̱ꞌi̱ꞌ re̱ꞌ jie̱ꞌe̱ꞌ kua̱chi‑ó, jee ña̱kuneeꞌ re̱ꞌ ichi kuáꞌá Ndiosíꞌ nu̱u̱nꞌ kúñáꞌnú re̱ꞌ.

Hebreos 12:2

Kunenu̱u̱nꞌ‑ó Jesús ya̱ nu̱u̱nꞌ maáréꞌ va̱ji ya̱ kuneí iniꞌ‑ó re̱ꞌ, jee síkújia re̱ꞌ iniꞌ‑ó ya̱ kuneí va̱ꞌa iniꞌ‑ó re̱ꞌ ne̱ nu̱u̱nꞌ nɨꞌɨ. Chi ñeꞌneꞌ iniꞌ re̱ꞌ nnoꞌo re̱ꞌ nu̱u̱nꞌ kurúsiꞌ, jee ntu ntɨ́ɨn kuéntáꞌ re̱ꞌ ya̱ ku̱ꞌva rá ñɨvɨ tu̱nkánuun nu̱u̱nꞌ re̱ꞌ ya̱ kuviꞌ re̱ꞌ sukuán, chi njia̱ꞌa Ndiosíꞌ re̱ꞌ ya̱ kusɨ̱ɨ̱ꞌ víꞌí iniꞌ re̱ꞌ ichinúúnꞌ jee suni nna̱kuneeꞌ re̱ꞌ ichi kuáꞌá teyuꞌ nu̱u̱nꞌ nééꞌ Ndiosíꞌ tátúníꞌ‑i.

Hebreos 4:14

Íyó jín‑ó ɨɨn su̱tu̱ꞌ kúñáꞌnú ka̱ꞌ ya̱ nnaa re̱ꞌ súkún nu̱u̱nꞌ nééꞌ Ndiosíꞌ. Jesús ví su̱tu̱ꞌ vá, ya̱ kúvi re̱ꞌ Se̱ꞌya Ndiosíꞌ. Saáva íyó kuiñɨ ni̱ꞌin‑ó jín tu̱ꞌun njia̱ꞌayuꞌú‑ó ya̱ jínúꞌ iniꞌ‑ó.

Hebreos 7:27

Jee ntu jíniñúꞌún re̱ꞌ saꞌá re̱ꞌ ta ki̱vɨ̱ꞌ kua̱ꞌ nsa̱ꞌá rá inka ka̱ꞌ rá su̱tu̱ꞌ kúñáꞌnú yanaꞌán, ya̱ xíꞌnañúꞌún ka̱ꞌ jiáꞌníꞌ ráa sa̱na̱ꞌ sókóꞌ ráa jie̱ꞌe̱ꞌ kua̱chi maáráa, jee kuíre sókóꞌ ráa jie̱ꞌe̱ꞌ kua̱chi rá ñɨvɨ ranika̱ꞌ ta ki̱vɨ̱ꞌ. Chisaꞌ métúꞌún ɨɨn íchíni nso̱ko̱ꞌ re̱ꞌ maáréꞌ nu̱u̱nꞌ ntáká tiempúꞌ jie̱ꞌe̱ꞌ kua̱chi‑ó sáá ni̱ꞌi̱ꞌ re̱ꞌ.

Hebreos 8:1

Jee saáva ya̱ ñáꞌnú nasɨ́kuitɨꞌ ka̱ꞌ kúvi jie̱ꞌe̱ꞌ rá tu̱ꞌun ya̱ káchíꞌ ráníꞌ kúvi ya̱ íyó ɨɨn su̱tu̱ꞌ kúñáꞌnú‑ó, sáni nkachiꞌ ránꞌ, ya̱ maáréꞌ ví ya̱ ña̱kuneeꞌ re̱ꞌ ichi kuáꞌá teyuꞌ nu̱u̱nꞌ nééꞌ Ndiosíꞌ kúñáꞌnú tátúníꞌ‑i ne̱ antivɨ́.

Hebreos 9:16

Chi nu̱u̱nꞌ íyó ɨɨn tutuꞌ ya̱ sáꞌá ɨɨn ñɨvɨ ya̱ jiáꞌa ya̱ naáꞌ jie̱ꞌe̱ꞌ ya̱ kínóo nijia ta̱ꞌvi̱ꞌ ya̱ xinóo ñɨvɨ vá, jee íyó stúvi ya̱ naáꞌ nijia ya̱ níꞌiꞌ ñɨvɨ xí tutuꞌ vá sáva kootiñu tutuꞌ vá.

Hebreos 9:26

Chi retánꞌ sukuán nkuvi, soo jíniñúꞌún ya̱ kue̱ꞌe̱ꞌ íchí kunoꞌo re̱ꞌ kuviꞌ re̱ꞌ ne̱ sáá nka̱jiéꞌé ña̱ko̱o ñɨ̱vɨ́ jín ne̱ vitan réáꞌ sukuán. Soo ntu̱ví chi vitan ya̱ kúvi tiempúꞌ kuánɨꞌɨ yaꞌá jee nkiji re̱ꞌ sáva nso̱ko̱ꞌ re̱ꞌ maáréꞌ ɨɨn ni íchí ya̱ kúvi nɨ́ɨ́nkání sáva siíyo re̱ꞌ kua̱chi.

1 Pedro 1:21

Chi jie̱ꞌe̱ꞌ Cristo jee jínúꞌ iniꞌ rán Ndiosíꞌ, ya̱ kúvi re̱ꞌ ya̱ nna̱xinátekuꞌ i̱i̱ꞌ tuku re̱ꞌ Cristo nnene‑e nteñu rá níyɨ, jee nnu̱ñáꞌnú nasɨ́kuitɨꞌ‑ɨ nsa̱ꞌá re̱ꞌ, jee saáva kúneí iniꞌ rán ínúꞌ iniꞌ rán Ndiosíꞌ, jee íyó kutú tu̱neí iniꞌ rán nétu rán ya̱ saꞌá re̱ꞌ.

1 Pedro 3:22

Jee nnaa Cristo kua̱noꞌonꞌ‑o antivɨ́ súkún, jee nééꞌ re̱ꞌ ichi kuáꞌá Ndiosíꞌ nu̱u̱nꞌ kúñáꞌnú nasɨ́kuitɨꞌ re̱ꞌ tátúníꞌ re̱ꞌ, jee rá najiáꞌáꞌ ííꞌ, jín rá nísotíñú, jín rá níso fuersáꞌ, nchiꞌi Ndiosíꞌ ráa xi̱ntíín re̱ꞌ.

2 Pedro 1:16

Chi ntu nníkɨ́nꞌ ránꞌ ntu ntɨ́ɨn kuéntáꞌ ránꞌ rá kuentúꞌ túꞌún máñáꞌ ya̱ nkene xi̱ni̱ꞌ ñɨvɨ sáá nsi̱kúkáꞌnú ránꞌ iniꞌ ránoꞌó jie̱ꞌe̱ꞌ ya̱ kenta I̱toꞌoꞌ‑ó Jesús ya̱ kúvi Cristo jín jie̱ꞌe̱ꞌ fuersáꞌ ííꞌ ni̱ꞌin níso re̱ꞌ, chisaꞌ niniꞌ jínúunꞌ ráníꞌ ya̱ viiꞌ kúñáꞌnú re̱ꞌ.

2 Pedro 1:17

Jee nni̱ꞌi̱nꞌ re̱ꞌ ya̱ Tátáꞌ‑ó Ndiosíꞌ nkaꞌanꞌ yɨ́ñúꞌún‑u jín re̱ꞌ, jee nsa̱ꞌá ñáꞌnú‑u re̱ꞌ. Chi ne̱ súkún nkiji rá tu̱ꞌun ne̱ nu̱u̱nꞌ nuva máá Ndiosíꞌ máá viiꞌ kúñáꞌnú‑u, jee nkachiꞌ‑i: “Yaꞌá ví Se̱ꞌya ni̱ꞌ jee ñúnúunꞌ ni̱ꞌ re̱ꞌ, jee kúváꞌa iniꞌ ni̱ꞌ néꞌyá ni̱ꞌ re̱ꞌ”, nkachiꞌ Ndiosíꞌ.

1 Juan 1:7

Soo retú na̱a̱ꞌ jiáꞌnu‑ó kuéntáꞌ nu̱u̱nꞌ túúnꞌ ñuꞌunꞌ sánikua̱ꞌ íyó maáréꞌ nu̱u̱nꞌ túúnꞌ ñuꞌunꞌ ya̱ kúvi ya̱ na̱a̱ꞌ íyó maáréꞌ, saájee íyó ɨnuún‑ó jín ɨɨn inka táꞌán‑ó, jee nónoo‑ó nu̱u̱nꞌ re̱ꞌ chi ni̱ꞌi̱ꞌ maá Se̱ꞌya re̱ꞌ Jesús jee ñatɨ ni̱ñɨ̱ꞌ vá sáva nasánoo‑o yó nu̱u̱nꞌ nta̱ká kua̱chi‑ó.

1 Juan 3:5

Jee jíníꞌ rán ya̱ Jesús nkiji re̱ꞌ ñɨ̱vɨ́ yaꞌá sáva siíyo re̱ꞌ rá kua̱chi‑ó. Jee ntu̱ví ná kua̱chi re̱ꞌ íyó.

Judas 1:25

Jee métúꞌún Ndiosíꞌ ví Ndiosíꞌ jee [níchí re̱ꞌ], jee síkáku re̱ꞌ yó nátavaꞌ re̱ꞌ yó nu̱u̱nꞌ kua̱chi‑ó, jie̱ꞌe̱ꞌ ya̱ nsa̱ꞌá re̱ꞌ jín I̱toꞌoꞌ‑ó Jesús ya̱ ya níso re̱ꞌ tiñu ya̱ kúvi re̱ꞌ máá Cristo. Jee na̱ ka̱ꞌ nákuetúꞌún‑ó Ndiosíꞌ, jee kúñáꞌnú víꞌí re̱ꞌ, jee níso re̱ꞌ fuersáꞌ ííꞌ nasɨ́kuitɨꞌ, jee tátúníꞌ re̱ꞌ tiñu nu̱u̱nꞌ nɨꞌɨ, [ne̱ yanaꞌán jín] ne̱ vitan, jín nɨ́ɨ́nkání. Sukuán koo. Amén.

Apoclipsis 3:21

’Jee ñɨvɨ ya̱ kuneí‑i si̱kɨ̱ꞌ ya̱ níváꞌa jín nu̱u̱nꞌ kui̱ꞌna̱ꞌ kúñáꞌnú, jee ku̱ꞌva ni̱ꞌ ya̱ kuneeꞌ ñɨvɨ vá jín nuꞌuꞌ nu̱u̱nꞌ teyuꞌ ni̱ꞌ nu̱u̱nꞌ tátúníꞌ ni̱ꞌ, kuéntáꞌ kua̱ꞌ nku̱neí ni̱ꞌ si̱kɨ̱ꞌ tiñu níváꞌa jee nééꞌ ni̱ꞌ jín Tááꞌ ni̱ꞌ nu̱u̱nꞌ teyuꞌ re̱ꞌ nu̱u̱nꞌ tátúníꞌ re̱ꞌ.

Apoclipsis 4:11

I̱toꞌoꞌ ránꞌ ya̱ kúvi nú Ndiosíꞌ ránꞌ, chi nóꞌo kúvi ya̱ íyó ya̱ ni̱ꞌi̱nꞌ nú, ya̱ káchíꞌ ránꞌ ya̱ viiꞌ kúñáꞌnú nú, jín ya̱ nákuetúꞌún ránꞌ noꞌó, jín ya̱ níso víꞌí nú fesáꞌ ííꞌ, chi maánú nsa̱ꞌá ntáká ya̱ íyó, chi sáni nkuini iniꞌ maánú, jee nkenta ña̱ko̱o ráa, jee nsa̱ꞌá nú maa, nkachiꞌ ráa.