Gálatas 4:4 - Mixteco del suroeste de Tlaxiaco Oaxaca

⁴ Soo sáá nkenta tiempúꞌ ñani Ndiosíꞌ, jee nchu̱ichí re̱ꞌ Se̱ꞌya re̱ꞌ. Jee nkaku‑u chi̱ji ɨɨn ñaꞌan. Jee ne̱ nkaku‑u nyɨ̱ꞌɨ‑ɨ chi̱ji xi̱ntíín tu̱ꞌun ley njia̱ꞌa Ndiosíꞌ nu̱u̱nꞌ Moisés.

Gálatas 4:4 ပူးပေါင်းရင်းမြစ်များ

Génesis 3:15

Jee saꞌá ni̱ꞌ ya̱ tu̱fi̱ꞌ ta̱ꞌán noꞌó jín ñaꞌan vá, jín ya̱ tu̱fi̱ꞌ ta̱ꞌán se̱ꞌya ichiyúkúnꞌ nú jín se̱ꞌya ichiyúkúnꞌ ña. Jee ɨɨn se̱ꞌya ichiyúkúnꞌ ña xtufíꞌ re̱ꞌ xi̱ni̱ꞌ nú, jee suvinú xtufíꞌ xu̱jieꞌéꞌ re̱ꞌ.

Génesis 49:10

Jee nkuíyo bastón nu̱u̱nꞌ Judá, jee kino̱o bastón te̱e néetiñu jín rá ichiyúkúnꞌ kiji nu̱u̱nꞌ re̱ꞌ ya̱ tatúníꞌ ráa ne̱kua̱ꞌ kiji te̱e xí karútíꞌ vá, jee rá ñɨvɨ ntáká rá ñuunꞌ kaníjiá ráa re̱ꞌ.

Mateo 1:23

Kune̱ꞌyá rán, ɨɨn ñaꞌan súchí núún, nanise̱ꞌya ña, jee sikáku ña ɨɨn su̱chí yɨ́ɨ́, jee sikúnání ráa maa Emanuel káchíꞌ nu̱u̱nꞌ Tutuꞌ Ííꞌ. Emanuel kuíni kachiꞌ: Ndiosíꞌ íyó re̱ꞌ jín‑ó.

Mateo 3:15

Jee nkachiꞌ Jesús nu̱u̱nꞌ re̱ꞌ: ―Kɨnetuꞌ nú saꞌá‑ó maa, chi saá íyó sikúnkuvi‑ó ntáká rá tiñu na̱a̱ꞌ sáni kuíni Ndiosíꞌ saꞌá‑ó ―nkachiꞌ re̱ꞌ. Saájee ñɨ̱netuꞌ Juan sikuánuté re̱ꞌ Jesús.

Mateo 5:17

’Jee koto jiáni iniꞌ rán ya̱ va̱ji ni̱ꞌ sijíta ni̱ꞌ tu̱ꞌun ley Ndiosíꞌ ya̱ nstúvi re̱ꞌ nu̱u̱nꞌ Moisés yanaꞌán, áxí rá tu̱ꞌun nna̱kani rá te̱e ya̱ nna̱kani rá tu̱ꞌun nkene yuꞌú Ndiosíꞌ ne̱ yanaꞌán. Nsáꞌ váji sijíta ni̱ꞌ rá tu̱ꞌun káchíꞌ ráa, chisaꞌ va̱ji ni̱ꞌ sikúnkuvi ni̱ꞌ rá tu̱ꞌun vá.

Marcos 1:15

jee nkachiꞌ re̱ꞌ: ―Ya nkenta ki̱vɨ̱ꞌ ñani Ndiosíꞌ, ya̱ va̱kuyatin ya̱ tátúníꞌ Ndiosíꞌ nu̱u̱nꞌ ñɨvɨ. Nakani iniꞌ rán jee i̱nu̱ꞌ iniꞌ rán tu̱ꞌun váꞌa Ndiosíꞌ, naní evangelio.

Lucas 1:31

Jee kuniꞌ nú chi nanise̱ꞌya nú, jee koo ɨɨn se̱ꞌya yɨ́ɨ́ nú, jee sikúnání nú maa Jesús.

Lucas 1:35

Jee nna̱xiníkó najiáꞌáꞌ ííꞌ vá nu̱u̱nꞌ ña: ―Ta̱chi̱ꞌ Ííꞌ kiji‑i nu̱u̱nꞌ noꞌó, jee kiji fuersáꞌ níꞌin níso maá Ndiosíꞌ máá ñáꞌnú ka̱ꞌ nu̱u̱nꞌ nɨꞌɨ jee kenta‑a kikasɨꞌ kátɨ́‑ɨ noꞌó jee saꞌá‑a tiñu a̱nasɨ́ jín noꞌó. Jee saáva te̱e lúlí i̱i̱ꞌ ya̱ kaku vá kuna̱ní‑i Se̱ꞌya Ndiosíꞌ.

Lucas 2:7

Jee nsi̱káku ña se̱ꞌya yɨ́ɨ́ ña ya̱ kúvi se̱ꞌya xíꞌnañúꞌún ña, jee nsu̱kún ña saꞌma maa, jee ñakɨnꞌ ña maa nu̱u̱nꞌ káá ya̱ yájíꞌ rá sa̱na̱ꞌ, chi ntu̱ví íyó núne ka̱ꞌ iniꞌ veꞌi nu̱u̱nꞌ kínóo rá ñɨvɨ.

Lucas 20:44

Saájee ne̱ maá David nkachiꞌ‑i ya̱: I̱toꞌoꞌ ni̱ꞌ kúvi Cristo. Saáva, ¿na̱ja vá kúvi Cristo ɨɨn se̱ꞌya ichiyúkúnꞌ nkene nu̱u̱nꞌ David rúja? ―nkachiꞌ Jesús.

Juan 1:14

Jee maáréꞌ ya̱ kúvi Tu̱ꞌun vá nkenta nkuvi re̱ꞌ ɨɨn te̱e ñunéꞌyúꞌ jee nneeꞌ re̱ꞌ nteñu‑ó. Jee niniꞌ ránꞌ ya̱ viiꞌ nasɨ́kuitɨꞌ kúñáꞌnú re̱ꞌ. Kúñáꞌnú re̱ꞌ chi Se̱ꞌya métúꞌún Ndiosíꞌ kúvi re̱ꞌ ya̱ váji ne̱ nu̱u̱nꞌ Tátáꞌ‑ó Ndiosíꞌ. Jee ntántúníꞌ íyó mániꞌ iniꞌ re̱ꞌ néꞌyá re̱ꞌ yó jee mani kúvi re̱ꞌ ya̱ nááꞌ ya̱ saꞌ víꞌí káꞌ stúvi ya̱ nááꞌ jie̱ꞌe̱ꞌ Ndiosíꞌ.

Juan 10:36

soo nu̱u̱nꞌ nkachiꞌ re̱ꞌ sukuán jie̱ꞌe̱ꞌ ráa, saájee jie̱ꞌe̱ꞌ nuꞌuꞌ, ya̱ Tátáꞌ ni̱ꞌ Ndiosíꞌ chi nsa̱ꞌá sɨ́ɨ́n re̱ꞌ nuꞌuꞌ kɨtíñú ni̱ꞌ saꞌá ni̱ꞌ tiñu re̱ꞌ jee nchu̱ichí re̱ꞌ nuꞌuꞌ va̱ji ni̱ꞌ iniꞌ ñɨvɨ yaꞌá, jee ránoꞌó, ¿na̱ja kúvi káchíꞌ rán ya̱ káꞌánꞌ niva̱ꞌa ni̱ꞌ jie̱ꞌe̱ꞌ Ndiosíꞌ, jie̱ꞌe̱ꞌ ya̱ nkachiꞌ ni̱ꞌ: “Kúvi ni̱ꞌ Se̱ꞌya Ndiosíꞌ”, rúja?

Juan 3:16

’Chi na̱ ka̱ꞌ vá ñúnúunꞌ ka̱ꞌ Ndiosíꞌ ñɨvɨ ñɨ̱vɨ́, saáva njia̱ꞌa re̱ꞌ Se̱ꞌya métúꞌún re̱ꞌ nkiji‑i, sáva nta̱ká rá ñɨvɨ ya̱ kúneí iniꞌ ráa maa, jee nsáꞌ kɨ̱naanꞌ ráa, chisaꞌ kutekuꞌ ráa nɨ́ɨ́nkání jín re̱ꞌ.

Juan 6:38

Chi nkikuun ni̱ꞌ ne̱ antivɨ́, nsú sáva saꞌá ni̱ꞌ ya̱ kuíni ni̱ꞌ, chisaꞌ sáva saꞌá ni̱ꞌ ya̱ kuíni maáréꞌ ya̱ nchu̱ichí nuꞌuꞌ va̱ji ni̱ꞌ.

Juan 8:42

Saájee nkachiꞌ Jesús nu̱u̱nꞌ ráa: ―Jee retánꞌ Ndiosíꞌ kúvi re̱ꞌ Tátáꞌ rán, jee kunu̱u̱nꞌ rán nuꞌuꞌ nékúvi. Chi nuꞌuꞌ, jee ne̱ nu̱u̱nꞌ Ndiosíꞌ nkene ni̱ꞌ va̱ji ni̱ꞌ. Jee nsú jie̱ꞌe̱ꞌ nkuini maáníꞌ jee va̱ji ni, chisaꞌ maáréꞌ nta̱jí re̱ꞌ nuꞌuꞌ va̱ji ni̱ꞌ.

Hechos 1:7

Jee nkachiꞌ Jesús nu̱u̱nꞌ ráa: ―Ntu̱né íyó kukáꞌnú iniꞌ ránú ni na̱ ki̱vɨ̱ꞌ ni nama ñani Tátáꞌ ni̱ꞌ maa. Maá Tááꞌ ni̱ꞌ ñani hora vá, chi nísotíñú re̱ꞌ.

Romanos 1:3

jie̱ꞌe̱ꞌ Se̱ꞌya re̱ꞌ Jesús, ya̱ nkuvi tataꞌ ichiyúkúnꞌ nkiji‑i nu̱u̱nꞌ David sáá nkiji‑i kuvi‑i ñɨvɨ ñunéꞌyúꞌ.

Romanos 15:8

Chi káchíꞌ ni̱ꞌ ya̱ nkiji Cristo sáva kɨtíñú re̱ꞌ chineí re̱ꞌ rá ñɨvɨ Israel, sáva stúvi re̱ꞌ ya̱ na̱a̱ꞌ ví Tu̱ꞌun Ndiosíꞌ, jee sáva sikúnkuvi re̱ꞌ rá tu̱ꞌun ya̱ nchi̱sóyuꞌú Ndiosíꞌ nu̱u̱nꞌ rá jííꞌ yanaꞌán ráníꞌ.

Romanos 5:6

Chi ne̱ sáá táyáꞌ iniꞌ‑ó ntu̱náꞌ kúvi saꞌá‑ó sáva kino̱o na̱a̱ꞌ‑ó nu̱u̱nꞌ Ndiosíꞌ, jee maá tiempúꞌ ñani Ndiosíꞌ ni̱ꞌi̱ꞌ Cristo jie̱ꞌe̱ꞌ rá ñɨvɨ ntu ntɨ́ɨn kuéntáꞌ ráa Ndiosíꞌ.

Romanos 8:3

Chi máá maá Ndiosíꞌ nsa̱ꞌá re̱ꞌ tiñu vá ya̱ ntu nkúvi saꞌá ley nta̱túníꞌ re̱ꞌ ya̱ njiáꞌa re̱ꞌ nu̱u̱nꞌ Moisés. Jee ntu nkúvi saꞌá ley vá tiñu vá, chi táyáꞌ ley vá chi táyáꞌ iniꞌ‑ó jee ntu nkúneí‑ó sikúnkuvi‑ó ley vá jín yɨkɨkúñu‑ó. Jee máá maá Ndiosíꞌ nsa̱ꞌá re̱ꞌ tiñu vá chi nchu̱ichí re̱ꞌ Se̱ꞌya re̱ꞌ nu̱u̱nꞌ ñɨ̱vɨ́ yaꞌá jín yɨkɨkúñu‑u ya̱ kúnkunuún jín yɨkɨkúñu ñɨvɨ yɨ́ꞌɨ́ xi̱ntíín kua̱chi, sú ntu íyó kua̱chi re̱ꞌ. Jee nta̱jí re̱ꞌ Se̱ꞌya re̱ꞌ sáva kuviꞌ‑i so̱ko̱ꞌ‑o maáa jie̱ꞌe̱ꞌ kua̱chi‑ó, sáva sukuán nsi̱jíta Ndiosíꞌ kua̱chi‑ó ya̱ nna̱kuniso Jesús maa iniꞌ yɨkɨkúñu re̱ꞌ.

Romanos 9:5

Jee suviráa kúvi ichiyúkúnꞌ váji ráa nu̱u̱nꞌ rá tátáꞌ jííꞌ ráa ya̱ nku̱ñáꞌnú nu̱u̱nꞌ Israel yanaꞌán. Jee nu̱u̱nꞌ tataꞌ ichiyúkúnꞌ ráa nkene Cristo sáá nkiji re̱ꞌ nkuvi re̱ꞌ te̱e ñunéꞌyúꞌ. Jee suvire̱ꞌ vá kúvi Ndiosíꞌ ya̱ tátúníꞌ re̱ꞌ nu̱u̱nꞌ kua̱íyó ya̱ íyó, jee netuꞌ kúvi re̱ꞌ nɨ́ɨ́nkání. ¡Suꞌva koo, amén!

Efesios 1:10

Chi sikúnkuvi re̱ꞌ maa sáá kenta máá tiempúꞌ ya̱ nkáji re̱ꞌ, ya̱ nachiꞌi re̱ꞌ ntáká nantíñú xi̱ntíín Cristo, rá íyó antivɨ́ jín rá íyó iniꞌ ñɨ̱vɨ́ yaꞌá.

Colosenses 2:14

Chi nsi̱jíta re̱ꞌ maá acta ya̱ níso rá kua̱chi si̱kɨ̱ꞌ‑ó ya̱ nsi̱jíta‑a yó, jie̱ꞌe̱ꞌ ya̱ nta̱túníꞌ re̱ꞌ nu̱u̱nꞌ‑ó. Jee nsiíyo re̱ꞌ acta vá, sáá ni̱ꞌi̱ꞌ Cristo nu̱u̱nꞌ kurúsiꞌ, chi íyó kuéntáꞌ nkani Ndiosíꞌ acta vá nu̱u̱nꞌ kurúsiꞌ, sáva nchu̱náán nkáꞌnú Cristo maa.

1 Timoteo 2:6

Jee suvire̱ꞌ nso̱ko̱ꞌ maáréꞌ jee ni̱ꞌi̱ꞌ re̱ꞌ, sáva nchu̱náán nkáꞌnú re̱ꞌ nu̱u̱nꞌ Ndiosíꞌ jie̱ꞌe̱ꞌ kua̱chi nɨꞌɨ ñɨvɨ. Suꞌva nstúvi Ndiosíꞌ tiempúꞌ nka̱ji re̱ꞌ, ya̱ kuíni re̱ꞌ saꞌá re̱ꞌ ya̱ nanitáꞌvíꞌ nɨꞌɨ ñɨvɨ.

1 Timoteo 3:16

Va̱tu̱ꞌ nijia ya̱ kúvi ya̱ naáꞌ, ya̱ mánasɨ́ ví tu̱ꞌun yuꞌuꞌ jie̱ꞌe̱ꞌ ichi na̱a̱ꞌ Ndiosíꞌ, ya̱ sukuán ntañúꞌún nstúvi re̱ꞌ nu̱u̱nꞌ‑ó: Ndiosíꞌ ntu̱vi nu̱u̱nꞌ ñɨ̱vɨ́, jee ni̱yo yɨkɨkúñu re̱ꞌ, chi nkenta kúvi re̱ꞌ ɨɨn te̱e. Nstúvi kájí nijia Ta̱chi̱ꞌ Ííꞌ re̱ꞌ, ya̱ na̱a̱ꞌ ví re̱ꞌ. Ntu̱vi re̱ꞌ nu̱u̱nꞌ rá najiáꞌáꞌ ííꞌ Ndiosíꞌ. Nte̱ku̱tu̱ꞌún jie̱ꞌe̱ꞌ re̱ꞌ nu̱u̱nꞌ rá ñɨvɨ ñɨ̱vɨ́. Ni̱nu̱ꞌ iniꞌ ñɨvɨ ñɨ̱vɨ́ re̱ꞌ. Nnaa re̱ꞌ kua̱noꞌonꞌ re̱ꞌ súkún nu̱u̱nꞌ ñuunꞌ viiꞌ nasɨ́kuitɨꞌ nu̱u̱nꞌ tátúníꞌ Ndiosíꞌ.

Hebreos 2:14

Saáva rá se̱ꞌya vá jee ñɨvɨ yɨkɨkúñu ví ráa, jee suni sukuán nuún nkuvi maá Jesús chi suni ñɨvɨ yɨkɨkúñu ví re̱ꞌ ranika̱ꞌ, sáva nkuvi ni̱ꞌi̱ꞌ re̱ꞌ jie̱ꞌe̱ꞌ‑ó, sáva kuneí re̱ꞌ nu̱u̱nꞌ kui̱ꞌna̱ꞌ kúñáꞌnú ya̱ níso fuersáꞌ ya̱ kínóo ñɨvɨ jín kua̱chi ráa jee jíꞌíꞌ ráa jee ntu nánitáꞌvíꞌ ráa.

Hebreos 9:10

Chi ntáká rá tiñu yukuán, jee kua̱chi kuitɨꞌ kúvi‑i tu̱ꞌun ya̱ tátúníꞌ‑i na̱ja saꞌá‑ó jín yɨkɨkúñu‑ó. Chi tátúníꞌ‑i jie̱ꞌe̱ꞌ ya̱ yájíꞌ, jín ya̱ jíꞌi, jín jie̱ꞌe̱ꞌ na̱ja nasaꞌá noo‑ó yɨkɨkúñu‑ó. Jee ñakɨnꞌ Ndiosíꞌ tiñu vá ne̱kua̱ꞌ tiempúꞌ nasaꞌá jiáá na̱a̱ꞌ re̱ꞌ nɨꞌɨ.

1 Juan 4:14

Jee ránuꞌuꞌ chi niniꞌ ránꞌ jee nástúvi ránꞌ ya̱ máá Tátáꞌ‑ó Ndiosíꞌ nchu̱ichí re̱ꞌ Se̱ꞌya re̱ꞌ nkiji‑i sáva sikáku‑u maáórán ya̱ kúvi‑ó ñɨvɨ ñɨ̱vɨ́ yaꞌá jie̱ꞌe̱ꞌ xinóꞌo Ndiosíꞌ yó jie̱ꞌe̱ꞌ kua̱chi‑ó.

1 Juan 4:2

Jee suꞌva kuniꞌ rán retú Ta̱chi̱ꞌ Ííꞌ Ndiosíꞌ ví ya̱ njia̱ꞌa tu̱ꞌun káꞌánꞌ ñɨvɨ: nta̱ká ñɨvɨ ya̱ jiáꞌayuꞌú ráa ya̱ Jesús kúvi re̱ꞌ Cristo, ya̱ ñani Ndiosíꞌ sáva tatúníꞌ re̱ꞌ nu̱u̱nꞌ ñɨ̱vɨ́, jín ya̱ nkenta re̱ꞌ ñɨ̱vɨ́ yaꞌá sáva kúvi re̱ꞌ te̱e jín yɨkɨkúñu re̱ꞌ, jee Ta̱chi̱ꞌ Ííꞌ Ndiosíꞌ ví ya̱ njiáꞌa tu̱ꞌun vá nu̱u̱nꞌ ráa.