Gálatas 2:4 - Mixteco del suroeste de Tlaxiaco Oaxaca

⁴ Nku̱tútú sɨ́ɨ́n ránꞌ suꞌva, chi nki̱vɨ te̱e káꞌvi ni ya̱ káchíꞌ ráa nika̱ꞌ ya̱ kúvi ráa ñaniꞌ‑ó. Nki̱vɨ yuꞌuꞌ ráa nteñu‑ó, sáva kune̱ꞌyá yuꞌuꞌ ráa jie̱ꞌe̱ꞌ ya̱ íñɨ́ núne‑ó nu̱u̱nꞌ ñujiínꞌ sáꞌá rá ñɨvɨ Israel, chi yɨ́ꞌɨ́‑ó nu̱u̱nꞌ Cristo Jesús. Sáꞌá ráa suꞌva sáva nanukú ráa ya̱ sikúnkuvi‑ó ñujiínꞌ vá jee nuvi tuku‑ó musúꞌ ya̱ kɨꞌɨ‑ó chi̱ji xi̱ntíín ñujiínꞌ vá.

Gálatas 2:4 ပူးပေါင်းရင်းမြစ်များ

Lucas 5:38

Saáva va̱ꞌa ka̱ꞌ chuꞌun ráa nixiꞌ uva jiáá iniꞌ ñɨɨn xlaúꞌ jiáá, sáva ni ɨɨn ni inka ráa ntu kɨ̱naanꞌ.

Hechos 15:1

Kéꞌín rá te̱e va̱ji ne̱ Judea jee ntiaaꞌ ráa Antioquía. Jee xínéꞌénꞌ ráa rá ñaniꞌ kúneí iniꞌ Jesús ya̱: “Nsáꞌ nánitáꞌvíꞌ rán, ré ntu sáꞌá circuncidar rán maárán sánikua̱ꞌ ñujiínꞌ njiáꞌa nu̱u̱nꞌ Moisés ñakɨnꞌ re̱ꞌ.”

Hechos 15:24

’Nteso̱ꞌo ránꞌ ya̱ sava rá táꞌán ráníꞌ nkene ráa nteñu ránuꞌuꞌ kua̱ne̱ꞌyá ráa ránoꞌó jee nxtaña̱ꞌán ráa ránoꞌó jín tu̱ꞌun ráa, jee nku̱naanꞌ rán nsa̱ꞌá ráa. Soo ntu̱náꞌ tiñu njia̱ꞌa ráníꞌ nu̱u̱nꞌ ráa.

Hechos 20:30

Jee ne̱ nteñu rán koo rá te̱e ya̱ kijiéꞌé xinéꞌénꞌ ráa tu̱ꞌun xínáꞌví nu̱u̱nꞌ Tu̱ꞌun Ndiosíꞌ nu̱u̱nꞌ rá ñɨvɨ níta ñujiínꞌ Jesús sáva tɨɨn rává tu̱ꞌun xínéꞌénꞌ ráa sáva kunikɨnꞌ rává ráa.

Romanos 8:15

Chi nsáꞌ nníꞌinꞌ rán ɨɨn ta̱chi̱ꞌ ya̱ sáꞌá‑a ya̱ kuvi tuku rán kuéntáꞌ musúꞌ kéꞌen ñɨvɨ ya̱ yɨ́ꞌɨ́ rán xi̱ntíín nu̱u̱nꞌ chuyúꞌví iniꞌ rán. Chisaꞌ nni̱ꞌi̱nꞌ rán Ta̱chi̱ꞌ Ííꞌ ya̱ nákeꞌen re̱ꞌ yó nuvi‑ó se̱ꞌya Ndiosíꞌ. Jee Ta̱chi̱ꞌ Ííꞌ yaꞌá sáꞌá ya̱ káchíꞌ‑ó nu̱u̱nꞌ Ndiosíꞌ: “¡Tááꞌ ni̱ꞌ!”

2 Corintios 11:13

Chi rá te̱e vá jee kátúꞌún ráa ya̱ níso ráa tiñu apóstol, soo ntu̱ví. Tiñu xínáꞌví sáꞌá ráa. Sáꞌá ráa nika̱ꞌ maáráa ya̱ kúvi ráa apóstol ya̱ chúichi Cristo.

2 Corintios 11:17

Soo sáá káꞌánꞌ ni̱ꞌ suꞌva, jee ntu káꞌánꞌ ni̱ꞌ sáni nkaꞌanꞌ I̱toꞌoꞌ‑ó. Chisaꞌ kuéntáꞌ káꞌánꞌ naanꞌ ni̱ꞌ, sáá kúneí iniꞌ ni̱ꞌ ya̱ kaꞌanꞌ téyɨ́ɨ́ iniꞌ ni̱ꞌ.

2 Corintios 11:20

Chi yɨ́netuꞌ rán jiéꞌnéꞌ iniꞌ rán nu̱u̱nꞌ ráa retú néni ɨɨn ñɨvɨ chíꞌi‑i ránoꞌó xi̱ntíín‑i kuéntáꞌ musúꞌ saɨn kéꞌen ñɨvɨ, retú néni ɨɨn ñɨvɨ xínɨ́ꞌɨ‑ɨ ránoꞌó jín nantíñú rán, retú néni ɨɨn ñɨvɨ nééꞌ nu̱u̱nꞌ‑u ránoꞌó jie̱ꞌe̱ꞌ rá nantíñú rán, retú néni ɨɨn ñɨvɨ sáꞌá ñáꞌnú‑u maáa, retú néni ɨɨn ñɨvɨ kátúꞌ‑u nu̱u̱nꞌ rán.

2 Corintios 11:26

Kue̱ꞌe̱ꞌ íchí ña̱ꞌa̱nꞌ ni̱ꞌ kue̱ꞌe̱ꞌ nu̱u̱nꞌ. Jee ntaꞌanꞌ ni̱ꞌ tu̱nóꞌó nu̱u̱nꞌ rá ntekáꞌnú. Ntaꞌanꞌ ni̱ꞌ tu̱nóꞌó nu̱u̱nꞌ rá ñɨvɨ kuíꞌná. Ntaꞌanꞌ ni̱ꞌ tu̱nóꞌó nu̱u̱nꞌ rá ñɨvɨ táꞌán ñuunꞌ ni̱ꞌ. Ntaꞌanꞌ ni̱ꞌ tu̱nóꞌó nu̱u̱nꞌ rá ñɨvɨ ntu kúvi Israel. Ntaꞌanꞌ ni̱ꞌ tu̱nóꞌó nu̱u̱nꞌ rá ñuunꞌ. Ntaꞌanꞌ ni̱ꞌ tu̱nóꞌó nu̱u̱nꞌ ñu̱ꞌún saɨn. Ntaꞌanꞌ ni̱ꞌ tu̱nóꞌó nu̱u̱nꞌ nteñúꞌún. Ntaꞌanꞌ ni̱ꞌ tu̱nóꞌó nteñu rá ñɨvɨ ya̱ káchíꞌ nika̱ꞌ ya̱ kúvi ñanitáꞌán‑ó.

2 Corintios 3:17

Chi I̱toꞌoꞌ vá ví Ta̱chi̱ꞌ Ííꞌ. Jee nu̱u̱nꞌ íyó Ta̱chi̱ꞌ Ííꞌ I̱toꞌoꞌ‑ó iniꞌ ánímaꞌ ñɨvɨ, jee nákuíñɨꞌ núne ñɨvɨ vá nu̱u̱nꞌ xi̱ntíín ley vá.

Gálatas 1:7

Soo ntu̱ví inka tu̱ꞌun váꞌa ya̱ síkáku‑u yó, naní evangelio. Chisaꞌ kua̱chi íyó ya̱ sava ñɨvɨ stáña̱ꞌán ránoꞌó, jee kuíni ráa sama ráa tu̱ꞌun váꞌa jie̱ꞌe̱ꞌ Cristo.

Gálatas 4:25

Chi Agar kúvi kuéntáꞌ yuku Sinaí ya̱ íñɨ́ nu̱u̱nꞌ ñuꞌun Arabia. Jee suni kúvi ña kuéntáꞌ ñuunꞌ Jerusalén ya̱ íyó‑o vitan. Chi rá se̱ꞌya ñuunꞌ vá kúvi ráa musúꞌ sátíñú saɨn ya̱ yɨ́ꞌɨ́ ráa chi̱ji xi̱ntíín tu̱ꞌun ley vá ya̱ nta̱túníꞌ Ndiosíꞌ.

Gálatas 4:3

Jee suni sukuán nnoꞌo‑ó ne̱ ntiáꞌan kuniꞌ‑ó Jesús, jee nkuvi‑ó kuéntáꞌ ɨɨn te̱e lúlí, chi nyɨ̱ꞌɨ‑ó chi̱ji xi̱ntíín rá ñujiínꞌ sáꞌá ka̱ꞌá ñɨvɨ ñɨ̱vɨ́, kuéntáꞌ ɨɨn musúꞌ kéꞌen ñɨvɨ nkuvi‑ó.

Gálatas 5:1

Nna̱kani núne Cristo yó, sáva kuiñɨ núne yó. Saáva kuiñɨ ni̱ꞌin núne rán nu̱u̱nꞌ tu̱ꞌun ley vá ya̱ nta̱túníꞌ Ndiosíꞌ. Jee koto kíninkava tuku rán xi̱ntíín tu̱ꞌun vá ya̱ kuvi tuku rán musúꞌ sátíñú saɨn.

Gálatas 5:10

Ne̱ yuchí kúkáꞌnú iniꞌ ni̱ꞌ ránoꞌó ya̱ nkáni sɨ́ɨ́n iniꞌ rán nu̱u̱nꞌ tu̱ꞌun yaꞌá, chi yɨ́ꞌɨ́ rán nu̱u̱nꞌ I̱toꞌoꞌ‑ó. Soo ñɨvɨ ya̱ sísákáꞌ ráa xi̱ni̱ꞌ rán, Ndiosíꞌ xinóꞌo maa, néni ɨɨn te̱e kúvi‑i.

2 Timoteo 3:6

Chi sava rá ñɨvɨ vá kíní ráa maáráa iniꞌ rá veꞌi, jee kúneí ráa jín rá ñaꞌan níjin, chi ya níso víꞌí ráña kua̱chi, chi túꞌva ráña kéꞌín ya̱ níyo víꞌí iniꞌ ráña.

Santiago 1:25

Soo ɨɨn ñɨvɨ chúꞌun iniꞌ‑i tu̱ꞌun ley na̱a̱ꞌ Jesús, ya̱ sáꞌá‑a ya̱ nakui̱ñɨ̱ꞌ núne‑ó nkɨ́ꞌɨ‑ó nu̱u̱nꞌ kua̱chi‑ó, jee nákuíñɨꞌ ni̱ꞌin‑i, jee nsáꞌ kua̱chi tésóꞌo‑o tu̱ꞌun vá, jee nsáꞌ náánꞌ iniꞌ‑i tu̱ꞌun vá, chisaꞌ sáꞌá‑a ya̱ káchíꞌ tu̱ꞌun vá, saájee na̱ ka̱ꞌ netuꞌ ka̱ꞌ kúvi ñɨvɨ vá jín ya̱ sáꞌá‑a.

1 Pedro 2:16

Nna̱kani núne Cristo ránoꞌó nu̱u̱nꞌ xinóꞌo Ndiosíꞌ ránoꞌó jie̱ꞌe̱ꞌ kua̱chi rán, saáva kueꞌnu na̱a̱ꞌ rán jee koto jiátíñú rán ya̱ íñɨ́ núne rán sáva tee rán nanísi̱kɨ̱ꞌ saꞌá rán ya̱ niváꞌa, chisaꞌ kueꞌnu rán sáni íyó kueꞌnu rá musúꞌ Ndiosíꞌ ya̱ yɨ́ꞌɨ́ rán xi̱ntíín re̱ꞌ.

2 Pedro 2:19

Chísóyuꞌú ráa ya̱ kuiñɨ núne rá ñɨvɨ ya̱ kuvi saꞌá rá ñɨvɨ vá néni ɨɨn tiñu ya̱ kúvi iniꞌ maá rá ñɨvɨ vá, soo maáráa chi kúvi ráa musúꞌ ya̱ yɨ́ꞌɨ́ ráa xi̱ntíín ya̱ níyo néꞌí iniꞌ ráa. Chi kúvi ñɨvɨ musúꞌ ya̱ yɨ́ꞌɨ́‑ɨ xi̱ntíín ne̱ ni ɨɨn ya̱ kúneí vá jín‑i.

1 Juan 4:1

Ránoꞌó ya̱ ñúnúunꞌ ni̱ꞌ, koto jínúꞌ iniꞌ rán nta̱ká rá ñɨvɨ ya̱ káchíꞌ ráa ya̱ káꞌánꞌ ráa tu̱ꞌun ya̱ njia̱ꞌa Ta̱chi̱ꞌ Ííꞌ sákachiꞌ ráa. Chisaꞌ kototúníꞌ rán ráa sáva nanukútúꞌun rán retú ta̱chi̱ꞌ njia̱ꞌa rá tu̱ꞌun káꞌánꞌ ráa kúvi Ta̱chi̱ꞌ Ííꞌ ya̱ va̱ji ne̱ nu̱u̱nꞌ Ndiosíꞌ áxí ntu̱ví. Chi kue̱ꞌe̱ꞌ víꞌí ñɨvɨ jíkanuun ñɨ̱vɨ́ yaꞌá káꞌánꞌ ráa tuntúꞌún, ya̱ kátúꞌún ráa nika̱ꞌ ya̱ kúvi ráa ñɨvɨ ya̱ nákani ráa tu̱ꞌun kéne yuꞌú Ndiosíꞌ.

Judas 1:4

Chi vitan jee sava rá ñɨvɨ ya̱ káchíꞌ ráa ya̱ níkɨ́nꞌ ráa Cristo soo nxi̱náꞌví ráa ránoꞌó, jee nki̱vɨ ráa nteñu rán jee yɨ́ꞌɨ́ ráa jín rán. Jee rá ñɨvɨ vá jee ne̱ yanaꞌán víꞌí nkachiꞌ tu̱ꞌun nééꞌ nu̱u̱nꞌ ɨɨn tutuꞌ, ya̱ saá váji ráa ya̱ sijíta re̱ꞌ ráa. Chi ntu sáꞌá ñáꞌnú ráa nu̱u̱nꞌ Ndiosíꞌ. Jee sɨ́ɨ́n násaꞌá ráa Tu̱ꞌun Ndiosíꞌ, chi káchíꞌ ráa ya̱ jie̱ꞌe̱ꞌ ya̱ íyó mániꞌ iniꞌ Ndiosíꞌ‑ó néꞌyá re̱ꞌ yó, jee ntu nákeꞌen ráa maáráa ya̱ néꞌí jiáꞌnu ráa. Jee ne̱ kúíchi iniꞌ ráa Ndiosíꞌ, ya̱ métúꞌún maáréꞌ kúñáꞌnú nu̱u̱nꞌ‑ó jín I̱toꞌoꞌ‑ó Jesús, ya̱ kúvi re̱ꞌ Cristo ya̱ ñani Ndiosíꞌ tátúníꞌ re̱ꞌ nu̱u̱nꞌ nɨꞌɨ.