Efesios 2:20 - Mixteco del suroeste de Tlaxiaco Oaxaca

²⁰ Chi nsa̱ꞌá Ndiosíꞌ ya̱ maáórán kúvi‑ó kuéntáꞌ veꞌi ya̱ yósóꞌ nu̱u̱nꞌ koo jie̱ꞌe̱ꞌ ve̱ꞌí. Jee koo jie̱ꞌe̱ꞌ ve̱ꞌí vá kúvi Tu̱ꞌun Ndiosíꞌ ya̱ nste̱kútu̱ꞌún rá te̱e níso tiñu apóstol, ya̱ nchu̱ichí re̱ꞌ sáva stúvi ráa tu̱ꞌun re̱ꞌ, jín rá te̱e nna̱kani ráa tu̱ꞌun nkene yuꞌú re̱ꞌ. Jee máá Cristo Jesús kúvi kuéntáꞌ yu̱u̱ꞌ maá ñáꞌnú ka̱ꞌ ya̱ yɨ́tuvi skináꞌ veꞌi vá.

Efesios 2:20 ပူးပေါင်းရင်းမြစ်များ

Mateo 16:18

Jee nuꞌuꞌ káchíꞌ ni̱ꞌ nu̱u̱nꞌ nú, ya̱ noꞌó kúvi Pedro. Jee [tu̱ꞌun na̱a̱ꞌ vá ya̱ nkachiꞌ nú], yaꞌá kúvi máá kava káꞌnú nu̱u̱nꞌ samaꞌ ni̱ꞌ veñu̱ꞌun ni̱ꞌ, ya̱ kúvi rá ñɨvɨ kúneí iniꞌ ráa nuꞌuꞌ. Jee nu̱u̱nꞌ íyó rá ánímaꞌ rá ñɨvɨ níꞌiꞌ ntu̱náꞌ kuneí‑i jín rá ñɨvɨ kúneí iniꞌ ráa nuꞌuꞌ.

Mateo 21:42

Jee nkachiꞌ Jesús nu̱u̱nꞌ ráa: ―¿Á ni ntiáné kaꞌvi rán Tutuꞌ níso Tu̱ꞌun Ndiosíꞌ?: Yu̱u̱ꞌ ya̱ nkuniichiꞌ rá te̱e jiáni veꞌi, jee yu̱u̱ꞌ vá nkenta nkuvi máá yu̱u̱ꞌ ñáꞌnú ka̱ꞌ íyótiñu, ya̱ káá skináꞌ veꞌi jín ya̱ jiáꞌa kuꞌvaꞌ nu̱u̱nꞌ sámáꞌ veꞌi. Maá I̱toꞌoꞌ‑ó Ndiosíꞌ nsa̱ꞌá maa, jee tívɨ́ xíniꞌ‑ó néꞌyá‑ó maa jín nchinúún‑ó, káchíꞌ nu̱u̱nꞌ Tutuꞌ Ííꞌ jie̱ꞌe̱ꞌ maáréꞌ.

1 Corintios 12:28

Jee saáva nteñu rá ñɨvɨ yɨ́ꞌɨ́ xi̱ntíín Cristo jee xíꞌna ka̱ꞌ ñani Ndiosíꞌ sava rá te̱e kuniso ráa tiñu apóstol chúichí Cristo ráa stúvi ráa ya̱ nááꞌ jie̱ꞌe̱ꞌ Cristo. Jee ya̱ uvíꞌ, jee ñani re̱ꞌ sava rá ñɨvɨ kuniso ráa tiñu ya̱ nakani ráa rá tu̱ꞌun kéne yuꞌú maáréꞌ. Jee ya̱ uníꞌ, jee ñani re̱ꞌ sava rá ñɨvɨ ya̱ xínéꞌénꞌ ráa tu̱ꞌun váꞌa re̱ꞌ nu̱u̱nꞌ rá ñɨvɨ. Jee kuíre ñani re̱ꞌ sava ñɨvɨ ya̱ sáꞌá rá tiñu a̱nasɨ́ jín fuersáꞌ ííꞌ Ndiosíꞌ. Jee kuíre njia̱ꞌa re̱ꞌ ta̱ꞌvi̱ꞌ nu̱u̱nꞌ sava rá ñɨvɨ sáva xínúvi ráa rá ñɨvɨ kúꞌvíꞌ, jee njia̱ꞌa re̱ꞌ ta̱ꞌvi̱ꞌ nu̱u̱nꞌ sava rá ñɨvɨ sáva chíneí ráa rá ñanitáꞌán ráa, jee njia̱ꞌa re̱ꞌ ta̱ꞌvi̱ꞌ nu̱u̱nꞌ sava rá ñɨvɨ sáva kuneen kuéntáꞌ rá ñɨvɨ ya̱ jínúꞌ iniꞌ ráa Cristo, jee njia̱ꞌa re̱ꞌ ta̱ꞌvi̱ꞌ nu̱u̱nꞌ sava rá ñɨvɨ sáva kúvi káꞌánꞌ ráa inka ka̱ꞌ nu̱u̱nꞌ rá tu̱ꞌun káꞌánꞌ ya̱ ntu jiáku̱ꞌun iniꞌ ráa.

Gálatas 2:9

Jee jíníꞌ rá ñɨvɨ ya̱ Jacobo, Pedro, jín Juan ví rá te̱e kúñáꞌnú nu̱u̱nꞌ rá ñɨvɨ ya̱ kúneí iniꞌ ráa Jesús. Jee ni núníꞌ ráa nsa̱ꞌá kuéntáꞌ ya̱ ntaji Ndiosíꞌ tiñu vá nu̱u̱nꞌ ni̱ꞌ jee chíneí chítuvi re̱ꞌ nuꞌuꞌ. Jee ntɨɨn ráa naꞌá ni̱ꞌ jín Bernabé, jie̱ꞌe̱ꞌ nkuva̱ꞌa iniꞌ ráa nne̱ꞌyá ráa ránuꞌuꞌ. Nsa̱ꞌá ráa suꞌva sáva stúvi ráa ya̱ kúnuún iniꞌ nta̱ká ránꞌ ya̱ kɨ̱satíñú ni̱ꞌ jín Bernabé nteñu rá ñɨvɨ inka nación, jee kɨ̱satíñú ráa nteñu rá ñɨvɨ ya̱ kúvi ichiyúkúnꞌ Israel.

Efesios 3:5

Jee tiempúꞌ yanaꞌán jee ni ntu nstúvi Ndiosíꞌ maa nu̱u̱nꞌ rá ñɨvɨ, kua̱ꞌ nstúvi kájí Ta̱chi̱ꞌ Ííꞌ re̱ꞌ maa vitan nu̱u̱nꞌ rá te̱e re̱ꞌ ya̱ níso tiñu apóstol jín nu̱u̱nꞌ rá te̱e nákani tu̱ꞌun kéne yuꞌú re̱ꞌ, rá nsa̱ꞌá sɨ́ɨ́n re̱ꞌ sáva kɨtíñú ráa nu̱u̱nꞌ re̱ꞌ.

Colosenses 2:7

Jee kaka rán suꞌva jie̱ꞌe̱ꞌ kukutú rán kuiñɨ rán jín re̱ꞌ, kuéntáꞌ kúun ɨɨn yoꞌo yutun, jee kujia iniꞌ rán ya̱ kúneí iniꞌ rán re̱ꞌ, jee kuiñɨ ni̱ꞌin rán ya̱ kúneí iniꞌ rán re̱ꞌ, sánikua̱ꞌ nku̱tu̱ꞌva rán. Jee saꞌ víꞌí káꞌ ku̱ꞌva rán ya̱ kútaꞌviꞌ rán nu̱u̱nꞌ Ndiosíꞌ.

1 Pedro 2:6

Chi níso nu̱u̱nꞌ Tutuꞌ Ííꞌ káchíꞌ Ndiosíꞌ [jie̱ꞌe̱ꞌ Jesús]: Kani ni̱ꞌ nu̱u̱nꞌ Sión ɨɨn yu̱u̱ꞌ maa ñáꞌnú nasɨ́kuitɨꞌ ka̱ꞌ ya̱ jiáꞌa ku̱ꞌva, ya̱ nka̱ji ni̱ꞌ maa jee yɨ́yáꞌvi víꞌí‑i, jee ñɨvɨ ya̱ kúneí iniꞌ‑i ínúꞌ iniꞌ‑i re̱ꞌ, jee nsáꞌ koo tu̱nkánuun‑u.

Apoclipsis 21:14

Jee nu̱u̱nꞌ nsamaꞌ ti̱yu̱ꞌ yuꞌú ñuunꞌ vá, jee jie̱ꞌe̱ꞌ nu̱u̱nꞌ nsamaꞌ vá yɨ́ꞌɨ́ u̱xu̱ꞌ u̱vi̱ꞌ (12) yu̱u̱ꞌ máá náꞌnú víꞌí yósóꞌ táꞌán. Jee nu̱u̱nꞌ yu̱u̱ꞌ náꞌnú vá nééꞌ súví rá ni uxúꞌ u̱vi̱ꞌ (12) rá apóstol nchu̱ichí maáréꞌ ya̱ kúvi re̱ꞌ Lanchi Lúlí Ndiosíꞌ.